07. Keta, Pilikisya Kangi Uyege Nu Bumi: Ibuku Lya Buhano Nabubili - Yesu Yontwa Kangi Mpoki

Yesu Yontwa Kangi Mpoki: Ubwandilo

Bakamu wangu ngimba naloli Yesu Mwana wa Kyala (uyu atumigwe ukufuma kwa Kyala) kangi abagile ukubapa abandu ubumi bwa bwilabwila? Ukupapigwa kwa Yesu, ifika ifi abombile, ubumi bwake, ukusyuka mbufwe namasyu gake gikunangisya naloli mwana gwa Kyala (atumigwe ukufuma kwa Kyala). Bopapo mupilikisya, keta ififwani ifya mwimbuku ili ilya kainja. Bopapo kangi mupilika ulwimbo ulu, keta ikifwani ikingi. (Ulwimbo)

Ikifwani Kya Kwanda Ukupapigwa Kwa Yesu

Yohane 1 :1-14; Luka 2:1-11; Akolose 1:16

Keta ikifwani. Kyunangisya umwana nunkikulu, unyina nugwise gwa mwana. Abanyambala batatu abangi abo batimi ba ng’osi. Bosa bikunketa umwanike. Ingamu yake yo Yesu. Yumo afugeme nkyeni mwa Yesu. Nongwa ya fiki afugeme?
Ifundo yake yakuti, Yesu ali mwana nsubiligwa ukinda abana abanyambala bosa babo bapapigwe. Bo Yesu akapapigwa, aliko kumwanya nu Kyala. Ifindu fyosa fyapeligwe na Kyala. Kyala yo Mbepo, loli inangisye umwene mwa Yesu, yuyo apapigwe munkikulu unsita kummanya unyambala. Mbepo gwa Kyala yo abombile isi. Mbepo yuyuyu yo ali mwa Yesu Khristu. Kyala alisile ukufuma kumwanya ukwisa kutwabula uswe kumbibi nukutunangisya uswe mumo tubaghile ukuyila bana ba Kyala. (Ulwimbo)

Ikifwani Kya Bubili Yesu Ikusanusya Amisi Ukuya Bwalwa Bwa Mafilu

Yohane 2:1-11

Bo Yesu akulile, abilikiligwe kubweghi. Abafundigwa bake nunyina ingamu yake Maria babukile nagwe. Maria asimenye ukuti Yesu mwana gwa Kyala, lelo bo ubwalwa bwa mafilu bumalike alimbulile Yesu. Alinkubabula ababombi ukuti, “Syosa isi linga ikubabula, syo mubombege itolo.” Syalipo indeko inywamu ihano na yimo palubafu. Yesu alinkuti kubabombi, “Amwisusyege amisi mndeko.” Balinkwisusya ufika pamwanya. Alinkubabula alinkuti, “Amunegege lelo, muntwalile unjabafyakulya.” Amisi galipelile ukuya bwala bwa mafilu! Abafundigwa ba Yesu balyandile uketa ukuti Yesu ali namaka amakulumba gakufuma kwa Kyala nukuti balyandile ukusubila mnyake. (Ulwimbo)

Ikifwani Kya Butatu Yesu Ikuyoba Na Nikodemu

Yohane 3:1-36

Ikilo kimo umundu yumo ingamu yake Nikodemu alisile kwa Yesu ukufwana nifika ifi abombile kangi nisya Kyala. Nikodemu ali nkulumba kangi mmanyisi baYuda. Apilike ukuti Yesu ikupela ifika. Asyagenie ukuti Yesu afumile kwa Kyala. Yesu alinkuti kwa Nikodemu, “Naloli nikubabula une nikuti, umundu akabagila ukububona ubutwa bwa Kyala, loli pene apa linga ikupapigwa kangi.” Nikodemu alinkundalusya “Abagile bulebule umundu ukupapigwa bo nkangale?” Yesu alinkumwamula alinkuti, “Kosa aka kapapigwe kumbili go mbili, naka kapapigwe kwa Mbepo yo mbepo.”
Yesu akasanusyagha ukuti kukafwana nukupapigwa kwa mubili. Umundu olondigwa ukuti apapigwe kangi ukwendela mnjila ya Mbepo Mwikemo gwa Kyala. Mbepo Mwikemo Ikubanangisya abandu imbibi syabo kangi ukubatula ukuti basileke imbibi syabo mbutungulu bwa setano. Nukwanda ukuntufya Kyala. Po bisa kusyaghania ukuti Yesu ikubapoka babo bikusubila mmyake.
Polelo, umundu gwesa yuyo ikusubila kangi ikunkonga uNtwa Yesu, kokuti apapigwe ubupya. Abasubiligwa bikuya nubumi bwa bwilabwila, papo Mbepo gwa Kyala ikuya nabo. Loli gwesa uyu itikusubila mwa Yesu, isakupaguligwa kwa Kyala kangi atisa kwingila kumwanya. (Ulwimbo)

