Vanja, Yevelela Kuenda Kala Elivulu Li 6 Yesu - Ulongisi

Outline: From Matthew and Mark. 24 sections. It has a picture book to go along with the recording.

Script Number:423
Language:Umbundu
Theme:Life of Christ; Multiple themes
Audience:General
Style:Monolog
Genre:Bible Story
Sophistication:General
Purpose:Teaching
Status:Publishable

Script Text

Ulandu

Kalunga! Enju kuenda kũliha u wa velapo alongisi vosi. Onduko yaye Yesu. Vanja koviluvialuvia velivulu li tekãvelua kuenda tuvula ociluvialuvia ci kuayimo eci o yevelela ocisungo eci

Ociluvialuvia Ca 1: Yesu O Longisa Omanu

Ociluvialuvia Ca 1: Yesu O Longisa Omanu

Mateo 5

Vociluvialuvia cilo Yesu o kasi loku longisa omanu eci ci tiamela ku Suku. Yesu wa tunda ku Suku, kuenje omo Eye eye Omola a Suku wongunga, wa kũliha cosi ci tiamela ku Suku. Suku o kola, kuenje omo omanu va kuete ovisimilo kuenda ovilinga vĩvi, ovo va litepa la Suku. Puãi Suku wa tuma Yesu Kilistu ha longisa omanu ndomo ovo va tẽla oku u kũliha. Cilo, ame hu lomboluila eci Yesu a longisa omanu eci a kala kilu lieve okuti lovevo amako vali oku lilongisa eci ci tiamela ku Suku yocili ukuamuenyo.

Ociluvialuvia Ca 2: Olonjo Vivali

Ociluvialuvia Ca 2: Olonjo Vivali

Mateo 7:24-27

Vociluvialuvia cilo Yesu wa tuala esapulo lialume vavali. Ulume umue wa tunga onjo yaye kesenje (kohanda/kewe). Esenje ociseveto cimue ca kola. Eci ombela yeya, onjo ka ya kupukile. Ulume ukuavo wa tunga onjo yaye keseke. Eci ombela yeya, onjo yaye ya wa.
Yesu wa popia lulume wa tungila onjo yaye kesenje hati ove umunu ukualonge.
Etu tua sesamelavo oku tungila omuenyo wetu kociseveto ca kola. Yesu Eye-muele, eye ociseveto cetu ca kola. Etu tua sesamela oku pokola kelongiso liaye. Nda etu tu U pokola , Eye o laika oku tu kuatisa oku yula Satana kuendavo ovisimilo lovituwa vĩvi tu kasi lavio vomuenyo wetu. Yesu o laika oku linga ongusu yetu, kuenje otembo yosi o laika oku tu songuila ndaño muele kolotembo viohali.

Ociluvialuvia Ca 3: Ocinyi Ci Sesamela Oku Muiwa

Ociluvialuvia Ca 3: Ocinyi Ci Sesamela Oku Muiwa

Mateo 5:14-16

Vanja! Omanu o lete vociluvialuvia cilo, va kasi lolondiyelo viavo povaka. Ove o linga nye locinyi vowelema? Ulume umue wa tulika ocinyi caye ha eci ocinyi komanu vosi va kasi vonjo. Omunu ukuavo wa wulua. Eye wa soleka ocinyi caye vohumba. Yesu Eye ocinyi coluali, kuenje Eye o tu lekisa onjila yenda ku Suku. Eci etu tu U kolela loku pokola Kondaka Yaye kuenda oku yi kuama, omanu vakuavo va tẽla oku muila ocinyi ca Yesu vokuetu. Yesu wa popia hati: "...ocinyi cene ci taimile ndoco kovaso omanu okuti va mola ovilinga viene viwa, kuenje va sivaya Isiene o kasi kilu."

Ociluvialuvia Ca 4: U Roma O Yula U Yudea

Ociluvialuvia Ca 4: U Roma O Yula U Yudea

Mateo 5:38-42; Roma 12:19

Eci Yesu a kala vofeka ya va Yundeya, ovingendeleyi via va Roma via va vialele. Olonjanja vimue, asualali va Roma va va yambula loku va tata lãvi, ndomo o ci lete. Asualali lavovo va tambula ovikutu vialume. Omunu wa sesamelele oku linga nye? Yesu wa popia lomanu hati: "Ko ka litamalali londingaivi, puãi u wa ku veta ocikusi ketama liondio u pongoluila ketama liepili. Umue nda o yongola oku ku sombisa ha tambula ombinja yove, wihavo ocikutu cove."

