Sa Nakwaan Da Amin Kan Nasubbutan Da Tagu

Sa Nakwaan Da Amin Kan Nasubbutan Da

Sa aweawe naippun kakkayu’tta andi ye bebbeleg. Naippun ayam atte annae lubong. Naippun os danum ak an-ayus atta wail kan da tawwang.

Yakon ak Apodios, kingwana da amine maila sigun atte piniona. Abuse kinumanna bakon intuppagoyna didae maawadda. Kanana, “Awadkae padda, wok anna padda” kanana bos, “Awadkayu we tawwang kan baybay, ya misinakae luta” Pun daguse nagwada.

Pune sadi kanana, “Tumubukayu we lumun, kayu kan amine mula” Pun tummubuda. Sana da kayu we makan kan adi makan bungada. Isuna bos atta matipoye kulbasa, apaya ya da amine mulae tumubu dumakol. Katti bos inon Apodios we nangwa’tta sissiwit, amine ugadiw, amine ayam ya da amine awad si luta, baybay kan lap-at ni luta.

Ak Apodios, siya bos nangwa kan ditaku we tagu. Yakon sa damu, abuse ossaane lalaki kingwana wok ningadanana’k Adam. Unipun pinasuyopna’k Adam ate ampagdote suyop. Masusuyop kad ak Adam, innalan Apodios osae tung-al ni butikna wok siya kingwana’k bubai. Pun innatod Apodios sanae bubai kan Adam ta katulungna bakon nu siya ambalin ak asawana. Eva nangngadan Adam kan siya.

Pune sadi, inniggan Apodios ak Adam si lugare ambalu we sa tummubuwan da amungae kayu. Kanana kan Adam, “Makwae kanom da bungan da amine kayu si anna malaksid andi ye tummubu si gaggawan ni imong. Adim kanon sanate bunga.” Yakon sin-algaw kad, ummoy ak satan si sanae ik-imonge nambalin ak ulog. Pun imbagana kan Eva we kabaluwan ak makan sanate miparite bunga. Pune sadi tinuttuwan Eva subsub satan. Kinanna bunga wok os Adam innatodna.

Unipun, dingngolda gingan Apodios atte ik-imong wok nantaluda te nakimutanda.

Kanan Apodios, “Adam, dinu igawnu?” Kanan Adam, “Nantaluwak te makimutak.” Kanan Apodios we nangimus, “Kinannu kamman bungae imparitku?” Kanan Adam, “Sa annae bubai ye innatodnu nangitod kan sakon wok kinanku.”

Kanan Apodios kan Eva, “Gapu ta adimpun tinuttuwa ugudku, ampakalamkae umanak ya sissiyae piom kan pasigka umapyu kan asawam.

Ak Adam kad, kanan Apodios kan siya, “Gapu ta adimpun sakon tinuttuwa, lumaweng luta ya ippun adu’k apitom te ippun adi tumubu we lasi kan da lumun. Masapule malingtanka pumangog ya asiyot awad ikatagum. Unikad natoyka ya nambalinka’k luta te siya nalpuwam.”

Pune sadi, pinalyaw Apodios da Adam kan Eva atte sadi ye ambalu we lugar te adipun agon makwae inggawda sidi. Napalyawda kad, ummoyda nangngit ak inggawanda kan mulaanda.

Kan ditaku we tagu, iissutau da Adam kan Eva. Aditakupun os tinuttuwa ugud Apodios. Adu da lawwenge kingwataku we adipun makaay-ayu kan siya. Madudusataku bos. Yakon ay-ayaton ditaku kan Apodios.
Sadi gapunae imbuun Apodios ak Jesus atte annae lubong, kingwana remedy ta mipaulitaku kan siya. Ak Jesus namukud si basultaku. Natoy yakon ummuli natagu. Kad gapu ta siya nadusa para’tta dusataku, adipun masapule ditaku anrigat ak inggana. Nu amatitaku ya antalgudtaku kan Jesus, awaton ditaku kan Apodios. Makwa makaugudtaku kan siya. Pun anggappiyataku si imbuunnak Jesus ak tumulung kan ditaku. Amatitaku kan siya ya tuttuwaontaku da ibagana.

Sa Nakwaan Da Amin Kan Nasubbutan Da Tagu

Sosomkonyu kan mipanggob kan ditaku we tagu. Mailayu kamman da kayu, tagudtud, ya da beleg? Kingwan Apodios dida. Mailayu kamman dab aka,luwang ya da udume danakkole ayam? Kingwan os Apodios dida. (pause) Ngamma inon da bolok, asu kan da manuk? Kingwan os Apodios dida. (Pause) Ngamma inon os da ambabalu we pulawol ya da mangngolyu we kantan di sissiwit? (Pause) kingwan os Apodios losan da anna. Siya tuttuwae Apodios we nangwa si langit kan luta ya da amine awad kan dida. (Pause) Ngamma inon da annae abenge an-ay-ayam ya da bibi ye mitayutayun atte inada? Ak Apodios os nangwa’tta tagu.