Ikifwani Kya Buna: Malafyale Ikufugama Nkyeni Mwa Yesu

Yohane 4:46-54

Umundu uyu ali nkifwani iki alyendile ubwendo ubutali ukuti akamwaghe Yesu. Umundu uyu lyali malafyale. Umwanake ali pipi itolo ukufwa, nukuti alinsumile Yesu alinkuti, “Malafyale, isaga twikililege bo umwanangu akali ukufwa.” Umwene Yesu alinkumbula alinkuti, “Bukaga, umwanako mumi.” Popapo umundu yula alinkulitila ilisyu ili Yesu alimbulile, alinkubuka. Lelo bo akali ikwikilila ababombi bake bali nkwaganila nagwe, balinkumbula ukuti umwanake mumi. Isekema yalindekile umwanake nkabalilo kako Yesu alimbulile ukuti, “Umwanako mumi.” Popapo alinkwitika yuyo ninyumba yake. (Ulwimbo)

Ikifwani Kya Buhano Umundu Umbine Pakisiba

Yohane 5:1-47

Nkaya ka Yelusalemu kyalimo ikisiba. Abandu bali nulusubilo ukuti uyu linga atalilepo ukwingila mmisi bo gafumile pakuyughanika, abumbulukagha ububine bosa ubu linga alinabo. Lelo alipo umundu yumo uyu agonile nububine bwake ifyinja amalongo matatu na fihano na fitatu (38). Yesu alimbwene alambalele mumbafu nkisiba alinkundalusya alinkuti, “Bule gwiganile ukubumbulusigwa?” Umbine alinkumwamula alinkuti, “Une ngaya nu mundu gwa kumbika nkisiba bo amisi gikusukanika.” Yesu alinkumbula alinkuti, “Sumuka, pimbaga ubulili bwako gwendege.” Nakalinga itolo umundu yula alinkubumbuluka. Abandu bamo sikabahobwisye sisyo Yesu abombile papo alimbumbulwisye umundu umbine pisiku lya Sabati, isiku lilyo Kyala alisungile. Ili lyali isiku lilyo abaYuda batusyaga ukubomba imbombo loli ba mwiputaga Kyala. Popapo umundu yula alinkubuka, alinkubabula abaYuda ukuti Yesu yo uyu ambumbulwisye, loli abene batakalondaga ukunsubila Yesu. Ukubumbulusigwa kwa mundu kwa nangisye ukuti Yesu abagile kangi anamaka gha Kyala ga kubumbulusya isiku lililyosa ukongania ilya Sabati. (Ulwimbo)

Ikifwani Kya Buhano Na Kimo Yesu Ikubaswila Abandu Baelifu Bahano

Yohane 6 kanandi 1 mpaka 15 nu kanandi 25 mpaka 58

Abandu abingi bapilike ukuti Yesu ikubumbulusya ababine nukuti ilisiku limo ikilundilo kya bandu ikikulumba kilinkunkonga kwi silya ilingi lya nyanja. Ilyamayolo lyake Yesu alinkubalalusya abafundigwa bake, “Tukulaga kugu ifisyesye ukuti abandu bababa balyege?” Yumo gwabafundigwa alinkumwamula alinkuti, “Kalipo papapa akalumyana, aka kali nifisyesye fihano ifya malesi nutuswi tubili; loli fikabagila ukufwana abandu bosa?” Yesu alinkubitughasya abandu pasi. Popapo Yesu alinkwega ifisysye nutuswi, alinkugwa ulupi, alinkubapa abandu, balinkulya ukufwana bo mumo balondelagha. Kilabo kyake ikulundilo kya bandu kilinkunkonga kangi Yesu. Umwene alinkubabula abandu alinkuti, “Naloli nikubabula une nikuti, umwe mutikundonda papo mwafibwene ifika, loli papo mwalile ifisyesye, mwalikwite. Mungiyulagha kufyakulya ifi fikuyonga, loli mwiyuleghe kufyakulya ifi fikuyako bwila, ifi fikupa ubumi bwa bwila, ifi Nnyamundu ikubapaga.” Yesu akayobaga isya mwene. Alinkuti kangi, “Yo une ne kisyesye ikipela bumi; uyu linga ikwisa kumyangu, yo yitisakundumagha injala, kangi uyu ikunyitika une, yo atisakumilwamo siku.” (Ulwimbo)

