Vanja, Yevelela Kuenda Kala Elivulu Lia 2 Alume Va Mia Va Suku

Garis besar: Jacob, Joseph, Moses. 24 sections. It has a picture book to go along with the recording.

Nomor naskah:419
Bahasa:Umbundu
Tema:Law of God; Multiple themes
Pengunjung:General
Gaya:Monolog
Jenis:Bible Story
Kecanggihan:General
Tujuan:Teaching
Kutipan Alkitab:Paraphrase
Status:Publishable

Isi Naskah

Ulandu

Kalunga! Suku yocili ove wo kũliha? Linga hu lomboluile alume vamue vo kũlihile. Vanja koviluvialuvia vi kasi velivulu lievala lielalanja, osimbu ove o yevelela okasete kuenda ivaluka oku tuvula ociluvialuvia ci kuayimo eci o yevelela ocisungo cilo.

Ociluvialuvia Ca 1: Vamanji Vavali

Ociluvialuvia Ca 1: Vamanji Vavali

Efetikilo 25:21-34, 27:1-29

Vamanji vavali va sangiwa vociluvialuvia cilo va kasi loku litava. Umue londuko Esau wa kala ukongo unene. Yakomba, umalehe waye wa angiliya okulia kumue kuwa . Esau wa kala lonjala ya lua, ndopo a tiuka koku yeva, kuenje wa pinga okulia ku Yakomba. Yakomba wa popia la Esau hati, "Tete, ndandise unuñulu wove." Onduko Yakomba ya lomboloka 'ondimbiki', kuenje ca kala ocituwa caye oku limbika pamue oku kemba vakuavo. Eye wa yonguile ocipiñalo cepata eci nda ca linga ca kota liaye Esau. Esau ka sakalaile locipiñalo caye. Wa sakalala lika limo liaye lia kala lonjala. Kuenje wa landisa unuñulu waye lokulia.

Ociluvialuvia Ca 2: Onjoyi Ya Yakomba

Ociluvialuvia Ca 2: Onjoyi Ya Yakomba

Efetikilo 28:10-22

Noke Esau wa suvuka Yakomba. Eye wa yonguile oku u ponda, kuenje Yakomba wa tila, wa sia onjo yavo. Eci kua tẽkava eye wa pekela konele yonjila, kuenje wa enda kotulo. Wa lota onjoyi. Wa mola Suku kilu kuenda ovangelo va Suku va kala loku loka posi. Suku wa popia la Yakomba hati: "Ame ndi Yehova, Suku ya sekulu yove Avilahama, haime ndi Suku ya Isake. Osi eyindeti wa pekela ndi yeca kokuove, lombuto yove. Ombuto yove yi linga ndeseke lioposi, lovitumbulukila viove vi enda kutakelo lokutundilo, ko Norte lo ko Sul. Apata osi okilu lieve a sumũluhila kokuove lokombuto yove. Ocili, ame ñasi kumue love. Hu lava lava kuosi wenda, kuenje hu nena vali vofeka yilo. Si ku yanduluka toke nda linga eci nda likuminya love." Suku wa kũlihile okuti Yakomba ohembi, puãi Suku wa sola Yakomba, kuenje wa yonguile oku u pongolola. Oco Suku wo wiha olohuminyo evi via posoka.

Ociluvialuvia Ca 3: Yakomba Kuenda Lavone

Ociluvialuvia Ca 3: Yakomba Kuenda Lavone

Efetikilo 29:1 - 31:55

Yakomba wa ile oku ka talavayela Lavone, inanu yaye. Eye wa yonguilevo oku kuela Lahele omola a Lavone umalehe. Wa talavayela Lavone alima epanduvali ha fetela oku u kuela. Kuenje Lavone wa kemba Yakomba oco a kuele tete omolaye uveli, Lavone wa kisika Yakomba oku talavayela Lahele alima akuavo epanduvali. Yakomba wa kembavo Lavane. Eye wa nganyala ovinyama viosi via velapo vio vocunda ca Lavone, ndofeto yupange a linga. Yakomba wa yeva eci omala va Lavone va kala loku popia hati :"Yakomba wa tambula cosi isietu a kala laco, kuenda ukuasi wosi a fũla wo limuisa lukuasi wa isietu." Kuenje Yakomba wa limbuka okuti ekalo lia Lavone lia pongoloka, ka lingaile laye ndeci a ikile oku linga konyima.
Oco Suku wa popia la Yakomba hati: "Tiukila kofeka yolonjali viove kuenda kepata liove kuenje ame ha kala love."

