Vanja, Yevelela Kuenda Kala Elivulu Lia 3 Eyulo La Suku

Outline: Joshua, Deborah, Gideon, Samson. 24 sections. It has a picture book to go along with the recording.

Script Number:420
Language:Umbundu
Theme:Victory; Multiple themes
Audience:General
Style:Monolog
Genre:Bible Story
Sophistication:General
Purpose:Teaching
Bible Quotation:Direct
Status:Publishable

Script Text

Ulandu

Kalunga! Vokasete kalo o ka yevelela u wa kuama mu Mose ndusongui wa va Isaleli. Lomo, Suku a va songuila oku tunda vekalasoko loku loña ko Kanana kuenda ndomo a va kuatisa oku yula ovanyali vungende wavo. Vanja oviluvialuvia vi sangiwa velivulu li kusukilua kuenje tuvula emela li kuayimo eci o yevelela ocisungo cilo.

Ociluvialuvia Ca 1: Yehosua O Liyaka La Va Amaleke

Ociluvialuvia Ca 1: Yehosua O Liyaka La Va Amaleke

Etundilo 17:8-13; Mateo 18:19

Va Isaleli ka va kale handi lofeka yavo muele. Ovo va ñuala ñualapo vekalasoko. Puãi Suku wa va likuminyile ofeka yo Kanana ha yi lingi ofeka yavo. Suku wa nola ulume umalehe onduko yahe Yehosua ha lingi usongui wovita via va Isaleli. Eci ca lingiwa eci okuti Mose, usongui va va Isaleli handi ka file. Epata likuavo, va Amaleke, veya oku liyaka la va Isaleli, kuenje Mose wa popia la Yehosua hati: "Tu nolele alume. Kuende. Ka liyake la va Amaleke. Hẽla ha talama kilu liowulu lombueti ya Suku peka." Olonjanja viosi eci Mose a tulika eka liaye lombueti, va Isaleli va yula va Amaleke. Kuenje ceya okuti ovoko a Mose a kava, kuenje ka tẽlele vali oku a katula. Kuenje va Amaleke va fetika oku yula. Kuenje alume vavali va katula ovoko a Mose toke koñolosi, kuenje Suku wa kuatisa Yehosua oku yula va Amaleke.

Ociluvialuvia Ca 2: Olondavululi Vieya Lepako Lia Kanana

Ociluvialuvia Ca 2: Olondavululi Vieya Lepako Lia Kanana

Atendelo 13:1-33; 14:1-38

Eci va Isaleli veya ocipepi lolongave via Kanana, Yehova wa handeleka Mose hati, tuma alume oku ka lavulula ofeka. Mose wa tuma ekuĩ liasongui kasongui vavali, pokati kavo, Yehosua la Kalembe haipo va kalavo. Kovaso yakuĩ akuãla koloneke alume va tiuka, kuenje va sapuila Mose ungende wavo. Ovo vati, "Tua ile vofeka wa tu tumile, ocili yi tumoha asenjele lowiki. Epako liofeka yaco lieli. Puãi omanu vofeka yaco va pama, ovaimbo aco a malehisua hao anene ca lua." Puãi Kalembe wohisa omanu, wa popia hati: "Tu lamani ndopo,tu yi kuati, momo oku yi yula tu ci tẽla muele. Puãi alume va lamanele laye kumosi va popia vati, "Oku liyaka lomanu vaco ka tu ci tẽla, omo va pama etu tu sule". Kuenje va sanduila ku va Isaleli ondaka yĩvi yofeka va ka lavuluile. Uteke waco omanu va lila kuenda va lisiõsuila asongui va Suku, Mose la Alone loku lisiõsuilavo Suku eye muele.
Suku wa tema, momo ovo ka vo kolelele, kuenje wa va tiula vekalasoko omo va kala akuĩ akuãla kanyamo. Va Isaleli vosi ka va kolelele Suku, va fila vekalasoko.