Ikifwani Kya Buhano Nabubili Yesu Ikwenda Pa Misi

Yohane 6 kanandi 16 mpaka 21

Bo Yesu abaswilile abandu bosa, alinkwenda nukubasatanisya. Alinkubuka ku kukyamba ukwakwiputa kwa Kyala. Abafundigwa bali nkwipaka mwiboti bali nkwambuka inyanja. Kwali ngisi kangi inyanja yili nkusambuka. Popapo Yesu alinkusegelela kubene bo ikwenda pa nyanja. Abene balinkwinogona ukuti kisyuka kangi balinkutetema. Yesu alinkubabula alinkuti, “Yo une mungatetema.” Alinkwipaka mwiboti popapo umbelo ghulinkubota. Isi syabanagisye abafundigwa kangi sikutunangisya uswe ukuti amaka ga Kyala gakabombelaga mwa Yesu. (Ulwimbo)`

Ikifwani Kya Buhano Nubutatu Yesu Ikumbumbulusya Umundu Mfwamaso

Yohane 9 kanandi 1 mpaka 41

Alipo umundu uyu apapigwe bo mfwamaso. Abafundigwa bakinong’onaga ukuti apapigwe mfwamaso panongwa yakuti umwene pamo abapapi bake bali batula nongwa. Loli umwene Yesu ababulile ukuti umundu uyu apapigwe umfwamaso ukuti imbombo sya Kyala mosibonekelege mmyake. Alinkuswa amata pasi, alinkufuga amatope namata, alinkumpaka namatope mmaso. Yesu alinkumbula alinkuti, “Bukagha ukasukusule pakisiba Siloa.” (Siloa ko kuti “ntumigwa”). Umundu apilikile Yesu. Alinkubuka nukwakusugusula; alinkugomoka bo ikuketa itolo. Binangu twebingi tuli bafwa maso papo tukabwagania ubwigane bwa Kyala. Loli Yesu alinkuti, “Une ne lumuli lwa kisu; uyu linga ikungonga une, yo atisakwendaga mungisi, mma, isakughagha nalo ulumuli lwa bumi.”Kusimbigwe kangi ukuti, “...loli linga tukwenda ndumuli bo apa umwene ali ndumuli, po tuli balilanisi twe babo batupu, lyope nilopa lya Yesu uMwanake likutwelusya kumbibi syitu syosa.” (Ulwimbo)

Ikifwani Kya Buhano Yesu Inkunkolela Lazalo Ukufuma Mbufwe

Yohane 11 kanandi 1 mpaka 46

Aliko umundu ingamu yake Lazaro yuyo abinile fiyo. Maria na Malita, babo bali balumbu bake, balinkutuma indumi kwa Yesu balinkuti, “Gwe Ntwa, keta, ummanyani gwako mbine.” Umwene Yesu bo apilike popapo alinkuti, “Ububine ubu bukaya bwakungogha, loli bwakwibonesyamo ubukulumba Kyala, ukuti uMwana gwa Kyala mo abonekelege ukulumba.” Umwene Yesu yo abaganile ba Malita na Maria ugwamyabo, na yu Lazalo. Loli Yesu akabukile papo. Alinkugona amasiku mabili alinkubabula abafundigwa bake alinkuti, “Lazalo afwile une nikusekela panongwa yinu, papo ngaliko kuko, ko kuti umwe mwitikege; nduko, tubukege kumyake,” Bo Yesu afikile, alinkwaga Lazalo amalilemo amasiku mana mwipumba. Abalumbu ba Lazalo bali nikitima papo Yesu akalisile ukumbumbulusya, loli Yesu alinkuti kwa Malita, “Ilumbugo isakusyukaga.” Ayobile kangi ukuti, “Ne kusyuka, ne bumi yuyune. Uyu linga ikunyitika, napa linga ikufwa ikuyaga mumi itolo; kangi gwesa uyu mumi, linga ukunyitika une, yo atisakufwamo siku na siku. Bule kwitika sisisi?” Popapo ababulile abandu ukuti bigule ilileke. Alinkukolela ilisyu ilikulumba alinkuti, “Lazalo, soka!” Popapo alinkusoka aniembeteligwe nimyenda mmalundi na mmaboko. (Ulwimbo)

