Үз, сонс, амьдар 2-р ном Бурханы хүчирхэг эрс

Удиртгал

Таны энэ өдрийн амар амгаланг айлтгаж байна. Та цорын ганц, жинхэнэ Бурханыг мэдэх үү? Тэгвэл Түүнийг мэддэг байсан хүмүүсийн талаар танд ярьж өгье. Та үүнийг сонсонгоо улбар шар хавтастай буюу 2-р номны зурагнуудыг хамт үзнэ үү. Дохио дуугарах бүрд дараагийн зураг руугаа ороорой.

Зураг 1: Ах дүү 2

Эхлэл 25:21-34, 27:1-23

Энэ түүх Библийн Эхлэл номын 25:21-34 ба 27:1-23-р ишлэлүүд дээр байгаа тул та Библиэсээ уншиж бас болноо.
Энд ах дүү 2 хоорондоо наймаалцаж байгаа зураглал харагдаж байна. Ахыг нь Есав гэдэг ба тэрээр гарамгай анчин байв.
Нэг удаа дүү Иаков нь амттай хоол хийжээ. Гэхдээ ах Есавдаа өгөхийг хүссэнгүй. Тэгээд Иаков ахдаа: “Ууган хүү байх эрхээ надад худалд” гэв. Учир нь тэрээр зөвхөн ууган хүү нь л өвлөх эрхтэй гэр бүлийн өв хөрөнгөө авахыг хүсчээ. Харин Есавд тэр бүх зүйл огт сонин байсангүй, зөвхөн хоосон ходоодоо л дүүргэх нь чухал санагдсан тул хоолны төлөө ууган хүү байх эрхээ худалдчихав.
Иаков гэдэг нэр “Мэхлэгч” гэсэн утгатай бөгөөд Иаков өөрөө төрөлхийн бусдыг хуурч явдаг, тэр бүү хэл өөрийн төрсөн эцгээ ч мэхэлсэн нэгэн юм.

Зураг 2: Иаковын зүүд

Эхлэл 28:10-22

Хэрвээ танд Библи байгаа бол та Эхлэл номын 28-р бүлэг 10-22-р ишлэлийг уншаарай.
Ах Есав дүү Иаковоо ихээр үзэн ядаж, тэр бүү хэл алахыг завдсан тул Иаков төрсөн гэрээ орхин зугтахаас өөр аргагүй болов.
Зурган дээр Иаков зүүдэлж буй тухай дүрсэлсэн байна. Зүүдэндээ тэрээр Тэнгэрт буй Бурхан Эзнийг болон Түүний тэнгэр элч нар дэлхий дээр буун ирж байгааг олж үзлээ. Бурхан Иаковд: “Би чамд болон чиний үр хүүхдүүдэд энэ газар нутгийг өвлүүлэн өгөх болно. Дэлхийн бүх үндэстэн чамаар дамжуулан ерөөл хүртэнэ. Хаана ч явсан Би чамтай хамт байх болно” хэмээжээ.
Иаковыг мэхлэгч гэдгийг Бурхан мэдэж байсан ч түүнийг хайрлан, өөрчлөхийг хүсэж байлаа. Тийм ч учраас Бурхан түүнд эдгээр гайхамшигт амлалтуудыг соёрхсон ажгуу.

Зураг 3: Иаков, Лабан 2

Эхлэл 29:1 - 31:55

Иаков хүмүүсийг үргэлжлүүлэн хуурч мэхэлсээр байсан ба өөрөө ч бас бусдад мэхлүүлдэг байв. Иаков нагац ах Лабаныхаа бага охин Рахелд дурлаж, түүнтэй гэрлэхийн тулд нагац ах Лабандаа зарцлагдах болов. Иймээс Иаков Рахелын төлөө 7 жил зарцлагджээ. Харин Лабан Иаковыг мэхэлж, бага охиноо бус харин том охин Леагаа түүнтэй гэрлүүлчихэв. Тэгээд Иаков Рахелтай гэр бүл болохын тулд дахин 7 жил ажиллалаа. Эцэст нь Иаков нагац ах Лабаныгаа залилж түүний хонин сүрэгнээс хамгийн тарга хүчтэйг нь шилж авав. Нэг өдөр Бурхан Иаковд: “Эцэг өвгөдийнхөө нутаг руу эргэн ир” гэлээ.

