Lii Lolo Be'a

Lii Lolo Be'a

Samenvatting: Short Bible stories from Genesis through the ascension. How to become a follower of Jesus. 40 sections. It has a picture book to go along with the recording.

Scriptnummer: 395

Taal: Dhao

Thema: Sin and Satan (Temptation, Deliverance, Light/Darkness, Sin, disobedience, Satan (the devil)); Christ (Jesus, Our Substitute, Resurrection of Jesus, Son of God, Saviour of Sinful Men, Birth of Christ, Ascension, Sacrifice / Atonement, Death of Christ, Life of Christ); Eternal life (Salvation, Eternal / everlasting life, Broad & Narrow Ways); Character of God (Love of God, Holy Spirit, Grace and Mercy, Nature, character of God, Word of God (the Bible), Power of God / Jesus); Living as a Christian (Fruit of the Spirit, Prayer, petition, New Nature, Worship, Witnessing, Church, Christianity, Second Birth, Obedience, No other gods, idols, Peace with God, Leaving old way, begin new way, Forgiveness, Faith, trust, believe in Jesus, Peace (between men), Children of God, Family, relationships, Spiritual Life, Christian values); Life event (Death); Bible timeline (Creation, Law of God, End Time, Second Coming, Gospel, Good News, People of God); Problems (Materialism, Evil Spirits, demons, Fear, Problems, troubles, worries)

Gehoor: General

Stijl: Monolog

Genre: Bible Stories & Teac

Doel: Evangelism

Bijbelse verwijzing: Extensive

Toestand: Publishable

Tekst van het script

Introduction, Part A

Introduction, Part A

Salama oo! Lii ne'e ne, bisa j'aj'i lii dhu nèti babe'a kapai titu kèna, hia miu. Lii ne'e ne, j'aj'i lii lolo be'a kahèi, pala mi dhèu aa'i-aa'i. Ladhe ku, gambar ne'e la. Èle na, pasa dhilu nanene paie-iie, te ja'a neo lole Lii Lolo Be'a ne hia miu. Ladhe miu tadèngi lii sasadhu sèmi ne'e (music), heka bhoke kèna, ho laladhe gambar dhu leo. Ladhe miu neo padhue-padhai j'ara lalole nèti gambar èci, sèna ka mi neo pakarèi, do miu neo pangee sasoa na, miu bisa patèje eele lii lolo ne'e, madhutu dadèi miu. Èle ku heka pakako hari kaset kèna. De, mi ladhe ku gambar partama ne.

Gambar 1: Lii lolo dhu uru tèka

Gambar 1: Lii lolo dhu uru tèka

Kejadian 1:1-5; Lii soda nèti Mazmur 90:2

Ngaa-ngaa èci sa dhae, te ngaa Lamatua dhu mema le. Nèngu ka paj'aj'i liru dènge rai-haha. Taa èèna, aa'i-aa'i dhu dhae mèci mèka, aa dhu jahu lulu-lulu era. Lod'o Ama Lamatua paj'aj'i èle rai-haha ne, ka Na paredha saraa, sèna ka heo. Hèia, Na paj'aj'i madha lod'o, hèru, dènge hua-hètu. Ama Lamatua ne, be'a seli eele. Nèngu ka, lalau se'e, aa'i-aa'i.

Gambar 2: Lii Holo Nori Ama Lamatua

Gambar 2: Lii Holo Nori Ama Lamatua

Yesaya 45:18-19; Ibrani 4:12; Lii soda 19:7-10

Sasuri ètu dara gambar ne'e, ngara na Alkitab. Ne'e ne ka dhu peka na Lii Holo Nori Ama Lamatua, dhu lole hia èdhi lalole dènge dadèi Na. Ama Lamatua dhu bhera boe ca dhèu sa, Na sue èdhi aa'i-aa'i ti. Ngaa-ngaa dhu ja'a peka padhai dènge miu se, kore nèti Lii Holo Nori Ama Lamatua.

Gambar 3: Ama Lamatua paj'aj'i liru, rai-haha, dènge isi ra aa'i-aa'i

Gambar 3: Ama Lamatua paj'aj'i liru, rai-haha, dènge isi ra aa'i-aa'i

Lii lolo dhu uru tèka pasal 1:1-25

Ama Lamatua ka paj'aj'i aa'i mèu-mèu. Ladhe Na lii, aku Nèngu na: "J'aj'i saraa!" Hèia saraa j'aj'i dènge ka, sama sèmi lii Na peka deo na. Na paj'aj'i liru. Na paj'aj'i dhasi. Dènge lii padhai Na ka, rai mango j'aj'i dènge. Dhu mamuri aa'i-aa'i, Nèngu ka hèi dhu paj'aj'i si, sèmi: i'a ètu dara èi, manu bhui ètu talora liru, aa dènge rupa-rupa badha-manu. Dho-dhoka dènge lii padhai lii Na di, ka ngaa-ngaa aa'i-aa'i ra j'aj'i. Ropa ladhe Nare, pa'ue-ai Na se'e, dara Na karej'e. Lula ngaa dhu Na tao, mema be'a titu kèna!

Gambar 4: Lii lolo nèti Adam dènge Hawa

Gambar 4: Lii lolo nèti Adam dènge Hawa

Lii lolo dhu uru tèka 1:26-31, 2:7, 3:24

Ama Lamatua paj'aj'i mone uuru, dènge bhèni uuru. Dhèu mone, Na pangare Adam, aa bhèni na, Hawa. Na pua dua ra, sèna ka laladhe paie ngaa-ngaa dhu Na tao nare sèra. Ra pea ètu era be'a èci, dhu Ama Lamatua tao hia dua ra. Ètu era ne'e, Ama Lamatua tèke eele boe si mesa-mesa ra, te ngaa Na mai pa'asu-pareo dènge ra, aa Na mai padhai lii dènge ra hèi. Na pa'angalai dènge ra. Hua aaj'u-hua aaj'u nèti aj'u ètu era èèna, Ama Lamatua hia si ra'a. Dho-dhoka hua aj'u cakapua di ètu era èèna, Na kai si baku ra'a. Te ngaa ca lod'o, musu Lamatua, Dhèu Aae nidhu mai ka dadugu dua ra ètu era pea rèngu na. Na gagai si, sèna ka Adam dènge Hawa nanene ia ka lii Lamatua. Lula nèti èèna ka, dua ra ra'e hua aj'u dhu Lamatua kai si deo na. Dènge tatao rèngu ne'e ka, dua ra manahu asa dara sasala, lula rèngu se sisu paredha Ama Lamatua. Tuu dai èèna ka, babe'a pa'èci rèngu dènge Ama Lamatua ma'ète eele. Ka Ama Lamatua babège eele si, nèti era pea-palu'u ra dhu hua iia na. Krèi nèti èèna ka, dhèu aa'i-aa'i tao sasala, dènge sisu paredha Ama Lamatua. Lula nèti èèna ka, babe'a pa'èci dhèu rai-haha ne, mola heka dènge Lamatua. Dènge j'ara ne'e ne ka, èdhi pasae tare sasusa-j'aj'èra, papèda-tarègu, dènge mamadhe-mamopo.

Gambar 5: Lii lolo lula tatao Kaen dènge Habel

Gambar 5: Lii lolo lula tatao Kaen dènge Habel

Lii lolo dhu uru tèka 4:1-16; Roma 3:23

Adam dènge Hawa matana ana mone, dhèu dua. A'a, ngara na Kaen. Ari, ngara na Habel. Habel ne tao pakarej'e dara Ama Lamatua, te ngaa Kaen aad'o. Nèti èèna ka, Kaen tèka dara dènge Habel. Ka dara ca lod'o sa, na hake pamadhe ari na Habel. Lula bhabhelu Kaen ne'e ka, Lamatua huku ne. Lamatua nasa titu kèna, ladhe dhèu tao sasala. Dadèi Na ka, pa'angalai pabe'a-be'a dènge èdhi dhèu rai-haha ne. Te ngaa, lula èdhi se loe boe nèti tao sasala, babe'a pa'èci èdhi dènge Lamatua ma'ète eele.