Etu ka tua sesamelele oku fetuluinya ava va tu valula. Ñala hati: "Efetuluinyo liange. Ame fetuluinya." Suku o laika oku kangisa wosi amamako loku linga ũvi. Efetuluinyo liaco ci tava okuti li lingiwa vomuenyo ulo pamue vali vomuenyo wiyako ca lomboloka okuti kovaso yokufa. Suku puãi o tu longisa oku feta ũvi luwa. Ca sunguluka oku linga ciwa kovanyali vetu.

Ociluvialuvia Ca 5: Oku Likutilila Ku Suku

Ociluvialuvia Ca 5: Oku Likutilila Ku Suku

Mateo 6:5-15

Vociluvialuvia cilo tu lete omanu vavali va kasi loku likutilila, ca lomboloka okuti va kasi loku vangula la Suku. Umue o tãi vokololo, loku pitulula olohutililo via longa. Eye o yongola okuti omanu vosi vo mola loku u sivaya pamue oku u pandiya. Suku ka tambulula kohutililo ndoyo. Puãi etu tua sesamela oku linga ndomunu ukuavo tu lete vociluvialuvia cilo. Eye o kasi loku likutilila ku Suku vokati konjo yaye okuti lomue u lete (te lika Suku). Eye wa liketisa haeye ukuacili eci a kasi loku vangula la Suku. Yesu wa popia hati: "... eci o likutilila, iñila vohondo yove kuenje oku yila epito, likutilila ku So o kasi vuyombeki, kuenje So o lete covuyombeki o ku muisa onima. Kuenda vali eci vu likutilila ko ka pitololi ño-o olondaka vioku patekela ndeci vakualofeka va lingainga, momo va soka vati, Tu yeviwa omo olondaka vietu via lua. Ko ka lisokisi lavo, momo Isiene wa kũliha ovina vio sesameli osimbu ka wa vi pingili. Oco likutilili ndeci, hoti,
'A Isietu o kasi kilu. Onduko yove yi sumbiwe. Usoma wove wiye. Ocipango cove ci lingiwe posi ndeci ci lingiwa kilu. Tu ĩhe okulia kuetu kuetaili. Tu ecele oku lueya kuetu ndeci tu ecaila ava va tu lueyela. Ku ka tu songuile veyonjo, puãi tu popele kuvi. Momo usoma wove; unene wove; ulamba wove; oloneke vi enda ño-o hũ. Amen.'"

Ociluvialuvia Ce 6: Unyali O Kula Osoka

Ociluvialuvia Ce 6: Unyali O Kula Osoka

Mateo 13:24-30, 36-43

Omanu vãvi va kũla osoka vepia liokaliye. Omanu vaco ava va linga ovanyali va muele yepia. Osoka ya lisetahala ca lua lombuto yocili. Muele yepia ka tẽlele oku tukũla osoka, momo nda hacoko o nyolavo ovikũla viwa pamue ombuto yiwa. Eye wa talamela toke kotembo yoku ungula.
Noke eye wa kongela pamosi ale wongolola osoka loku yi yoka. Kovaso yaco oco ongolola noke ombuto yiwa.
Suku wa lisoka lukuepia, kuenje Satana eye ondingaivi. Voluali lulo, Satana wa kũla omanu vãvi pokati komanu va Suku. Kotembo ya sokiyiwa Yesu o keya vali. Eye o laika oku tepa vãvi kuava va kolela kuenda va pokola Suku. Yesu o laika oku kala la vana vosi va tava kokuaye kuenda vo kolela, ha va kala laye olotembo ka vi pui.. Puãi vosi vana ka va tava ku Yesu va ka enda vo Ngehena la Satana, va ka enda vocitumalo cohali ka yi pui, haico ca litepa la Suku.

Ociluvialuvia Ce 7: Yesu Kuenda Omala

Ociluvialuvia Ce 7: Yesu Kuenda Omala

Mateo 18:1-6, 19:13-15

Vanja! Eteke limue omanu vamue va nena omãla ku Yesu. Ovo va yonguile okuti Yesu o sumuluisa omãla loku va likutilila. Olondonge via Yesu via seteka oku lupula omãla. Puãi Yesu ka ci sanjukilile, kuenje wa popia hati: "Ko ka va tutuiyi oku iya kokuange, momo Usoma wokilu wava va lisoka lavo." Yesu wa popiavo lolondonge viaye hati: "Ocili mopia lene siti Lalimue eteke wiñili vusoma wokilu, te nda vu pongoloka ho lingi ndotumãla."

Omanu va velapo vusoma wokilu te va liketisa ndotumãla. Vosi vana va kasi lepela, va lipanda kuenda va sima vati va velapo vakuavo, haloñame viociliko via Yesu.

