6. Kenge, tegherere ndani pare Mbapira 6 Jesusi ne muhongi ndani mwirukithi

Balangkas: From Matthew and Mark. 24 sections. It has a picture book to go along with the recording.

Bilang ng Talata:423
Wika:Thimbukushu
Tema:Life of Christ; Multiple themes
Tagapakinig:General
Istilo:Monolog
Klase:Bible Story
Antas ng kaalaman:Unassigned
Layunin:Evangelize and Teach
Kawikaan mula sa Bibliya:Unknown
Katayuan:Approved

Ang talatang ito ay panimulang gabay para sa pagsasalin at pagrerekord sa ibang mga wika.Dapat ito´y naaangkop sa ibat ibang kultura at mga wika upang ito´y maging makabuluhan sa anumang lugar na pag gagamitan. May ilang mga salita at kaisipan na maaaring mangailangan ng mas malawak na paliwanag o maaaring ipagpaliban ang paggamit para sa ibang mga kultura.

Salita ng Talata

Mwingeneno

Diyuwa dyodiwa, mwiye tukuwanekere namuhongi ghomukuru. Dina dyendi ne Jesusi. Kenge kuthiperende mumbapira dho thinadiwiru ndani fikure kuthiperende apa sho yuve mughuma ghu. (Mughuma)

Thiperende 1 Jesusi ghana kuhonga hanu

Thiperende 1 Jesusi ghana kuhonga hanu

Mateghusi 5

Muthiperende thi, Jesusi ne kuna kuhonga hanu yoku hatera kwa Nyambi. Jesusi gha shwayire kwa Nyambi, ndani aye mwana Nyambi ghopithendi. gha dimuka yoyihe yokuhatera kwa Nyambi. Nyambi ne yo gha tu vareka twahe, ndani pithendi vene Nyambi ghoghushemwa. Nyambi ne gha pongoka ene hanu mbadi hakumithamo difumanekero di dya mu roghera ye, no ghurwedhima ghu wa muroyera ne, wa pira mumwawo. Awo kughayara yoyimango nokutenda yitenda yoyimango, gho ha yakunuka kwa Nyambi no ha guva wa Nyambi. Ene Nyambi gha tumine Jesusi mu kuhonga hanu eshi ngepi edi sho hamudimuke no ha wane ghurwedhima wendi. Gheyire mu kuhuthera po ghundambo ghopakatji ka Nyambi no hanu no kuhutha hanu kwa Nyambi. Gheyire mukuturapo ghurwedhima wa Nyambi mwa wanu pakushimba ye honyi dhawo mu mwendi thinda. N̂anyi ni mu tongwere keho eshi yinye eyi gha hongire hanu Jesusi apa gha karire pakaye, podiyo eshi mu kone kukuhonga yoyingi yokuhatera kwa Nyambi ghoshemwa ghomuyumi. (Mughuma)

Thiperende 2 Tushema ndhugho tuwadi

Thiperende 2 Tushema ndhugho tuwadi

Mateghusi 7:24-27

Jesusi gha thimwetwedhire thithimwetwedha thokuhatera kwa warume hawadi pathiperende thi. Gha ningire eshi, “Yomuhe ghokuyuva man̂ando ghange no kughatenda, gha pitura yira murume ghomaghano yu gha tendire ndhuwo dhendi padiwe. Mvura gha hotokire, ruhandjo rwa poposhire, nodipepo dya pumurire mundhugho dhi. Ene mbadi dha wire, yoyishi ha dhi tendera pamawe. Yomuhe ghokuyuva man̂ando ghange nokupira kughatenda, gha pitura yira murume ghomuyero yu gha tenderire ndhugho dhendi mudishata. Mvura gha hotokire, ruhandjo rwa poposhire no dipepo dya pungire nokupumura mundhugho dhiya. Paghuhura ndhugho dha wire no dha hanyaghukire.”
Twa kona natwe kutendera yipara yetu yopamatatekero gho ngcamu. Jesusi ne yomatatekero ghetu gho ngcamu. Twa kona kukutha yihonga yendi. Ngeshi ha tu tendi man̂ando ghendi, ngo mbo ghana tu ghamwena mukuwitha Shatani no mipepo dhendi dhodhihe, pofotji noku yighayara yetu yoyimango yomuyipara yetu. Jesusi mbo ghana kara matanarero ghetu nokutupiterera ngambi munako dho dhikukutu. (Mughuma)

Thiperende 3 Munyenge ha kona kughu mona

Thiperende 3 Munyenge ha kona kughu mona

Mateghusi 5:14-16

Kenge, oyu munu pathiperende, gha di no munyenge. Yinye eyi gha tendithanga kumunyenge mudikokore? Ghofotji gho po wa harume ghana kwaterera munyenge wendi kuwiru podiyo shi ghumunekere keheyu gha di mundhugho. Katughuru ghumwe ghomuyero. Aye ne kokuhoreka munyenge wendi kwishi dho thikote. Jesusi yomunyenge ghokaye ndani gha tu neghedha ndhira dho kwa Nyambi. Aye gheyire mukuna tu shwayitha mughufumu ghomakokore gha tu tware mughufumu gho thishe. Ngeshi ku tuna kurupera mumwendi, kutambura yihonga yendi nokupara mumwayo, hanu hamwe kukona ha mone munyenge wa Jesusi mu mwetu. Jesusi gha ningire eshi, “Mu munekere munyenge wenu kwa wanu hamone yitenda yenu yoyiwa podiyo eshi hafumanekerepo wihetu ghomudiwiru.” (Mughuma)