Зураг 4: Иаков Брхантай уулзсан нь

Эхлэл 32:1-32

Иаков төрсөн гэртээ эргэж очихыг ихээр хүсэмжилж байсан боловч ах Есаваасаа айж байлаа. Учир нь бусдыг мэхлэгч хүн бүр өшөө хорслын айдас хүйдэс дотор амьдардаг нь жам билээ. Орой төрсөн нутаг руугаа харих замд нэгэн хүн Иаков дээр ирж, түүнтэй шөнөжин барилдав. Тэгээд үүр цайх үеэр тэр хүн Иаковын түнхийг мулталчихав. Харин Иаков тэр хүн Бурханаас ирснийг мэдсэн тул Түүнтэй барилдахаа зогсоож: “Намайг ерөөхөөс нааш Таныг би явуулахгүй” гэжээ. Нөгөө хүн хариуд нь: “Чамайг үүнээс хойш Иаков гэж дуудахгүй, харин Израиль хэмээх болно” гэлээ. Израиль гэдэг нь “Бурхантай тэмцэлдсэн хан хүү” гэсэн утгатай юмсанж.
Бурхан Иаковыг ханхүү болгон өөрчлөхийн тулд түүнийг эхлээд сул дорой мэхлэгч байхыг зөвшөөрсөн ажээ. Израиль гэр бүлийнхэн рүүгээ амар тайван буцав. Тэрээр Бурханыг хүндэтгэдэг агуу үндэстний өвөг эцэг нь болсон юм.
Ах дүү нар аа, бид бусдыг хуурч мэхлэнэ гэдэг Бурханы эсрэг тэмцэж байна гэсэн үг. Харин Бурхан биднийг ч бас өөрчлөхийн тулд нэгэн Хүнийг илгээсэн бөгөөд Түүнийг Эзэн Есүс Христ гэдэг билээ.

Зураг 5: Иосефын зүүд

Эхлэл 37:1-11

Бурханаар нэрээ Израиль хэмээн солиулсан Иаков нь 12 хүүтэй байснаас тэрээр хүү Иосефоо илүү хайрладаг байлаа. Иаков хүү Иосефдоо тансаг дээл хийж өгсөнд ах нар нь түүнд атаархах болов. Нэг үдэш Иосеф зүүд зүүдэлж, тэрнийгээ ах нартаа ярив: “Миний зүүдийг сонсоцгооно уу? Бид нар бүгдээрээ тариан талбайд сүрэл боож байх юм. Гэтэл та нарын боосон сүрэлүүд миний сүрлийг тойроод түүнд мөргөцгөөв” гэв. Үүнийг сонссон ах нар нь: “Бид бүгд чамд мөргөнө гэж үү?” хэмээн ихэд хилэгнэцгээв. Тэд Иосефыг улам ихээр үзэн ядах болж, түүнийг хөнөөх цаг боломжийг хайж эхэллээ.

Зураг 6: Иосефыг худалдсан нь

Эхлэл 37:12-36

Иосефын ах нар гэрээсээ алс хол газар хонио хариулцгааж байсан тул Иаков хүү Иосефдоо: “Явж ах нар чинь болон хонин сүрэг нь эсэн мэнд байгааг мэдээд ир” гэлээ. Харин ах нар нь Иосефыг ирж явааг хараад түүнийг алахаар хуйвалдацгаав. Тэд Иосефын тансаг дээлийг нь булааж аваад, усгүй худганд хийчихжээ. Ах нарынх нь нэг нь: “Бид өөрсдийн дүүгээ алж яах юм бэ? Харин түүнийг боол болгоод зарчихая” гэж бусаддаа хэлэв. Яг тэр үед хэсэг худалдаачид ирж явсан тул ах нар нь Иосефыг тэдэнд 20 мөнгөн зоосоор худалдаж гэнэ. Дараа нь тэд Иосефын тансаг дээлийг нь ямааны цусанд дүрээд эцэгтээ илгээжээ. Эцэг Иаков нь хүү Иосефоо хээрийн зэрлэг араатанд бариулж хэмээн бодож асар их уй гашууд автав.