Gambar 6: Kapa Noh

Gambar 6: Kapa Noh

Lii lolo dhu uru tèka 6:1-22; 2 Petrus 3:9

Ana-èpu Adam dènge Hawa, ae titu kèna. Te ngaa, rèngu se ca ropa èèna ka. Rai eele boe nèti tao sasala, dènge sisu paredha Lamatua. Bhabhelu-katub'a rèngu se kura boe, te ngaa asa hino. Nèti èèna ka, Lamatua pama'ète nare le ètu dara Na, ho pamadhe aa'i si, asa dara èi lala. Dhoka abhu ca dhèu di, dhu roca boe nanene, dènge pama'ète boe sanao-maena mi Ama Lamatua. Dhèu ne, ngara na Noh. Ama Lamatua pua Noh, sèna ka tao kapa aae cue, ho na abhu mamuri lod'o èi aae lala. Hèia Noh pamata heka, na sab'a dènge ka, madhutu sèmi mia dhu Lamatua paredha. Te ngaa sasab'a ne, na'e lod'o toke tèu. Lod'o-lod'o na sab'e kapa ne, na loe boe pasanède dhèu aa'i-aa'i, aku nèngu na: Lamatua neo huku dhèu rai-haha ne, dènge j'ara hia èi aae lala mi rai-haha ne, sèna ka pamadhe aa'i si. Te ngaa, ca dhèu sa ro'o boe nanene lii na. Dhèu-dhèu se'e, loe boe nèti tao sasala-sasigo.

Gambar 7: Èi aae lala

Gambar 7: Èi aae lala

Lii lolo dhu uru tèka 7:1-24

Ama Lamatua pua badha-manu lasi asa Noh. Ka na pamaso si asa dedha kapa. Hèia Noh dènge dhèu èmu na, ana mone na dhèu tèlu, dènge dhèu èmu ra, ca'e asa dedha kapa lasi. Rengu aa'i-aa'i ra dhèu aru, dènge badha-manu deo sa. Ropa rèngu tesa aa'i ètu dedha kapa, hèia Lamatua bèdho pa'èra-èra babèdho kapa ne. Èle pidhu lod'o, ka Lamatua sabhori èi èj'i mai nèti dedha-liru, aa madha èi-madha èi sabhoka nèti dara rai. Èi ne ca'e dhu loe boe ciki sa. Ropa dai èpa nguru lod'o, rai-haha ne, èi aae dhu lale kab'èle nare le èèna. Dhèu mia dhu maso boe asa dara kapa ne, dènge heka era sanao. Ka èci sa ata boe, aa'i-aa'i ra cène, hèia madhe aa'i si mèu-mèu. Te ngaa Noh, dhèu èmu na, dènge ana niki ra, abhu soda-mole, lula rèngu se lèka, aa ra madhutu paredha Lamatua.

Gambar 8: Li lolo nèti Abraham, Sara, dènge Isak

Gambar 8: Li lolo nèti Abraham, Sara, dènge Isak

Li lolo dhu uru tèka 9:18-19, 17:1-8, 21:1-7; Mat. 1:1-16

Nèbhu-nèbhu ka, ana-èpu Noh asa bèba-kacanga. Nèti èèna ka, udhu-rasa ra, ae kahèi. Ana-èpu Noh se'e, èci ka Abraham. Abraham ne'e dèi nanene, aa na sue Lamatua. Ca tèka, Ama Lamatua pa'èki lii pajaji dènge Abraham, dhu peka na, nèngu dènge Sara, bèli-camèda ana-èpu ra, j'aj'i dhèu-dhèu kapai. Te ngaa taa èèna, Abraham dènge dhèu èmu na Sara, dhu heka bhoro le, aa rèngu se, dènge mèka kolo. Masi ka sèmi èèna, dua ra kèpe pa'ère, lii pajaji Lamatua deo na. Abraham ne, dhu dènge ana mone ca dhèu, na abhu nèti bhèni leo. Ngara ana ne, Ismael. Ismael ne'e ka, j'aj'i baki nèti dhèu-dhèu Arab. Te ngaa, lod'o Abraham dènge Sara ètu dara heka bhoro ne, ra abhu ana mone ca dhèu, madhutu sèmi lii pajaji nèti Lamatua. Ka ana ne, ra pangare na, Isak. Lamatua peka na, bèli-camèda Nèngu tao Isak dènge ana-èpu na, j'aj'i berkat mi dhèu aa'i-aa'i ra ètu rai-haha ne.

Gambar 9: Musa dènge atora-atora nèti Lamatua

Gambar 9: Musa dènge atora-atora nèti Lamatua

Keluaran 19:1-25, 34:27-32

Isak ne, ana-èpu na, asa bèba-kacanga, ka j'aj'i dhèu ae-ae. Nèti rèngu se'e ka, j'aj'i dhèu-dhèu Isra'el. Ana-èpu Isak ca dhèu, ngara na Musa. Musa ne, dhèu dhu dèi nanene aa lèka Ama Lamatua. Ca tèka, Ama Lamatua paroa nare Musa, sèna ka ca'e la'e asa ledhe èci. Hèia Ama Lamatua peka dènge ne, atora-atora, sèna ka Musa peka padhai dènge dhèu-dhèu Isra'el. Lod'o Musa puru mai nèti ledhe èèna, dhu nèd'u dènge lei hadhu dhu dule atora-atora nèti Ama Lamatua. Dadèi Lamatua ka, ladhe dhèu aa'i-aa'i ra madhutu j'ara-j'ara sèra.

Gambar 10: Canguru Atora nèti Ama Lamatua

Gambar 10: Canguru Atora nèti Ama Lamatua

Keluaran 20:1-17

Jara-j'ara dhu Ama Lamatua pangèd'u mi Musa na, aa'i-aa'i ra be'a. Dhèu dhu madhutu Atora sèra, nèngu abhu berkat nèti Ama Lamatua. Atora-atora nèti Ama Lamatua ne'e ka, nuka: èdhi hud'i sue ku Lamatua, pahaha iisi, dènge nanene dho-dhoka mi Ama Lamatua di. Èdhi baku tao mèdha ho sogo-tagu si. Èdhi baku ale kolongara Ama Lamatua iia-iia dara. Pake calodo ètu dara camigu, sèna ka ae nèti sasab'a la'a ho pahaha iisi mi Ama Lamatua. Ana-ana nanene pabe'a-be'a ku dènge re'a pakabua ina dènge ama. Baku pamadhe dhèu. Ana mone-ana bhèni
baku tao j'ara karehe. Baku ag'o, dènge kapode-kabèli dhèu. Baku mana'u. Baku dara dèi mèdha-panyau unu dhèu leo.

Gambar 11: Korban pamèu sasala-sasigo

Gambar 11: Korban pamèu sasala-sasigo

Imamat 4:27-35; Yohanis 1:29; Roma 3:23

Dadèi Lamatua, peka na, "Cee dhu tao sala, hud'i abhu ku huku." Hahuku na, nuka mamadhe. Te ngaa, taa Musa nèd'u paredha dhèu Israel, ladhe cee dhu lab'a atora Ama Lamatua, nèngu hud'i roro ku ana kalèbho ci'u hia Lamatua, sèmi tadha na nèngu ele-ho'a. Ana kalèbho ne madhe, sèna ka gati dhèu dhu lab'a atora Ama Lamatua. Aa ana kalèbho ne madhe, sèna ka sui nare sasala-sasigo, dhu na tao èèna. Ana kalèbho ne, j'aj'i mi tadha dhu paj'uj'u asa korban èci, dhu kapai risi eele ètu lod'o-lod'o dhu mai. Nèti èèna ka, Lamatua dhu tao tèke le j'ara ho hia Ana Na mai asa rai-haha ne, sèna ka madhe, ho pamèu eele sasala-sasigo èdhi aa'i-aa'i ti.