Thiperende 4 MukaRoma ghana kupumura mu Juda

Thiperende 4 MukaRoma ghana kupumura mu Juda

Mateghusi 5:38-42; HakaRoma 12:19

Apa gha tungire Jesusi muditunga dyawaJuda, hamutundakure homu Roma hawa raghurire. Parumweya mashurundate gha waka Roma, nga hawa pethanga nonyinya. Thika dyodi ghuna kumona mushurundate ghana shimbi thivata thakatughuru yu. Yinye keho sho gha kone kutenda katughuru yu? Jesusi gha tongwerire hanu eshi, “Mwa huthanga ghuyi. Ngeshi ghumweya ghana kungcambura kuditama dyorudyo, mupirwere karo dimweya. No ngeshi ghumweya ghana shana kushimba hembe ghoye, muthighe karo gha shimbe no baki ghoye.” Mbadi twa kona kuhutha ghuyi, kwa wa hana tu yipithanga. Fumu Nyambi gha ghamba eshi, “Y okuhutha nyara ne yange no mbo na ruweritha.’’ Nyambi n̂anyi ghakuhumbithe awa hana kutenda ghuyi. Mahumbithero gha, kukona gheye moghuno ghuparo endi pakufa. Ene Nyambi kuna kutuhonga eshi kuhutha ghuhunga kughuyi pakutenda yinu yoyiwa. Gha tu shanena eshi tu tende ghuwa kwa wa n̂ore dhetu, kuthigherera nokukandadheka wa hana kutukuta. (Mughuma)

Thiperende 5 Kuraperera kwa Nyambi

Thiperende 5 Kuraperera kwa Nyambi

Mateghusi 6:5-15

Pathiperende thi harume hawadi kuna kuraperera. Ghofotji gho powa harume gha nemana panunda muthitarata, kuna kuhukuruka mandapero ghomare eshi, kehe yu gha mumone no kumutanaghura. Jesusi gha ningire eshi, “Ngeshi kumunakuraperera mwa kara yira hakadifurumeko, owa, haka kukumonekitha ngeshi kuhana kuraperera. Ghushemwa nakumutongwera ha wana kare yiruwera yawo.” Kokughamba Jesusi eshi, “Ngeshi ku ghuna ku raperera wingene mundhugho, yandhere thero no raperere kwa wiho ghokudhira kumona, na wiho ghokumona yokunda yo mbo gha kuruwera. Ndani, ngeshi kumuna kuraperera mwa vurithanga man̂ando yira hahayidena, awo kughayara eshi n̂anyi ha wa yuvere paman̂ando ghomare.
Mwa kara thika wo. Yoyishi wihenu gha dimuka yoyiheya eyi mwa nyanda kughutho ghokuyimuromba. Muraperere eshi: ‘Wihetu ghomudiwiru, difumane dina dyoye. Ghu fumu ghoye wiye, mahimeno ghoye hagha tende yira mudiwiru kemo nopamuve. Yidya yetu yokehe diyuwa ghutupeko dyarero. Tuthiyerere mirandu dhetu, thika kenge di tuna kuthiyereranga hakamirandu dhetu. Wa twingeneka mumayerekero, ene ghu tu komonone kughumango.’” (Mughuma)

Thiperende 6 Muyi ghana kukuna ghurugha

Thiperende 6 Muyi ghana kukuna ghurugha

Mateghusi 13:24-30, 36-43

Murume ghomuyi gha yendire ghaka kune ghurugha mudipya mu ha kunine. Hanu wa ne ha nyathi wathinda shadipya. Ghurugha wa kurire yira yimena yoyiwa. Thinda shadipya kadi gha konine ku shwayitha ghurugha ghu, yoyishi sho dhi yiperere no mbuto dhodhiwa, gha tatererire kate pa mukesho. Ndani po gha tongwerire hakakukesha eshi ha torore mo mbuto mwene no haka tumekere ghurugha. Nyambi ne yothinda shadipya. ndani Shatani yo muyi. Shatani gha tura ghuyi mwa waguva wa Nyambi muno mukaye. Ene apa rwa kurikanya ruvedhe, Jesusi n̂anyi gha kwiye karo, n̂anyi gha kuna taghure hayi nowa hakurupera mwaNyambi no kumufumaneka. Jesusi n̂anyi gha kuna shimbe hatawi wahe owa ha mukurupera haka kare nendi kuroruheya. Ene kowa ha mu shwena Jesusi, n̂anyi haka pwe kuvukumena mudirara dyomudiro omu mbo ghaka wa hanyawera Nyambi. (Mughuma)