Ociluvialuvia Ca 4: Yakomba O Lisanga La Suku

Ociluvialuvia Ca 4: Yakomba O Lisanga La Suku

Efetikilo 32:1-32

Yakomba wa yonguile oku tiukila konjo puãi wa kala lohele ya Esau, momo vosi va sole oku kemba vakuavo va kala lohele yoku fetuluinyua.. Uteke umue, vungende waye omunu umue wa kokela ku Yakomba. Eye wa liyaka la Yakomba uteke wosi. Eci kua kala loku ca, ulume wa lemeha ocikalo ca Yakomba. Eye wa popia la Yakomba hati: "Linga ngende, momo kua ca." Yakomba puãi wo tambulula hati: "Si ku eci osimbu kua sumũluisile." Kuenje ulume wa popia la Yakomba hati: "Onduko yove ka yi tukuiwa vali Yakomba, te Isaleli, ..." Isaleli ya lomboloka 'wa liyaka la Suku.' Kuenje paco opo haipo o sumũluisila. Kuenje Yakomba wa popia hati: "...Suku ndo limuila ocipala kocipala, haimo lumue omuenyo wange wa popeliwa."

Yakomba, 'ohembi' haeye wa hongua, Suku weya kokuaye oco a tẽle oku u pongolola. Yakomba wa tiukila kepata liaye lombembua. Eye wa linga Isia yofeka yinene yomanu va fendaila Suku.

Ociluvialuvia Ca 5: Onjoyi Ya Yosefe

Ociluvialuvia Ca 5: Onjoyi Ya Yosefe

Efetikilo 37:1-11

Yakomba, una Suku a luka Isaleli, wa kala lekui liomãla komãla vavali. Pokati kavo u a solelepo vali Yosefe. Yakomba wa iha Yosefe ocikutu cimue ca posoka. Vahuvaye vo kuatela ukuse. Uteke umue, Yosefe wa lota onjoyi kuenje wa sapuilako vahuvaye. Wa popia lavo hati: "Ndo yeveleli onjoyi eyi nda lota. Etu tua kala loku kuta ovitungu vepia, kuenje ocitungu cange ca talama vilu; ovitungu viene via ñualapo oku fendela ocitungu cange." Vahuvaye vo temela. Onjoyi eyi ya lomboloka okuti ovo nda va fendela manjavo? Ovo va suvuka Yosefe kuenje va vanja evelo lioku u linga civi.

Ociluvialuvia Ce 6: Yosefe O Landisiwa

Ociluvialuvia Ce 6: Yosefe O Landisiwa

Efetikilo 37:12-36

Vahuva a Yosefe va kala loku lisa oviunda viavo ocipãla lonjo yavo. Yakomba wa popia la Yosefe hati: "Kuende ka kũlihise va huvove kumue loviunda, oco wiye o sapuileko ondaka yaco." Eci va huvaye vo muila ocipãla oku iya kokuavo, osimbu handi ka pitilile, vo tumbika ongombo yoku wipa. Vo lula ombinja yaye ya posoka, kuenje vo wimba vocitunu cupolokoso. Kuenje umue pokati ka vahuvaye wa popia hati: "Ci tu kuatisa nye oku ponda manjetu?...Tu u landisi." Kuenje haico kua moleha vamue vakuamilu va kala loku pita. Oco va huvaye va landisa Yosefe lakui avali kolopalata. Kuenje va tama ombinja ya Yosefe losonde yocitupi cohombo yu va yi tuala ku isiavo.
Yakomba wa sima hati Yosefe wa ipaiwa locinyama cimue ca tema covusenge. Kuenje wo lila lesumuo lialua.