Зураг 7: Иосеф ба хорон санаат эм

Эхлэл 39:1-20

Худалдаачид Египет оронд ирж Иосефыг Потифар гэгч эрд боол болгон худалдав. Бурхан Иосефтой хамт байсан тул тэр хийсэн ажил бүрдээ амжилт олж байлаа. Удалгүй тэрээр Потифарын гэрийн даамлаар томилогдов. Иосеф сайхан залуу байсан тул Потифарын эхнэр түүнийг хүсэн мөрөөдөх болж Иосефоос өөртэй нь унтахыг шаардах болжээ. Харин Иосеф үүнийг бусармаг, буруу зүйл гээд түүнээс зугтаасанд Потифарын эхнэр Иосефын хувцсыг зулгаан авч үлдэв. Тэгээд эхнэр нь хувцсыг нь барьсаар нөхөр Потифар дээрээ очиж өөрийг нь хүчирхийлэхийг завдсан гэж мэдүүлсэнд Потифар Иосефыг шоронд хийлгэв.

Зураг 8: Шоронд орсон Иосеф

Эхлэл 39:20 - 40:23

Шоронд хүртэл Бурхан Иосефтой хамт байсаар байв. Удалгүй Иосеф шоронгийн бүх хоригдлуудыг харгалзах боллоо. Тэр үед хааны ахлах сөнч, талхчин хоёр шоронд хоригдож байжээ. Нэг шөнө тэр хоёр хоёулаа зүүд зүүдлэв гэнэ. Иосеф тэдэнд: “Зүүдний тайлал нь Бурханд байдаг юм. Зүүдээ надад хэлцгээнэ үү” гэв. Ингээд ахлах сөнч нь Иосефт: “Зүүдэндээ би 3 мөчир бүхий усан үзмийн мод харлаа. Би тэр модноос усан үзмийг нь авч, хааны хундаганд шүүсийг нь хийгээд, хаанд өргөж байх юм” гэлээ. Зүүдний тайллыг Иосеф ингэж хэлжээ: “3 өдрийн дараа хаан чамайг суллахаар үл барам хуучин ажилд чинь тохоон томилох болно” хэмээв. Талхчин ч бас зүүдээ ярилаа. Гэхдээ түүний зүүдээр бол талхчин 3 хоногийн дотор цаазлуулах байв.
Иосефын тайлсан ёсоор зүүд биелэж ахлах сөнч суллагдан, харин талхчин цаазлагджээ. Харин Иосеф шорондоо дахин 2 жил суув.

Зураг 9: Хааны зүүд

Эхлэл 41:1-45

Египетийн хаан бас зүүд зүүдлэв гэнэ. Зүүдэндээ хаан 7 тарган сайхан үхэр голын хажууд зогсож байхыг үзэв. Бас гол дотроос 7 туранхай муухай үхэр гарч ирээд тэдгээр 7 тарган үхрээ идчихэж гэнэ. Хэн ч энэ зүүдийг тайлж чадахгүй байж байтал хааны ахлах сөнч Иосефыг санаж, эзэн хаандаа түүний тухай ярив. Ингээд хаан Иосефыг шоронгоос дуудан ирүүлж зүүдээ тайлууллаа. Иосеф: “Бурхан танд хийх гэж буй зүйлээ мэдүүлжээ. Египетэд ургац арвинтай 7 жил болох ба түүний дараа ган зудтай 7 жил болох гэж байна” хэмээлээ. Бурханы Сүнс Иосефтой хамт байгааг мэдсэн хаан түүнд бүх Египетийг захирах эрх мэдлийг өглөө.

Зураг 10: Иосеф Египетийг удирдсан нь

Эхлэл 41:47 - 42:28

Ургац арвинтай 7 жилд нь Иосеф хэмжээлшгүй их тариа будаа хураан нөөцөлсөн ажээ. Үүний дараа 7 жилийн ган зуд эхлэхэд Иосеф хураасан тариа будаанаасаа хүмүүст худалдаалж эхэллээ. Тэр үед Канаан нутагт ч бас өлсгөлөн ган болж байсан тул Иосефын 10 ах нь египетээс тариа, будаа худалдаж авахаар ирцгээв. Ах нар нь Иосефыг египетийг удирдаж байгаа гэдгийг мэдсэнгүй харин Иосеф тэднийг таньж байлаа. Гэвч тэрээр ах нарыгаа туршуулууд хэмээн зориуд буруутгаж, 3 өдөр шоронд хорьжээ.
Дараа нь Иосеф тэдэнд: “Та нар үнэнч шударга хүмүүс гэдгээ батлая гэвэл хамгийн бага дүүгээ над руу ирүүл” гээд ах дүү нараас нэгийг нь шоронд үлдээж, бусдад нь тариа будаа өгөөд гэр лүү нь буцаав.