Thiperende 7 Jesusi nawanuke

Thiperende 7 Jesusi nawanuke

Mateghusi 18:1-6; 19:13-15

Kenge! Diyuwa dimweya hanu ha retire hanuke kwa Jesusi. Hashanine eshi Jesusi gha kandadheke hanuke no kuwa raperera. Hakathishongero waJesusi hashanine kushinga hanuke. Ene Jesusi kadi ya mu rogherere no gha ghambire eshi, “Mu thiye hanuke heye kukwange, mwawashinga, podiyoshi ghufumu ghomudiwire ne wawo.” Karo Jesusi gha ghambire kwawakathishongero wendi eshi, “Ghushemwa na kumutongwera, shimengwa mukutjindje ndani ghomukare yira wa hanuke, ngo mbadi mbo mwingena mughufumu waNyambi. Hanu hohakuru mughufumu waNyambi wo wa hakumbirupitha yira hanuke.” Ene kowa hakununeka ndani nokughayara eshi awo ne mudyo shemwa kupiterera hamweya awo ne kadi ha kathishongero waJesusi hoghushemwa. (Mughuma)

Thiperende 8 Mudithi no ndjwi

Thiperende 8 Mudithi no ndjwi

Mateghusi 18:12-14; Johanesi 10:14

Diyuwa dimweya Jesusi gha tongwerire hakathishongero wendi eshi, “Mu koneke mbadi mwa kona kunyatha hanuke hohambiru.” Jesusi kwaghambire kohanuke wa ha karire mukatji kawo. No gha ningire shime eshi, “Ngeshi murume ghumweya gha kara nondjwi dithere dyofotji, oyu ghofotji ne kokuyongara, mbadi gha kona kuthiya makumi kwoko no mane no kwoko nodhine no kashana oyu ghana yongara ndi? Ndani ngeshi ghana ka mu wana, ghana kuhafa kupitakana ko dhi makumi kwoko no mane no kwoko no dhine dhi dhina piri kuyongara. Kemo karo kwa wihenu ghomudiwiru yihima yendi eshi ngo noyofotji temba ghopa wa hanuke yu mbo gha yongara.” Jesusi mbadi ghana shana eshi munu ghumweya gha yongare. Nyambi yo gha tenda hanu wahe mukaye. Kukwendi ha hatera. No keheyu gho kukutha Shatani, aye ghana kukara yira ndjwi yu ghoku yongara. Kokughamba Jesusi eshi, “Yame mudithi ghomuwa; na dimuka ndjwi dhange nadho karo dha ni dimuka me.” Jesusi yo ghana kukutoya eshi mudithi ghomuwa pamurandu shi aye kushana nokughamwena wa ha yongara kwa Nyambi. Jesusi shime gha wa shana wa ha yongara nokughamwena hokuyongara. (Mughuma)

Thiperende 9 Mupika ghokupira kuthigherera

Thiperende 9 Mupika ghokupira kuthigherera

Mateghusi 18:21-35

Mupika yu gha yadhimine manyinga kwa fumu ghomengi, ene mbadi gha konine kuruwera. Fumu gha tongwerire mupika yu eshi nowe no diko dyoye mupwe kughuritha kughupika. Ene mupika gha kandererire kwa fumu eshi, ni peko tango karuvedhe na kuruwere manyinga ghoye. Ene fumu gha mu fererire n̂eke mupika yu. Gha shwayithire po mukudi ghoghuhe nokumuthigha gha kayende. Apa gha shwayirepo gha kayende, mupika yu gha wanine muyendhendi yu gha mu korotire manyinga ghomapu, gho gha dhirire kumuruwera. Gha tangire kumugama katughuru yu, no kumuthineneka gha mu ruwere masherenyi ghendi. Yoyishi mbadi gha konine kumuruwera, gho gha turire katughuru yu mukashitiko kate gha kuruwere mukudi wendi. Hapika hamwe ha ka tongwerire fumu ko yi yina hokoka na fumu gha patire thikuma. “Owe mupika ghomuyi,” dyo gha ghambire, “Na kuthiyerera mukudi ghoye ghoghuhe pamurandu ghuna ni kumbera. Owe ne mbadi wakukara nothin̂eke kwa muyendhoye thikakenge na tendi kukoye we?” Na fumu gha turire mupika ghomuyi mukashitiko kate gha kumane kuruwera mukudi wendi. Nyambi ne gha tu thigherera maharwero ghetu ghomahe, natwe twa kona kuthiyerera keheyu ghana kutenda ghuyi kukwetu. (Mughuma)

Thiperende 10 Harughani hana kuwana ndjambi dhawo

Thiperende 10 Harughani hana kuwana ndjambi dhawo

Mateghusi 20:1-16

Thinda shadipya gha yendire gha kakute harughanie mu kamurughanena mudipya dyendi dyomandjembere. Ha kuyuvire eshi kuwaruwera dinyinga dyo diyuwa dyodiheya. Pa katokera diyuwa harughani heyire mukuna wana ndjambi dhawo. Munu yu gha ruwerire pakutanga yo yu ha kutire munyima. Gha rughanine vene yoyipu. Ene thinda shadipya gha karire muhunga. Gha pire katughuru yu dinyinga. Gha mupire dinyinga dyo diyuwa dyodihe. Ghokurandako oyu gharughanine dihenda dyo diyuwa. Harume hamwe ha rughanine diyuwa dyodihe. Ene harughani wahe ha wanine ndjambi dhofotji endi paro dhofotji. Harume awa ha rughanine diyuwa dyodihe ha tangire kunyeghenya, ha shanine manyinga ghomengi. Ene thinda shadipya gha ghambire eshi, “Mushere, ngo mbadi ni na kara no mu hunga kukwenu. Ngo mbadi muna tawa kuruwanena dinyinga dyofotji? Shimbe yiruwera yoye ghukayende. Na shana kuruwera murume yu na hureghera kukuta yiruwera yokukurikanya no yenu. Kadi na kara no mahimeno mukutenda kehe yino na himi no manyinga ghange ndi? Endi kukoye ne nya yoyi na kara nomuhunga?” Nyambi ne yothinda shadipya. Aye roruheya muhunga, no karo munongo. Aye ne kutenda nothin̂eke kukwetu twaheya gha tapa yokukurikanya yomakomweneno kwawahe awa ha tawa mwa Jesusi. Aye ne yitapa yonyara-nyara ene mbadi yiruwera yoyirughana yetu yoyiwa eyi twa tendanga pakaye. (Mughuma)

