unfoldingWord 05 - Thulium Naupasal Chu

Abram le Sara Kanan ramah an lût kum sawm hnunga khom nau an la nei ta naw rop a. Abram nuhmei Sara chun Abram kuomah, “Pathienin nauhai a mi pêk phal si nawh, tu hin nauhai nei dingin ka tar ta si a, hi taka hin ka siehlawnu, Hagar a um a, nau mi nei pêk dingin nuhmeiin nei ve el rawh,” a ti ta a.

Chuongchun Abram chun Hagar chu nuhmeiin a neita a. Hagar chun naupasalte a neia, a hming dingin Abram chun Ishmael a phuok a. Nisienlakhom Sara chun Hagar chu a thîk el ta a. Ishmael kum sawm le pathum a upa a hung tling chun Pathienin Abram kuomah thu a hril nawk a hieng hin,

Pathien Iengkimthawthei ka nih. Nang le ei inkârah thuthlung ka siem ding a nih,” tiin. Chuphing le chun, Abram chu hnuoiah a bok khupta a. Pathien chun a kuomah, “Hnam tamtak pa i hung ni ding a nih. Nang le i thlahai kuomah I rochan dingin Kanan ram hi pêng ka ta, chatuonin an Pathien nîng ka tih. I insûnga pieng naupasal phot chu an ser i tan pêk ngei ngei ding a nih,” tiin.

I nuhmei, Sara chun naupasal nei a ta, thutiem naupa ti nîng a tih. A hmingah Isak ti’n phuok rawh. Ka thuthlung chu a kuomah um a ta, hnam ropuitak hung nîng a tih. Ishmael khom hnam ropuitakin siem ka tih, ana chu ka thuthlung chu Isak le inkâr nîng a tih. Chuongchun Pathienin Abram hming kha a tleng pêka Abraham an bûk pêka, a umzie chu, “mi tamtak pa” tina a nih. Pathienin Sara hming khom kha a thlenga, Sari ti’n an bûk pêka “lalnaunu” tina a nih.

Chu phing le chun Abraham chun a insûnga um pasal popo chu an ser a tan pêk ta a. Kum khat vêl hnunga chun Abraham chu kum 100 a upa a hung ni a, Sari khom kum 90 a hung kai chun Sari chun Abraham chu naupasal a neipêk ta a. Pathienin a hril ang khan a hmingah Isak an inbûk a.

Isak chu tleirawlte a hung ni chun Pathienin Abraham chu a ringna fiena dingin, “I naupa neisun kha thruoi la, ka ta dingin a hringin inthawina dingin maichâm chungah inhlân rawh” a ti el ta a, Abraham chun Pathien thuhril chu a awi a, a naupa chu maichâma Pathien kuoma inthawina dingin a buotsai a.

Abraham le Isak chu inthawina ding hmun tieng an fe lai chun Isakin, “Pa, inthawina dingin thing a uma, pumrawhmang thil inhlân dingin beramte khawlâm a um a?” a ta. Abraham chun, “Ka naupa, inthawina ding beramte chu Pathienin ngaituo fawm el a tih,” tiin a dawn a.

Inthawina ding hmun an tlung chun, Abraham chun a naupa Isak chu a khuopa, maichâm chunga chun an zâl tira, a naupa that dinga chemte a let lai chun Pathienin, Abraham kuomah, “chawl rawh! Naupang chunga khan kut thlâk naw rawh! Tuhin chu i mi tri leiin i naupa neisun khom ka ta dingin i pêk phal a ni ti ka hriet tah” a ta.

Abraham chu a hang ngha vela, a hnung tieng chun beramchal, a ki thing hnoka lo in tâng tlat hi a hmu a. Isak aia inthawina ding beramchal chu Pathienin a lo buotsai pêk a. Chuongchun hlimtakin Abraham chun inthawina dingin beramchal chu a hmang ta a.

Chuphing le chun Pathienin Abraham kuomah, “Thil iengkim, I naupa neisun chen khom i mi pêk phal leiin, mal ka sawm ngei ngei ding che a nih. I thlahai khom vâna arasi zât nek khoma sukpung ngei ka tih. Ka thu i awi leiin i thlaa chun khawvêla chitin la thawveng an tih” a ta.