Ociluvialuvia Ca 3: Va Isaleli Va Yoka Olui

Ociluvialuvia Ca 3: Va Isaleli Va Yoka Olui

Yehosua 1:1-2, 3:1-17

Kovaso yokufa kua Mose, Suku wa nola Yehosua ha lingi usongui wa va Isaleli. Kuenje Suku wa popia la Yehosua hati: "Ukuenje wange Mose wa fa. Oco kaliye katuka, yoka olui olu Yolondau, ove kumue lomanu ava vosi, ha vu iñila vofeka ngeca ku va Isaleli. ...Kolisako, kuata utõyi, momo ove o piñalisa omanu ava ofeka nda lisilile lolosekulu viavo oku va yiha." Suku wa likuminyile oku kala la Yehosua, kuenje wo handeleka oku pokola Kondaka yaye (Ondaka ya Suku). Kuenje Suku wa sapuila Yehosua eci eye a sesamela oku linga. Ovitunda via va Isaleli via kala locikasa cimue ci likasi, ca tukuiwa ocikasa covisila. Vocikasa caco mua kala ovihandeleko via Suku via sonehiwa vovawe. Suku wa sapuila oku ambata ocikasa loku enda laco Kolui Yolondãu. Olui lua supoka, ca lomboloka okuti lueyukile calua, puãi tuli olomahi viovitunda via lamba kovava aluo, ovava haico a kotoka, a a tunda konano a talama a linga ondunda. Ovitunda via talama vokati kaluo osimbu omanu va yokila ko Kanana posi ya kukuta.

Suku o yongola oku ku longisa ove kuenda ame okuti eci a tu pinga cimue, etu tua sesamela oku U pokola loku U kolela okuti eye o tu kuatisa oku linga ocipango caye.

Ociluvialuvia Ca 4: Ovimbaka Via Yeliko

Ociluvialuvia Ca 4: Ovimbaka Via Yeliko

Yehosua 5:13-7:1

Va Isaleli va kala ko Kanana ocipepi limbo lia tukuiwa Yeliko, Kuenje Yehova wa popia la Yehosua hati: "Tala, nda eca Yeliko peka liove, losoma yaco, lalume vaco va pama vakuotõyi. Ene vosi walume vakuavita, ñuali imbo, ñualiko lumosi. Eci oco vu linga oloneke epandu. Ovitunda epanduvali viambate anguena epanduvali olombinga viovitupi, kuenje vi pite kovaso yocikasa. Keteke liepanduvali, ñuali imbo olonjanja epanduvali, kuenda ovitunda vi sike anguena. Eci va sika ombinga yocitupi, kuenda eci va yeva ocileñi cenguena, oco omanu vosi va kaluke londaka yalua. Ocimbaka cimbo ci leñuha, kuenje omunu omunu posi a suñama haipo a lamanela."

Kuenje Yehosua kuenda omanu va linga muele ndeci Suku a va handeleka. Ovimbaka via Yeliko via leñuha, kuenje Isaleli wa tambula imbo. Suku wa handeleka va Isaleli okuti ka va likapela cimue. Puãi ulume umue londuko ya Akani wa lueyela Suku. Kuenje noke tu ka ku lomboluila ca velapo eci ci tiamela kokuaye.

Ociluvialuvia Ca 5: Isaleli O Tila Ko Hayi

Ociluvialuvia Ca 5: Isaleli O Tila Ko Hayi

Yehosua 7:1-12, 6:18,19,24

Ocipepi la Yeliko kua kala imbo likuavo liovanyali lia tukuiwa Hayi. Yehosua wa sesamelele oku kuatavo Hayi. Oco wa tuma olondavululi oku ka lavulula imbo. Olondavululi via tiuka loku popia hati: "Havosiko va sesamela oku lamana oku ka liyaka la Hayi, momo vañamiñami va kasiko (ca lomboloka okuti vakuavita vatito ca lua)." Omo liaco Yehosua wa tuma lika alume ka va luile vakuavita ha va tambula Hayi. Puãi alume va Hayi va pama calua, kuenje va yula alume va Isaleli. Vamue va Isaleli va ipaiwa, vakuavo va tila oku popela omuenyo wavo. Kuenje Yehosua la vamue akulu (asongui) va Isaleli va petamela kocikasa covisila via Yehova lesumuo lialua. Puãi Suku wa popia la Yehosua hati: "Votoka, nye wa tuvikila ndoco ocipala cove posi? Va Isaleli va linga ekandu. Ocili muele, ocisila cange nda va handelekele, va ci lueya. Ocili va kuata kovina via siñaliwa, kuenda va iva, va limbika, yu va vi yombeka muele pokati kovikuata viavo. Oco va Isaleli ka va tẽla oku tamalala lovanyali vavo;..."
Yehova wa sapuilile va Isareli okuti ovina viosi va iva pamue va tambula, ndeci o palata lulu, va sesamelele oku vi tumbika kokuaye, ca lomboloka okuti oku vi kapa (vonjo yaye).

Oku upisa kelinga eli tu lilongisa okuti Suku o kangisa vosi vana vo sinila. Eci etu tu sinila Suku, tu livalula etu muele kuenda tu valulavo vakuetu.