Gambar 12: Lamatua pamoa ho pua dhèu mai, sèna ka pala bagi hia èdhi mamuri

Gambar 12: Lamatua pamoa ho pua dhèu mai, sèna ka pala bagi hia èdhi mamuri

Lukas 1:26-38, Matius 1:18-25

Pèri-pèri ngasu tèu dhu la'e, Ama Lamatua pua ana pajuu Na èci nèti surga, mai nèti lii mamoa Na mi ana bhèni ca dhèu, ngara na Maria. Maria ne, dhu tèka le mèdha Yusuf. Te ngaa ana pajuu Lamatua ne lii dènge Maria, peka na: "Èu ne pakarej'e le dara Lamatua. De, bèli-camèda èu mora iisi ana mone ca dhèu, ho mu pangare ne, Yesus." Te ngaa Maria dhaa, na: "Ja'a ne pa'èci kèdhi mèka dènge dhèu mone! Tasa mia ka, ja'a bisa dènge babia?" Hèia ana pajuu Lamatua ne bala, aku nèngu na, "Sèmi ne'e, Maria! Èèna na, Roh Lamatua dhu Mola-Mèci mai sa èu. Dènge j'ara sèmi èèna ka, ana dhu èu mora iisi èèna, tare'a-re'a dhu mola-mèci, lula Nèngu na Ana Ama Lamatua." Ana pajuu Lamatua ne, padelo iisi na mi Yusuf kahèi, ètu dara nii na. Na peka dènge Yusuf sèmi ne'e ka, "Yusuf! Mage èu madha'u kahèi, ladhe èu leo dènge Maria, lula dhu na kad'o na, nèti Roh Lamatua dhu Mola-Mèci. Bèli-camèda, Maria nara iisi ana mone ca dhèu, mu pangare ne, Yesus." Ngara Yesus ne, sasoa na, dhu hia mamuri mi dhèu. Èle ka, Yusuf kabi dènge Maria, te ngaa ra pa'èci boe, sèmi dhèu èmu kamali, toke Maria nara iisi Ana ne.

Gambar 13: Maria nara iisi Lamatua Yesus

Gambar 13: Maria nara iisi Lamatua Yesus

Lukas 2:1-20

Tèu èèna, dhèu aae hia paredha, sèna ka dhèu aa'i-aa'i lèpa asa rai èta èsu ra, ho madhutu sensus. Ka Maria dènge Yusuf kako nèti Nasaret asa rae Betlehem. Betlehem ne, rae èta èsu nèti bèi-baki Yusuf. Dai Betlehem, pasagraha dhu pènu aa'i le dènge dhèu. Nèti èèna ka, Maria dènge Yusuf pea ka ètu dara oka badha. Ètu era ne ka, Maria nara iisi Ana Mone ca dhèu, nuka Yesus na. Dara mèda èèna kahèi, ana pajuu Lamatua èci, mai nèti surga, padelo iisi mi pèri-pèri ana madhenga badha ètu pada sod'a, dhu ètu lii'u kota. Ana pajuu ne lii, aku nèngu na, "Ja'a ne mai peka dènge dhèu aa'i-aa'i, lii lolo dhu be'a èci. Deo ne'e ne, ca dhèu ina, nara iisi le Kristus! Kristus ne, dhèu dhu Ama Lamatua padhadha le, krèi nèti uru ka. Lamatua hia Ne mai, sèna ka dhèu aa'i-aa'i unu mamuri!" Ropa na peka nare sèmi èèna, cag'ag'a laa ana-ana pajuu nèti surga ae titu kèna, mai pa'èci dènge ne. Hèia ra koa-kio kolongara Ama Lamatua dènge lii sod'a. Ka ana madhenge badha se, pagale èci dènge èci, aku rèngu na, "Wee! Mai lati ku laa asa Betlehem, sèna ka ta laladhe ku ngaa dhu j'aj'i ètu nèi. Ropa ra ladhe rèdhi Ana ne, ka ra palolo-lème dènge dhèu aa'i-aa'i, nèti ngaa dhu rèngu rèdhi dènge tadèngi. Dhèu se'e malaa, lod'o ra tadèngi lii lolo nèti ana-ana madhenga badha se'e.

Gambar 14: Lamatua Yesus aj'a-nori dhèu

Gambar 14: Lamatua Yesus aj'a-nori dhèu

Lukas 2:41-52, Markus 6:34

Yesus kapai ka no-noo ètu dara adhe aai Yusuf dènge Maria. Ropa Na dai canguru dua tèu, Yusuf dènge Maria lere rèti Ne, asa kota Yerusalem. Ètu era nèi, Na padhue-padhai dènge mese-mese aa dènge ama-ama agama aa'i-aa'i ra, j'ara-j'ara paredha Ama Lamatua. Hiu-hiu na Na nanene mau-mau, èle èèna ka, Na karèi, aa Na lole dènge si. Dhèu se aa'i-aa'i ra, malaa titu kèna, lula Yesus ne'a aa'i mèu-mèu j'ara-j'ara paredha Ama Lamatua. Ka ropa Yesus dai tèlu nguru tèu, hèia Na pakako sasab'a, dènge j'ara aj'a-nori dhèu madhutu dadèi Ama Lamatua. Nèti èèna ka, dhèu ae lèka Nèngu, ka ra madhutu Ne. Te ngaa abhu kahèi dhu lèka boe, ka ra lab'a Ne.

Gambar 15: Lamatua Yesus tao tadha-tadha malaa

Gambar 15: Lamatua Yesus tao tadha-tadha malaa

Markus 8:2-26, 5:35-43, 6:45-52

Ama Lamatua pangèd'u Yesus koasa kapai titu kèna. Ka Na tao rupa-rupa tadha malaa. Na pa'èla dhèu pèda nèti papèda-tarègu ra. Na puri-pa'èle dhèu bèdhu ho rèdhi hari. Na pamamuri hari dhèu madhe. Na pamau dano dènge ngèlu aae. Na kako re dedha èi. Ropa dhèu se'e se ladhe rèdhi tadha-tadha se'e, ae ka ra parcaya, peka na Ama Lamatua ka dhu pangèd'u koasa mi Yesus. Dhèu se'e aa'i-aa'i ra, malaa-maloha nèti ngaa dhu Na aj'a-nori, dènge ngaa dhu Na tao. Lamatua Yesus dènge koasa ho ladhe-leru èdhi kahèi.

Gambar 16: J'aj'èra Lamatua Yesus

Gambar 16: J'aj'èra Lamatua Yesus

Matius 27:11-31

Yesus ue nare le, j'ara-j'ara dhu nèti babe'a ae titu kèna, ka abhu dhèu ae dhu madhutu Ne. Na tulu dhèu ae, dènge Na aj'a-nori dadèi Ama Lamatua. Na padelo sasue Ama Lamatua, aa Na lole j'ara-j'ara sèna ka dhèu bisa pabe'a hari dènge Ama Lamatua. Masi ka sèmi èèna, ama-ama agama tèka dara dènge Yesus. Dara ra adhu sèmi hadhu, aa ro'o boe parcaya, peka na, Ama Lamatua ka dhu hia Yesus mai asa rai-haha ne. Ro'o boe re'a na rèngu se tao sala kahèi, aa ra ro'o boe re'a kahèi rèngu lab'a atora-atora nèti Ama Lamatua. Ama-ama agama se, lole pakapod'e ngaa dhu Yesus tao. Ra tenge j'ara rupa-rupa neo kèpe Yesus. Sordadu-sordadu hake kalabhe Yesus. Ra ènyu solo nèti aj'u padhudhu, ho ra pasolo mi kaba-kètu Yesus. Ra lalangu-madahu dènge padhède aapa Ne. Miu sanède era, lii lolo deo na, sina ma? Yesus ne, Ana Ama Lamatua. De, Nèngu ne dènge koasa ho dhedhe palaho aa'i dhèu se'e se. Te ngaa Na tao boe j'ara sèra. Yesus mau-mau, aa Na lab'a boe kahèi, lula Na ne'a na se'e se j'aj'i madhutu sèmi dhu Lamatua peka tèke le.