Ociluvialuvia Ce 7: Yosefe Kuenda Ukayi Wa Vĩha

Ociluvialuvia Ce 7: Yosefe Kuenda Ukayi Wa Vĩha

Efetikilo 39:1-20

Vakuamilu va landisa Yosefe k'Engito. Oko, eye wa linga upika wulume umue wa tukuiwa Potifala. Potifala wa kala omunu umue wa kemala ca lua velombe, oku lingila upange soma yo ve Engito. Suku wa kala la Yosefe kuenje cosi Yosefe a linga ca kuata esumũluho. Ka pa pitile osimbu ya lua haico a kapiwa kupange wukaleyi vonjo ya Potifala. Yosefe wa kala umalehe umue ososi haeye unumbu. Ukãyi wa Potifala wa yongola oku pekela laye. Wa seteka oku kisika oku pekela laye. Yosefe wa kũlihile okuti civi, kuenje wa likala. Eteke limue, eye (ukãyi) wo kuata kocikutu caye kuenje hati, "Pekela lame!" Yosefe puãi wa sia ocikutu caye povaka ukayi kuenje wa tilila kosamua. Eye ukãyi wa kuata ocikutu, wa ci tuala ku veyaye loku popia hati Yosefe wa seteka oku njonja. Kuenje Potifala wa kapa Yosefe vokayike.

Ociluvialuvia Ce 8: Yosefe Vokayike

Ociluvialuvia Ce 8: Yosefe Vokayike

Efetikilo 39:20 - 40:23

Suku lopo wa kala la Yosefe, ndaño muele vo kayike. Ka pa pitile osimbu ya lua, Yosefe vo kundika ocikele colomandekua viosi viovokayike. Kaleyi kovinyu viosoma kuenda kaleyi kolombolo kavali kavo va kalavo vokayike. Uteke umue, kavali kavo va lota olonjoyi. Ovo puãi va sima vati ka kuli omunu o tẽla oku va lomboluila olonjoyi viaco. Yosefe puãi wa popia lavo hati: "Ha Sukuko hẽ o kasi lelomboluilo? Sapuiliko olonjoyi viene." Oco kalei katete wa sapuila Yosefe onjoyi yaye; eye hati: "Konjoyi yange nda mola uyuva wa kala lovianja vitatu. Ame nda yunga ayuva, nda kamela vokopo ya soma (Faleo), kuenje nda yeca ku soma." Yosefe wo sapuila elomboluilo lionjoyi, eye hati: "Pokati koloneke vitatu, soma o laika oku ku eca, o panduluka, oku tiuwiya kupange wove." Kalei ka vakualombolo layevo wa lomboluila Yosefe onjoyi yaye, puãi elomboluilo lionjoyi yaye lieli liokuti pokati koloneke vitatu eye o pondiwa.
Pokati koloneke vitatu kaleyi kovinyu wa eciwa, puãi kaleyi kolombolo wa ipawa ndeci Suku a ci lekisile ku Yosefe.

Ociluvialuvia Ce 9: Onjoyi Ya Soma

Ociluvialuvia Ce 9: Onjoyi Ya Soma

Efetikilo 41:1-40

Yosefe wa kala vokayike alima akuavo avali.
Noke uteke umue soma y'Engito wa lotavo onjoyi. Eye wa mola olongombe epanduvali via neta konele yolui. Olongombe epanduvali via kopa via tunda volui kuenje via lia olongombe epanduvali via neta. Lomue wa tẽla oku lomboluila soma onjoyi eyi. Kuenje kaleyi kovinyu wa ivaluka Yosefe yu wa ci sapuila soma. Soma wopa Yosefe vokayike. Yosefe wa sapuila soma elomboluilo lionjoyi loku popia hati: "Suku wa ku lomboluila ove vu Soma eci o laika oku linga. Ku ka kala alima epanduvali epuiti, eliwewo, kuenda oku ungula kuwa k'Engito. Noke ku ka kala alima epanduvali onjala lelambu. Cilo Faleo a vanje ulume wa lunguka, ukualondunge, kuenje u kapa ukulu wofeka y'Engito. Kuenje ulume waco o, kumue loloñuatisi vimue ka via luile, vongolole olomema vimue valima aco a epanduvali elau loku vi solekela alima epanduvali onjala yi laika oku kala vofeka. Soma wa limbuka okuti espilitu lia Suku lia kala la Yosefe, kuenje wo kapa kusongui wofeka yaco yosi y'Engito."

