LLL 3 Bushindanani Pamo Na Leza

Outline: Joshua, Deborah, Gideon, Samson. 24 sections. It has a picture book to go along with the recording.

Script Number:420
Language:Kiluba: Shaba
Theme:Victory; Multiple themes
Audience:General
Style:Monolog
Genre:Bible Stories & Teac
Sophistication:Simple
Purpose:Teaching
Bible Quotation:Extensive
പദവി:Approved

Scripts are basic guidelines for translation and recording into other languages. They should be adapted as necessary to make them understandable and relevant for each different culture and language. Some terms and concepts used may need more explanation or even be replaced or omitted completely.

Script Text

Talaipo’bidi Yehova Leza wakweshe Bene Isalela kunekenya balwana nabo; kino kifwaninwe kwikala bu bundiji kotudi dyalelo dino’di.

Kifwatulo 1: Yoshua ulwa Bene Amaleke

Kifwatulo 1: Yoshua ulwa Bene Amaleke

Bana ba Isalela kebadipo na ntanda yabo ehe. Badi kebanangakana mu ntanda mutuputupu. Mosesa ye wadi kilongoji kyabo. Byobiya Watonga nsongwalume wakutelwa bu Yoshua mwanda wakutangidila bashidika. Kitatyi’kya Bene Amaleke batambilwe bulwi Isalela. Ponkapo Mosesa kanena Yoshua’mba: Enda’bidi ulwe Bene Amaleke, kabidi nkashikata pa mutwe wa ka-lulu, ne mukombo wa Leza ku makasa. Ebiya Mosesa paadi utundula mukombo wa Leza’wa pamo bwa milombelo, ponkapo Yoshua ne Bana ba Isalela bakomena Bene Amaleke. Mwiko, makasa a Mosesa akoka keakokejepo kadi kwiolwela kudi Leza ehe ponkapo kadi Bene Amaleke bashilula kukomena Isalela mu bulwi’bwa. Byobiya bantu babidi bakwata maboko a Mosesa kwiatundula kufika ka ne ku kyolwa, kabidi Leza wakwasha Yoshua kunekenya Bene Amaleke.

Kifwatulo 2: Tubedibedi ne bipa bya mu Kenani

Kifwatulo 2: Tubedibedi ne bipa bya mu Kenani

Ebiya Leza byalaile ku Bene Isalela kwibapa ntanda ya Kenani. Ponkapo Mosesa watuma bantu dikumi na babidi kubela ntanda’ya. Mu bula bwa mafuku makumi ana, ponkapo bajoka ne kuleta mapya a byobakamwene’ko. Kabidi ba Yoshua ne Kalebu baleta mapya malumbuluke byamwiko. bya’yo kebyobi’po kadi. Inoko bekadi ba ntanda’ya i bakomokomo. Ino nanshi, ketwakibevwanai moyo ehe, shi Yehova Leza udi netu, nabya uketukunkuja mu ntanda’ya. Mwiko ke-tuntu tubedibedi tukwabo twaletele mapya mabimabi, anena’mba Bene Kenani i batumpangala. Kuno kwadi kutyumuna mityima ya Bene Isalela kukatwela mu Kenani. Ponkapo Leza wafitwa byamwiko, mwanda kemaukulupilepo ehe kadi webatwala mu ntanda-mutuputupu mu bula bwa myaka makumi ana. Ponkapo Bene Isalela bonsololo kebakulupilepo mwadi bakubile monka mu ntandamutuputupu.

Kifwatulo 3: Bene Isalela babuka kalunga kamema

Kifwatulo 3: Bene Isalela babuka kalunga kamema

Ebiya Mosesa pakufwa, Yoshua wamupingakana bu kilongoji kya Bene Isalela. Ponkapo Yehova Leza wanena Yoshua’mba: shi kepano, abe ne bantu bobe, mwilongololei kwabuka Yodano amba mumone kwenda ku ntanda yonkemupa. Kabidi Leza washintulwidile Yoshua mobafwaninwe kulongela. Bapidishitu mu Isalela badi ne sanduku wadi utelwa bu dikumbo. Amo muno mo mwadi Bipapo bya bijila bya Leza. Kabidi Yehova Leza webalombwele kwabuka kalunga-kamema pamo na dikumbo’dya. Dijiba dino’di dyadi na mantaki, ino binyatyilo bya bapidishitu po byatyimpile mu mema a Yodano, ponkapo ne mema akokela aikala kwakubulwa mantaki kadi ne kupa kyaba kya abo kwabuka. Ponkapo bapidishitu baimana pabukata bwa dijiba’di kadi ne bantu bonso kebabuka pomu kukatwela mu ntanda ya Kenani.