Gambar 17: Ra paku pamadhe Lamatua Yesus ètu aj'u palèbha

Gambar 17: Ra paku pamadhe Lamatua Yesus ètu aj'u palèbha

Markus 15:22-39; 1 Petrus 2:21-24

Sordadu-sordadu paku patarenge Yesus ètu aj'u palèbha. Ka ngi'u Na, lalodhe ka, ètu aj'u palèbha ne, toke Na madhe. Taa èèna, rèngu se dhu tema le, huku pamadhe dhèu bhelu dènge j'ara sèmi èèna. Palere-lere dènge Yesus, dhèu se'e paku pamadhe kahèi, dhèu parapo dhèu dua. Dhèu èci re g'ana, aa èci hari re kariu Yesus. Masi ka dhèu aae-dhèu kapai parisa le lii langu Yesus, dhu ra abhu boe sasala Na èci sa. J'ara-j'ara se'e, sasoa na, Yesus pasae nare babia, dhu madhutu iia-iia na, lèke boe mi dedha Nèngu. Babia ne hud'i èdhi ku dhu pasae. Èdhi aa'i-aa'i ti, ka dhu tao sasala-sasigo, de dhu mola ka, èdhi ka dhu dui tare hahuku ne. Te ngaa Yesus tago nare sasala èdhi se, sèna ka èdhi j'aj'i dhèu mola. Ladhe èdhi mangaku sasala èdhi, ho pakaj'èu nèti sasala se, Lamatua saku èèle aa'i sasala sèra. Nèti èèna ka, ja'a peka dènge miu, mi parcaya la Yesus, sèna ka miu abhu soda-mole toke dai mia-mia.

Gambar 18: Lamtua Yesus mamuri hari

Gambar 18: Lamtua Yesus mamuri hari

Lukas 23:50 - 24:9

Ropa ra paku pamadhe Yesus ètu aj'u palebha, musu-musu Yesus pangee na, rèngu segi le Yesus, lula Na madhe le. Te ngaa sèmi boe ngangee rèngu èèna! Lod'o Yesus madhe, angalai-angalai Na nedhe rèti ngi'u aae Yesus, lasi padhane asa dara ro'a dhu tao nèti hadhu. Hèba ro'a ne, ra saguru dènge hadhu kabela aae èci! Te ngaa asa camèda na, Yesus mamuri hari nèti mamadhe Na. Lod'o èèna, ina dhèu pèri-pèri lasi asa era ro'a, ho lalau-lalo'o ngi'u aae Yesus, madhutu ad'a ra. Dai nèi, rèngu capa cag'ag'a èèna ka, lula hadhu saguru hèba ro'a na, dhu loli eele le. Aa ngi'u aae Yesus aad'o heka ètu dara ro'a èèna hèi. Kaca'a laa, ana pajuu Lamatua dhèu dua, padelo iisi mi rèngu, ka ra lii, peka na: "Yesus aad'o heka ètu era ne'e. Na mamuri hari le!" J'ara ne, monya boe, tare'a-re'a Na mamuri hari le. Dènge j'ara ne'e, peka na Yesus ne, tare'a-re'a Lamatua. Yesus ne mamuri taa-taa, toke dai sange ne'e ne. Mamadhe segi boe Ne. Sèmi èèna kahèi dhèu aae nidhu oo, segi boe Ne.

Gambar 19: Li lole Tomas

Gambar 19: Li lole Tomas

Yohanis 20:19-31

Ropa Yesus mamuri hari nèti mamadhe, Na padelo iisi Na mi ana-ana pajuu-paleha Na. Na padhai lii dènge ra. Na'a-ninu dèngu rèngu kahèi. Lod'o hiu-hiu Na padelo iisi Na, ana pajuu-paleha Na dhèu èci, dhu aad'o dènge rèngu. Ngara na, Tomas. Ropa mone aanga-angalai na, peka na rèngu rèdhi le Yesus, lula Na mamuri hari le, te ngaa Tomas parcaya boe. Tomas peka na, "Lod'o mia ja'a kèdhi ku dènge musi madha ja'a, aa cèlu ku ai ja'a asa ro'a hisu dhu lèke paku sèra, ja'a heka lèka kèna." Ka dai camigu sa, hèia Yesus mai hari pacèu ngi'u Na. Lod'o èèna, Tomas kahèi ètu era èèna, sèmi, dhu miu mèdhi ètu dara gambar ne. Ka Tomas patitu kètu urutuu na, hèia na lii, "Ja'a lèka tare'a-re'a, ne'e ne Lamatua ja'a ka ne'e!" Ropa Tomas ladhe nèdhi Yesus, lod'o èèna dara na kajari heka. Ka Yesus lii dènge Tomas, "Èu ne parcaya, lula èu ladhe mèdhi ja'a ne, dènge musi madha èu. Te ngaa dhu be'a risi hari, dhèu dhu rèdhi boe Ja'a, te ngaa ra parcaya."

Gambar 20: Lamatua Yesus ca'e asa surga

Gambar 20: Lamatua Yesus ca'e asa surga

Mateos 28:18-20; Li lole nèti ana pajuu-paleha 1:1-11; Yohanis 14:1-4

Ropa Yesus mamuri hari nèti mamadhe, Na padelo iisi Na mi dhèu ae-ae. Dhèu se'e ladhe rèdhi Ne, ka ra re'a na, Nèngu ne tare'a-re'a mamuri hari. Dai èpa nguru lod'o, Yesus neo ca'e asa surga, lula Na tao pa'èle le sasab'a-la'a Na ètu rai-haha ne. Ka Na peka dènge dhèu-dhèu dhu lèke Ne, aku Nèngu na, "Miu se hud'i kako paleme ku asa rae-rae, sèna ka paj'aj'i dhèu aa'i-aa'i ra, a'a-ari Ja'a. Aj'a-nori paie-iie si, ho ra madhutu aa'i ngaa-ngaa dhu Ja'a peka kore le dènge miu." Hèia, Yesus ca'e asa surga la'e. Ètu dara surga nèi, Na tao nare era pea dhu be'a titu kèna, pala mi dhèu-dhèu dhu lèke Ne. Tasa mera mia dènge èu mone aanga-angalai, kera-ba'i, dènge a'a-ari ja'a? Èu neo parcaya Yesus, do aad'o? Èu neo madhutu Ne, do aad'o? Ladhe Na lèpa hari mai asa rai-haha ne bèli-cameda, èu dhu tatae le ho soru-more Ne, do dhae? Baku pa'adhu ia ka dara, te dai lod'o oe èle kèna.

Introduction, Part B

Introduction, Part B

Slamaat, oo! Èdhi nanene kaset re cabèka deo na kèna. Laladhe ku gambar ètu dara sasuri ne. Ja'a manèngi sèna ka pasa dhilu pabe'a, ho mi nanene paie-iie, ropa ja'a lole hia miu Lii Lolo Be'a ne. Ropa miu tadèngi lii sasadhu sèmi ne'e (music), na mi bhoke ho ladhe gambar dhu leo kèna. Ladhe miu neo pajiko ho lole nèti gambar se'e èci-èci, do neo pakarèi, miu bisa stop èèle kaset ne, madhutu dadèi miu. Èle èèna, heka pakako hari kèna. Nah! Ladhe ku gambar 21 laa!