Ociluvialuvia Ce 8: Ungombo Kuenda Omeme

Ociluvialuvia Ce 8: Ungombo Kuenda Omeme

Mateo 18:12-14; Yoano 10:14

Eteke limue Yesu wa longisa olondonge viaye kuenje wa popia hati: "Kali lutate okuti ka vu sepuisa kamue kava vatito." Yesu wa kala loku tukula omãla va kala pokati kavo. Kovaso yaco wa popia hati: "Nda umue o kasi locita colomeme, kuenje yimue ya nyelela, ka si hẽ olomeme akuĩ ecea lecea kolomunda ha endi oku sanda eyi ya nyelela? Nda o yi sanga, o yi sanjukila ca lua, akuĩ ecea lecea ka via nyelile ci sule. Oco hacipango ca Isieneko o kasi kilu okuti kamue kamosi kava vatito ka taka."

Yesu ka yongola okuti umue o tinduka kokuaye loku nyelela. Suku wa lulika omanu vosi voluali lulo. Vosi va tiamela kokuaye. Nda umue o kuama Satana, waco o-o wa lisoka lomeme ya nyelela.

Eteke limue Yesu wa popiavo hati: "Ame ndungombo uwa. Ñũliha olomeme viange. Olomeme viange vi ñuama ame..." Yesu o tukuiwa ungombo uwa, momo eye weya "oku vanjiliya kuenda oku popela" vosi vana va kasi ocipãla la Suku. Yesu haimo a kasilili loku vanjiliya kuenda oku popela ava va nyelela."

Ociluvialuvia Ce 9: Ukuenje Ka Ecela

Ociluvialuvia Ce 9: Ukuenje Ka Ecela

Mateo 18:21-35

Ukuenje umue wa levalele soma yaye olombongo via lua, eye puãi ka tẽlele oku vi feta. Kuenje soma wa handeleka okuti ukuenje waco kumue lepata liaye va landisiwa ha va lingi apika. Puãi ukuenje wa livondela soma ho talamelapo kamue ha feti ofuka yaye. Cime wo kuatela ohenda. Wo wecela ofuka yaco yosi, kuenje wo linga hati kuende.
Kovaso yaco ukuenje waco u wa sanga ukuavo omo va talavayela kumue wa kala lofuka yaye yimue yitito hayo ka telele oku feta. Wa fetika oku kisika ukuavo ho feti lonjanga ofuka yaye. Omo ukuavo ka kaile lepondolo lioku feta lonjanga. Eye wa fetika oku kisika ukuavo oku feta olombongo viaye. Omo eye ka tẽlele oku feta lonjanga olombongo viaye, wo kapa vokayike toke a feta ofuka yaye. Ukuenje umue ukuavo wa sapuila soma eci ca kala loku pita. Cime wa tema ca lua, kuenje wa popia laye hati: "Okuenje wa huka, nda ku ecela ofuka yina yosi omo wa meya. Ka ca ku sesamelele hẽ oku linga ukuẽle ohenda ndeci nda ku linga ohenda?" Cime wa kapa ukuenje ũvi vokayike toke a feta ofuka yaye yosi.
Etu tua sesamela oku ecela wosi wa tu lingila cimue cĩvi. Kuenje Suku o laika oku tu ecela ovina viosi vĩvi tua linga. Puãi etu tua sesamela oku likekembela ocili esino lietu.

Ociluvialuvia Ce 10: Olonalavayi Vi Tambula Ofeto Yavo

Ociluvialuvia Ce 10: Olonalavayi Vi Tambula Ofeto Yavo

Mateo 20:1-16

Omunu umue wa tunda yu wa ka pañinya olondingupange ha vi talavaya vepia liaye okuti ocumbo cayuva. Eye wa litava lolonalavayi oku va feta osingu veteke. Eci ekumbi lia enda olonalavayi vieya ha vi tambula ofeto yavo. Omunu watete a fetikila, yuna wa sulako oku lalekiwa. Eye wa linga lika okopange katito. Puãi mueleacumbo wo kuatela ohenda. Wo wĩha osingu. Caco oco ca kala ofeto yeteke liosi liupange. Omunu wa vali wa talavaya onepa yeteke. Omunu ukuavo wa talavaya eteke liosi. Puãi olondingupange viosi via tambula olombongo vimosi. Omunu wa talavaya eteke liosi wa lisiõsiõla, wa hoyako. Wa yonguile oku tambulapo vali olombongo. Puãi mueleacumbo wa popia hati: "Okuetu sia ku liañele. Kua navele hẽ osingu? Tambula cove,kuende. Ame muele nda panga oku eca ku wa sulako ndeci nda ku ĩha ove. Ka ci tava hẽ, ame oku linga ndeci manga levi viange? Ca ku kokela hẽ ocikupe omo nda linga ohenda?"