Kifwatulo 4: Kupona kwa mpembwe ya Yediko

Kifwatulo 4: Kupona kwa mpembwe ya Yediko

Ke-bantu Bene Isalela byo badi kitulo mu Kenani kubwipi na kibundi kya Yediko. Ponkapo Leza kanena Yoshua’mba: Napana Yediko mu makasa obe, shi kepano jokolokai kibundi’ki na bantu bonso babulwi mu mafuku asamba, amba dikumbo dimutangidile kumeso na bapidishitu basamba-babidi baselele masengo a mikoko milume. Mu difuku dya busamba-bubidi’dya, mujokoloke misuse isambaibidi kibundi pamo na bapidishitu bela masengo a mikoko milume’ya. Ponkapo bantu nabo bakela nanji ya bulwi, kabidi ne mpembwe ya kibundi’ki ikapona panshi kadi ne bantu bakatwela munda mwa kibundi. Ebiya Yehova Leza wakankeje ku Bene Isalela kusela bitutwa, mwiko ke-muntu wakutelwa dya bu Akana wabulwa kikokeja.

Kifwatulo 5: Bene Isalela banyema Bene Ai

Kifwatulo 5: Bene Isalela banyema Bene Ai

Talaipo’bidi Ai kyadi kibundi kikwabo kya lwana kyadi kubwipi na kya Yediko. Kabidi Yoshua wadi ufwaninwe ka kwikinekenya na’kyo. Ponkapo watuma bantu kwikibela. Ebiya tubedibedi twajoka ne kunena’mba: kekyendelemopo bantu bonso bende kulwa ku Ai ehe, mwanda ke-bantu balwana netu
i batyetye’tu. Mwiko, nanshi Bene Ai badi bakomo kutabuka’ko Bene Isalela. Ponkapo Bene Isalela bamo baipaibwe kadi bamo nabo banyemene. Kyadi kya bulanda nakampata, Yoshua waponena kumpala ya Leza, ne kubandika mpala yandi panshi, ponkapo Leza kanena’mba: Isalela i mulonge bubi, i bebe kadi ne kubepa bubela, o mwanda mwine kebakokejapo kadi kwishishimika kumeso a balwana nabo ehe.

Kifwatulo 6: Kutyibilwa mambo kwa Akana

Kifwatulo 6: Kutyibilwa mambo kwa Akana

Ponkapo Yoshua wabungakanya Bene Isalela kumeso a Leza. Kabidi Yehova Leza walombola Yoshua’mba i Akana wamupile mambo. Ebiya Yoshua waipangula Akana’mba: nombolepo’bidi bubi bolongele, penepo kadi Akana nandi wamulondolola’mba: I bine, nemupye mambo kudi Yehova Leza, ponamwene mu bitutwa bya ku Yediko mutwelo wa buya bwa dyangi, kadi namona ne ndalama pamo ne nsahabu ponkapo nakomwa’byo meso nebiyata. Ponkapo bantu bakebisokola bintu’bi byadi bifye mu dipema dya Akana. Byobiya Akana waipaibwa monka mwasonaninye’kyo Yehova Leza mwine. Ebiya bukalabale bwa Leza bwamutuka kadi wanena’mba: shi kepano sela babulwi bobe, endai mulwei na Bene Ai, kokikwatwapo’bidi moyo ke-ne-muntu napana kibundi’ki mu makasa obe, ke kyobe kadi. Kabidi Bene Isalela bakokela Yehova Leza kadi ne kunekenya banekenya Bene Ai.

Kifwatulo 7: Dyuba ne kweji byaimana

Kifwatulo 7: Dyuba ne kweji byaimana

Ebiya bantu babibabi ba Kenani bashilula kuzakala Isalela. Byobiya bisaka bitano bya mu bisaka byekuta pamo mwanda wa kulwa Isalela, kabidi Yehova Leza walombola Yoshua’mba: kokikwatwapo’bidi moyo ehe. Ponkapo Yoshua ne babulwi ba ndi bafika kulwa bisaka bino’bi, kabidi webityumuna ne kunyema byanyema, kadi byakwatwa ne moyo byamwiko. Ke-buntu bulwi bwaikele difuku dituntulu. Ponkapo Yoshua wasonanya dyuba’mba: Imana’bidi kadi Yehova Leza nandi walengeja dyuba ne kweji kubulwa kuteluka po byadi difuku’dya kufikija ka ne Isalela byanekenye balwana nandi. Talaipo’bidi kekwaikelepo difuku dikwabo didingamene na dino’di ehe. Ke-muntu Yehova Leza wakwesha Bene Isalela kunekenya bisaka byonsololo bibibibi bya Kenani’bya.