Gambar 21: Ngi'u Yesus aad'o heka ètu aj'a palebha

Gambar 21: Ngi'u Yesus aad'o heka ètu aj'a palebha

1 Petrus 3:18; Galatia 2:20

Nga tao ka Yesus hud'i madhe ku ètu aj'u palebha? J'ara na sèmi ne'e ka: Yesus madhe, masi ka Na tao boe sala, sèna ka dhèu rai-haha ne unu soda-mole. Yesus madhe ho Na sui sasala-sigo dhèu aa'i-aa'i ra, sèna ka baku abhu huku dènge baku abhu mamadhe. Mamadhe Yesus ne lula Na dui nare sasala èdhi. Sasala-sasala èdhi se'e ka dhu pa'ele iie babe'a pa'èci èdhi dènge Ama Lamatua. Yesus ne j'aj'i mi ana kahib'i-kalèbho Ama Lamatua dhu mola, sèna ka Na gati èdhi. Nèngu ne'e ka j'aj'i mi mèdha-katagu ho sui nare èdhi se nèti mamadhe. Ladhe èdhi parcaya Yesus, aa ta mangaku sasala èdhi aa'i-aa'i, ho èdhi pakaj'èu nèti sasala deo sa, Ama Lamatua hia saku eele sasala èdhi. Ladhe èdhi tao madhutu sèmi èèna, Yesus dede èdhi j'aj'i ma ana-ana Ama Lamatua. Gambar dhu leo sèra, èèna na padelo sasoa na dènge be'a.

Gambar 22: Dua J'ara

Gambar 22: Dua J'ara

Mateo 7:13-14; Yohanis 3:16; 1 Yohanis 1:9

Yesus lole j'ara-j'ara tasamera mia èdhi abhu mamuri taa-taa dènge Ama Lamatua. Dhèu ae-ae ka dhu neo lasi re j'ara taleo. Te ngaa j'ara taleo na, j'ara dhu pènu dènge sasala-sasigo. Dhèu aa'i-aa'i madhutu j'ara èèna, lula èdhi dhèu rai-haha ne, tao dhoka sasala di, èci èèna ka dènge Adam. Te èdhi se, ana-èpu Adam na! J'ara kadua, j'ara dhu kob'o. Masi ka kob'o, j'ara ne'e ka dhu dhèu bisa lasi paraga dènge Ama Lamatua ètu surga, sèna ka dhèu bisa mamuri dènge Ne ètu nèi. Lamatua Yesus dhu
peka tèke le, na, be'a risi èdhi madhutu j'ara kob'o na. Ètu dara gamber ne, miu ladhe mèdhi aj'u palèbha èci dhu patitu ètu re suu j'ara maso sa dara èèna. Èdhi bisa maso sa j'ara èèna, ladhe èdhi dhaa sasala-sasigo èdhi, ho tèke eele si, na parcaya, peka na, Lamatua Yesus madhe le ètu aj'u palèbha, ho gati nare èdhi. Masi ka sèmi èèna, dhèu ae ka dhu ro'o boe rai eele nèti tatao-tatao ra dhu karehe sèra. Ra pangee na, j'ara kob'o dhu dai surga èèna, carui titu kèna, ladhe ra madhutu. J'ara taleo ka dhu carui boe. Dhu madhutu iia-iia, j'ara taleo èèna ke, dhu la'e asa dara naraka. Naraka na, era j'aj'èra dhu Ama Lamatua sadia tèke hia dhèu-dhèu dhu Na babèga-lalèta eele si. De, ja'a neo karèi a'a-ari, ama, to'o, ina-teto, nèti dua j'ara se, mia ka dhu èu pili? Ladhe neo unu j'ara mamuri taa-taa toke dai mia-mia, hua iia lamu mangaku sala èu asa madha Lamatua. Baku pamata ia ka. Lamu ka dènge dara lai-lai ne! Ara lamu asa madha Lamatua, ho peka na, "Ama ee! Ja'a ke'a na Ama kapai risi eele, aa dhu mola-mèci. Ètu katanga madha Ama, èci sa dhu pahuni boe, aa pa'abhe boe. Ja'a mai asa madha Ama, dhu kèti dènge sasala-sigo ja'a. J'ole ai Èu mai, Ama, ho nuni more la ja'a nèti dara lub'u ne. Ja'a parcaya, Yesus madhe le ètu aj'u palèbha, sèna ka sui nare ja'a nèti hahuku. Aa ja'a manèngi ho Ama saku eele sasala-sasigo ja'a aa'i-aa'i. Pamèu ja'a nèti sasala-sasigo ja'a. Sèmi la ja'a, j'aj'i ana Ama. Ja'a neo madhutu j'ara soda-mole, dhu Lamatua Yesua padelo le. Ladhe lod'o dai ja'a madhe, tèke eele rai-haha ne, ja'a neo mamuri taa-taa dènge Ama ètu dara surga. Makasi, Ama Lamatua. Dai sange ne'e ka, lii manèngi-mangaj'i ja'a. Amin."

Gambar 23: Ana-ana Lamatua

Gambar 23: Ana-ana Lamatua

Yohanis 6:37-40; Yohanis ladhe nèdhi raihaka hiu 7:9

Ètu dara gambar ne, èdhi tèdhi Yesus. Na soru nare dhèu nèti rupa-rupa suku, bangsa, dènge lii-lii ra. Dhèu se'e se, dhèu dhu parcaya le Yesus. Nèti èèna ka, Yesus sèmi nare le si, j'aj'i ana-ana Lamatua. Rèngu se'e ka dhu madhutu j'ara kob'o dhu la'e asa surga na. Ana-ana Lamatua se, èci èèna ka dènge a'a-ari ètu dara èmu cue. Abhu dhèu heka, dènge dhèu ngèru. Abhu dhu ana iiki era, aa abhu dhu kapai hèi. Abhu dhèu bhèni, aa abhu kahèi dhèu mone. Abhu dhu ka'uri mèdhi, ka'uri karara, dènge ka'uri pudhi. Abhu dhu kaja-su'i, aa abhu kahèi dhu unu boe ngaa-ngaa. Lamatua Yesus sèmi nare si aa'i-aa'i ra, sèna ka j'aj'i ana-ana Ama Lamatua.

Gambar 24: Nara iisi hari èdhi

Gambar 24: Nara iisi hari èdhi

Yohanis 3:1-18; Titus 3:4-7; Petrus 1:22-23

Lod'o Yesus mamuri era ètu rai-haha ne, ca dhèu mese agama, ngara na Nikodemus. Ètu dara ca mèda, la'e tenge Yesus, ho neo karèi pèri-pèri j'ara. Ka Yesus peka dènge ne, ca j'ara dhu pabingu Nikodemus. Na peka, aku Nèngu na, "Dhèu cee, dhu neo j'aj'i ana Ama Lamatua, nèngu hud'i rara iisi hari ne. Èdhi dhu j'aj'i ana-ana nèti ina-ama, lula rèngu ka matana èdhi. Te ngaa, èdhi bisa j'aj'i ana-ana Ama Lamatua, ladhe èdhi rara iisi hari ca tèka. Rara iisi èdhi uru na, nuka ngi'u aee ne. Te ngaa dhu rara iisi kadua, nuka roh. Roh Lamatua dhu Mola-Mèci èèna ka, tao èdhi mamuri dhu hiu iia. Èdhi abhu mamuri hiu iia ne, ropa èdhi madhutu Lamatua Yesus. Nèngu ka dhu tao èdhi j'aj'i dhèu dhu hiu, dhu j'aj'i dhèu unu Ama Lamatua.

Gambar 25: Roh Lamatua dhu Mola-Mèci

Gambar 25: Roh Lamatua dhu Mola-Mèci

Yohanis 14:15-18; Lii Lolo nèti ana-ana pajuu-paleha 2:1-39

Lod'o Yesus ca'e meka asa surga, Na peka le dènge ana pajuu-paleha Na, sèna ka Na hia mai Roh Lamatua dhu Mola-Mèci. Ropa Na ca'e asa surga, ana-ana pajuu-paleha Na pakaboko ètu era èci. Dai lod'o ka canguru, cag'ag'a laa, lii aae sèmi bohe laa. Hèia rèngu ladhe rèdhi sèmi ai sa, dhu heo puru mai sa rèngu èci-èci. Ka rèngu aa'i-aa'i ra abhu dènge Roh Lamatua dhu Mola-Mèci, sama sèmi dhu Yesus padhadha tèke na. Lod'o èèna, dhèu ae, dhu mai nèti rae-rae ètu rai-haha ne, dhu pakaboko ètu dara kota Yerusalem. Ka ana-ana pajuu-paleha nèti Yesus sèra, abhu koasa ho padhai lii, hèia ra padhai lii dènge rèngu, madhutu lii ra èci-èci. Ana-ana pajuu-paleha se peka dènge dhèu sèra j'ara-j'ara dhu be'a, dhu Ama Lamatua tao le. Ètu lod'o èèna kahèi, tèlu riho dhèu madhutu dènge, sèmi Yesus dènge dara kateme. Dai sange ne'e ne, Roh Lamatua ne, pea ètu dara dhèu aa'i-aa'i ra, dhu tare'a-re'a madhutu Lamatua Yesus. Roh dhu Mola-Mèci ne, pangèd'u koasa mi èdhi, sèna ka èdhi madhutu lii holo nori Yesus, aa peka dènge dhèu leo kahèi, lalole Yesus.