Зураг 11: Иосеф ах нартаа өөрийгөө илчилсэн нь

Эхлэл 43:1 - 45:27

Иосефын ах нар нь египет рүү эргэж очихоос айж байсан ч тэдэнд дахин үр тариа хэрэгтэй байлаа. Тиймээс тэд хамгийн бага дүү Бениаминаа Иосеф дээр авчирав. Тэрээр ах дүү нартаа өөрийгөө хэлэхгүй байсаар л. Иосеф тэдэнд үр тариа өгсөн боловч шуудайнуудад нь бас үнэт эрдэнэ нууцаар хийчихэв. Үүнийхээ дараа ах нар луугаа зарцаа илгээн тэд нарыг хулгай хийлээ хэмээн зориуд гүтгэлээ. Гэтэл ах нар нь яг Иосеф зүүдэндээ харж байсан сүрэл адил өршөөл эрэн түүнд мөргөцгөөөж эхлэв. Иосеф ч удаан тэвчиж чадалгүй дүү Бениаминаа тэврэн авч: “би та нарын худалдсан дүү Иосеф чинь байна” хэмээн уйлав. Ах нар нь ч гэртээ харьж эцэгтээ Иосефыг амьд байгааг болон түүнийг бүх египетийн захирагч болсон гэдгийг дуулгалаа.

Зураг 12: Иаков, Иосеф 2 Египетэд уулзсан нь

Эхлэл 45:28 - 50:26

Хөгшин болсон Иаков эцэг нь гэр бүл, бүх эд хөрөнгөө аваад египетэд оршин суухаар нүүж ирлээ. Хүү Иосефтойгоо дахин уулзсандаа туйлаас их баярлаж байв. Иаков Иосефынхоо 2 хүү дээр гараа тавин, бүх овог аймгуудаас хамгийн агуу нь болохыг ерөөжээ. Иаков египетэд урт удаан амьдарсны эцэст нас нөгчлөө.
Энэ үед ах нар нь урьд үйлдсэн муу үйлээсээ болж маш их айж явсан боловч Иосеф тэдэнд: “Айх хэрэггүй ээ. Та нар миний эсрэг хуйвалдацгаасан боловч Бурхан үй олон хүмүүсийн амийг аврахын тулд энэ бүхнийг сайнаар эргүүлсэн юм” гэж хэлсэн ажээ.
Найзуудаа, тэнгэрт оршигч Тэр нь Иосефоос илүү агуу бөгөөд нэрийг нь Эзэн Есүс Христ гэдэг. Хорон муу хүмүүс Түүнийг алсан авч Бурхан энэхүү үйл явдлыг бидний төлөө сайнаар эргүүлсэн юм. Есүс үхлээс дахин амилсан. Бурхан бидний бусдын эсрэг хийж байсан муу зүйлс хийгээд бүх гэм нүглийг уучилж чадна.
Та биднийг мөнхйин үхлийн аймшигт шийтгэлээс аварч чадах цорын ганц Бурхан бол Есүс Христ билээ.

Удиртгал 2

Ард түмнээ боолчлолоос аварсан Мосе гэгч нэгэн эр байжээ. Мөн тэрээр хүн бүрийг муу ёрын сүнсний боолчлолоос чөлөөлж чадах Нэгэн рүү биднийг удирдан чиглүүлсэн билээ.
Та улбар шар хавтастай буюу 2-р номынхоо зургийг үзэнгээ үргэлжлүүлэн сонсоорой. Та энэ дохиог дуугарах бүрд дараачийн зураг руугаа шилжихээ мартуузай.

Зураг 13: Мосегийн хүүхэд нас

Египетээс гарсан нь 2:1-10

Мосе Израиль хүн байсан бөгөөд Иосефоос хойш 300 жилийн дараа египет нутагт мэндэлсэн билээ. Египетийн хаан Израильчуудад таагүй ханддаг байсан төдийгүй тэднийг хүчээр боолчилдог байлаа. Тэр бүү хэл хаан шинээр төрсөн бүх эрэгтэй хүүхдүүдийг устгаж байхыг эрх баригчдад тушаасан байв.
Ээж нь Мосег төрүүлээд 3 сар хүрмэгц нь олны нүднээс далдуур сагсанд хийж, голын зэгсэнд тавьлаа. Мосегийн эгч Мириан дүүгээ холоос харсаар л байлаа. Харин энэ үед египетийн хааны гүнж усанд орохоор гол дээр ирэхдээ сагсанд байгаа Мосег олжээ. Тэгээд гүнж Мосег өөртөө авахаар болж, түүнээс хойш тэрээр хааны ордонд Египет хүний адилаар өсөн торнилоо.