Ikifwani Kya Kalongo Yesu Ikufwa Pakipingika

Yohane 18 kanandi 1 mpaka 40, Yohane 19 kanandi 1 mpaka 42

Yesu alinangisye ukuya mwana gwa Kyala nongwa ya fika ifi abombile. Abakulumba ba kipanga ba kiYuda bali na kabini kangi balondaga ukongoga umwene. Yesu ababulile abafundigwa bake ukuti agogigwe nongwa ya mbibi syabandu bosa. Yali yo njila yene iyakubatwalila abandu kwa Kyala. Yuda uyu ali yumo gwa bafundigwa ba Yesu, alinkumbika Yesu mmaboko ga balugu bo ambilie indalama (amalongo matatu ga siliva) ku bakulumba ba kiYuda. Balisile nukunkola Yesu. Peteli nabafundigwa babopile papo bali nulutende. Abakulumba ba Yuda balinkumwegha Yesu ukubuka nagwe kwi koti loli batoligwe ukuyaga inongwa iyi atulile. Abene loli balinkuywega balinkuti, “Nkomele pakipingika! Nkomele pakipingika! ” Panyuma balinkuntwala Yesu ku bandu. Bope balinkuywega, “Nsosyepo! Nsosyepo! Nkomele pakipingika!” Popapo umwana gwa Kyala unsita kutula inongwa agogigwe. Iminyambuta mibili yafwile palikimo na Yesu. Balyambilile ikilango panongwa yabutula nongwa bwabo loli Yesu akabombile imbibi nasimo, afwile ukuya likemo lyabutula nongwa bwa bandu bosa palikimo ugwe na une. Yesu lyali likemo lyene lilyo Kyala alyitikisye nongwa ya mbibi syitu. (Ulwimbo)

Ikifwani Kya Kalongo Na Kimo Maria Na Yesu Pipumba

Yohane 19 kanandi 42, Yohane 20 kanandi 1 mpaka 18

Yumo mbafundigwa ba Yesu ingamu yake Yosefu asumile umbili gwa Yesu. Balimpele umbili gwa Yesu kangi alinkugulambalika umbili mwipumba ilipya ili alitendekekisye umwene Yosefu. Yosefu alinkubungulukisyapo ibwe inywamu pa kifigo kya ipumba. Ilisiku lya butatu Maria Magadaleni alinkwisa kukuketa ilipumba. Ibwe lisegwikepo pipumba. Maria alinkwanda ukulila. Alinkwinama alinkuketa mwipumba. Balinkwaga umbili gwa Yesu nagumo. Abandumi babili batugesye apa gwalambalele umbili gwa Yesu. Ulu Maria alinkusyutukila kunyuma alinkumbona umundu imile, loli alinkusita nukummanya ukuti yo Yesu. Yesu alinkundalusya Maria alinkuti, “Gwe nkikulu, kulila fiki? Kundonda ywani?” Umwene Maria papo atigi ndindililangunda, alinkundalusya kuko gubukile umbili gwa Yesu. Umwene Yesu alinkukolela alinkuti, “Maria!” Po alinkusyagania ukuti yo Yesu. Ali mumi! Yesu alinkunti kumwene, “Bukaga…kubamitu ukababulege ukuti, nsumwike kwa Tata, uGwisemwe; kwa Kyala wangu kangi Kyala gwinu.” ‘Kubamyitu’ kusanusya abafundigwa. (Ulwimbo)