Gambar 26: Mamuri ètu dara saraa

Gambar 26: Mamuri ètu dara saraa

Yohanis 3:19-21, 8:12; 1 Yohanis 1:5-7

Dhèu dhu dhae lèka mèka Yesus, rèngu sèra sama sèmi dhèu ètu dara gambar ne, dhu ra kako gogo ai lae-lae ètu dara maroga. Rèngu se katoka rubhu-rubhu, oe bebhe sagèba mopo-mopo. Lula ra abhu boe saraa dhu d'elo rèngu, sèna ka rèdhi j'ara. Ladhe èdhi lèka Yesus, aa ta sarai mi Nèngu, èdhi èci èèna ka dènge dhèu dhu kako ètu dara saraa. Ladhe j'ara dhu be'a na,
carui boe. Masi ka j'ara be'a boe, èdhi se bèbhe boe, lula ladhe tèdhi hadhu dènge ro'a, ka lehe eele. Yesus dhu peka na, "Ja'a ne, saraa rai-haha. Ladhe dhèu cee dhu madhutu Ja'a, rèngu mamuri boe ètu dara maroga." Yesus hia Roh Na dhu Mola-Mèci na, ho padelo j'ara dhu be'a hia dhèu aa'i aa'i dhu parcaya Ne.

Gambar 27: Èdhi bisa j'aj'i dhèu dhu hiu

Gambar 27: Èdhi bisa j'aj'i dhèu dhu hiu

Galatia 5:16-26; Efesus 4:22-23; 2 Korintus 5:17

Dhèu dhu sange mera mia madhutu Yesus Kristus, rèngu se j'aj'i dhèu dhu hiu. Dadèi dhèu se'e ka, madhutu Lii Holo Nori Ama Lamatua, loe boe dènge manèngi makasi, lula Ama Lamatua saku èèle sasala-sasigo rèngu, dènge pala hia si mamuri hiu. Rèngu dèi boe tao j'ara dhu papèda dara Ama Lamatua. Dènge j'ara ne'e, dhèu dhu parcaya Yesus, patao-palaha boe, mana'u boe, ana bhèni-ana mone tao boe j'ara makae, aa sogo-tagu boe nidhu. Roh Lamatua dhu Mola-Mèci, hia èdhi koasa sèna ka èdhi rai nèti sasala-sasigo, sèna ka tao dhoka dhu be'a di, madhutu dadèi Lamatua.

Gambar 28: J'ara-j'ara mamuri nèti a'a-ari dhèu Kristen

Gambar 28: J'ara-j'ara mamuri nèti a'a-ari dhèu Kristen

Efesus 5:21 - 6:1; 1 Petrus 3:1-9

Ladhe ètu dara èmu cue, dhèu aa'i-aa'i madhutu tare'a-re'a j'ara mamuri Lamatua Yesus, rèngu mamuri dara èci. Dhèu mone sue dhèu èmu na. Dhèu bhèni pakabua dhèu èmu kamali na. Ana-ana dèi nanene lii nèti ina-ama. Sèra sa, Lii Holo Nori Ama Lamatua ka dhu aj'a èdhi sèmi èèna. Ina dènge ama pasue, dènge pa'èra dara èci dènge èci. Ra nori ana-ana ra, sèna ka ra sue Lamatua, aa madhutu Lii Holo Nori Na. Keluarga dhu pahaha iisi mi Ama Lamatua, biasa sabaj'a sama-sama, pasae j'aj'èra sama-sama, dènge mamuri dara èci.

Gambar 29: Sue la musu èu

Gambar 29: Sue la musu èu

Mateos 5:43-48; Lukas 10:25-37

Yesus nori dhèu dhu madhutu Nèngu, sèna ka sue dhèu aa'i-aa'i ra. Edhi se sèmi èèna kahèi. Èdhi hud'i sue ku musu-musu èdhi. Ca tèka Yesus lolo, peka na, Ca dhèu dhu la'e asa kota leo. Dai talora j'ara, parapo game ne. Nèbhu boe ka, dhèu nèti suku leo mai, ka rage dhèu ne dhu baa-baa ètu sebhe j'ara. Hèia la'e ka, na pamèu hisu dhèu ne, ka na heo dènge perbaan. Èle ka, na hue dhèu dhu hisu ne, asa dedha keledai na. Ka nèti dhèu ne asa dara kota la'e. Na pamaso ne asa dara èmu losmen. Hèia na hia uuru doi kètu mi dhèu unu losmen ne, sèna ka na lalau pabe'a-be'a dhèu dhu hisu ne. Lii a'aja Yesus ne, peka na, èdhi se musti tulu dhèu dhu ètu dara j'aj'èra, dhu peka boe na, nèngu èèna nèti dhèu mia, do agama mia.

Gambar 30: Yesus dènge koasa kapai titu kèna

Gambar 30: Yesus dènge koasa kapai titu kèna

Lii Lolo nèti ana pajuu-paleha 19:18-21; Lii sod'a 115:1-8; 1 Yohanis 3:8, 4:4

Dhèu ètu gambar ne, nèti dènge mèdha sogo-tagu nèngu, ho tunu eele si. Uru na, rèngu sogo-tagu nidhu, te ngaa limuri nè, rèngu mai le madhutu Yesus. Dhèu dhu madhutu le Yesus, pa'èci ia ka dènge nidhu, suagi, do dènge mèdha-mèdha maroga dhu uku-ked'i dhèu. Èdhi madha'u ia ka dènge mèdha-panyau nidhu sèra, aa pusi ia ka dènge ra hèi. Lamatua èra risi eele nèti rèngu sèra, aa nèti Dhèu Aae rèngu, Lusifer. Dhèu dhu parcaya Yesus musti core eele aa'i ngaa-ngaa dhu èki rèngu. Yesus tèke eele boe èdhi mesa ti, te ngaa koasa Na sanoro èdhi. Dènge j'ara sèmi èèna, koasa nidhu segi boe èdhi.

Gambar 31: Yesus magèla eele nidhu-nidhu bhelu-katub'a

Gambar 31: Yesus magèla eele nidhu-nidhu bhelu-katub'a

Markus 5:12; Yakobus 4:7

Ca tèka ca dhèu, dhu nidhu ae titu kèna tao ne. Dhèu èci sa, dhu bisa boe èki ne dènge dhari, do rate bèsi, lula nidhu se èra titu kèna. Te ngaa Yesus tao nare ne. Yesus magèle eele nidhu se kalua nèti dhèu ne, ka ra madhutu kahèi paredha Na. Hèia Yesus patabuli eele dhèu ne'e, sèna ka nidhu se dènge heka koasa mi dedha dhèu ne. Ka dhèu ne la'e dènge ka, la'e lolo aa'i-aa'i dènge a'a-ari na, ngaa-ngaa dhu Yesus tao mi dedha nèngu. Yesus babège eele le nidhu nèti dhèu ae-ae. De, èdhi te'a le, nidhu, dènge Dhèu Aae ra, hud'i madhutu ku lii paredha Yesus.
Ele boe, èu j'aj'i le dhèu Kristen, te ngaa nidhu loe boe pamadha'u èu. Sanède paie! Ladhe èu dhu parcaya le Lamatua Yesus, èu ne j'aj'i le unu Lamatua. De nìdhu dènge heka hak mi dedha èu. Lab'a nìdhu sèra, dènge j'ara manèngi koasa Lamatua Yesus ho magèla eele si. Peka dènge dhèu parcaya Lamatua sèra, sèna ka sabaj'a sama-sama dènge èu. Ladhe èdhi se madhutu pa'èra parèdha Lamatua Yesus, koasa Na madhenge pa'èra èdhi. Dènge j'ara sèmi ne'e ne ka, koasa nìdhu segi boe èdhi.