Ociluvialuvia Ce 10: Uviali Wa Yosefe Ke Engito

Ociluvialuvia Ce 10: Uviali Wa Yosefe Ke Engito

Efetikilo 41:47 - 42:28

Pokati kalima epanduvali elau Vengito, Yosefe wa soleka okulia kua lua. Eci alima epanduvali elambu eya, eye wa landisa okulia komanu vosi vo ke Engito. Ko Kanana kua kalavo onjala. Kuenje vahuva ekui va Yosefe, veya oku landa okulia ke Engito. Ovo ka va kũlihile okuti Yosefe eye wa viala ve Engito, puãi eye (Yosefe) wa va limbuka. Eye wa va lundila hati vulondavululi, kuenje wa va kapa vokayike. Kovaso yoloneke vitatu wa popia lavo hati: "Nda wakuacili, neneli manjene una wa nukuili." Eye wa kuata umue pokati kavo, wo kapa vokayike, kuenje vakuavo va enda oku ka tuala okulia kapata avo.

Ociluvialuvia Ce 11: Yosefe O Lisitulula Ku Va Huvaye

Ociluvialuvia Ce 11: Yosefe O Lisitulula Ku Va Huvaye

Efetikilo 43:1 - 45:27

Vahuva a Yosefe va kala lohele yoku tiukila Kengito, puãi ka pa pitile osimbu ya lua, va sukila vali okulia. Ovo va kuata manjavo kuasula Benjamini kuenje va tiukila laye ke Engito. Yosefe lopo handi ka lisituluile kokuavo.
Eye wa va landisa okulia, puãi wa handeleka umue pakuenje vaye oku tiula olombongo viavo loku vi kapa kolonjeke viavo kuenda oku salamisa okopo yaye yopalata vonjeke yotiliku (yokulia) ya manjavo kuasula. Kuenje eye wa tuma akuenje vaye oku va landula loku va pindika pamue oku va lundila okuti va nyana. Va huvaye vonjanja yaco haico va tiukila konjo ya Yosefe. Eci va pitila oko, vosi yavo va kekama kolongolo loku fendela Yosefe, ndeci ca pita lovitungu vonjoyi ya Yosefe yosimbu, kuenje ovo vo livondela loku pinga ongecelo. Yosefe wa lila, kuenje ka tẽlele vali oku likandangiya. Eye wa va lomboluila hati: "Ame, ame manjene Yosefe, una wa landisi Kengito."
Eye wa kuatelelavo Benjamini kuenje wa lila osimbu a kala loku u sipula kuenda oku sipulavo va huvaye vakuavo. Yosefe wa va iha olombanjale via lua ha va vieci ku isiavo. Yosefe wa va handeleka oku tiukila ke Engito, loku nena apata avo kuenda Isiavo. Va huvaye va enda kimbo, kuenje va sapuila isiavo hati: "Yosefe haimo a kasilili lomuenyo!...Eye wa viala Engito liosi!"

Ociluvialuvia Ce 12: Yakomba Kuenda Yosefe K'Engito

Ociluvialuvia Ce 12: Yakomba Kuenda Yosefe K'Engito

Efetikilo 45:28 - 50:26

Yakomba wa katuka lepata liaye kuenda cosi a kala laco kuenje wa enda oku ka kala ke Engito. Eci Yakomba a mola omolaye Yosefe, wo kuatelela kuenje kavali kavo va lila. Noke eye (Yakomba) wa kapa ovaka aye komala a Yosefe kuenje wa sumuluisa akuenje vaco. Ovo va linga asongui vanene pokati kapata a Isaleli. Yakomba wa fila ke Engito eci okuti wa kuka ca lua.
Oco va huva a Yosefe va kala lusumba wovina vĩvi va lingila Yosefe. Puãi Yosefe wa popia lavo hati: "Ko ka yokoki, ame nga nda linga Suku? Ene muele wa simili ũvi, Suku puãi wo pongolola uwa, oco etaili kuli omanu va lua va kasi lomuenyo omo va popeliwa. Oco ko ka kuati usumba. Ene muele lotumãla tuene ame ndu tekuli." ("Ko ka kuati usumba. Ene wa simili uvi, Suku puãi wo pongolola uwa ha popela omanu.")