Зураг 14: Мосе дүрэлзэн асч буй бутыг харсан нь

Египетээс гарсан нь 2:11 - 4:17

Нэг удаа Мосе египет хүн израиль боолыг зодож байхыг хараад өөрийн хүндээ туслахын тулд өнөөх египетийг нь алчихаж гэнэ. Ингээд Мосе египетийн хааныхаас зугтаж, Синаин цөлд 40 жилийн турш амьдарсан юм. Нэгэн өдөр МОсе тун жигтэй зүйл үзэв. Юу гэвээс гал дүрэлзэн асч байгаа боловч үл шатах бут мод байх юм. Бурхан бутан дотроос Мосег дуудан, түүнд: “Миний ард түмэн хэрхэн зовж байгааг Би харлаа. Иймээс Өөрийн ард түмнээ египетээс чөлөөлөхийн тулд чамайг египетийн хаан руу илгээж байна” гэж айлдав.

Зураг 15: Мосе хаанд бараалхсан нь

Египетээс гарсан нь 3:11 - 10:29

Мосе эмээж байсан боловч Бурханд бүрэн найдсаар египет рүү буцан ирлээ. Ах Аарон нь түүнтэй цуг хаан дээр очоод: “Израилийн Бурхан ийн айлдаж байна. Миний хүмүүсийг явуул гэлээ” гэв. Хариуд нь хаан: “Би танай Бурханыг чинь мэдэх ч үгүй, израильчуудыг явуулах ч үгүй” хэмээн хатуурхав. Бурхан Мосед: “Аароныг таягаа аваад хааны өмнө хая гэж хэл. Тэр нь могой болох болно” хэмээн айлдлаа. Аарон хэлснээр нь хийж, египетийн хаан Бурханы хүч чадлыг харсан боловч ард түмнийг нь чөлөөлсөнгүй. Бурхан египетүүдийн эсрэг олон гайхамшгууд үйлдэж байв. Бурхан бүх усыг цус болгон хувиргасан учир хүмүүс уух усгүй боллоо. Түүгээр үл барам египетэд үй түмэн мэлхий, ялаа, голио, мөндөрийг илгээжээ. Амьтад нь үхэж, хүмүүс нь үхэж зовж байсан ч египетийн хаан израильчуудыг явуулсангүй.

Зураг 16: Хурган өргөл

Египетээс гарсан нь 12:1-36

Бурхан дахин Мосед: “Израильчуудад хэлтүгэй. Айл бүр өө сэвгүй хурга авч нядлаад цусыг нь хаалганыхаа хатавч болон тотгон дээр нь түрхтүгэй. Учир нь Би египетийн бүх нутгаар явж ууган төрөгсөдийн амийг авах болно. Харин тэр цус байгаа газрын дээгүүр нь өнгөрөх бөгөөд та нарыг гэмтээхгүй” гэж айлдлаа. Бурхан айлдсаныхаа дагуу бүгдийг үйлдэж, египетийн бүх ууган хөвгүүд алагджээ. Харин нэг ч израиль хүн үхсэнгүй гэнэ. Ингээд египетийн хаан Мосег дуудан ирүүлж: “Чи болон чиний ард түмэн миний нутгаас түргэн явсугай. Явж өөрсдийн Эзэн Бурхандаа мөргө” хэмээлээ.

Зураг 17: Тэнгисээр гаталсан нь

Египетээс гарсан нь 13:17 - 14:31

Мосе израилийн ард түмнээ удирдан египетээс гаргалаа. Бурхан тэдний өмнө үүлэн ба галан багана болоод явж байв. Харин египетүүд боолоо алдсандаа ихээр бухимдацгааж байв. Ингээд хаан бүх цэргээ дагуулан израильчуудын хойноос нэхэцгээлээ. Израильчууд гаталж үл барам их тэнгист тулж ирлээ. Египетүүүд яг ард нь ирэхэд израильчууд зугтах аргагүй боллоо. Мосе тэдэнд: “Бүү ай. Бурхан та нарын төлөө юу хийхийг харагтун” гэв. Тэгтэл Бурхан тэнгисийн дундуур зам гаргаж, израильчууд хуурай газраар явцгааж гэнэ. Египетийн цэргүүд хойноос нь нэхэн хөөсөн боловч тэнгисийн их ус буцан нийлж тэднийг хаман одлоо. Ингээд бүх египетүүд живж, израильчууд аврагдсан юм.