Thiperende 11 Hakamadi kwoko panunda dhothero

Thiperende 11 Hakamadi kwoko panunda dhothero

Mateghusi 25:1-13

Jesusi gha thimwetwedhire thithimwetwedha thokuhatera kohakamanighana dikumi, awa ha tatererire mukandi ghutameke. Mwenga ne gha tjavukire kwiya pakatji koghuthiku. Awa hakwoko hakuroyitherire mukukuwana nendi. Ha munekire maramba ghawo no ha yendire pofotji nendi kumukandi. Hakwoko hakamadi hohayero. Mbadi ha karire no maghori mumaramba ghawo, podiyo ha kona kuyenda ha kaghure maghori. Ene apa ha kahukire, hana wanine kuthero hana yandherako, gho ha kughererire eshi, “Mukadikuto! Mukadikuto! Tuyandhwerere thero.” Ene mwenga gha wa huthire eshi, “Ghushemwa na kumutongwera, mbadi na mudimuka.” Jesusi mudiwiru gha di. Aye ne yo mwenga ghodiwiru. Diyuwa dimweya n̂anyi gha kutjavukere kahuka mukaye. Mbadi ya dimuka eshi panako munye. Ene tu kuroyithere mu kuna kuwanekera nendi mukehe dino diyuwa. Jesusi n̂anyi gha kuna shimbe hendi mu kakara nendi mudiwiru. Ene gha wa ha pira kukuroghithera mbadi mbo ha ngena mudiwiru. (Mughuma)

Thiperende 12 Hekudya no hapikendi

Thiperende 12 Hekudya no hapikendi

Mateghusi 25:14-30

Ngepi di sho tu kuroyithe pakwiya Jesusi? Tegherere. Katughuru ghomudyo yu ghuna kumona pathiperende ne momukahuko kudighumbo kushwagherera kuruyendo rokayenda. Kughutho ghokuyenda gha taperire ghushwi wendi ghumweya kwawa pikendi. Kwamupika ghumweya gha mupire masherenyi makwoko ghomuwaya-waya. Mupika yu gha gha rughanithire no gha waneghene po hekudyendi masherenyi makwoko karo. Mupika ghumweya ha mu pire masherenyi mawadi ghomuwaya-waya, gho gha waneninepo karo mawadi gha hekudyendi. Apa gha kahukire hekudyawo nokuna mona edi ha gharunithire masherenyi thiwana, gho gha wa ningire eshi, “Mwarughana thiwana, hapikange mwene homakurupero. Muna kuneyi kukona kumukurupera muyinu yoyimbiru. Mbo na mutura mudyango no kumuruwera yoyikuru. Mwiye na mu shamberere pofotji nange.” Ene mupika ghoghuhatu, gha wanine dinyinga dyofotji, gha di horekire nombadi gha di rughanithire eshi, gha wanene po ghamweya. Hekudyendi gha patire no gha ningire eshi, “Ghomuyi no gho mupika ghomuva! Wa dimukire eshi, ame ne na shanine kuwanena maghuwa kushwagherera kukoye! Ngo wa turire masherenyi gha kumbanga ngo na wanena po shosho.’’ Gha mu kungurire dinyinga no gha di pire koyu gha karire no manyinga kwoko. Ndani gho gha ningire eshi, “Muvukume thi thipika thi sha ghumango panunda mudikokore, omu mbo haha kadira hanu ghukukwetjura ngaghayegho notjitju.” Jesusi yohekudya wawatawi. Ghapita mudiwiru, ene mbo ghana ka huka karo mukaye. Aye gha tapera kohakuthi wendi yitapera, no ghukaro gho kurughana yirughana yendi. Ghuwa thikuma kurughanitha keheyi twa kara nayo mukufumaneka Jesusi. Ghatoyedhera kuruwera wa ha kumukarera no matawero.