Ikifwani Kya Kalongo Nabubili Yesu Ikubasetukila Abafundigwa

Yohane 20 kanandi 30 mpaka 31, Yohane 21 kanandi 1 mpaka 19

Bo Yesu akabuka kumwanya, abombile ikika ikingi. Ikilo kimo abafundigwa bamo babukile nkuloba iswi, loli bakakolile. Bo kukile ndubunju, balinkumbona umundu yumo pisilya pa nyanja. Alinkubabula ukuti basope ulwelo kulubafu ulwa kukililo kya iboti ko bisakusyagaga iswi. Popapo balinkusopa kangi balinkukola iswi inyingi fiyo. Popapo abafundigwa balinkusyagania ukuti umundu uyu bikuyoba nagwe yo Yesu. Balinkutwala iswi syosa pisilya. Umwene Yesu atendekisye ifyakulya fyabo. Bobalile alinkuyoba nabo. Peteri yope alipo. Umwene Peteri alimbopile Yesu palikimo nabafundigwa abangi bo Yesu ikukoligwa kangi alinkanile Yesu. Yesu alinkuti kwa Peteri “Ngongagha une!” Alimbulile Peteri ukuti abamanyisyege abandu ba Kyala, abapakikisyege kangi nukubamanyisya ukuti bayabanege amasyu amanunu ga Yesu namumo alisile ukutufwila uswe kumbibi syitu nukuntola setano bo asyukile mbufwe.
Kyala ikulonda ukuti abandu bosa bapilike isya Yesu nifika fyake ukuti babagile ukusubila ukuti mwana gwa Kyala. Munkongege kangi mwisakupokigwa nu kwambilila ubumi bwa bwilabwila.

Yesu yo Mpoki Ulubafu babubili: Ubwandilo

Yesu yo mpoki unkulumba. Ikitupoka uswe ku mbibi na kukayilo akanyali, kangi ikutupa ubumi bwa bwilabwila. Pilikisya kufimanyisyo fifingi ifya Yesu. Keta ikifwani ikingi linga upilika ulwimbo. (Ulwimbo)

Ikifwani Kya Kalongo Nubutatu Yesu Ikubamanyisya Abafundigwa Bake Babili

Luka 24:13-35

AbaYuda bingi bakinogonaga ukuti Yesu ikuyaghapoke ku balugu babo baki Roma. Loli sikaya syo isi alisile pa kisu. Panyuma abaYuda balinkubasuma abalongosi ba baRoma ukuti bangoge Yesu.
Mukumbuka mumo abasilikali baki Roma balingogile Yesu, ukumpayika pakipingika papo afwilile.
Bo asyukile mbufwe, abafundigwa babili bakabukaga nkaya. Popapo Yesu alinkubabonekela abene. Abene bakinogonaga ukuti nhesya, balinkumbula isi sibombigwe mula mmasiku gala. Popapo Yesu alinkubalingania isi Mose na basololi ba Kyala bayobile isya mwene mmasyu mu fyinja ifi fikindile. Abasololi bayobile ukuti isakutamigwa kangi nu kufwa. Bayobile kangi ukuti isa kusyuka mbufwe, isakufyuka kumwanya, ko isakwikala kukiboko ikililo kya Kyala uGwise, ko isakulagilaga ikisu kyosa bwilabwila. Ikilo kilakila, atugasenie nabo abafundigwa babili bala nukulya nabo. Bo amenyile ikisyesye nubapa, amaso gabo galinkwiguka kangi balinkumwagania (ukuti yo Yesu). Popapo alinkuyonga kumaso gabo. Popapo balinkubuka ku Yelusalemu ukwakubabula abafundigwa abangi ukuti bambwene Yesu kangi mumi.
Unko tupilikesye isi umwene Yesu ikutumanyisya uswe ukufuma mmasyu gake.
(Ulwimbo)

Ikifwani Kya Kalongo Nabuna Umwana Unsobi Pakati Pangulube

Luka 15:11-19

Bo Yesu akafwa, ayobilepo ikifwanikisyo kya mundu uyu ali nabana abanyambala babili. Umwana unnandi alinkuti ku gwise, “Ulimbaga ikyuma iki kufwene ukunjabila une.” Popapo ugwisabo alinkubayabania ikyuma kyake. Popapo umwana unnandi alinkubuka nkisu kya kubutali. Alinkwakukibululusya ikyuma kyake kuko, mbumi bwa mwalwemwalwe. Popapo yilinkugwa injala yi nyingi fiyo nkisu kila. Umwana uyu alinkulondoka. Popapo abukile ukulonda imbombo ku mundu yumo uyu antumile ukwakuswila ingulube. Umwana uyu ali ninjala nukuti alinkunyonywa ukulya fyakulya fya ngulube. Lelo bo iyagenie alinkuti, “Balinga ababombi ba tata aba bikulya ifyakulya kangi fikusyala, loli une nikufwa ninjala apa? Nikusumukaga, nikubukaga kwa tata, nikwakumbulaga nikwakutigi, ‘gwe tata ndulile inongwa kumwanya na kumyako, ngabagila ukuyobigwa ukuya mwanako; ulimbelaga ukuya bo yumo umbombi bako.’” Popapo alinkusumuka, alinkubuka kugwise. (Ulwimbo)