Зураг 18: Цөлд хооллосон нь

Египетээс гарсан нь 16:1 - 17:7

Мосе ард түмнээ дагуулсаар цөлд ирлээ. Хүмүүст идэх хоол хомс байсан тул Бурхан тэднийг хоол хүнсээр хангах боллоо. Өглөө бүр манна хэмээх талх газраар байх болжээ. Мөн үдэш болгон Бурхан тэдэнд сүрэг сүргээр нь идэх шувуу явуулж байлаа. Тэд уух усгүй болоход Бурхан Мосед: “Таягаа авч энэ хаданд ус гарахыг тушаа. Ингээд та нар устай болмой” хэмээн айлдлаа. 40 жилийн турш Бурхан цөлд израильчуудыг хоол хүнсээр хангав.

Зураг 19: Мосе Бурханы ууланд гарсан нь

Египетээс гарсан нь 19:1 - 20:21, 24:12-18, 34:1-10

Бүх Израиль Синаин ууланд ирэхэд үүл бүрхэн аянга цахилгаан цахилж, Бурхан уулнаа галаар буун ирлээ. Ингээд Тэрээр Мосед хандан: “Би чиний Бурхан Эзэн байна. Чи Надаас өөр бурхадтай байж болохгүй. Чи хуурамч шүтээнүүдэд мөргөх юм уу тэдэнд үйлчилж болохгүй. Чи өөрийн Бурхан Эзний нэрийг дэмий бүү дурд. Амралтын өдрийг ариунаар сахихын тулд санагтун. Эцэг эхээ хүндэл. Чи хүн бүү ал, бүү завхайр. Чи бүү хулгайл. Чи хөршийнхөө эсрэг худал бүү гэрчил. Чи бусдын юманд бүү шунахайр” гэсэн 10 хуулиа айлдлаа. Бурхан эдгээр хуулиудыг 2 чулуун хавтан дээр бичсэн бөгөөд Мосе тэднийг нь авч уулнаас буун, израилийн ард түмэнд авчирсан билээ.

Зураг 20: Модны орой дээрх могой

Тооллого 21:4 - Дэд Хууль 18:18

Хүмүүс Бурханы өгсөн хоолны талаар гомдоллон эсэргүүцсэнд Бурхан тэдний дунд хорт могойнуудыг тавьж шийтгэв. Олон хүмүүс могойд хатгуулан нас барж байсан тул ард түмэн Мосегоос тусламж гуйсанд Мосе тэдний төлөө зуучлан залбирлаа. Хариуд нь Бурхан Мосед: “Могой хийж, модны оройд тавь. Хатгуулсан хүмүүс түүн рүү хараад эдгэх болно” гэжээ.
Ингээд Мосе хүрлээр могой хийж, тэр могойг харсан болгон эдгэж байлаа. Мосе бол израилийн хамгийн агуу Бурханы эш үзүүлэгч байсан юм. Тэрээр цөлд 40 жил хүмүүсээ удирдан явсан бөгөөд насан эцэслэхийнх нь өмнө Бурхан түүнд: “Би израильчуудын дундаас чам шиг өөр нэгэн эш үзүүлэгчийг томилох ба тэр хүн Миний тушаасан бүхнийг ард түмэнд минь дамжуулан хэлэх болно” гэж айлджээ.

Зураг 21: Есүс хүмүүсийг хооллосон нь

Иохан 6:1-58

Олон олон жилийн турш Израилийн ард түмэн МОсетой ижил эш үзүүлэгч гарч ирэхийг хүлээж байлаа. Ингээд эцэст нь израильд Есүс Христ мэндэлжээ. Тэрээр МОсегийн адилаар хүмүүст Бурханы талаар сургаж байв. Хүмүүс Түүний сургаалыг сонсохын тулд цөлд ирцгээж байсан ажээ. Тэдгээр хүмүүс өлсөж эхэлцгээсэн боловч идэх хоол байсангүй. Харин нэгэн жаал хүүд 5 цагаан талх, 2 жижиг загас байж гэнээ. Есүс талх, загасыг авч Бурханд талархал өргөөд, тэр хоолоо бүх хүнд өглөө. Тэнд 5000 гаруй хүмүүс байсан бөгөөд тэд: “Энэ хүн гарцаагүй эш үзүүлэгч байна” гэцгээж байв. Харин Есүс хариуд нь: “Би бол Амийн Талх. Над руу ирэгч нь хэзээ ч өлсөхгүй. Надад итгэгч нь хэзээ ч цангахгүй юм” гэлээ.