Mwingeneno 2

Jesusi gha hongire hanu yokuhatera kwa Nyambi, karo gha neghedhire eshi, gha kara no ngcamu dhodhikuru edhi dha tunda kwa Nyambi. No gha hakire kuwadimukitha n̂eke dha Nyambi dhokukwawo. Ha Juda ngahaghayaranga eshi, mahamba ghomengi gha gha karire mukatji kawo ne, yitundamo yothikuto tha Nyambi pamurandu ghomaharwero ghawo. Mumerukithero noyitetukitho yendi Jesusi, kwa shanine kuneghedha ha Isragheri ghuwa wa Nyambi. Gha hakire karo thineghedhitho thomatamekero ghoghufumu wa Nyambi, oghu hatatererire rure. Kenge kuthiperende no ghufikure thokurandako apa sho yuve mughuma. (Mughuma)

Thiperende 13 Diyoghero dya Jesusi

Thiperende 13 Diyoghero dya Jesusi

Marukusi 1:4-13

Pathiperende thi, tuna kumona Jesusi kughutho ghokutanga kuhonga hanu. Katughuru yu gha di pepinendi ne Johanesi ghomukadiyoghero. Johanesi gha yi dimukire eshi, Nyambi n̂anyi gha kutume Jesusi pakaye. Johanesi gha konekithire haJuda eshi, ha thiye ghuyi wawo no ha karere Nyambi yofotji ghoghushemwa. Awa ha tawire kuman̂ando gha Johanesi agha gha shwayire kwaNyambi awo hawa yoyire mumeyu. Diyoghero thineghedhitho eshi, hashanine Nyambi ghawa thigherere maharwero ghawo nohapirure yikara yawo no hashambererithe Nyambi. Johanesi gha ghambire eshi, “Munyima dhange ghana kumu ghoyu gha kara no ngcamu kunipiterera me. Ame na kumuyogha mumeyu, ene aye mbo ghana mu yogho nomupepo ghokupongoka.” Jesusi gheyire kwaJohanesi, naye gha shanine gha ka mu yoghe ngambi kenge kadi gha harurire. Apa gha shwayire Jesusi mumeyu, tha hokokire po thitetukitho. Diwiru dya yandhurukire nomupepo ghokupongoka waNyambi weyire papendi muthishwi tho dikutji. Diywi dya Nyambi dya shwayire mudiwiru, eshi, “Yowe mwanange, oyu na haka; no oyu na menya menyena.” Apa gha pwire kuyogha, Nyambi gha tawedherire Shatani gha mu yereke Jesusi. Shatani gha rughanithire man̂ando ghaNyambi mughumbumba mu kumuyereka. Ene Jesusi gha withire Shatani mu kumuhuthera man̂ando gha Nyambi agha ghapwa kutjanga pangcamu dhamupepo ghokupongoka. (Mughuma)

Thiperende 14 Jesusi ghana kwitha hakathishongero

Thiperende 14 Jesusi ghana kwitha hakathishongero

Mk 1:12-20; Mateghusi 28:19,20

Munyima dhokuwitha Shatani, Jesusi gha yendire gha katange kurughana eyi gha mu tumine Nyambi. Nyambi gha tumine Jesusi kristusi pano pakaye mu kuna yaghura mbudhi dho dhiwa dha Nyambi, kuhonga hanu, kwirukitha hakakukorwa ndani kuyipitha yirughana ya Shatani. N̂ando Kristusi dhaninga eshi, “Oyu gha torora Nyambi.” Hanu ha monine eshi, gha kara no ngcamu dha Nyambi. Diyuwa dimweya, Jesusi gha yendaghurire kumbadi dhodikuruviya dya Galileya gha monine harukwata thi hane. Gho gha ningire kukwawo eshi, “Mwiye, mu ni kuthe. Mbo na mu tendi mwarukwata hanu.” Popo vene gho ha thiyire makwe ghawo no ha yendire naJesusi. Jesusi ghatororire karo harume hakwoko nohahatu. Hanu wa dikumi no hawadi ha karire hakathishongero wendi mukukara nendi nokukuhongera kukwendi. Ha monine yitetukitho yi gha tendire Jesusi gho ha dimukire eshi kwa Nyambi gha tunda. Munyima hakathishongero wa Jesusi ha karire Hapostoli, kutongora eshi oyu gha pwa kutuma. Ha yaghurire mbudhi dhodhiwa dha Jesusi Kristusi ndani herukithire hakakukorwa mudina dya Jesusi. Munyima Jesusi gha wapire ngcamu kupitera mwa mupepo ghokupongoka. Ha karire no ngcamu dhokumipepo dhodhimango podiyo eshi ha dhi shwayithe, ndani kutenda yitetukitho yoyihe. Munyima, dho kukumithamo thitambo thendi mukaye, kughutho ghokuhuka Jesusi mudiwiru, gha pire hakathishongero wendi marawero eshi, “Muyende mu ka tende hanu hakathishongero wange mu marudhi ghomahe, mu kawayoghe mudina dyawihe ndani no dyamwana ndani nomwamupepo ghokupongoka, ndani mu ka wa honge mu kukwata yoyihe eyi na mu rawera.” (Mughuma)