Ikifwani Kya Kalongo Nubuhano Umwana Unsobi Ikigomokela Kumyabo

Luka 15:20-32

Umwana unsobi bo akali ali pabutali ugwise alinkumbona. Popapo alinkumbopela umwana yula alinkutamila mmakosi, alinkumfipa. Ugwise alinkubabula ababombi bake ukuti batwale unselekesye unkinde kangi batendekesye ifyakulya ifinunu. Alinkuti kangi, “Twise tulyege tusekelege; buno umwanangu uyu afwile, lilino mumi; ayongile, lilino abonike.” Kwali ulusekelo ulunywamu fiyo.
Yesu atubulile ukuti Kyala afwene bo tata uyu. Abandu bosa bafwene bo umwana umbomba mbibi. Loli Kyala atuganile uswe. Ikulonda uswe tugomokelege kumyake. Ikulonda ukuti atuhobokele imbibi syitu. Popapo alintumile Yesu ukwisa kubalonda nukubapoka abandu aba bapagwike kwa Kyala. Abandu aba ubumi bwabo bukaya na Kyala, batagigwe kangi yu Yesu yo injila yabatagigwa ukuti bise kangi kwa Tata Kyala. (Ulwimbo)

Ikifwani Kya Kalongo Nubuhano Na Kimo Ikyuma Kya Mundu Unkabi

Luka 12:13-34

Yesu alinkukibula ikilundilo ikifwanikisyo kya mundu unkabi uyu ali nufunjo umwingi. Alinkwinogona ukuyenga indamba inywamu isyakubikamo ifyakulya, popapo alinkwinogona munda alinkuti, “Gwe moyo wangu, uli nafyo ifyuma ifingi itolo ifi gwilundikile kufyinja fi fingi; gwitesyege lelo, ulyege, unweghe, usekelege.” Umwene loli Kyala alinkumbula alinkuti, “Gwe nkonyofu ugwe, ikilo kikiki bikugulonda umoyo gwako. Lelo ifi gwitendekesyagha fisakuyaga fyani?”
Yesu alinkuti, “Umu mo sisa kuyilaga ku yuyo linga ikwilundikila ikyuma bo kwa Kyala akaya nkabi (nubukamu na Kyala kangi nulusubilo mmyake).” (Ulwimbo)

Ikifwani Kya Kalongo Nubuhano Nabubili Umundu Undondo Nunkabi

Luka 16:19-31

Yesu ayobile isya kifwanikisyo kya mundu unkabi uyu alinafyo fyosa. Loli alinkusita ukuya nimbombo numundu uyu asumagha pa kipata kya nyumba yake. Popapo undondo yula alinkufwa, alinkubuka kumwanya. Kuko aye kwitugala ndupakato lwa Abrahamu, kuno bafumile aba luko lwa ba Yuda. Bo umundu nkabi afwile, alinkubuka ku moto kuko alinkutamigwa. Bo alikula alinkumbona Abrahamu kubutali ampakete undondo yula. Alinkukolela Abrahamu ukuti antume undondo yula antwalile amisi, loli Abrahamu alinkuti, “Pakati pamyitu nanugwe lulipo ulupanga ulutali; ukuti aba bikulonda ukutumusania ukufuma kuno ukwisa kumyinu uko batoligweghe; kangi nukuti aba uko bangalobokagha ukwisa kumyitu.”
Ku moto bukayako ubununu nabumo kangi nakububopelo. Babo bikubuka kula bisa kutamigwa mbumi bwabo bosa. Nalinga tuye bakabi kali balondo tunganege ukumpilikila Kyala. Usubilege mwa Yesu Khristu po gwisa kupokigwa ku moto, nukwambililwa ubumi bwa bwilanabwila. (Ulwimbo)