Gambar 32: J'ara-j'ara dhu pamanahu èdhi

Gambar 32: J'ara-j'ara dhu pamanahu èdhi

Mateos 6:24; 1 Tim 6:6-10; 1 Koristus 10:13-14

Nìdhu dènge Dhèu Aae ra, loe boe tenge j'ara ho pamanahu ana-ana Ama Lamatua. Dadèi nidhu ka, ladhe èdhi to'o heka nanene dènge madhutu ia ka Lamatua Yesus. Nidhu se mai dadugu dhèu parcaya dènge rupa-rupa j'ara, sèmi: mèdha papake dhu be'a, tinu mahu, pake narkoba, doi pana, paga kapai, ana mone-ana bhèni tao j'ara makae. Nidhu se dadugu, sèna ka kapode-kabèli èdhi, ho èdhi pangee na j'ara-j'ara sèra sa, ka dhu tao pakarej'e dara èdhi. Te ngaa, rèngu se, baki nèti leko monya. Ra neo kapode èdhi, sèna ka èdhi rai nèti Ama Lamatua. De, èdhi se hud'i dènge dara kateme ku manèngi Lamatua, sèna ka èdhi bisa lab'a lii kakèj'i nidhu sera. De, lèka la Lamatua Yesus, aa madhutu dhoka Nèngu di.

Gambar 33: Ladhe èdhi tao sala

Gambar 33: Ladhe èdhi tao sala

Lukas 15:11-32; 1 Yohanis 1:7-9

Ladhe dhèu parcaya tao sala, j'ara kalua na tasamia? Ca tèka, Yesus peka sèmi ne'e ka. Abhu ana mone ngèru ca dhèu dhu la'e tèke eele ama na. Ana mone ne pakèdi, la'e bali asa rai kaj'èu cue. Ètu dedha rai ne'e, nèngu tao sasala ae titu kèna. Sasab'a na, karihu dènge bhèni karehe, ka pa'èle aa'i doi dhari ama na. Nèbhu boe ka, kabarai ne lèke manganga-madèu. Ka ana mone ne sala dai seli, dènge heka doi ca ana maa sa. Lula manganga ae ka, ai na roe capa lèpa. Hèia, na sanède, nèngu ne, tao sala mi Ama Lamatua, dènge ama na kahèi. Ka na manyasa titu kèna. Lod'o èèna kahèi, kèdi nara iisi na, ka la'e dènge ka asa ama na. Masi ka ana mone ne tao sala ciki boe, te ngaa ama na sue ne. Ka ama na sèmi nare nèngu dènge dara karej'e titu kèna. Ama na bhèlu eele aa'i sasala-sasigo dhu na tao le. Ladhe èdhi se tao sala, èdhi hud'i ele ku ho'a, aa mangaku sasala èdhi sèra, dènge tèke eele si. Dènge j'ara ne'e, Ama Lamatua saku eele aa'i sasala-sasigo èdhi, aa sèmi nare èdhi, sama sèmi ama ètu dara lii lolo deo na. Lamatua Yesus dhu peka le, "Ladhe abhu ca dhèu dhu ele-ho'a, ho na mangaku, dènge tèke eele sasala na, ho la'e madhutu hari Lamatua, ana pajuu Lamatua ètu surga aa'i-aa'i, dara ra karej'e milu."

Gambar 34: Ladhe èdhi paraga dènge papèda-tarègu

Gambar 34: Ladhe èdhi paraga dènge papèda-tarègu

Filipi 4:6-7; Yakobus 5:13-16

Ladhe dhèu unu Lamatua paraga dènge papèda-tarègu, èdhi tao tasamia? Dhu èdhi tao uru j'ara ka, èdhi manèngi-mangaj'i dènge ta parcaya na, Ama Lamatua èèna na tao dhu be'a risi hia èdhi. Ama Lamatua bisa pa'èle dhèu nèti papèda, ladhe dadèi Na sèmi èèna. Ama Lamatua sue èdhi. De, lod'o èdhi paraga dènge j'aj'èra, Lamatua ka dhu ator sèra. Roh Lamatua bera-bera dènge èdhi masi ka ètu dara sasusa, aa dara papèda-tarègu, ho Na tulu èdhi, dènge Na tao dara èdhi j'aj'i mera-milu.

Gambar 35: Ladhe dhèu madhe

Gambar 35: Ladhe dhèu madhe

1 Tesalonika 4:13-18; Ibrani 2:14-15; Yohanis nèdhi Raishu 14:13

Ètu dara gambar ne, èdhi ladhe tèdhi dhèu se padhane dhèu madhe ra madhutu ad'a rèngu. Lod'o dai bèli-camèda, èdhi èci-èci madhe kahèi. Te ngaa ladhe èdhi madhe, èdhi j'aj'i mi ngaa? Li Holo Nori Ama Lamatua ka, nuka Alkitab, dhu peka na, ladhe dhèu dhu parcaya Yesus madhe, roh na ca'e la'e sama-sama dènge Lamatua Yesus asa dara surga. Ètu dara gambar ne, a'a-ari dènge mone aanga-angalai nèti dhèu parcaya dhu madhe le, mema dara ra pèda, ka ra pahaa èi madha, te ngaa dara ra roe boe. Èdhi se baku madha'u madhe. Ama Lamatua sue èdhi, aa Na hia èdhi sod'a-mole. Na saku èèle sasala-sasigo èdhi, ka èdhi abhu heka hahuku Na. Te ngaa dhèu dhu lèka boe Yesus, bèli-camèda rèngu baku maena abhu mamuri taa-taa dènge Ama Lamatua ètu surga. Alkitab peka na, dhèu dhu lèka boe Yesus, èèna na, Na babèga eele si asa era j'aj'èra, ètu dara ai naraka dhu ne'a boe madhe. Ja'a neo karèi èu sèmi ne'e: ladhe bèli-camèda èu madhe, èu abhu era mia? Lamu mamuri taruu dènge Lamatua? Do, abhu babèga, ho lamu ètu dara ai naraka?

Gambar 36: Ngi'u Kristus na, nuka dhèu-dhèu parcaya

Gambar 36: Ngi'u Kristus na, nuka dhèu-dhèu parcaya

1 Korintus 12:12-31; Efesus 4:11-16; 1 Petrus 4:10

Ngaa-ngaa dhu pakadhai ètu ngi'u èdhi ne, èci-èci ka dènge sasab'a na. Dènge musi madha, sèna ka èdhi ladhe tèdhi. Ro'a dhilu, sèna ka èdhi tadèngi. Hèba ho èdhi bisa padhai lii dènge ta'a-tinu. Aa'i-aa'i se pakaboko ètu èci, ka j'aj'i ngi'u ne. Ladhe nèti èci dhu pakadhai se abhu pèda, do hisu, ngi'u ne abhu j'èra aa'i kahèi. Ama Lamatua peka na, dhèu-dhèu dhu parcaya Yesus, èci èèna ka dènge ngi'u ne. Èdhi peka na, ngi'u na, nuka 'Gareja' ne. Lamatua Yesus j'aj'i Kètu nèti ngi'u ne. Ama Lamatua papala sasab'a mi dhèu parcaya aa'i-aa'i. Conto sèmi: abhu dhèu dhu dèlu-mèu lole j'ara-j'ara mamuri Lamatua dènge dhèu leo, abhu dhèu dhu bisa manyanyi, abhu dhu bisa laladhe-leru dhèu, abhu dhu bisa soru tamu, abhu dhu bisa aj'a-nori, abhu dhu bisa hia persembahan. Ladhe dhèu parcaya èci sab'e boe sasab'a na, ngi'u gareja ne aa'i-aa'i abhu susa. Ladhe dhèu parcaya aa'i-aa'i sab'a ku dènge dara èci, aa èci ladhe-leru èci, heka ngara na, èdhi pusi-pahae kolongara Ama Lamatua kèna.