Kifwatulo 8: Yoshua ufundija bantu

Kifwatulo 8: Yoshua ufundija bantu

Ponkapo Kenani yaikala ke ntanda ya Isalela monka mwamulaijije’byo Yehova Leza. Ebiya Yoshua byadi ke mununu, ponkapo waityija bantu ne kwibakongakanya pamo. Kadi kaebalombola’mba: mwikankamikei, kadi kokelai ne kulama byonsololo bisonekelwe mu Mukanda Wabijila wa Yehova Leza. Shi mukengiile bilezaleza nabya mukonakanibwanga, mukonakanibwanga mu ino ntanda miyampe nenki’u yemupele Yehova Leza. Nanshi tongai dyalelo dino’di yewa omukengidila. Banwe balunda nami, Yehova Leza wafikidije milao yandi yonso kudi Yoshua kadi ne kudi Isalela mwine. Kabidi webapele ntanda kadi ne kwibanekenyenya balwana nabo. Talaipo’bidi Yehova Leza imwitulae kifuko momwa mulu kwa nyeke ne nyeke. Ke-muntu aye Leza ufikidijanga byalaile. Satana i walwana netu, ino tuyuke’maba tudi na kilongoji wetu, ke aye washindile Satana kadi, aye i Mfumwetu Yesu Kidishitu. Shi kepano mufwaninwe kutonga yewa omukengidila.

Kifwatulo 9: Debola wisambila Yehova Leza

Kifwatulo 9: Debola wisambila Yehova Leza

Kunyuma kwa lufu lwa Yoshua, Bene Isalela bavundamina Yehova Leza. Mwiko, ke-bantu bashilula kutota bankishi ba Bene Kenani. Ponkapo Bene Kenani batadila Bene Isalela kadi bashilula kwibasusula. Ebiya Debola byadi utangidile Isalela; ponkapo bantu bafika kumwipangula kyakulonga, ponkapo watompa kwibajokeja kudi Leza. Ebiya difuku dimo waita Balake. Aye uno’u ye wadi mudyavita wa bashidika ba Isalela. Kabidi kamunena’mba: Sela’bidi bana-balume tununu dikumi amba umone kukanda nabo ku lulu lwa Tabola; ke-muntu Shisela ne babulwi Bene Kenani bakafika’ko kwimulwa, ino enka Yehova Leza ukemupa bushindanani po’badi. Ponkapo Balake wakwatwa na moyo, kalombola Debola’mba: shi kwendapo netu nabya ketukendapo ehe. Ebiya Debola walondolola’mba: nkenda nenu, ino Yehova Leza ukapana Shisela mu makasa a mwanamukaji, nabya ne buleme kebukakujokelapo ehe.

Kifwatulo 10: Yehova Leza walengeja kutyumunwa kwa Shisela

Kifwatulo 10: Yehova Leza walengeja kutyumunwa kwa Shisela

Byobiya Debola, Balake pamo ne Bene Isalela baenda ku lulu lwa Tabola. Kabidi Shisela nandi pamo ne babulwi ba Bene Kenani bafika kulwa nabo. Talapo’bidi Shisela wadi na makalo tutwa kitema a bulwi, ino Bene Isalela badi enka na bipete mu makasa abo. Ebiya Bene Kenani batukila mu kinekaneka, kubwipi na lulu lwa Tabola. Ponkapo Yehova Leza wapalakanya Shisela, pamo ne ba pa makalo andi bene kumo kumeso a Balake badi na byonka bipete. I enka Shisela ye wanyemene lwa panshi.