Зураг 22: Есүс Мосетой ярилцсан нь

Лук 9:28-36

Мосе, Елиа нар хоёулаа Бурханы эш үзүүлэгчид байсан бөгөөд тэд Есүийг дэлхийд ирэхээс олон олон жилийн өмнө амьдарч байжээ.
Есүсийг уулан дээр залбирч байхад нүүрнийх нь төрх өөрчлөгдөж, хувцас нь цагаан өнгөтэй болж гялалзаж байлаа. Үзэгтүн, 2 хүн Түүнтэй ярилцаж байсан бөгөөд тэд Мосе, Елиа нар байв. Тэд цог жавхлантайгаар үзэгдэж, Иерусалимд гүйцээгдэх Түүний үхлийн тухай яриж байлаа.
Есүсийн 3 дагалдагч Түүний цог жавхлан хийгээд Түүнтэй хамт зогсох Мосе, Елиа нарыг ч бас харав. Удалгүй өтгөн үүл тэднийг бүрхэн авч үүлэн дотроос Бурхан: “Энэ бол Миний Хүү. Түүнийг сонсогтун” гэх дуу гарлаа. Үүний дараа Есүс ганцаараа зогсож байв.

Зураг 23: Есүс бидний төлөө алагдсан юм

Иохан 3:14-16

Израильчууд Есүсийг эсэргүүцэж, улмаар Түүнийг алав. Цэргүүд Түүнийг модон загалмай дээр хадаж, өөр 2 хүний хамт цовдоллоо. Тэр хоёр хүн бол алуурчин, дээрэмчид байсан бол харин Есүс Бурханы хуулиудыг хэзээ ч зөрчиж байгаагүй Нэгэн. Харин та бид нар тэдгээр хуулиудыг зөрчсөн учраас мөнхийн үхлийн шийтгэлийг хүртэх ёстой байв. Гэвч Бурхан хүмүүсийг хайрладаг учир бидний хэнийг нь ч мөнхийн үхлийн шийтгэлийг аваасай гэж хүсдэггүй. Иймээс л Тэрээр энэхүү шийтгэлийг зайлуулахын тулд Өөрийн Хүү Есүсийг илгээсэн билээ.
Мосегийн үед Израильчууд хурганы цусаар аврагдаж байсны адил Бурханы Хурга Есүс бидний төлөө өргөл болон алагдсан юм. Түүний цус бол бидний гэм нүглийн төлөөс. Есүсийг хүлээж авсан хүн болгон аврагдах болно. Мосе хүрэл могойг дээш өргөсний нэгэн адил Хүний Хүү Есүс Христ өргөмжлөгдөх бөгөөд Түүнд итгэгч бүхэн мөнхийн амийг авнаа.

Зураг 24: Тэнгэрт байгаа Есүс

Үйлс 1:6-11

Есүсийн биеийг хадан булшинд оршуулсан боловч 3 дахь өдрөө Тэрээр дахин амилсан төдийгүй олон хүн Түүнийг харж, Түүнтэй ярьжээ. 40 өдрийн дараа таны харж буй зурган дээр байгаан адилаар Тэрээр тэнгэр өөд өргөгдсөн бөгөөд Есүс одоо ч амьд хэвээр юм.
Мосе агуу удирдагч, Бурханы эш үзүүлэгч байсан бол Есүс Бурханы Хүү байлаа. Тэр Мосегоос илүү агуу билээ. Мосе израильчуудыг удирдан тэнгисээр гаталж, амь аврагдаж байсан бол Есүс Өөрийг нь дагадаг хүн нэг бүрийг аврахаар ирсэн юм. Нэг л өдөр Есүс тэнгэрт өргөгдсөний адил буцан ирж Өөрт нь итгэдэг бүх хүмүүсийг тэнгэр дэхь диваажин руу аваачих болно.
Ах дүү нараа, та Есүстэй хамт явахад бэлэн үү? Тэр өнөөдөр ч ирж магадгүй. Эзэн Есүс Христэд итгэгтүн. Тэгвэл та аврагдана.