unfoldingWord 16 - Namuko Kinkena Yiwikewayouno

Josua puconimi, Israiliuci Koctin awayani arureni, pa wayon Kenaniuc iye yiruman yiwakureno, Koctinic ake wayani iyen awakureno. Israiliuc Kenaniuyic umac Koctinkaci mantenoyo, Yahwehmi eceno puka Koctine. Israiliuc kimi iyen dukeni, yeni indeyon antekanimi awakurenoyo.

Israiliuc Koctin awayani iyen inde wayomi, yenyic namukouc danini yeman yireno. Namukouni Israiliuyic anecne umorureni, umacden anecne anankareni amucnon yiruman pukeno. Amucna orande acnaimpaci, Koctin awayani arewayomi yenyic namuko anom mandaic uyinkeno. Israiliuc yikuno tireni Koctin indaoyomi yofa emi.

Micnuremi Kocti namukouc yiyankinke yofainanim wainta yimiremi nanayin yeni weyom makafin yimemi. Yewekeni Koctin yiwinkareni kukandeni makakackena umac koctinuc yeweke mantiankeno. Micnurami Kocti ecani Midianiuc yacnakakena namukouci yeman Israiliuc yirureni anankayeno.

Mana yacmar afac kar orandekaci Midianiuc umacden yunami Israiliuc yinda marewano. Israiliuc anon pekantimi weni, oy andun tinkaci yucmande wano, Midianiuc iyewac yona kowani. Icnaimi Koctimpaci ific denoyo, yofaino wani.

Mana nurami, Israilic wainta wen awici Kidionim wemi ayofakemi witi ackanuc dasac nemoni, Midianuc umorinayo nani. Yahwehnic ensoli Kidioni wanipac yeremi temi, "Kocti enamaci wemino, erarukawe. Orewaci Israiliuc yofaono Midianiuc kinkewe."

Kidionin afoi umac koctinic kandandan uwaremoni. Kocti Kidionin tamemi temi, mini kandanda arumar ukarano. Afo Kidioni anasi wantauc yikani peckemi dafisewami ayufunkemi. Ayufumi mini kandanda oman arumar ukaremi. Weni ena kandandan Koctin indan uwaremi, umac kotinic kandanda acnakaci. Koctin akonkecin kandanda mini naropaci akonke uankemi.

Ena wanurami onayomi mini kandanda aruman ukarakani, yeni anon yiran anecne mareno. Yeni Kidionin arirani wenamapaci weno. Micnoyomi Kidionin afon temi, "Nacekaci ikeni umac koctin ofai irarakafono? We kocti wantene, ecanan wenafu weyar ofaino!" Micnin tenim poni Kidionimi iyewac arumam pukeno.

Afo Midianiuc oweke Israiliuyic andandauc umorirani yeno. Yeni amucnoukami wayoni yandar amankac iyem weno. Kidioni yiroko wani Israiluc yaramam manakaci demi. Kidioni Koctim paci kantan anecne wani indaemi. Micnuranaci weni onarenaci pukan Kocti wemi ukacdukami Israiliuc yofa intemi.

Acnan tapaci yocakenin afotafic inowani, Kidioni sipisipi ayo makakaci demi, Koctim paci indaemi, wanuran kinkena koc awi mikac kumem makakac iyewac kuminon temi. Kocti mini micnemi. Ena ayufumi weni temi, ecanam makakawac nonic inanaci sipisipi ayowaci kafukano. Kocti mini waci emi. Mini anecne kanda Kidionin yocakanimi, Kocti Kidionin taminami Midianiuc yiyampinken Israiluc yofaintemi.

32,000 Israilic yiruim waintauc Kidioni wanipac yeno. Kocti temi, amucno ukamone. Kidioni 22,000 waintauc yiruiram pekauni tiyin kanini weno. Kocti Kidionin tamemi, amucno waintauci dukana mino. Micnonimi Kodioni umaden tiyinkani woyomi 300 yiruim waintauci pawano.

Mini ayufumi, Kocti Kidionin tamemi, "Kundaewa Midianiuc weyopac wayayuc tinayon indeno, andini iyen intemi." Afo mini ayufumi Kidioni kumben indewanimi, mana Midianic waintan akonan kayim wayani tamemi. Mini wainta akanda temi, "Mana kayimi Kidioninic aruim waintauci Midianic aruim waintauci yiruman kipanten none." Kidioni mini indiremi, Koctim mantiankemi.

Kidioni oweken wenic aruim waintauc wayopaci yeremi, ufena, kawewa, onuc maya maya yimemi. Yeni Midianic yiruim waintauc yum wakayoni yeukeno. Kidioni 300 yiruim waintauc yenyic onuci kawe kinkaci ayofeno, Midianiuc mini onuc iye onako wani.

Umacde Kidioninic arium waintauc macde manapaci yenyic kaweuc ukareno, ika oyani afotafic onini yenyic ufen arureni wacdeno. "Yahwehnuc Kidionin kandayic toparoke!"

Kocti Midianiuyic indini ananka yinkarani, yenyirani yiruo weno. Akakaeni Israiliuc yareno yen yimakinkake yereya yofae Midianiuc yiwakuro koware. Yeni amucno ukami yirureni Israiliuyic makakaci yiwakureno. 120,000 Midianiuci pukeno mini nurami. Kocti Israiliuc yofaemi.

Kidioni yenyic kinic inowani anasi wanta teno. Kidioni iyem micno kowani temi, weni yemi indaemi, nacde kori rini Midianiuc yinda maya maya mareka fonon temi. Yeni Kidionimi amucna koriuci ameno.

Afo Kidioni mini koriucponi yicnom prisiuc ewayom yinan anecne ken uwaremi. Yeni kukande umac koctinpaci manteyonic eno. Afo Kocti Israiliuc yewekemi umani yimemi, newarafi yeni umac koctinkaci mantewano. Kocti yenyic namuko danini yereni yireno. Yeni Koctin yeweken yofaino wani indaomi, Kocti ena yofaim waintan yimemoni.

Micneyon andai amucna yaci ampamemi: Israiliuc numoc urane, Kocti yemi umani yimenini, yeni yindun waekeno. Kocti yen yiwikananim wainta danami yofa intemi. Amucna orande yankac onimi, Kocti amucna yofaim waintauc danimi Israiliuyic namuko kinke yofaeno.

Icnaimi, yeni Koctinkaci kinic inanimi indaeno, ena amampaten dukeyonic irani. Iyeci weni eran dukenaci iyac wenafi, miyi weyan yiwikemi yiruintimi winani. Kocti mini indaini afonkemi, yeni indaeyonic memi kimi yimemi.