Kifwatulo 11: Yaele waipaya Shisela

Kifwatulo 11: Yaele waipaya Shisela

Shisela wanyema ne kukefya mu dipema dya mwana-mukaji utelwa bu Yaele. Nandi wamunena’mba:
twela’bidi kadi kokikwatwa moyo. Kabidi Yaele bya kadipo Mwine Isalela, ponkapo Shisela kadipo na
moyo wakutwela mu dipema’dya kufyama’mo. Penepo Yaele wamupa mabele kutoma kadi
wamuputa ponkapo nandi waponena mu tulo bukuu. Byobiya wasela kikomo kya ku dipema ne
kitotwa. Kabidi wafwena bityebitye kudi Shisela byadi mu tulo, wamupopa’kyo ponka pa kutwi
kyasabila bukila enka ne panshi. Kupita kwa kitatyi kityetye’tu Balake wafika mu kukimba Shisela,
ponkapo Yaele wamwityila mu dipema’mba: iya’bidi kulombole muntu okimba’ye. Aye pa kwela
meso, au Shisela ulele mufwe-fwe, mutwe wandi mupopwe panshi.

Kifwatulo 12: Isalela wimba mwanda wa kutumbija Yehova Leza

Kifwatulo 12: Isalela wimba mwanda wa kutumbija Yehova Leza

Talaipo’bidi i Yehova Leza wapele Bene Isalela bukomo bwa kunekenya Bene Kenani. Ba Debola ne Balake batemba nimbo ya kumufwija Yehova Leza. Kabidi bantu bonso nabo basepelele, kadi batokelwe kwikala na Debola bu kilongoji wabo. Kabidi wadi pamo wa inabo. Kadi batendele Yaele byakakwatyilwepo moyo wa Shisela. Ke-muntu Yehova Leza waingidije bano bana-bakaji babidi kunyongolola Isalela. Balunda nami, Yehova Leza wingidijanga nyeke boba bakulwa bukomo bakokekoke mwanda waetumbije ba boba badi na bukomo. Leza watumine Mfumwetu Yesu Kidishitu kwitunyongolola kudi Satana. Ino bantu babi bamwipaile Yesu, bafwatakenye’mba Yesu kadipo na bukomo, ino Leza wasangwile Yesu kutamba mu lufu. Aye ye wanekenye Satana ne bantu bonso babi. Yesu upananga bukomo ne bumi bwa nyeke ku bonsololo bakwiubija kudi Yehova Leza kadi ne kumukokela. Nanshi twimbei’bidi, twikalei na katokwe ku mityima kadi ne tumutotei uno Yehova Leza Wabinebine. Ino tuyuke’mba Satana ukalwa boba bonso bakulonda dishinda dya Yesu ditwala kudi Leza (ke-muntu Aye mwine ye dishinda), ino Leza wetulombola mwakutabidila Satana. Nanshi ivwana ne uyate bufundiji mu Mukanda Ukola.

Kifwatulo 13: Ngidioni ne mwikeulu wa Yehova Leza

Kifwatulo 13: Ngidioni ne mwikeulu wa Yehova Leza

Penepo Bene Isalela babulwa kikokeji kya kudi Yehova Leza mwanda balongele bilongwa bibi byamwiko. Ponkapo Yehova Leza webapana ku Bene Midiana kwibatadila mu bula bwa myaka isamba-ibidi. Mwiko, Bene Midiana baonakenye myangulo ya Bene Isalela; ebiya Isalela wamwisashila Yehova Leza kwibanyongolola. Byobiya difuku dimo, muntu umo wakutelwa dya bu Ngidioni wadi upula ngano, watompa kwiifya ku Bene Midiana. Ponkapo, mwikeulu wa Yehova Leza wamumwekela ne kumunena’mba: enda kadi ukanyongolole Isalela ku kuboko kwa Bene Midiana. Ino Ngidioni walondolola’mba: Le kanyongolola Isalela namani, a? Ami ne wa bitupubitupu’tu. Byobiya Yehova Leza wanena’mba: Nkekala nobe. Kabidi Ngidioni waendela mwikeulu bidibwa, ponkapo mwikeulu watenga’byo na mukombo wandi; bukidi bonka bidibwa byalotejibwa lubimbi kadi ne mwikeulu wajimina ne kwaya jimejime. Penepo Ngidioni wayuka’mba uno musapu wadi utamba kudi Yehova Leza.