Da Adam kan Eva da ummunae tagu. Ambaluda. Ayatonda’k Apodios ya ayaton os Apodios dida. Angganas biyagda. Kanan Apodios, “Nu siya unudonyu’k satan, aaddi ye matoykayu.” Ak satan, siya pangat da lawwenge ispiritu.

Sin-algaw kad, nantultulli’k satan atta sanae layae kan bubai. Pun da Adam kan Eva, nan-awidanda’k Apodios wok siya unudonda’k satan. Adidapun tinuttuwa ugud Apodios. Pun dinnumtong kan dida da sakit kan da dandanag. Andadaulidae nangunud kan satan. Binagbagaan Apodios dida yakon makimutda.

Sasangngaan Apodios lawwenge makwa. Imbagan Apodios kan didae madusa basulda. Yakon inkarina bose ibuunna abengna si annae lubong ta siya matoy para’tta basulda. Ambalin ak tagu. Kade sadi lak-amona rigat kan katoy. Siya ambaline apugid para’tta lawwenge kingwada. Papolkasona kaanon da lawwenge awad atta pusuda. Kade sadi, makwa mipauli bumalu makabulbulunanda kan Apodios.

Amod de layad da Adam kan Eva si sadi ye ugud Apodios. Pionda kasin makabulbulun kan Apodios. Yakon igammun Apodios we aduadu we tawon malakpus ya asiyot abengna dumatong. Pionae paawanon da Adam ya da ganakna. Kananae namilin kan dida, “Makwa iyapugidyu ubbun ni karnero. Naippun kaboolan ni dalan ni karnero, yakon sanat angipaila kan dikayu si dalan ni abengku. Nu ilak dalan ni karnero, ikagasmokku abengku, ya pakawanok dikayu. Kad awad de ulnus kan dikayu.

Nalakpus kad aduadu we tawon, imbuun Apodios abengna si annae lubong. Ummali ye nambalin utting. Jesu Cristo ngadanna si dummakol. Innatodna long-agna’k matoy para’tta basul da amine tagu. Nagongat, kad sa annae nakwa binukudna dusataku. Yakon gapu ta Apodios, nipauli biyag kan siya wok kesan nipauli kan Apodios we amana. Sinsadi awad ad langit.

Natoy kad ak Jesus kanan Apodios, “Sa abengku nangwa si namingpingsan kan ummun-une apugid. Adipun agon kasapulan udume apugid. Kad naimane tuttuwaona’k Jesus we siya de apugid ni basul, pakawanok.”

Susunod u, ippun igammun da tagu si annae ambalu we damage. Adidapun igammu we ak Jesus nangwa’tte bayad (Dusa) para’tta basulda. Sissiyae an-apugidda’k mipaoy kan Apodios para kan didae mismu. Adimpun Apodios agon pione an-apugidtaku’k mipaoy kan siya. Abuse amatitaku kan Jesus. Awatontaku we siya apugid ya iwalangtaku we angwa’tta adume apugid. An-awidantaku da lawwenge kokok-on. Kad ak Apodios, pakawanona basultaku ya ittona ulnus kan ditaku.

Ak Cristo Angiyugud Kan Ditaku

John 14:6; Hebrews 10:17; 1 Timothy 2:5,6; Hebrews 7:25

Kanan Jesus, “Sakon de dalan, katuttuwaan kan biyag, Naippun tagu’k umoy kan Amak nu adi angoy kan sakon.”

Sa aweawe, dakampun ak insigun ay tagu we umadani makaugud si sangun Apodios we isun di ambulbulune an-ug-uggud. On te kabasbasulan da tagu kad nasantuwan ak Apodios. Inninggaw si awe dakole kurtina si boot ni igaw Apodios ya sa igawe makwa inggawan da tagu. Abus kangatuwane padi ye dutukan da tagu’k makwae umoy angiyugud atta tagu kan Apodios. Maabus kad andatun kan maabus da kasapulane koona, mipalubuse umadani si altar Apodios ya iyyugudna kasapulan da tagu kan siya. Kad abuse amingsan si sintawon. Yakon da annae apugid, adidapun makakaan atta basul. Kad da padi we mismu dakampun ak nasantuwanda kan ippun basulda. Pun ippun astu’k ummun-un ak umadani kan Apodios. Ippun paat mapnokanda inggatna’k odasanda matattagu kan katuttuwaane Apodios. Kanandae alluwalu, “Odasantaku okyan pos sanae Apodios!” Yakon sa basulda, siya isun di kurtinae ankopal kad adidapun makaila kan siya.