Suku o kasi nda mueleacumbo. Olonjanja viosi Eye ukuesunga. Puãi eye layevo uwa haeye ukuahenda. Eye eca ocali comuenyo ko pui ku wosi o pokola Yesu. Ca linga ocali ka ci fetiwa, eci cosi ciwa tu lingila kulo kilu lieve.

Ociluvialuvia Ce 11: Afeko Vatalo Kosamua

Ociluvialuvia Ce 11: Afeko Vatalo Kosamua

Mateo 25:1-13

Yesu wa tuala olusapo luafeko ekuĩ. Ovo va kala loku talamela oku pitila kua sandombua kuenda oku fetika kuocipito cuvala. Vatãlo va lunguka, puãi vatãlo o lete palo, va wulua. Eci sandombua eya ocipikipiki vokati kuteke, vatãlo va lunguka va liangiliyila oku ka lisanga la sandombua. Ovo vangiliya olondiyelo viavo, kuenje va enda laye kocipito. Epito lia yikiwa konyima yavo. Afeko vatãlo va wulua ka va kalie lulela volondiyelo viavo. Kuenje ca va kisika oku enda oku ka landa kamue okolela. Eci va tiuka va kaluka vati: "A Ñala. A Ñala tu yuluileko!" Puãi sandombua wa kumbulula hati: "Mopia lene ocili hati: Siu wi."

Cilo Yesu o kasi kovailu. Eye eye sandombua yokovailu. Eteke limue eye o laika oku moleha ocipikipiki kulo kilu lieve. Etu ka tua kũlihile eteke liaco ci ka lingiwa. Puãi eteke leteke tua sesamela oku liangiliyila oku lisanga laye. Momo Yesu o laika oku ambata wosi u sole loku u pokola ha kala kumue laye kovailu. Puãi valua va setahaila afeko vatãlo va wulua va ka siala konyima.

Ociluvialuvia Ce 12: Ñala La Vakalei Kaye

Ociluvialuvia Ce 12: Ñala La Vakalei Kaye

Mateo 25:14-30

Tu tẽla oku liangiliya ndati eci Yesu eya?
Yevelela. Ulume wa kemãla o lete ndeti vociluvialuvia cilo ndopo a tiuka kungende umue wa tumala osimbu yalua. Osimbu handi ka katukile, eye wa sia vimue povikuata viaye lakuenje vaye. Ku umue wa sia olombongo vitãlo. Ukuenje wa linga lavio omilu, kuenje wa sangela cime caye olombongo vikuavo vitãlo. Ukuenje ukuavo wa tambula olombongo vivali. Eye wa sangela cime caye olombongo vikuavo vivali. Eci cime cavo a tiuka, kavali kavo wa va ĩha onima. Puãi ukuenje watatu, wa tambuile olumbongo lumosi, olumbongo luaco wa lu seleka. Lacimue a linga ha vokiya kolumbongo a tambula. Cime wa tema, momo ukuenje waye wa kala ukuawesi. Eye wo tambula olumbongo luaco kuenda wo tundisa vonjo.

Yesu Kilistu eye Cime cu wa tava. Eye wa enda kovailu, puãi o laika oku tiuka kilu lieve. Eye wa kolela okuti akuenje vaye va laika oku U kuama loku lomboluila vakuavo eci ci tiamela Kokuaye. Eye wa eca Espilitu Liaye li Kola ha li va kuatisa oku U pokola. Ciwa ca lua oku linga cosi tu tẽla ha tu sumbila Yesu. Eye wa likuminya oku eca onima kuava vosi vo vumba locili.

Ulandu

Yesu wa longisa omanu eci ci tiamela ku Suku, puai eye wa va lekisavo okuti eye muele wa kuata unene u tunda ku Suku.. Vanja koviluvialuvia kuenje tuvula eci ci kuayimo eci o yeva ocisungo.

Ociluvialuvia Ce 13: Yesu O Papatisiwa

Ociluvialuvia Ce 13: Yesu O Papatisiwa

Marko 1:4-11

Vociluvialuvia cilo tu lete Yesu eci handi ka fetikile oku longisa omanu. Ulume o kasi laye, Yoano Upapatisi. Yoano wa kũlihile okuti Suku o laika oku tuma Yesu koluali. Yoano wa kala loku lungula va Yundeya oku siapo olonjila viavo vĩvi ha va vumbi Suku. Vosi vana va tava kondaka ya Yoano ya tunda ku Suku va papatisiwa lovava. Epapatiso lia kala ondimbukiso yokuti ovo va pongolola olonjila viavo, kuenje va kasi loku sanjukila Suku. Yoano wa popia hati: "Vonyima yange mu ñuayi u wa velapo, ame ndi sule, kuenje si sesamela oku petama si itula olunjita luolohaku viaye. Ame ndo papatisi lovava, puãi eye u papatisi le Espilitu li Kola."