Kifwatulo 14: Ngidioni watyumuna bankishi

Kifwatulo 14: Ngidioni watyumuna bankishi

Kisaka kya Ngidioni kyadi kitota Bala kadi ne Ashela, bankishi ba mu Kenani. Yehova Leza wanena
Ngidioni amba: tyumuna mandabahu a shobe awashimikile Bala kadi tyumuna ne oa a Ashela mene
kumo, kabidi shimika mandabahu a Yehova Leza. Ngidioni wadi ne moyo wa bantu bakwabo inoko
wadi usaka kukokela Yehova Leza. O mwanda mwine, bufuku’bwa, wasela bantu dikumi pamo nandi
kadi batyumuna bankishi. Bantu bakalabele bikata kadi basakidile kumwipaya Ngidioni, ino shandi
wamwela mu kyadi. Balunda nami, Yehova Leza i Mukatakata Mwine kutabuka nkishi musongwe wa mutyi nansha ke wa mabwe mwine. Shi kepano, le tukokeja kutyina bankishi’ni nansha tutyine Leza
Mumi kadi Wabinebine?

Kifwatulo 15: Bashidika ba Ngidioni batoma mema

Kifwatulo 15: Bashidika ba Ngidioni batoma mema

Ponkapo Bene Midiana bebunga pamo kulwa Bene Isalela. Ngidioni walongele bashidika enka na Bene Isalela, ino Leza wanena Ngidioni’mba: ubalonga bushidika na bantu bangi, nanshi boba bamoyomoyo bajokele ku mobo abo. Kabidi bantu bangi badi nabo bajokela kwabo. Kadi Leza walombola Ngidioni amba: mukidi kadi bangi, nanshi wibatwale bidi ku lubungo lwa munonga, ebiya nkakutongela’bo. Ponkapo Ngidioni walongela monka na monka mu kwibatwala ku nsulo kutoma mema. Bavule bafukete manwi panshi kebalake mema pamo bwa ba mbwa. I enka bantu tutwa tusatu bobatomene mema na makasa abo. Ponkapo Yehova Leza wanena’mba : I enka na bano bantu tutwa tusatu batoma mema na makasa abo, bo abo kupityila makasa abo kupana Midiana komudi.

Kifwatulo 16: Bantu ba Ngidioni bajokoloka kitulo kya Bene Midiana

Kifwatulo 16: Bantu ba Ngidioni bajokoloka kitulo kya Bene Midiana

Kabidi kibumbo kikatampe kya bashidika ba Bene Midiana badi batudile kitulo mu musanza. Kwadi bantu ba ntanda ne miseke pamo ne tubalwe kebabadikapo ehe. Ino aye Ngidioni wadi enka na bantu tutwa tusatu, ino Yehova Leza wamulombwela kala mwakulongela. Ebiya Ngidioni wapana monji ne kinanu ne tulondo twampikwa kintu. Ponkapo bajokoloka kitulo kya Bene Midiana mu bukata bwa bufuku, kupwa kebalengwa lungwe lukatampe. Ebiya bapuja mu binanu’mwa ne kulala tulondo’twa ne kwela nanji amba : Ndoe kudi Mfumwetu Leza ne kudi Ngidioni. Ponkapo Bene Midiana pa kutumuka bashilula kwitapa abo bene na bene, kadi manyema mu kitulo kyabo, enka ne
byebanekenye Bene Isalela. Balunda nami, nansha twibakubulwa bukomo kadi batyetye monka mwadi mwikadile babulwi ba Ngidioni, tukokeja na bukwashi bwa Yehova Leza kunekenya walwana netu mukatakata, ke Satana kadi.

Kifwatulo 17: Samishoni waipaya ntanbo

Kifwatulo 17: Samishoni waipaya ntanbo

Kunyuma kwa lufu lwa Ngidioni, Bene Isalela kadi bavundamina Yehova Leza monka. Kadi Leza nandi waingidija muzo mubimubi mutyima, ke Bene Fidishitia kadi mwanda wa kwibadingila. Kadi Leza watuma kilongoji mukwabo ukokeja kunyongolola Bene Isalela. Dijina dya uno kilongoji i Samishoni. I Mushipiditu wa Yehova Leza wadi mulengeja kwikala na bukomo, mwiko ino Samishoni kaingidijepo bukomo buno kupandija Bene Isalela ku Bene Fidishitia ehe. Ke-muntu webwindije ku bya aye mwine, wabulwa kukokeji kudi Leza. Talaipo’bidi Samishoni wasanswa mwana-mukaji Mwine Fidishitia, o mwanda mwine difuku dimo, kanena kudi shandi’mba: enda ukankimbile’ye mwanda
wansangaja. Ebiya Samishoni byadi wenda ku njibo ya mwana-mukaji uno’u, ponkapo ntambo kasake kumukwata. Ino Samishoni byadi mukomokomo waipaya ntambo’wa na makasa andi. I enka nenki ne byasongele Mwine Fidishitia uno’u, ino aye mwine kadipo umukokele ehe. Kwendelelako mu bukalabale bwandi Samishoni waipaya makumi asatu a Bene Fidishitia.