Gambar 37: Pakaboko sèna ka pahaha iisi mi Lamatua

Gambar 37: Pakaboko sèna ka pahaha iisi mi Lamatua

Ibrani 10:24-25; 1 Korintus 11:23-34; Kolose 3:15-17

Dhèu dhu parcaya Yesus hud'i pakaboko ku, sèna ka pahaha iisi mi Lamatua. Dhu be'a ka, ladhe rèngu se dhu tema le pakabako pa'èci. Ladhe ra pa'èci, ra aj'a Li Holo Nori Lamatua, dènge sabaj'a pelere-lere, aa ra sod'a koa-kio kolongara Ama Lamatua. Dhu be'a risi hari, ladhe rèngu rèti tao kolekte, sèna ka pakako sasab'a Lamatua. Lamatua Yesus dhu aj'a le, na, dhèu dhu dèi madhutu Nèngu, na sanède mamadhe Na. Ètu gambar ne, èdhi ladhe tèdhi dhèu parcaya ra'a-rinu pa'èci. Roti dhu dhèu se ra'e ne, pasanède èdhi mi ngi'u Yesus, ropa Na madhe ètu dedha aj'u palèbha. Aa dhu rèngu rinu, pasanède èdhi, raa Na suti, sèna ka rase pamèu èdhi nèti sasala, ho èdhi abhu mamuri taa-taa. Èdhi hud'i pakaboko ku, sèna ka tasanède mamadhe Yesus, dènge j'ara sèmi èèna kahèi, toke Na lepa hari mai.

Gambar 38: Lamatua Yesus neo lepa hari mai

Gambar 38: Lamatua Yesus neo lepa hari mai

Yohanis 14:1-3; 1 Tesalonika 4:13 - 5:4

Bèli-camèda Lamatua Yesus lèpa hari mai nèti surga asa rai-haha ne, madhutu sèmi dhu Na peka le. Mamai Na dhu sahèka, lod'o dhu dhèu re'a-re'a boe. Ho èèna na, dhèu parcaya dhu madhe le, kalua nèti dara ro'a ra, lasi soru Ne. Aa dhèu parcaya dhu madhe mèka, pa'èci dènge ra, ho paraga dènge Yesus asa dedha-liru. Ho ladhe èèna na, dhèu parcaya aa'i-aa'i ra mamuri taa-taa dènge Lamatua Yesus ètu surga. Te ngaa dhèu dhu lèka boe Yesus, abhu boe sèmi èèna. Lamatua, dènge dhèu-dhèu parcaya sèra, tèke eele si. Bèli-camèdi Ama Lamatua huku si, ho ra mamuri dhoka ètu dara j'aj'èra toke dai mia-mia. Èdhi se èci sa, te'a boe lod'o mia, Lamatua Yesus lepa hari mai. Nèti èèna ka, ta mate tatae Ne, toke dai lod'o mamai Na. A'a-ari, ja'a neo karèi miu: ladhe Lamatua Yesus lepa hari deo ne'e ne, èu dhu pa'èra le, do dhae?

Gambar 39: Hua-hela la dhu be'a

Gambar 39: Hua-hela la dhu be'a

Mateos 7:15-20; Galatia 5:22-23; Yohanis 15:1-8

Aj'u ètu dara gambar ne, hua ae titu kèna! Ladhe èdhi se madhutu Lamatua Yesus dènge dara kateme, Roh Ama Lamatua sab'e dara èdhi, heka abhu tatao dhu be'a rupa-rupa kèna. Ètu dara Alkitab peka na, hua-hela nèti sasab'a Roh Ama Lamatua na, nuka: mamuri pasue, dara karej'e, mamuri dènge mera-milu, padame, lii boe ugu boe, dara be'a, tao madha j'ara dhu be'a, mamuri setia, taha, lii sakaa boe, aa taha tare dara. Ca tèka, Yesus peka, aku Nèngu na, "Ja'a ne sama sèmi kapua aj'u. Aa miu sama sèmi dadana na. Ladhe miu se patai-patapa dènge Ja'a, aa miu soro tèke Ja'a patai-patapa dènge miu kahèi, èèna na miu abhu hua ae-ae." Te ngaa èdhi te'a le, dadana dhu madhe, dènge boe hua-hela. Èle èèna na, lamatua oka ne, poro eele ne, ho core asa dara ai, ho na'e pakèpu eele ne. Dadèi Lamatua Yesus ka, dhèu dhu madhutu Nèngu hud'i dènge ku hua-hela ae. Ladhe dènge tatao sèmi èèna, èdhi pakabua Lamatua, dènge sue dhèu leo kahèi.

Gambar 40: Lole dènge dhèu j'ara-j'ara Lamatua Yesus

Gambar 40: Lole dènge dhèu j'ara-j'ara Lamatua Yesus

Mateos 28:18-20; Li Lolo nèti ana pajuu-paleha 1:8

Lamatua Yesus peka na, dhèu dhu madhutu Nèngu hud'i lole ku dènge dhèu j'ara-j'ara Nèngu. Lole dènge dhèu se, peka na, cee dhu parcaya Yesus, bèli-camèda abhu mamuri, aa Lamatua saku eele sasala-sigo rèngu, Na patabuli ra nèti hahuku Na, dènge nèti mamadhe. Ladhe èu parcaya Lamatua Yesus, èu hud'i lolo kahèi dènge dhèu leo, sèna ka dhèu sèra re'a kahèi, j'ara mamuri Na dhu be'a èèna. Roh Lamatua, èèna na, pa'èra dara èu, sèna ka èu bisa lolo dènge dhèu j'ara-j'ara Yesus. Ladhe èu dèi, na pake buku gambar ne, ho lolo dènge dhèu. Dènge j'ara sèmi èèna, dhèu ae heka re'a tare'a kèna, j'ara-j'ara dhu mola nèti Ama Lamatua, dènge Ana Na Yesus Kristus, dhu hia mamuri ma èdhi aa'i-aa'i ti.

Dai sange ne'e ka! Syaloom!

Verwante informatie

Vrij te downloaden - Download Bijbelverhalen in audio formaat en Bijbellessen in duizenden talen, afbeeldingen, scripts en andere verwante materialen die geschikt zijn voor evangelisatie en gemeenteopbouw.

Audio-visuele materialen - Goed Nieuws - 'Goed Nieuws' is een platenboek met 40 illustraties uit de Bijbel met bijbehorende audio opnamen. Het geeft een overzicht van de Bijbel vanaf de Schepping tot en met Christus. Dit omvat de Bijbelse boodschap van verlossing en eenvoudig onderricht over het christelijke leven. Deze opnamen zijn beschikbaar in meer dan 1300 talen.

Hoe audio-visuele materialen van GRN te gebruiken? - 1: Het evangelie op een eenvoudige manier delen met de ander - In dit artikel kunt u lezen op welke verschillende manieren u de audio-visuele materialen van GRN kunt gebruiken binnen uw bediening.

Hoe audio-visuele materialen van GRN te gebruiken? - 2: Verdieping - In dit artikel kunt u lezen hoe mensen leren uit verhalen en waarom er niet veel commentaar aan de verhalen wordt toegevoegd.

De GRN-audiobibliotheek - Evangelisatiemateriaal en basisbijbelonderricht, aangepast aan de behoeften en de cultuur van het volk, in verschillende stijlen en formaten.

Copyright and Licensing - GRN shares it's audio, video and written scripts under Creative Commons

Creating DVDs using the GRN Slide show Videos - How to burn DVDs for specific people groups you are trying to reach

Choosing the right audio or video format - What audio and video file formats are available from GRN, and which one is best to use?