Palo, Yesu weya ku Yoano, momo wa yonguilevo oku papatisiwa, ndaño ocili okuti eye ka la linga ekandu. Eci Yesu eya kovava, kuli cimue ci komohisa ca pitako. Ilu lia yuluka, kuenje Espilitu li Kola lia Suku lio lokila ndopomba. Ondaka ya Suku ya tunda kilu yiti: "Ove vumolange wa soliwa. Nda ku sanjukila."

Kovaso yepapatiso liaye, Suku wa tava okuti Satana o yonja Yesu. Poku yonja Yesu Satana wa pengisa Ondaka ya Suku. Puãi Yesu wa yula Satana poku vangula laye lolondaka vi tunda Vondaka ya sonehiwa lunene we Espilitu li Kola.

Ociluvialuvia Ce 14: Yesu O Kovonga Olondonge Viaye

Ociluvialuvia Ce 14: Yesu O Kovonga Olondonge Viaye

Marko 1:12-20; Mateo 28:19

Kovaso yoku yula Satana, Yesu wa amako loku linga upange Suku o tumila oku linga. Suku wa tuma Yesu Kilistu koluali lulo oku kunda Ondaka Yiwa ya Suku, loku longisa omanu, loku sakula olombeyi kuenda oku nyola ovopange a Satana. Eteke limue eci Yesu a kala loku enda kokalunga ka Galileya, wa mola vavali vamanji okuti Simono la Andeleu va kala loku imba awanda avo vovava, momo ovo va kala anyanga olosi. Yesu wa popia lavo hati: "Ndo ñuami oco ndu lingisi anyanga vomanu." Haico va siapo awanda avo, kuenje va enda la Yesu." Yesu wa molavo vamanji vakuavo vavali okuti Tiango la Yoano. Ovo va kala loku angiliya awanda avo. Lavovo va kuama Yesu tuli a va kovonga. Yesu wa nola alume vakuavo ecelãla. Ekuĩ liaco la vavali va linga olondonge ha va kala laye kuenda oku lilongisa laye. Noke olondonge via linga Ovapostolo va Yesu, ca lomboloka okuti olonumiwa viaye. Va kunda ondaka yiwa ya Yesu Kilistu kuenda va sakula olombeyi vonduko ya Yesu. Noke, Yesu wa va ĩha unene le Espilitu li Kola u yula aspilitu ãvi loku a lupula kuenda oku linga ovikomo vñi viñi.

Kuenje osimbu handi Yesu ka tiukilile kilu wa eca kovapostolo vaye ocihandeleko cilo citi: " ...Oco kuendi, ka tavisi olofeka viosi oco va linge olondonge. Va papatisili vonduko ya Tate la Mõla kuenda espilitu li Kola. Va longisi oku linga ovina viosi ndo kundiki..." Eci ca lomboloka okuti wosi o yongola oku linga ondonge ya Yesu etaili te wa kuata ombili yoku pokola kovihandeleko viaye kuenda oku sapula komanu vakuavo Ondaka yiwa ya Yesu lunene we Espilitu li Kola. Kuenje Yesu Kilistu wa pinduiwa o laika oku enda lavo kuenda Suku o laika oku lingila upange vokuavo.

Ociluvialuvia Ce 15: Ulume Ukuavilundu

Ociluvialuvia Ce 15: Ulume Ukuavilundu

Marko 1:40-45

Eteke limue omunu umue ukuavilundu, (uvei umue uvi calua u veta ketimba), weya ku Yesu. Eye wa kekama kolongolo loku u livondela hati: "Nda o ci panga o tẽla oku ñayisa." Omanu vakuavo va kala lohele yoku kala ocipepi lomunu waco omo liuveyi waye puãi Yesu wo kuatela ohenda yalua. Yesu wo lamba kuenje wa popia laye hati: "Nda ci panga. Kaya." Vonjanja yaco muele haico a kaya kovilundu viaye. Esanju a kala lalio lia luile ca lua, kuenje wa ci sapuila omanu vosi.

Ekandu lia lisoka lovilundu. Olio li tu tepa ku Suku kuenda komanu vakuavo. Puãi nda tu iya ku Yesu eye o tu yelisa kakandu osi.