Thiperende 15 Katughuru ghoyin̂ondwe

Thiperende 15 Katughuru ghoyin̂ondwe

Markusi 1:40-45

Diyuwa dimweya katughuru ghoyin̂ondwe gheyire kwa Jesusi. Gha tongamenine kughutho wa Jesusi nokumukumbera, ‘‘Ngeshi ghuna himi, kukona ghuni kenithe.’’ Hanu hoyikorwa yi nga ha wathinenekanga kakara panunda dho hanu. Hanu hamweya ha yapire kuyenda pepi nawo. Ene Jesusi gha mu fererire n̂eke murume yu. Jesusi ghamukwatire no gha ningire eshi, “Na himi, kene.” Popo vene katughuru gherukire kuyin̂ondwe yendi. Jesusi gha ningire kukwendi eshi, ‘‘Mbadi ghu yi tongwere keheyu. Ene, yende ghu kakuneghe kwamupristeri, no ghaka kukenge. Shimbe yitapa thika di yemana mumuragho wa Mosesi ngeshi ghumweya gha neruka kuyikorwa yi. Ethi ne tho sho thi kare ghushupi kwawaheya eshi, ghunapu kukenitha.” Ene murume yune ghahafire thikuma gho gha yendire ghutongwera keheyu. Jesusi ne mbadi gha parire mukukutha yitaterera endi yighayara yohanu. Aye ne gha tendire vene eyi gha mu himenine Nyambi eshi, gha yi tende. Aye gha yeyura wa ha mwagha. Gha shwayithire honyi dhamurume yu no gha mu hutherire fumwa dhendi. Aye gha ningithire murume ya gha huke mukatji kwawanu ghomu hamu tjidhire. Jesusi mbo ghana kushwayitha honyi dhoye, ngeshi ghumu kumbere. (Mughuma)

Thiperende 16 Murume yu ha piterithire pamutuya

Thiperende 16 Murume yu ha piterithire pamutuya

Markusi 2:1-12

Diyuwa dimweya Jesusi mundhugho, pakuhonga hanu man̂ando gha Nyambi. Popo harume hane ha shanine kureta katughuru ghokughara kwa Jesusi, ene pamurandu ghowingi ghohanu kadihengenine mundhugho. Podiyo ha yorire pa mutuya no hengenekire murume yu paditju. Jesusi gha monine makurupero ghawo ghokukwendi, no gha ghambire kwamukakukorwa eshi, “Mwanange ghokatughuru, maharwero ghoye ghana pu kuthigherera.” Ha kamarukwaro ha patire apa ha yi yuvire yi. Ha ghambire eshi, “Yidye ghokuthigherera maharwero shimenga Nyambi pithendi?” Kadi ha tawire eshi Jesusi kwaNyambi gha tunda. Jesusi gha rawerire katughuru ghokughara eshi, “Na kukutongwera, wimane, shimbe thirongo thoye ghokayende kudighumbo.” Popo murume yu gherukire! Mumayira gha, Jesusi gha neghedhire hanu eshi, kwa Nyambi gha tunda. Gha kara no ngcamu dha Nyambi mukwirukitha hakakukorwa, thika di gha kara no ngcamu dha Nyambi dhokuthigherera maharwero. (Mughuma).

Thiperende 17 Jesusi ghana kwirukitha dyoko dyamurume

Thiperende 17 Jesusi ghana kwirukitha dyoko dyamurume

Markusi 3:1-5

Pano tuna kumona Jesusi mundhugho dhawa Juda dhokuraperera. Hakamarukwaro nawo moha karire. Ene pakarire murume ghokughara dyoko. Dya karire diyuwa dyo Sabata, endi diyuwa dyoghukwoko noghuwadi dyomuthivike ghodi nga ha rapereranga haJuda Nyambi. Muragho ghu waghamba eshi, noyofotji temba ghokukona kurughana mudiyuwa di. HaJuda ha kengererire hamone eshi, Jesusi n̂anyi gherukithe murume yu. Jesusi gha pakerire thinga hanu shime karo nopashadyarero. Hakamarukwaro kadi ha yi tendire. Awo ha shanine Jesusi eshi gha reghe muragho podiyo ha kumu paghe. Jesusi ghepurire hakamuragho eshi, “Yipi yi hafundhwera muSabata: kutenda ghuwa endi kutenda ghuyi, kughamwena moyo endi kupagha?” HaJuda mbadiko eyi ha huthireko yoyishi ha kukutithire mitjima dhawo. Jesusi gha ghambire kwakatughuru eshi, “Ghonyonone dyoko dyoye.” Naye ghaghonyononine, nawaheya pakuyimona, dyoko dyendi dyerukire no dyatanarire karo. Kukona tu karere Nyambi, ene twa kona karo kupakera thinga hamweya. Ngeshi mbadi kemo makughero ghetu ngo gha nyara-nyara no mbadiko mudyo. (Mughuma)

Thiperende 18 Jesusi ghana kuporeritha dingundunga

Thiperende 18 Jesusi ghana kuporeritha dingundunga

Markusi 4:35-41

Pathiperende thi kuna kumona Jesusi nawa kathishongero muwato. Hana kumutjinaghanitha ha reghe dikuruviya dyodikuru. Popo dingundunga dya tangire. Meyu ghatangire kungena muwato gho wa tangire kudhama. Oku Jesusi ye muturo kudihuto dyo wato. Hakathishongero wendi ha mu pinduthire nokughamba eshi, “Muhongi, kadi ghunakukudhekera ngeshi tu rowere ndi?” Jesusi gha pindukire no gha ghambire kumupepo no mangumbi, “Porere! Nokukare Nyiki!” Popo vene dingundunga dya kuturire. Jesusi gha ningire kwawakathishongero wendi eshi, “Yinye muna kuyapera? Shime mbadi mudi nomatawero?” Ha kathishongero ha tetukire nokughamba eshi, “Yidye yu? Ngambi mupepo no mangumbi kumukutekera!” Twa yi dimuka eshi Jesusi ne Nyambi. Gha kara no ngcamu kwawaguva wahe, kumipepo noku kehe yino ghatenda. Podighoshi, tu kurupere Jesusi mukutughamwena nokutupa thiraro mumanako ghomaghukukutu. (Mughuma)