Ociluvialuvia Ce 6: Esombiso Lia Acani

Ociluvialuvia Ce 6: Esombiso Lia Acani

Yehosua 7:14-26

Yehosua wa kovongela omanu vosi kovaso a Suku. Suku wa lekisa Yehosua okuti Akani eye wa sinila Suku. Yehosua wa popia la Akani hati: "Kaliye sapuileko eci wa linga, ku ka ndimbike." Kuenje Akani wa kumbulula Yehosua hati: "Ocili, nda lingila Yehova Suku ya va Isaleli ekandu. Pokati kovikuata Suku a lemela okuti ka tu vi tikula, eci nda muilapo okapote kamue ka posoka kuenda opalata lulu, nda vi nyañula loku vi lembikila posi vokati kombalaka yange." Alume vamue ka va luile va vi sanga yu va vi nena ku Yehosua. Kuenje Akani kumue lepata liaye va ipawa kuenda ovikuata viaye viosi via sanduiwa, via nyoliwa ndeci Suku a ci handelekele. Suku wa tiuka konyeño yaye, kuenje wa popia la Yehosua hati: "Ku ka kuate usumba, ku ka yokoke. Kuende lalume vosi vakuavita. Katuka, lamanela ko Hayi. Tala, nda eca peka liove osoma ya Hayi, lomanu vaye, limbo liaye, lofeka yaye." Oco Isaleli wa pokola ku Suku, kuenje va kuata ongusu yoku yula Hayi.

Suku o lete ovina viosi tu linga. Etu ka tu tẽla oku sitika pamue oku yombeka ovina vĩvi tu linga. Puãi nda tu limbuka akandu etu kuenje tu a litavela ku Suku, Eye o tu ecela kuenda o tu yelisa akandu etu.

Ociluvialuvia Ce 7: Ekumbi Kuenda Osãyi Vi Talama

Ociluvialuvia Ce 7: Ekumbi Kuenda Osãyi Vi Talama

Yehosua 10:1-14

Omanu vavi va Amori vakuafeka ya Kanana va fetika oku kuatela ohele va Isaleli. Kuenje olosoma vitãlo via va Amori (asongui vavo) va likongela oku liyaka la va Isaleli. Puãi Suku wa popia la Yehosua hati: "Ku ka va yokokele, momo nda eca povaka ove.Lomue pokati kavo o tamalala love." Oco Yehosua kuenda olohoka viaye va enda oku ka yaka lolofeka viaco, kuenje vosi yavo va tila va Isaleli. Suku layevo wa lowila kovanyali ovawe alua, kuenje valua va fa. Uyaki wa amako eteke liaco liosi. Yehosua wa likutilila, kuenje Suku wa talamisa ekumbi losãyi eteke liaco liosi, toke eci va Isaleli va yula ovanyali vavo. Ka kua la kala eteke lia lisoka lalio.

Ociluvialuvia Ce 8: Yehosua O Pindisa Omanu

Ociluvialuvia Ce 8: Yehosua O Pindisa Omanu

Yehosua 23:1-24:31

Eye Yehosua a linga osekulu, okuti wa kuka, wa kovonga omanu vosi va Isaleli loku va kongela pamosi. Eye wa va ivaluisa ovina vinene Suku a va lingila, ndomo Eye Suku a endisa olosekulu viavo oku vopa ke Engito, ndomo a vo ongotiya kuenda ndomo a va yakelako. Yehosua wa popia la va Isaleli hati: "Pami cocili; kali lutate woku pokola kovina viosi via sonehiwa Velivulu Liovihandeleko via Mose (evi a tambula ku Suku), kuenje ko ka pambukili ndaño kondio, ndaño kepili. Nda vu pokola lika ku Suku, eye o laika oku u kuatisi oku tundisa olofeka vi kasi handi kovaso ene, kuenje vu laika oku piñala ofeka yosi ya Kanana. Puãi nda vu pokola kolosuku vikuavo, vu laika oku siapo ofeka yiwa Suku o likuminyili. Noli etaili u vu laika oku vumba." Kovaso yaco, Yehosua wa tula omuenyo.