Kifwatulo 18: Samishoni ne tumizeu tutyetutye

Kifwatulo 18: Samishoni ne tumizeu tutyetutye

Ponkapo Samishoni waenda ku ba mukaji wandi Bene Fidishitia kukamusela, ino muko wandi wadi kala kemumusongeje kwa mulume mukwabo. Ponkapo wafitwa ne kukanina kwaluja kinongo padi Bene Fidishitia. Wafunduka wakakwata tumizeu tutyetutye tutwa tusatu, wetukuta tubidi tubidi ku mikila yato, kadi ne kukutyila ngenge ya mudilo kadi wetulekelela monka mu madimi a Bene Fidishitia. Ebiya bidimanwa byabo byonsololo pamo ne byamwangulo bine kumo byatema mudilo fututu. Ponkapo Bene Fidishitia bamushikwa byamwiko Samishoni ; kadi batompa kumwipaya, ino aye Samishoni wepandija, kufikija ka ne byaipaile Bene Fidishitia kanunu.

Kifwatulo 19: Bene Fidishitia batenda nywene ya Samishoni

Kifwatulo 19: Bene Fidishitia batenda nywene ya Samishoni

Samishoni kasha wadi ketendele nywene yandi ehe. Nywene yandi milampe kyadi bu kiyukeno kyakulombola i Mwine-Nazila, ye yadi imupa bukomo. Mwiko, Samishoni waendelele kwikala wampikwa kikokeji kudi Leza. Kadi wemona na mwana-mukaji mukwabo Mwine Fidishitia, dijina dyandi i Dedila. Mwana-mukaji uno wasokola kifibwe kya bukomo bwa Samishoni. Ponkapo Samishoni wamulombola’mba nemupandulwe kudi Leza, shi bantende nywene, nabya nkajimija bukomo bwami. Ebiya bufuku bumo Samishoni byadi ulele tulo, ponkapo Dedila waita Bene Fidishitia. Ebiya nabo bamutenda nywene yandi. Kabidi Leza wamusonsoloka kadi ne bukomo bwandi bwine bwamupwa. Penepo Bene Fidishitia bamukwata kadi bamusaba meso andi, ebiya bamwela mu kifungo. Byobiya kadi nywene yandi yashilula kumena monka.

Kifwatulo 20: Samishoni waonakanya Bene Fidishitia

Kifwatulo 20: Samishoni waonakanya Bene Fidishitia

Bakulumpe ba Bene Fidishitia baela kitapwa kudi nkishi wabo. Kabidi batambija Samishoni mu kifungo musabwe meso andi kadi bamutula pa bukata bwa njibo yabo. Ponkapo bashilula kumusepa kibengo. Ebiya Samishoni walombela kudi Yehova Leza amba: mvulukepo kadi umone nkungalwija bukomo musungu umo’tu. Ponkapo Samishoni wafufukuta ne kubabata bikomo bya njibo’ya. Byobiya wasendalela’ko na bukomo bwandi bonsololo, ponkapo ne njibo’ya yatyumuka ne kuponena pa bonsololo badimo’ba. Ponkapo Samishoni wafwa pamo na bakulumpe ba Bene Fidishitia. Kabidi Yehova Leza wapene bushindanani kudi Samishoni pa Bene Fidishitia, ino pa mwanda wa kubulwa kikokeji, Leza kamupelepo meso amba amone bushindanani buno’bu ehe. Balunda nami, Yehova Leza watumine Yesu amba etulombole dishinda dya bushindanani bwa nyeke pa bibi kadi ba bumpikwa kikokeji pene kumo.

Kifwatulo 21: Yesu upinga bandemona

Kifwatulo 21: Yesu upinga bandemona

Yesu waikele mu Isalela padi kepapite myaka mingi mine na paikadileko ba Ngidioni ne Samishoni. Difuku dimo wasambakene muntu umo wadi mukwatwe na bandemona bangi. Muntu uno’u wapona ku maulu a Yesu kamunena’mba: le i kika ne amiwa, abe Yesu Mwana Leza Wamulu Mwine? Mishipiditu ino’i mibi yadi iyukile’mba Yesu i Mwana Leza. Ponkapo Yesu wasonanya bandemona pabwipi. Ponkapo luombe luno’lu lwa nyema ne kukeela mu dijiba. Kabidi bantu bashilula kumona Yesu ‘mba udi na lupusa padi Satana ne pa mishipiditu mibi mine. Ke-muntu ne mishipiditu mibi mine yadi imukokela.