Gapu kad ta dingngol Apodios sadi ye kararag da tagu, imbuunna mismu we abengna si annae lubong ta siya mismu we amayad atte apugide para’tta amine basultaku. Sa annae Jesu Cristo, nambaline kangatuwane padi ye angiyugud kan ditaku si sangun Apodios. Ak Jesus kad, Apodios ya tagu bos. Pun siya kallamog nangaan si dakole kurtina si nambootan da tagu kan Apodios. Naabus kad nampakalabaman Jesus atte cross kanana, “Naganggangput” wok naabus kade imbagana, natoy. Pun sa sadi ye natoyana, nallunig wok nankagwa kurtina si Templo we boldak ni igaw Apodios ya sa igaw da tagu. On te ginanggangputna da kasapulane makwa ta masalakniban da tagu kad namingpingsane kingwana. Pun sa sadi ye nangisina’tta tagu kan Apodios, nakaan ak inggainggana.
Naabus kad natoy kan nilibon ak Jesus, ummulin si mikaklun algawna wok nipangatu’d langit atte antotollongan da disipuluna. Ummoy atte igaw amanae Apodios kad awad sidi sinsadi ye ikarkararagan ditaku. Kad gapu si sadi ye natoyana’tte cross, maka umadanitaku we mismu kan siya mipagapu si napatoge dalan Cristo. (Adipun agon kasapulane awad udum ak padi’k angiyugud an ditaku kan Apodios. Kanan Apodios, “ Da basulyu kan kinalawengyu, adikpun agon sosomkon.”) Pun nu inawattaku’k Jesu Cristo we siya sumalaknib ya siya abus ak antalgodantaku we angiyugud, masalaknibantaku’tta amine basultaku ya sa dusae miyuuwway an ditaku. Makwa umadanitaku kan Apodios te adinapun agon sosomon da makabasulantaku, kad gapu si kaboolanae anna’tta pusutaku, iligsin ditaku’tte basul kan lawwenge makwa. Yakon nu awat ay di awad makabasulantaku, masapule umadanitaku we dagus ya nan-awidantaku da amine lawweng. Nambalin kad ak Jesu Cristo we siya salaknib kan ditaku, anna ulnus kan ditaku ya ayatontaku’k Apodios we mipalpu’tta pusutaku. Kad nu katti, aditakupun agon dinumaon da udume sinan-apodios. Piontaku angwa’k makaay-ayu kan siya kad ambalutaku kan ay-ayatontaku da udume tagu.
Ak Apo Dios abuse antalgodtaku malaksid nu umaditaku kammos. Siya abus ak Apodios kan abus ak makasalaknib kan ditaku. Umadanitaku kan Apodios mipagapu kan Jesus ya makaugudtaku kan siyae isun di makaug-uggud ak buybuyon. Makwa umali da nagimane tagu bakon nu da amin.
Kanan ni ugud Apodios, “Abuse ossaan angiyugud kan ditaku kan Apodios, siya’k Cristo Jesus, we sa nangitod si mismu we long-agna’k bayad para’tta amin. Pun siya kallamog analaknib kan dida ya da amine umadani kan Apodios gapu kan Jesus te siya matattagu we angiyugud kan dida si sangun Apodios.”

Sa Mipanggob Atte Biyag

Ngai kamman biyag? Abus kammane badbad-ik da pusu’tta long-agtaku? Abus kammane isun di libuu we maila sinsadi ya baagen naawan? Ngai kamman panggob ni biyag? Abus kammane mibuknagtaku, gangganasontaku baon nu ippun ganastaku si annae lubong, kade sadi natoytaku? Ambaliw biyag ya ambaliw da tagu. Ngai kamman ustu we agagawon ni osae tagu? Awad kamman makwa’k ansallayantaku we ustu? Sa tuttuwa pagaye adipun ambaliw bakon nu makaan? Sa sumisissiya kabalunae adipun mamansaan? Awad kamman nannama’k siguradu bakon nu adipun an-ungaw? Awad kamman biyag a tuttuwa pagaye wadawad amin ya mamat-optaku?