Thiperende 19 Mbuyama mu mbunga

Thiperende 19 Mbuyama mu mbunga

Markusi 5:25-34

Yoyi ghu mona yu mbuyama mumbunga ndi ? Nga shwaghanga manyinga myaka dikumi no dhiwadi. Nga yendanga rwingi kumanganga ene mbadiko oyi ha konine kutenda shimengwa dhodhotjitju vene nga yi mu reteranga. Manyinga ghendi ghomahe gha pwire kutaghera kumanganga, ene mudyango dyokukara hasha ne kokukuwedherera. Gha yuvire eshi Jesusi ne kwirukitha hakakukorwa. Gha kuningirethinda eshi, “Ngeshi ni kwate kuyivata yendi n̂anyi ni ruke.” Mbuyama gheyire mumbunga munyima dha Jesusi no gha kwatire kuthitere thendi. Gho gha shaghekire popo kuva manyinga no gha ku yuvire muyirama yendi eshi gha neruka. Jesusi gha kuyuvire eshi dhinatepuka ngcamu dhendi. Ghemanine no gha ghambire eshi, “Yidye ghana kundama kuyitere yange?” Ene ha karire hanu hohengi ha mu dhingumwetwedhire Jesusi, ene mbuyama yu gha dimukire eshi yinye yina muhokokera. Gheyire nowoma, no gha tongamenine kumapadhi no gha tongorire yoyihe mughushemwa. Jesusi gha mu huthire eshi, “Mwanange, matawero ghoye ghana kwirukitha. Kayende muthiraro no ghuna shutuka muyinyanda yoye.” Man̂ando gha Nyambi kuna kutuhonga eshi Jesusi ne shime kwirukitha hanu wa hatawa mumwendi nokumukurupera. Hengi hanu mukaye kano, Jesusi gha dimuka yomuhe no kutupakera thinga. Aye kukupakera thinga. Ghana kushana eshi wiye nowe ndani ghomukurupere. (Mughuma)

Thiperende 20 Jesusi nomwanuke ghokufa

Thiperende 20 Jesusi nomwanuke ghokufa

Markusi 5:22-24, 35-43

Jayirusi gha karire katughuru ghodikuto mungirishe dhawa Juda.
Mwanendi ghomukamadi gha korwire thikuma. Gha kethire Jesusi eshi, gha ka mwirukithe, ene kughutho ghokakuma, mwanuke gha fire. Jesusi gha ghambire kwa Jayirusi eshi, “Wayapa; ene tawe vene.” Mundhugho dha Jayirusi hanu ha dirire muyitokota, ene Jesusi gha wa shwayithire mo. Jesusi gha shimbire hakathishongero wendi na Jayirusi na muna Jayirusi hengenine mu gha karire mwanuke ghokufa. Jesusi gha kwatire mwanuke padyoko, no gha ghambire eshi, “Mwanuke, pinduke dyo na kukurawera!” Popo vene gha pindukire no gha yendaghurire. Jesusi gha wa tongwera eshi mumupe yokudya. Ghii, Jesusi gha kara nongcamu kupiterera yifa! Ghokutawa nokumukutha mbadi wakukona ha yape yifa. Jesusi ne ngcamu kupitakana Shatani, maharwero no yifa. (Mughuma)

Thiperende 21 Jesusi na mbuyama ghomutundakure

Thiperende 21 Jesusi na mbuyama ghomutundakure

Markusi 7:24-30; Mateghusi 15:21-28

Diyuwa dimweya mbuyama ghomutundakure gheyire kwa Jesusi. Mipepo dhodhimango dha nyikire mwanendi ghomu kamadighana. Ghogha kandererire kwa Jesusi gha ka shwayithe mipepo dhodhimango. Jesusi gha mu tongwerire eshi kweya kukughamwena haJuda pakutanga. Ngeshi gha ka ghamwene hamutundakure kughutho ghokaghamwena haJuda, n̂anyi yi kare yira kuna tanga kwikutitha mbwa ndani kekutitha hanuke. Jesusi gha ghambire eshi, “Thokutanga po tango hanuke hadye eyi hana shana, kadighuwa kupa ghuroto ghohanuke no kughuvukumena ku mbwa dhawo.” Mbuyama ghahuthire eshi, “Kemo fumu, mbwa nadho kudya yin̂ukumuna mwishi dho thidyero.” Jesusi gha ghambire eshi, “Matawero ghoye makuru! N̂anyi ni tende eyi ghuna kumbera.” Mbuyama gha hukire kudighumbo, gha ka wanine mipepo dhodhimango dhina mu shwagha mwanuke. Jesusi ghahaka no kughamwena hanu hokehe rudhi no matunga ghomahe. Jesusi gha tu shanena eshi tu mu kurupere yira kenge ya mbuyama ghomutundakure. Jesusi kukona kutushwayitha mungcamu dhashatani. (Mughuma)