Ikifwani Kya Kalongo Nubuhano Nubutatu Ummanyani Pa Kifigo

Luka 11:5-13

Akabalilo kamo umundu abukile kummanyani gwake kangi alinkuti, “Gwe mmanyani wangu uli ngopesyaga ifisyesye fitatu, papo ummnyani wangu yumo afikile, nhesya gwangu, lelo ngayanafyo fimo ifya kuntegelekesya (ngaya nifyakulya fyakumpa umwene).” Ummanyani gwake naba nnyumba yake balambalele. Atakalondagha ukusumuka ukumpako ifindu. Loli umundu uyu ali pakifigo akali ni soni ukindilila ukusuma, popapo ummanyani gwake alinkusumuka nukumpa fifyo alondagha. Yesu alinkuti, “Amusumeghe po mwisakupegigwagha; amulondeghe, pomwisakufyagaga; amukung’undege kulwigi, pomwisakuligwa.”
Kyala ikulonda ukuti ayege Tata gwitu unnunu. Ikulonda ukutupa uMbepo Mwikemo kangi nukutupa fyosa fifyo tukulonda. Iki tubombege, tukindilile ukunsuma mulwiputo ukuti atutule upilikila amasyu gake nukunsubila Umwene. (Ulwimbo)

Ikifwani Kya Kalongo Nubuhano Nabuna Abandu Babili Nnyumba Ya Kyala

Luka 18:9-14

Nkifwani iki tuketa abandu babili bikwiputa nnyumba ya Kyala. Umundu yumo ali gwa kwiputa fiyo, loli ali gwa kwibona. Alinkwiputa sisyake alinkuti, “Gwe Kyala, nikugwa ulupi kumyako papo gaya bo abandu abangi, iminyambuta, abaniongafu, abalogwe, pamo ukufwana bo unsongesyasongo uyu. Nikufibika ifyakulya kabili mundungu gumo, nikupagulapo ikiyabo kimo mfiyabo kalongo muli fyosa ifi ngukaba.” Kyala akahobwike nulwiputo lwa numundu uyu. Umundu uyungi ali nsongesyasongo unsyobi. Abibile abandu indalama. Asyaghenie ukuti akanhobosya Kyala. Alinkwikoma pakipambaga kangi ali nkusita nukwinula amaso ghake kumwanya mwa soni. Alinkwiputa kwa Kyala alinkuti, “Gwe Kyala, uliyaga nikisa kuli une ne ntulanongwa.” Yesu alinkuti Kyala apilike ulwiputo lwake. Alinhobokile imbibi syake.
Kyala ikubakana abalwitufyo, loli ikubitika aba bwanaloli kangi babo bikwiyisya mundumbula, kangi ikubamula inyiputo syabo. (Ulwimbo)

Ikifwani Kya Malongo Mabili Umundu Ikusopa Imbeyu

Luka 8:4-9

Ilisiku limo Yesu akamanyisyaga ikilundilo kya bandu kangi alinkuti, “Isiku limo unsopa mbeyu alinkubuka kukusopa imbeyu yake. Lelo bo ikusopa, yimo yilinkwakugwa munjila; abandu balinkuyikanya namalundi, ninjuni syakumwanya silikusala silinkumala. Iyingi yilinkwakugwa pa lwalabwe, boyimelile yilinkuma, papo ububundafu bukalipo. Iyingi yilinkwakugwa mmifwa, imifwa yilikukula pamopene nayo, yilinkwenda nukuyigoga. Iyingi yo yili nkwakugwa pa kisu ikinunu, yilinkumela, yilinkupa iseke mia yimo.” Yesu alinkuti ku bandu, “Uyu linga ali nasyo imbulukutu sya kupilikila, yo alipilikaga.” Popapo abafundibwa bake balinkundalusya balinkuti: ikifwani iki ko kuti fiki? (Ulwimbo)

Ikifwani Kya Malongo Mabili Nakimo Imbeyu Yilinkukula

Luka 8:9-15

Yesu alinkubabula isyakifwanikisyo ikya kusopa imbeyu munjila iyi, “Imbeyu lyo isyu lya Kyala. Iya munjila, bo aba bikupilika, kunyuma umohesi ikwisa ikunyaka ilisyu mundumbula syabo, ukuti bangitikaga nukupokigwa. Iyene iya palwalabwe, bo aba bikugelela bapilike, bikulyambilila ilisyu nu lusekelo; loli bakaya nimisisi, bikwitika pakabalilo akanandi itolo, nkabalilo kangelo bikugwa. lyene iyi yagwile mmifwa bo aba bikugelela bapilike, ndwendo lwabo bikusyobigwa nubwikolanie, nubukabi, nisyakwihobosya isya mbumi, popapo iseke syabo sitikukoma. Iyene loli iyi yagwile pakisu ikinunu, bo aba bikupilika ilisyu nindumbula inunu ingolofu bikulyumilila, nukupa iseke nulumilisyo (ukufunja).”
Mukupilikaga bulebule nukugambilila amasyu ga Kyala? Ngimba kugakanaga kangi nukuyaga nsobi? Pamo kugasubilaga amasyu ga Kyala nukugapilikila ukuti unhobosye Kyala? Popapo kuyaga bo imbeyu iyi yagwile pakisu ikinunu. (Ulwimbo)