On, awad, maodasan sanae biyag kan Jesu Cristo. Inigammutaku man bakon nu ippun igammutaku kan siya, inigammuna an ayyuwanan ditaku te ay-ayaton ditaku. Siya ababusan ak angitod si mat-opantau ya ittona kalasin ni biyage igaigayon da pusutaku. Kanan Jesu Cristo, “Sakon de dalan, katuttuwaan ya angtod si biyag.” Nu naippuntaku kan siya malimutaku’tte dalan ya madudusataku’tte dusae ippun anungusna. Iyayaayag Jesus sanae tuttuw biyag atta nagiman, ippun laksigona’k tagu, iyayagna kan dikayu yak an sakon. Pun nu awatonyu sanae ittona odasanyu ustu we panggob ni biyagyu. Adiyupun somsomkone biyag ay lawa ya sadin, yakon dumtong atte angosyu patog ni biyag. Awad de planun Apodios atta biyagtaku, awad de ulnus kan maayyuwanantau. Masapul okyan maodasan sanae kalasin ni biyag.

Sa makwa ta maalan ni tagu sanae biyag, masapule makasaganae angwa’tta isun di nginana. Iwalangnae angwa’tte pinion ni long-agna ya iyunudnae koona da pinion Apodios. Masapule paituray kan Jesu Cristo, ipulangnu we ustu long-agnu kan siya ya kingwan da amine piniona. Ansigab kamman? Naid, te ak Jesu Cristo we mismu tumulung ta ustu da amine koontaku. Yakon sissiyae adu da tagu we umadi si sanae pinion Jesu te adidapun maawatane da sanae iwalangda, adayuda’k miyisu si kabalun ni maganabda’tte umali ye algaw.

Sa kanana’tte Matthew 7:13,14, “Makwa lumnokta’d langit nu siya ayonta ansulpite lewangan! On, te sa kalsae umoy ad Impierno, alwa lewangannae umanay atta aduadu we tagu we siya piliyanda allasu we dalan. Yakon sa lewangan ni biyag, ban-og kan ansulpit kalsana ya akit da angdas atte sanae dalan.”

Sa annae dakole lewangan, an-awiawis ta lumnoktaku kad an-awi-awis alwae kalsa ta siya ayontaku allasu we ambibiyag. Ippun masapulna’k baliw ni biyagtaku kan ippun os anusantaku koon. Yakon sa lewangan ni biyag, ansulpit. Masapule an-awidantaku da basultaku ya mapasanta atte baro da pusutaku atte lumnokantaku’tte sanae ansulpite lewangan. Masapule ansosomsomoktaku we ustu.
Aditaku okyan isun di karnero we dinu kad ay ayon da kaaduwan, siya inunudtaku we tumuttuwada kan adida, isuna. Pun awad atte simbobokole tagu nu piona awaton sanae biyag bakon nu umadina.

Susunudku, ipatpatogyu kamman da kalidodwayu? Ipatogyu kamman sanae parting ni long-agyu we sissiyae matattagu takon ay nu maabuse milibonkayu?ipaniyu ad aite inggawantau’tte annae lubong atte ippun anungusnae mipasani. Adiyupun kamman igammu we nu matoytaku pagatupan ni kalidodwataku we matagu’k inggainggana? Dinu piliyonyu? Pionyu kammane angoy atte ansulpite lewangan ya odasanyu tuttuwae biyag? Sa biyage baro we milapu sinsadi?
Yakon awad nin atte somsomokyu, “Ngai masapule kook ta lumnokak atte ansulpite lewangan ya odasak biyage ippun anungusna? Nu pion ni tagu masalakniban, ippun andagson ak masapule koona te ginanggangput Jesus da amine kasapulan para kan ditaku. Abuse amati tagu’tte awad inabus Jesus kingwa para kan siya. Masapule amati ye sa natoyana’tte cross, nipabukud kan siya da basulna, kad sa nibukbukan ni dalana, nipabukud kan siya dusa da sanae basul. On, ginanggangput Jesus. Kad ippun nabun-an ak masapule koontaku.

Pun umadanitaku kan Apodios ya masapule angoytaku kan Jesus we ab-abbuson ak dalan. Ipakumbabataku da long-agtaku si sanguna ya tuttuwaontaku we kabasbassulantaku we ippun lamogtaku itton a bayadna. Ipilittaku da basultaku kan siya, ippun laksigona. Ibagataku we ambaba we taku kan an-awidantaku dida. Kodawontaku we pakawanon ditaku kan siya gapu si natoyan Jesu Cristo atte cross para kan ditaku. Aaddi ye pakawanona ditaku ya ibuunna Ispirito Santo ta mikamboloy kan ditaku ya dalusana ditaku. Kade sadi igammuwonyu we sa ansulpite ¬lewangan innoyyu we igaw ni tuttuwae biyag. Kad sana mangadanane Christianity. Sa inalgawe angunudantaku kan Jesus, malin-awaan da pusutaku, ya ittan ditaku’k pigsae sumangu si nagimane rigat ni biyag. Taon ay katoy aditakupun ogyatan te kan ditaku isunan mabuktan lewangan ad langit atte sanate timpo.