Ulandu

Vakuepata lia Yakomba, va Isaleli, va kala ke Engito kuenje va linga ofeka yinene okuti soma y'Engito wa fetika oku va kuatela ohele, kuenje wa va kisika oku linga upange ndapika. Puãi kua kala omunu onduko yaye Mose, haeyevo u Isaleli, omunu wa pama ku Ñala kuenje eye wa popela omanu va Suku kupika wo ke Engito. Osimbu o yevelela ko kassete, vanja koviluvialuvia. Eci o yevelela ocileñi eci, liangiliyila oku tẽhela kociluvialuvia ci kuayimo.

Ociluvialuvia Ce 13: Oñaña Mose

Ociluvialuvia Ce 13: Oñaña Mose

Etundilo 2:1-10

Eci pa pita ovita vitatu kanyamo (300) tunde polofa via Yosefe, Mose wa citiwa ke Engito. Koloneke viaco, va Isaleli va luile ca lua, kuenje soma yo v'Engito wa va talisa ohali yalua loku va lingisa upange ndapika. Eye wa handelekavo oku ipa oloñaña viosi vialume via va Isaleli. Puãi eci Mose a citiwa, inaye wo salamisa. Eci okuti wa kulapo kamue, wo kapa vuhamba woloneva kuenje wo salamisa, wo soleka voloneva konele yolui. Mukãyi waye Miliama wa kala ocipepi oku lavulula. Omola ufeko wa soma wa lokila kolui oku ka yua. Kuenje wa sanga uhamba kuenda oñaña Mose. Mose wa fetika oku lila. Omola a soma wa kuatela ohenda oñaña, kuenje wa sokiya oku likapela oñaña yaco, ha yi lingi omolaye. Mose wa kulila konjo ya soma (kelombe) Eye wa lilongisa ovoloño osi a va Engito kuenje wa linga omunu wa kemãla ca lua.

Ociluvialuvia Ce 14: Mose Kuenda Ocisapa

Ociluvialuvia Ce 14: Mose Kuenda Ocisapa

Etundilo 2:11 - 4:17

Eteke limue Mose wa mola umue u Engito wa kala loku veta umue upika u Isaleli. Mose wa yonguile oku kuatisa omanu vaye muele, omo liaco wa ipaya u Engito. Puãi ca kisika Mose oku tila Soma. Wa kala vekalasoko lia tukuiwa Sinai ca soka akuĩ akuãla kanyamo. Kuenje eteke limue eye wa mola owima. Wa mola ocisapa ca taima londalu puãi ka ca kale loku pia. Suku wa popia la Mose vocisapa hati: "Nda mõla ohali yomanu vange va kasi ve Engito. Hu tuma ku Soma ye Engito oco upe omanu vange vofeka yaco."

Ociluvialuvia Ce 15: Mose O Tiukila Ku Soma

Ociluvialuvia Ce 15: Mose O Tiukila Ku Soma

Etundilo 3:11 - 10:29

Mose wa kala lohele, puãi wa kolela Suku kuenje wa tiukila k'Engito. Huvaye Alone, wa enda laye. Ovo va popia la soma vati: "Yehova Suku ya va Isaleli wa popia hati: 'Eca omanu vange oco va ndingile ocipito vekalasoko.'" Puãi soma wa kumbulula hati, "Ame Ñala sio kũlihile, omo liaco si tava okuti va Isaleli va enda." Kovaso yaco Soma wa vokiyako vali kohali ya va Isaleli.
Suku wa popia la Mose hati: "....va Engito va laika oku kũliha okuti Ame ndi Yehova eci ndi laika oku õluila eka liange ke Engito loku popela va Isaleli oku vopa ve Engito. Suku wa popiavo hati: "Eci Faleo a popia love hati 'linga ocilimbu', oco popia la Arone hati 'kuata ombueti yove yi kupuila kovaso a Faleo' kuenje yi pongoloka, yi linga onyoha." Arone wa pokola, kuenje soma wa mola unene wa Suku, haimo lumue ka ecele omanu. Kuenje Suku wa linga ovikomo via lua la va Engito. Ovava a va Engito wa a pongoluisa a linga osonde kuenje vosi va Engito va fẽla ovisimo konele yolui lunene Nilu ha va sangi ovava oku nyua. Eye wa nena efengi liovimboto, leli liolohamue, leli liolonyi, lolombumbu via veta komanu lokovinyama, Mua kalavo ociwe, lowelema kuenda olohuma vofeka Yengito. Suku wa tava, wa ecelela okuti va Engito, vakuakulinga ovilimbu va vi linga, Puãi Suku wa linga ovilimbu via velapo okuti evi via va Engito vi sule. Lonjila eyi Suku wa eca elungulo ku Soma okuti eye (Suku) wa velapo kunene okuti vakuaku linga ovilimbu ci sule.
Puãi lopo soma wa likala oku pokola ku Suku, kuenje ka tavele oku eca va Isaleli okuti va enda.