Ociluvialuvia Ce 16: Ulume Iyilila Kolusoka

Ociluvialuvia Ce 16: Ulume Iyilila Kolusoka

Marko 2:1-12

Eteke limue Yesu wa kala vonjo oku longisa omanu Ondaka ya Suku. Kelivala liaco, alume vakuãla va yonguile oku nena ku Yesu omunu wa fa ovolu, puãi omo liowiñi, ka va tẽlele oku iñila. Oco va tuiya olusoka kuenje vo lowisila vepangu liaco. Yesu wa mola ekolelo vo kuatela. Kuenje wa popia lu wa fa ovolu hati: "Amolange akandu ove a eciwa." Asongui vamue vetavo va tema calua eci va ci yeva, kuenje va popia vati: "Helie o tẽla oku ecela akandu nda ha Suku ko lika?" Ovo ka va kolelele okuti Yesu wa tunda ku Suku. Kuenje Yesu wa popia lu wa fa ovolu hati: "Mopia love siti, Votoka. Tikula ula wove. Kuende konjo yove." Vonjanja yaco muele haico ulume a kaya!

Lonjila eyi, Yesu wa lekisa komanu okuti Eye eye wa tunda ku Suku. Eye o kuete unene wa Suku woku sakula ovoveyi ndeci a kasi lunene woku ecela akandu. Etu vosi tu yongola oku sakuiwa eci tu kasi loku vela, puãi ocina ca velapo oku pinga ku Yesu oku ecela avakandu etu kuenda oku tambula kokuaye ocali comuenyo ko pui.

Ociluvialuvia Ce 17: Yesu O Sakula Eka Liulume

Ociluvialuvia Ce 17: Yesu O Sakula Eka Liulume

Marko 3:1-5

Palo tu lete Yesu vonembele ya Suku. Asongui vetavo haiko va kala. Kuenje kua moleha omunu o kasi leka lia siõsia. Ca kala ketele Liesambata pamue eteke liepanduvali kosimanu eci va Yundeya va fendaila Suku. Ocihandeleko cavo ci popia hati lomue wa sesamela oku linga upange umue veteke liaco. Va Yundeya va lavulula Yesu ha va tali nda hẽ o sakula veteke liesambata ale ndati. Yesu wa kuatela ohenda omanu, kuenje wa ci linga. Asongui vaco vetavo ka va ci lingile. Eci ovo va yonguile oku mola Yesu oku sinila (teya) ocihandeleko ha vo wipaya. Yesu wa pula asongui vetavo hati: "Kesambata hẽ ci tava oku linga ciwa ale, ele oku linga civi? Oku popela omuenyo ale, ele oku ipa?"Va Yundeya ka va popele cimue momo itima viavo via siva. Yesu wa popia lomunu hati: "Õlola eka liove." Eye wa liõlola, kuenje wa limbuka okuti eka liaye lia kala ciwa kuenda lia pama.

Etu tua sesamela oku fendela kuenda oku pokola ku Suku, puãi tua sesamelavo oku tata vakuetu. Nda hacoko, efendelo lietu li linga liupolokoso halio ka li kuata elomboloko.

Ociluvialuvia Ce 18: Yesu O Tulumula Ehunguhungu

Ociluvialuvia Ce 18: Yesu O Tulumula Ehunguhungu

Marko 4:35-41

Vociluvialuvia cilo tu lete Yesu lolondonge viaye vowato. Ovo va kala loku yoka laye ociva cinene. Vocitukulukila kua moleha ehunguhungu. Ovava a fetika oku samohaila vowato, kuenje owato wa fetika oku vomba. Yesu wa kala loku pekela ketako liowato. Olondonge viaye vio pasula via popia hati: "Olongisi, ka ci ku vindula ohele nda tu nyoleha?" Yesu wa pasuka kuenje wa popia lofela lakimba; oku teta onimbu wa popia lokalunga hati: "Liweka, tulumuha!" Vonjanja yaco muele haico ehunguhungu lia tulumuha. Yesu wa popia lolondonge viaye hati: "Wa salukili nye? Ka wa kuateli handi ekolelo?" Olondonge via komoha, kuenje via popia hati: "U helie nga okuti ndaño ofela lokalunga viu pokola?"

Tua kũliha okuti Yesu Kilistu eye Suku kuenda o kuete unene komanu vosi, lo kaspilitu kuenda ovina vikuavo eye a lulika. Oco etu tu tẽla oku kolela okuti Yesu o tẽla oku tu teyuila loku tu ĩha ombembua koloneke viohali.