Thiperende 22 Jesusi kwamurume ghothipurupuru

Thiperende 22 Jesusi kwamurume ghothipurupuru

Markusi 7:31-37

Hanu hamwe ha retire katughuru kwa Jesusi. Gha fire matwi kutunda kumushamurukero wendi ndani mbadi wakughamba thiwana. Ha mu kandererire Jesusi eshi gha mu kambeke nyara. Gha mu shwayithire mumbunga. Jesusi gha thipire mate ndani gho ghakwatire parudimi rwakatughuru yu . Jesusi gha kapukire kudiwiru kwa wihe no kuninga eshi, “Yandhuruke!” Popo murume gha tangire kuyuva nokughamba thiwana. Hanu ha tetukire no ha ghambire eshi, “Aye ne kutenda yinu yoyihe thiwana. Aye ne kuyuvitha hakakufamatwi hayuve nokughamba.” Jesusi yodiye gha tenda yipo yoyiheya yomuyirama yetu. Gha kara nongcamu kuyikorwa yetu. Kadiko yokumukanga ye kutenda. Kukona tu mu kumbere mukutwirukitha pofotji yira ya murume ghothipurupuru, twa kona kutongwera karo hamweya yokuhatera kwa Nyambi. (Mughuma)

Thiperende 23 Jesusi ghana kwirukitha murume ghomukunga

Thiperende 23 Jesusi ghana kwirukitha murume ghomukunga

Markusi 8:22-26:Jesaya 53:4; Jakobusi 5:13-16

Diyuwa dimweya hanu ha retire murume ghomukunga kwa Jesusi. Hakumberire Jesusi eshi, gha mwirukithe. Jesusi gha shimbire murume ya nodyoko gha mu shwayithe mumukunda. Ghathipera pameho gha murume yu nokumukambeka nyara, ha mwipura eshi, “Koyidi yi ghuna kumona ndi?” Murume gha huthire eshi, “Kuna kumona haguva; ene kuwamona yira yitondo yina kuyendaghura ghudhinguruka.” Shime karo Jesusi gha kambekire nyara pameho gha murume yu. Meho ghendi gha yandhurukire, no gha konine kumona thiwana yoyihe. Jesusi yodiye ghofotji nodyarero. Eyi gha tendire pakare no dyarero kukona gha yi tende. Bayibiri dha ghamba eshi, “Gha shimbire matjitju no mahamba ghetu.” Moghadi oyu ghana kunyanda mukatji kenu ndi? Gha kone kuraperera. Moghadi mukatji kenu yu ghana kukorwa ndi? Gha kona kwitha hakuru hongirishe ha mu raperere nokumuwetha maghadhi mudina dya Fumu Jesusi. Ndapero dhomatawero ne kukona kughamwena mukatjitju, Fumu Jesusi yo mbo gha mwirukitha no ngeshi gha harura mbo ghana pu kuthigherera. Mukutongwerange maharwero ghenu nomukuraperithange eshi, mu kare ndjewa-ndjewa. Ndapero dhamuhunga dha kara nothirughana thothikuru. (Mughuma)

Thiperende 24 Jesusi ghana kwirukitha mungaghu ghomupepo ghoghumango

Thiperende 24 Jesusi ghana kwirukitha mungaghu ghomupepo ghoghumango

Markusi 9:14-29; 2 Tim 1:10

Diyuwa dimweya murume ghumwe, gha retire mwanendi ghomungaghu kwawa kathishongero wa Jesusi. Gha wa kumberire eshi, ha shwayithe mupepo ghoghumango mwamwanendi, ene mbadi ha yi konine. Munyima gha retire mungaghu yu kwa Jesusi. Mupepo ghoghumango apa wa monine Jesusi, wa muyayerithire mungaghana. Mungaghu gha wire pamuve nogha kughandumune pamuve, nokushwagha difudhi mukanwa. Wiha mungaghu gha karire nomatawero ghomapu eshi, Jesusi ne kukona kuwaghamwena no gha ghambire kwa Jesusi eshi, “Ene ngeshi kukona ghu tu fere n̂eke tu ghamwene.” “Ngeshi ghu yi kone?” gha huthire Jesusi. “Keheyino yiredhu kowa hokutawa.’’ Wiha mwanuke gha huthire eshi: “Nina tawa; ni ghamwene no mukakupira matawero me!” Mbunga dha tjirire na dhi mone, Jesusi gha ghambire kumipepo dhodhimango, “Owe, mupepo, wa tenda mungaghu ghadhire kughamba no kuyuva, na kurawera, shwaghe mumwendi nokaro mbadi wakahukemo.” Mupepo ghoghumango wa kughererire no wa shwayire mo mwamungaghu. Mungaghu gha rarire teghetete no haguva hohengi ha ghambire eshi, “Ghana fu.” Ene Jesusi gha mukwatire padyoko no gha mwimekire pamapadhi ghendi no ghemanine. Munyima, hakathishongero hepurire Jesusi mughudhindo, “Pashanye tuna pirera kughushwaghithamo?” Jesusi ghawa huthire eshi, “Yinu yokenge kushwagha ne shimengwa mandapero.” Munyima dhoruvedhe rorupu yahokokire, hapiterithi wa waJuda ha payire Jesusi. Ene Jesusi ne gha rughanine yitetukitho yoyikuru. Gha vumbukire mwawafu. Gha withire Shatani noyifa kuroruheya. Jesusi ne ghapiterera mipepo dhodhihe no hanyambi homuno mu kaye. Jesusi gha kara nongcamu kuyinu yoyihe; Jesusi ne yo Nyambi ghoghushemwa.
____________________________________________________________
Ghuhura

Katulad na kaalaman