Ociluvialuvia Ce 16: Okameme Ka Lumbiwa

Ociluvialuvia Ce 16: Okameme Ka Lumbiwa

Etundilo 12:1-36

Suku wa popia vali la Mose hati:"Sapuila va Isaleli okuti epata lepata li kuate okameme loku ka ipaya. Ovo va sesamela oku kuata yimue osonde loku yi kapa pamue oku yi nyila kovikuli viapito avo. Ha pita vofeka ye Engito. Ha ponda olonuñulu viosi vialume. Puãi eci ha mola osonde kolonjo viene, ha pitahãla, si ko lingi cĩvi." Suku o tẽlisa ohuminyo yaye. Vuteke waco, olonuñulu viosi via va Isaleli via fa. Kuenje soma wa popia la Mose hati: "Kuapua! Tundi vofeka yange, ove kuenda va Isaleli. Kuendi ka fendeli Yehova ndeci wa popi."

Ociluvialuvia Ce 17: Mose Komunda Ya Suku

Ociluvialuvia Ce 17: Mose Komunda Ya Suku

Etundilo 13:17 - 14:31

Mose wa songuila va Isaleli oku tunda ke Engito. Suku wa va pitila kovaso vongunji yelende kuenda vulienge wondalu. Eci soma yo ke Engito a yeva okuti va Isaleli va tunda, eye kuenda va Engito vakuavo va tema, momo va limbuka okuti va pesela apika vavo. Kuenje soma kumue la vakuavita va landula va Isaleli ha va tiukila vali ke Engito. Va Isaleli va pitila kokalunga kanene okuti ka va tẽlele oku yoka. Va Engito va kala konyima yavo. Ka kua kaile onjila yepuluko ku va Isaleli. Mose wa popia la va Isaleli hati: "Ko ka yokoki. Kolisiko, oco vu mola eyovo lia Yehova lina a ko muisi etaili. Momo va Engito vu lete ndeti etaili lalimue eteke vu ka va mola vali."Oco Suku wa yulula onjila vokalunga, kuenje va Isaleli va pita vosi ya kukuta. Va Engito va seteka oku va landula, puãi ovava a moleha vali yu a va tuvika. Va Engito vaco vosi va peseka kuenje Isaleli wa popeliwa.

Ociluvialuvia Ce 18: Okulia Kuenda Ovava Vekalasoko

Ociluvialuvia Ce 18: Okulia Kuenda Ovava Vekalasoko

Etundilo 16:1 - 17:7

Mose wa songuila omanu vekalasoko. Ovo ka va kale lokulia ku tẽla, omo liaco va lisiõsuila Mose, la Arone kuenda Yehova. Oñolosi oyo oñolosi, Suku wa tuma oviunda viotunjila tutito ha tu lingi okulia kuomanu. Omele oyo omele, kua moleha okacina katito ka setãhala ovinimbu viocikokoto. Omanu va tu nola 'mana'.
Eci ka kua kaile ovava, va Isaleli va lisiõsuila vali Mose. Mose wa popia lavo hat: "Nye vu hoyela lame? Nye vu setekela Yehova?" Mose wa likutilila ku Suku, kuenje Suku wo tambulula hati:" Kuata vombueti yove, yi veta kesenje Horeb, kuenje ku ka moleha ovava omanu va laika oku nyua." Akui akuãla kanyamo Suku wa tekula kuenda wongotiya ciwa va Isaleli vekalasoko.