Ikifwani Kya Malongo Mabili Nabubili Ukutuligwa Kwa Mundu Umfulale

Luka 10:25-37

Ka tubagile ukusyagania bulebule ukuti tukunhobosya Kyala mbumi gwa isiku nisiku? Amasyu ga Kyala, iBangeli, fikutumanyisya uswe ukuti tuneghe Kyala kangi tubanege abandu. Ngimba bo baliku abandu babo tubaganege?
Yesu alinkuyoba isya kifwanikisyo kya mundu yumo uyu alinkwenda mwene mu njila. Popapo alinkugwila mmaboko gaminyambuta. Balinkupoka fyosa ifi alinafyo kangi gilinkudenka bo asyele panandi ukufwa.
Kulusako abaputi babili balinkwenda pambali. Balinkumbona umundu umfulale yula, loli batakalondaga ukuntula. Panyuma alinkwisa umundu unhesya papo ali. Loli bo ambwene umundu umfulale yula, ikisa kilinkumwaga. Alinkumpinya ififulalo fyake, nukumbika pa mbunda yake alinkwakumbika nnyumba yabahesya mo alinkwakundwasya.
Yesu alinkuti linga tunganile Kyala, tunangisyege ulugano ulu, ukubatulaga abinutu babo bo batolwe. (Ulwimbo)

Ikifwani Kya Malongo Mabili Nubutatu Umwene Kaya Ikugomokela Kumyake

Luka 12:35-48

Ka kukumbuka ukuti boYesu afwile asyukile mbufwe? Abafundigwa bake balimbwene bo akafyuka kumwanya. Yesu ababulile ukuti isa kwisa kangi. Ababulile ukuti bosa aba bikusubila mmyake, bayege bo babombi aba bongulila umalafyale gwabo ukufuma kubwegi. Yesu alinkuti, “Basagigwa abandu aba umalafyale gwabo isa kubagaga bakali maso ...” Tukamanya ilisiku ili Yesu isakwisa kangi. Tumbombelege imbombo nukuya bakwitendekesya ukumwambilila umwene linga ikwisa. Ko kisa kuyaga kabalilo kalusekelo. Ku aba batukunsubila Yesu kisa kuya kabalilo ka kitima. Yesu ayobile kangi ukuti bosa aba bikutima ing’osi syake bope bayege maso. Linga bikusitima kanunu ing’osi syake, bisakwambilila ikyabupi ikinywamu. Loli linga batikusitima kanunu ing’osi syake, ikilango kyabo kisa kuyaga kinywamu. (Ulwimbo)

Ikifwani Kya Malongo Mabili Nabuna Umundu Mu Mpiki

Luka 19:1-10

Yesu abagile ukumpoka umundu gwesa ku mbibi. Pilikisya: Zakai ali nkulumba mbasongesyasongo. Ali munyongafu kangi akabibilaga abandu indalama. Apilike ukuti Yesu ikwisa munjila, po akalondaga ukunketa Yesu, loli ali mpimba kangi Yesu asyungutiligwe nikilundilo kya bandu. Popapo Zakai alinkufyuka mumpiki gwa nkuyu. Bo Yesu afikile pa buyo bula, alinkuketa mmwanya alinkumbula Zakai alinkuti, “Zakai, sulukaga mbibimbibi; namanga fikuti umusyugu ndugalemo nnyumba yako.” Abandu bobasibwene bo sisisi, balinkuswiga. Zakai alintula nongwa. Zakai asulwike pasi nukumwambilila Yesu ndusekelo. Alinkumbula Yesu ukuti ikuya pakuleka imbibi kangi ikuya pakwanduka. Ikuya pakugomola fyosa ifi abapokile abandu.
Yesu alinkuti, “Umusyugu ubupoki bubonike nnyumba iyi.”
Yesu alisile ukubalonda nukubapoka bosa aba basobile pa maso ga Kyala. Bo yu Zakai, utendekesyege ubumi bwako ukuti buyege bununu kwa Kyala bo kusubila nukumpilikila Yesu Kristi. Isa kupa amaka gakusilekela imbibi mbumi bwako.