Ociluvialuvia Ce 19: Ukãyi Vowiñi

Ociluvialuvia Ce 19: Ukãyi Vowiñi

Marko 5:25-34

O lete ukãyi vowiñi? Eye wa kala loku pita osonde ci soka ekuĩ kalima kalima avali, kuenje ca kala loku vokiya, ohĩse lakamue. Eye wa yeva okuti Yesu wa kala loku sakula olombeyi. Oco wa popia lutima waye hati: "Ndaño ndamba ño kuwalo waye ñaya." Ukãyi wa kuama Yesu kumue lowiñi, kuenje wa lamba kuwalo waye. Vonjanja yaco muele osonde haico ya kotoka, kuenje wa limbuka okuti etimba liaye li kasi ciwa, wa kaya. Yesu wa kũlihile okuti unene wo tunda. Oco wa talama, kuenje wa popia hati:"Helie wa lamba kuwalo wange?" Omanu va lua va kala la Yesu, vo ñuala, puãi ukãyi u wa kũliha eci ca pita laye. Eye weya lusumba walua kuenda wa luluma, kuenje wa petamela polomahi via Yesu yu wo sapuila ocili cosi. Yesu wa popia hati: "Amolange, ekolelo liove lia ku popela. Kuende lombembua. Uveyi wove wa ku tunda."

Ondaka ya Suku yi tu sapuila okuti Yesu haimo a kuetele epondolo lioku sakula olombeyi vina vio kolela havio vi kasi lelavoko kokuaye. Voluali lulo muli omanu va lua, kuenje Yesu wa kũliha omunu lomunu kuenda o va tata. Eye o ku tatavo. Eye o yongolavo okuti ove iya kokuaye kuenda u kolela.

Ociluvialuvia Ca 20: Yesu Kuenda Omola Wa Fa

Ociluvialuvia Ca 20: Yesu Kuenda Omola Wa Fa

Marko 5:22-24, 35-43

Eteke limue Yesu wa kala loku enda konjo yulume umue onduko yaye Yairo. Yairo wa kala omunu umue wa kemala vekongelo lia va Yundeya. Omolaye okofeko wa vela ca lua. Eye wa vilikiya Yesu heya oku u sakula, puãi osimbu handi Yesu keyile, omola wa fa. Yesu wa popia la Yairo hati: "Ku ka kuate ohele, kolela ño." Vonjo ya Yairo, omanu va kala loku lila ca lua, puãi Yesu wa va handeleka oku tundila posamua. Yesu wa kuata olondonge viaye vitatu kumue la Yairo kuenda ukãyi waye, kuenje va iñila vohondo omo mua kala omola ocivimbi. Yesu wa kuata omola peka, kuenje wa popia hati: "Ofeko, hu sapuila siti, Pasuka." Vonjanja yaco muele haico a pasuka, kuenje wa ñuala ñuala. Yesu wa va handeleka hati, wĩhi okulia.

Ocili Yesu o kuete omoko yoku yula olofa. Vosi vana vo kolela kuenda vo kuama ka va sesamela oku yokokela okufa.

Ociluvialuvia Ca 21: Yesu Kuenda Ukãyi Ocingendeleyi

Ociluvialuvia Ca 21: Yesu Kuenda Ukãyi Ocingendeleyi

Marko 7:24-30

Eteke limue ukãyi umue ocingendeleyi weya ku Yesu. Ocilũlu civi ca kuata omolaye ufeko. Eye wa amako loku livondela Yesu okuti o tundisa ocilũlu civi. Yesu wo lomboluila okuti eye weyilila oku kuatisa tete va Yundeya. Nda wa kuatisa tete ovingendeleyi ci lisoka loku lisa tete olombua osimbu kua lisile handi omala. Yesu wa popia hati: "Omala ve kute handi, momo ka ca sungulukile oku nyañula ombolo yomala loku yimba kolombua" Puãi ukãyi wa kumbulula hati: "Oco muele a Ñala, haimo lumue olombua vi lialia olosisi viomala vemi liomesa." Oco Yesu wo kumbulula hati: "Omo wa popia ondaka oyo, kuende, omolove ocilũlu co weca." Ukãyi wa enda konjo, kuenje wa sanga okuti ocilũlu cĩvi co tunda.

Yesu o sole kuenda o kuatisa omanu vo ka apata aiñi aiñi kuenda vo kolofeka viosi. Yesu o yongola okuti etu tu U kolela, ndeci ca linga ukayi ocingendeleyi. Yesu wa pama ca lua, kuenje o tẽla oku tu upa kunene wa Satana.

Ociluvialuvia Ca 22: Yesu Kuenda Omunu Ocisitatui Haeye Ocitende

Ociluvialuvia Ca 22: Yesu Kuenda Omunu Ocisitatui Haeye Ocitende

Marko 7:31-37

Omanu vamue va nena omunu ku Yesu. Eye wa kala ocisitatui tunde kokucitiwa kuaye haeye ka tẽlele oku popia ciwa. Ovo va livondela Yesu oku u kapa ovaka aye. Eye wa tunda lomunu, va sia owiñi yu va enda pocitumalo co pulika. Yesu wa kapa imuine viaye vovatui omunu. Noke wa siya kuenje wa lamba kelimi liomunu. Yesu wa imba ovaso kilu ku Suku yu wa tula omuenyo, kuenje wa popia hati: "Situluka!" Vonjanja yaco muele haico omunu a tẽla oku yeva kuenda oku popia ciwa. Omanu va komoha ca lua, kuenje va popia vati: "Ovina viosi
wa vi linga nye ciwa! O yevisa ovisitatui, kuenda ovitende vi popia."