Ociluvialuvia Ce 19: Mose Komunda Ya Suku

Ociluvialuvia Ce 19: Mose Komunda Ya Suku

Etundilo 19:1 - 20:17; Osamo 19:11; Yoano 14:15

Va Isaleli veya komunda Sinai. Suku wa lokila komunda londindimo kuenda ocinyi, lalende kuenda ondalu. Mose wa londa komunda, kuenje Suku wa popia laye hati: "Ame, ame ndi Yehova Suku yove,...Ku ka kuate olosuku viñi kovaso Ange. Ku ka petamelele kociteka cimue pamue oku ci fendela. Ku ka tukule onduko yange lesanda. Ivaluka eteke liepanduvali kuenje li kolisa. Oloneke epandu o linga upange wove wosi, puãi eteke liepanduvali esambata lia Yehova Suku yove. Veteke liaco ku ka lingilemo upange umue, ...Momo voloneke epandu Suku wa tunga ilu losi, lokalunga kuenda cosi ci kasimo, puãi veteke liepanduvali eye wa puyuka. Omo liaco Suku wa sumuluisa Esambata (eteke liepanduvali) loku li kolisa. Sumba so la nyoho, ...Ku ka ipaye. Ku ka pekelise. Ku ka ive, Ku ka imbile ukuele uvangi wuhembi pamue oku kembela umue, Ku ka livele ovikuata via vakuẽle."

Suku wa soneha ovisila evi kuenda ovihandeleko vikuavo vocipa covawe, kuenje Mose wa vi nena vemehi liomunda kovaso omanu vosi oku va pindisa. Etaili ovihandeleko (ovisila) via Suku tu vi sanga Vondaka Yaye okuti Embimbiliya.

Ociluvialuvia Ca 20: Onyoha Kuti

Ociluvialuvia Ca 20: Onyoha Kuti

Atendelo 21:4-9; Esinumuuilo 18:18

Va Isaleli va likuminyile oku pokola pamue oku lava ovihandeleko via Suku, puãi ka va ci lingile. Omanu lopo va fetika oku lisiõsuila Suku kuenda Mose vati: "Nye wa tu upila ke Engito okuti tu fila vekalasoko? Momo ka muli okulia ndaño ovava kuenda etu tu nyale okulia kuaco kũvi!" Suku wa va kangisa loku tuma olonyoha via tema pokati kavo. Valua pokati kavo va topuiwa lolonyoha viaco, kuenje va fa. Omanu va kalukila Mose oku pinga ekuatiso, kuenje Mose wa va likutililako. Oco Suku wa popia la Mose hati: "Tunga onyoha ya tema yi tulika kuti. Oco wosi wa lumaniwa, nda o yi vanja o kala lomuenyo." Kuenje Mose wa tunga onyoha yosipi, wa yi tulika kuti. Oco nda onyoha yimue ya lumana umue omunu o vanja konyoha yosipi o popeliwa.

Mose, umue pokati kasongui vanene kuenda ovapolofeto va kemala pokati ka va Isaleli. Pokati kakuĩ akuãla kanyamo, wa songuila va Isaleli vekalasoko. Osimbu handi Mose ka file, Suku wa popia laye hati: "Pokati kavo muele ñatulapo upolofeto ndove. Ñapa olondaka viange vomela waye,, leye o va lomboluila cosi ndu sapuila."

Ociluvialuvia Ca 21: Yesu O Tekula Omanu

Ociluvialuvia Ca 21: Yesu O Tekula Omanu

Yoano 6:1-58

Vokuenda kualima alua, va Isaleli va vanjiliya Upolofeto ukuavo wa lisoka la Mose. Kuenje oku sulako, Yesu Kilistu wa citiwa vofeka ya Isaleli. Eye wa longisa omanu ovilongua via Suku ndeci Mose a ci lingile.
Eteke limue, omanu va enda kocitumalo cimue culika oku ka yevelela elongiso lia Yesu. Ovo va kala lonjala, puãi ka va kuatele okulia. Ukuenje umue wa kala lolombolo vitãlo kuenda otulosi tuvali. Yesu wa kuata ombolo lotulosi tuvali kuenje wa eca olopandu ku Suku. Lokulia kuaco okuo, wa tekula omanu vosi. Omanu va kalako va pitãhala olohulukãyi vitãlo! Omanu va popia vati: "Ocili, u, eye upolofeto una o laika oku iya voluali!" Hẽla yaco Yesu wa popia lavo hati :"Ame ndimbolo yomuenyo. U iya kokuange ka kuata onjala, lu o ñolela ka yevi vali enyona."Voviluvialuvia vi kuamamo tu laika oku amako vali loku lilongisa eci ca tiama ku Yesu.