Kifwatulo 22: Yesu upinga basunga mu Njibo Ikola ya Leza

Kifwatulo 22: Yesu upinga basunga mu Njibo Ikola ya Leza

Ebiya difuku dimo Yesu waendele ku Njibo Ikola ya Leza mu Yelusalema. Basunga bano badi mu Njibo Ikola ya Leza. Badi bapotoloja banyema bakwela bitapwa, ke-bantu badi bepeteja monka mu kudimba bakwabo. Byobiya Yesu wakalabala, webanena’mba: njibo yami i njibo ya milombelo, ino muyelamuna ke muta wa bangivi. Kabidi webapinga bonsololo pamo ne banyema bene kumo. Yesu I Mwana Leza. Wadi na bubinga kulonga nabya. Mwanda wadi na lupusa kadi ne bukomo bwa kupinga bantu babi mu njibo ya Shandi, ino Bayudea bamobamo bafityilwe kadi kebanena’mba: witulombole bidi shi udi na lupusa lulonga namino’u.

Kifwatulo 23: Lusangukilo lwa Yesu

Kifwatulo 23: Lusangukilo lwa Yesu

Bayudea baipaile Yesu. Kadi bamupopele ku musalabu wa mutyi, ino mu difuku dya busatu, wasangukile kutamba mu lufu. Yehova Leza wapene lupusa kudi Yesu lwa kushinda lufu. Kakikokejapo kadi kufwa ehe. Nanshi bantu bapwile kujinglula’mba i bine Yesu i Mwana Leza. Yesu walombwele bana bandi babwanga’mba: lupusa lonso napebwa’lo lwa mulu ne panopanshi; nanshi endai panopantanda ponololo mukafundije mizo yonso ya bantu nabo bekale ke bana bami ba bwanga. Mwibabatyije mu dijina dya Tata, ne dya Mwana kadi ne dya Muya Ujila. Kadi mwibafundije kulama byonso byonemulaile, talaipo byondi nenu ka ne kumfulo ya panopantanda. Nanshi Yesu i Mushindanani padi Satana, pa bubi ne pa lufu lwine. Aye upana bumi bwa mushipiditu ku bonso bakumulonda kadi usakidila amba tusapule mwanda uno’u ku bantu bonsololo.

Kifwatulo 24: Bashidika ba Yehova Leza

Kifwatulo 24: Bashidika ba Yehova Leza

Yesu i munekenye Satana kadi wetupe lupusa lwa kumushinda Satana. Tufwaninwe kwikala belongolole, pamo bwa mushidika udi pa kifwatulo kino’ki. Aye i mupwe kwilongolola mwanda wa bulwi. Dibajinji tufwaninwe kwisamba bubinebine. Tufwaninwe kuvwala buno bubinebine pamo bwa kikaya mu kifuka. Tufwaninwe kusanswa bantu bakwabo kadi kwibobila byonka biyabiya, kino kyo kilama kyadi kikankaja Satana kutweja bibi motudi. Kadi tufwaninwe kusapwila bantu bakwabo dishinda dya ndoe dya padi Yesu. Talapo’bidi bikwabilo bitukankaja batwe bonso kupona mu dishinda dya Satana. Nabya tufwaninwe kwikala na lukulupilo mudi Leza amba twikale bemanije pototo poo. Ebiya ngabo itulama ku byakyongo bya Satana. Yesu wetupandija ku madingi asansa a pa bubi bwetu. Kilama mutwe (kitebo) kipandija muya wetu ku lufu lwa nyeke. Kinenwa kya Leza, ke Mukanda Ukola kadi, lo lupanga lwetu. Nabya tufwaninwe kwilwingidija mwanda wa konakanya bubela bwa Satana. Shi kepano tufwaninwe kwisamba na Yehova Leza mu milombelo kadi ne mu kukokela misonanya yandi. Nabya netu tukayuka ne kumona bushindanani padi Satana, pa bubi ne pa lufu lwa nyeke lwine.

Related information