Etu vosi tua sesamela oku kuata elomboloko lielongiso eli li tunda Vondaka ya Suku. Suku o vanguila letu Vondaka yaye. Ndeci Yesu a sakula ovatuĩ omunu u undeti ha yevi olondaka kuenda elimi liaye ha vangula lomanu, haico Yesu a tẽlavo oku tu iha ombili yoku yevelela Ondaka ya Suku okuti tu tẽla oku kũliha ocipango ca Suku vomuenyo wetu. Caco eci Eye o ci linga lupange Wespilitu lia Suku vokuetu. Ndeci ca pita locisitatuĩ, etu tu ka kuata epondolo lioku sapuila vakuetu ovina via Suku.

Ociluvialuvia Ca 23: Yesu O Letulula Ovaso Omeke

Ociluvialuvia Ca 23: Yesu O Letulula Ovaso Omeke

Marko 8:22-26

Eteke limue omanu va nenavo ulume umue omeke ku Yesu. Ovo va pinga Yesu oku yi sakula. Yesu wa kuata omeke yaco, kuenje wa enda layo kusenge (kofeka). Wa yi siyila vovaso, yu wa yi kapa ovoko aye, kuenje wo pula hati: "O lete cimue?" Ulume wa tambulula hati: "Ndete omanu, puãi ndi va lete va enda ndoviti." Oco Yesu wa kapa vali ovaka aye kovaso aye. Oco ovaso aye a letuluka, a vanja, kuenje wa mola ciwa ovina viosi.

Satana ka yongola okuti etu tu iya ku Yesu loku kuata elomboloko Liondaka yaye. Eci tu kolela Yesu eye o tu letulula kuenda o tu ĩha elomboloko liwa liocili caye. Caco eci ci lingiwa lupange we Espilitu liaye li Kola. Tu sukila oku likutilila eteke leteke oku u pinga okuti o tu ci lingila.

Ociluvialuvia Ca 24: Yesu O Sakula Ukuenje O Kuetiwe Locilũlu

Ociluvialuvia Ca 24: Yesu O Sakula Ukuenje O Kuetiwe Locilũlu

Marko 9:14-29

Eteke limue ulume umue wa nena omolaye kolondonge via Yesu. Eye wa va pinga oku tundisa ocilũlu ca vĩha vomolaye, puãi ovo ka va ci tẽlele. Noke eye wa nena ukuenje ku Yesu. Eci ocilũlu ca vĩha ca mola Yesu ca tanyisa ca lua ukuenje. Ukuenje wa kupukila posi loku tiñoloha kuenda oku tutumuha efelefele vomela waye. Isia yukuenje wa kala lekolelo liokuti Yesu o tẽla oku va kuatisa, kuenje wa popia la Yesu hati: "Puãi nda o tẽla cimue, tu linge ohenda, tu kuatise." Oco Yesu wa popia laye hati: "Nda ndi ci tẽla! Ovina viosi vi tẽliwa lu o kolela." Isia yukuenje wa tambulula hati: "Ñolela. Nda nda kamba ekolelo ñuatise!" (Eci owiñi wa kala loku ongoloka ha va tali), Yesu wa popia locilũlu ca vĩha hati: "Acilũlu cutende lusitatui, hu sapuila siti, Weca. Ku ko kuate vali." Ocilũlu ca vĩha ca kaluka, ca liyula, kuenje ca tunda vukuenje. Ukuenje wa linga ndocivimbi, kuenje va lua va popia vati: "Wa fa!" Puãi Yesu wo kuata peka, wo votola, kuenje wa votoka.

Noke olondonge via pula Yesu pulika hati: "Nye ka tua tẽlelele oku ci tundisa?"Yesu wa va tambulula hati: "Evi viepata eli, ka ci tava oku vi tundisa te lolohutililo."

Kovaso yoloneke ka via luile tunde eci ovina evi via lingiwa, asongui va Yundeya va ipaya Yesu. Puãi haicovo Yesu a linga ocilimbu ca velapo ovilimbu vikuavo. Eye wa pinduka kolofa. Wa yula Satana kuenda olofa oloneke ka vi pui. Yesu wa velapo okuti aspilitu osi kuenda olosuku viosi viokilu lieve vi sule. Yesu o kuete unene wovina viosi, Momo Yesu eye Suku yocili.

Related information