Ociluvialuvia Ca 22: Yesu O Vangula La Mose

Ociluvialuvia Ca 22: Yesu O Vangula La Mose

Mateo 17:1-8; Luka 9:28-36

Eteke limue Yesu wa songuila vatatu polondonge (vina vio kuama ocituke). Wa vi songuila komunda ha va likutilila. 'Olondonge' ca lomboloka okuti va kuama ocituke kuenda va kala akamba va Yesu.
Eci Yesu a likutilila, ocipala caye ca nina ndekumbi kuenda uwalo waye wa tua ndocinyi. Kuenje Mose l'Eliya va tukuluka (va moleha) kovaso avo. Mose la Eliya, kavali kavo, va kala ovapolofeto va Suku va kala kilu lieve konyima yalima alua eci okuti Yesu Kilistu handi keyile kulo kilu lieve. Mose la Eliya va vangula laye eci ca tiamela kolofa via kala loku u lavoka. Olondonge vitatatu via Yesu via va yeva eci va kala loku vanguila pamosi. Kuenje elende lia nina lieya lia va sikilila vosi yavo. Ondaka ya Suku ya popela velende yiti: "U omolange wa soliwa, haeye nda sanjukila. U yeveleli." Eci ondaka ya mala oku popia, olondonge lomue vali via mola te lika Yesu.

Ociluvialuvia Ca 23: Yesu Wa Tu Fila

Ociluvialuvia Ca 23: Yesu Wa Tu Fila

Yoano 3:14-16

Omanu valua va pembula Yesu kuenje va tẽla oku wipa. Asualali vo valela komindikiso yuti. Ovo va pondavo alume vakuavo vavali kumue laye. Ava kavali kavo va kala ovimunu haivo olomondi. Puãi Yesu lalimue eteke a lueyele ovihandeleko via Suku.

Puãi ove lame tua lueya ovihandeleko via Suku. Ndeci omanu vakuavo kilu lieve, etu tua sesamela ekangiso lienyoleho ka li pui kuenda oku takumuiwa ocipãla la Ñala. Suku puãi o sole omanu vosi. Eye ka yongola okuti etu tu enda Kongehena, ocipãla laye. Omo liaco Suku wa tuma Yesu oku tala ohali yakandu etu.

Koloneke via Mose, osonde yokameme ko Paskoa ya nyanyiwa oku popela va Isaleli kekangiso lia Suku vofeka Ye Engito. Mumosi haimo, Yesu okameme ka Suku, ka fa ndocilumba cetu. Osonde yaye oyo ofeto yakandu etu. Akandu ove la ange. Kuenje ndeci Mose a tulikike onyoha yosipi kuti, haico Yesu a tulikiwa komindikiso oco okuti wosi u kolela o mola omuenyo ko pui ndocali ca Suku. "Omo Suku a sola ndoco oluali, oco a ecela Omolaye wongunga okuti wosi u kolela ka fi, puãi o mola omuenyo ko pui."

Ociluvialuvia Ca 24: Yesu Kovailu

Ociluvialuvia Ca 24: Yesu Kovailu

Yoano 19:38; Ovilinga 1:6-11

Etimba lia Yesu liopiwa kekulusu loku li langeka veyambo. Puãi keteke liatatu, Yesu wa pinduka ku vakualufa kuenje kovaso yoloneke 40 olondonge viaye vio mola oku londa kilu.

Etaili, lopo Yesu o kasi lomuenyo.

Mose la vosi va fa loku kolela Suku, lavovo va kasi lomuenyo. Ovo va kasi kovailu. Mose wa kala usongui unene haeye upolofeto wa Suku, puãi Yesu eye Omola a Suku. Eye wa velapo Mose. Mose wa songuila va Isaleli vokalunga, kuenje va popeliwa ku va Engito. Yesu puãi weyilila oku popela omanu vosi vo kolela kuenda vo kuama. Eteke limue Yesu o laika oku tiuka kilu lieve ndeci a enda kilu. Kuenje Eye o laika oku ambata vosi vana vo kolela ha va kala kumue laye kilu.

Wa liangiliyila oku enda la Yesu? Ci tava okuti eye iya etaili. Kolela Ñala Yesu Kristu kuenje o popeliwa.

Keterangan terkait