Ociluvialuvia Ce 9: Ndevola O Vanguila Suku

Ociluvialuvia Ce 9: Ndevola O Vanguila Suku

Olonganji 4:1-9

Puãi kovaso yokufa kua Yehosua, omanu va Isaleli va yanduluka Yehova. Va fendela oviteka via va Kanana. Oco va Kanana va kuata omoko la va Isaleli, kuenje va linga lavo eci cĩvi toke eci va pinga ekuatiso lia Yehova Suku. Ndevola wa kala usongui wa va Isaleli. Omanu veya kokuaye oku lunguiwa loku songuiwa, kuenje eye wa va kuatisa oku sokiya ovitangi viavo. Wa seteka oku va tuiwiya ku Suku.
Eteke limue wa kovonga Balaka. Eye wa kala usongui wovita via va Isaleli. Ndevola wa popia laye hati: "Kuata ekuĩ liolohulukãyi vialume, kuende lavo Komunda Tavole. Sisela kumue lasualali o ko Kanana va laika oku iya oku liyaka love. Puãi Suku o laika oku ku iha eyulo." Balaka wa kala lohele, kuenje wa popia la Ndevola hati: "Nda ove wenda lame, ngenda. Puãi nda kuendi, lame si endi. Kuenje Ndevola wa popia hati: "Ngenda muele kumue love. Haimo vungende waco o linga ndeti, ka vu ku muisa ekemalo, momo Yehova eca Sisera peka liukãyi."

Ociluvialuvia Ce 10: Suku O Kuatisa Oku Yula Sisera

Ociluvialuvia Ce 10: Suku O Kuatisa Oku Yula Sisera

Olonganji 4:10-16

Ndevola la baraka va songuila vakuavita toke Komunda Tavole. Sisela la va Kanana va lamaneleleko oku ka liyaka la va Isaleli. Sisela wa kala lovita ecea viakãlu utale. Akãlu aco a tungiwilile muele oku yaka. Puãi akãlu aco a lemele calua, momo osi apa pa pitila ovita, osi ya kala konele yolui oko kua sangiwa va Isaleli, osi yaco ya leñelele ca lua. Eci Balaka la va Isaleli va amako oku liyaka la Sisera, Suku wa koka ovitangi pokati kolohoka via va Kanana. Sisela wa loka kekãlu liaye, kuenje wa endela posi, wa tila. Puãi Balaka wa landula akãlu a va Kanana, kuenje wa ponda asualali osi losipata; lomue wa supapo. Kuenje lekuatiso lia Suku olohoka via va Isaleli via tẽla oku ipaya olohoka via va Kanana. Te lika Sisela eye wa supapo.

Ociluvialuvia Ce 11: Yaele O Ponda Sisera

Ociluvialuvia Ce 11: Yaele O Ponda Sisera

Olonganji 4:17-23

Sisela wa tilila kombalaka yukãyi wa tukuiwa Yaele. Yaele ka kaile u Isaleli. (Omanu vaye va livalele ukamba la va Kanana, puãi eye kumue la veyaye va silepo omanu vavo muele, ka va kalele vali lavo). Yaele wa popia la Sisera hati, "...Pambuka a ñala yange, pambukila kulo. Ku ka kuate usumba." Oco wa iñila vombalaka oku ka salama. Yaele wo wiha asenjele (olete), yu wa nyua, kuenje wo sikilila ombilikiti. Kuenje Sisera wa enda kotulo. Yaele wa kuata vombambo yombalaka kuenda omalatelo. Wo yomba levando osimbu a pekelako kuenje wa valela ombambo polombandu viaye toke ya toma posi, kuenje wa fa.
Eci Balaka a moleha loku landula Sisela, Yaele wo kovonga yu wa popia laye hati: "Enju hu lekise omunu o kasi loku sanda." Kuenje Sisera wa kunguvala lombambo yombalaka vutue waye toke ya toma posi.

Ociluvialuvia Ce 12: Isaleli O Tumbangiya

Ociluvialuvia Ce 12: Isaleli O Tumbangiya

Olonganji 5:1-31

Suku eye wa eca unene ku va Isaleli ha va yuli va Kanana. Ndevola la Balaka va imba ocisungo coku panduila Suku; omanu va sanjukila kumue lavo. Ovo va kala lesanju lioku kuata usongui ndeci Ndevola. Kokuavo eye wa kala nda inavo. Va sivayavo Yaele, momo eye ka kuatelele usumba Sisela. Suku wa talavaya lakãyi vaco oku popela Isaleli.

Suku o talavaya la vosi vana va moleha ndu va hongua, ha yuli ava va pama. Etu vosi tu kuete unyali wa pama o tukuiwa Satana. Oku yula Satana, Suku wa tuma Ñala Yesu Kilistu oku fila komindikiso. Oko, oko eye a tambuila ekangiso liakandu etu, ca lomboloka okuti akandu ove la ange. Omanu va vĩha va kokela Yesu kolofa. Ovo va simile vati eye wa hongua. Ivaluka ndomo va Isaleli va yula ovanyali vavo lunene wa Suku. Yesu layevo wa yula Satana, unyali womanu vosi, eci a fila komindikiso loku pinduka kolofa. Lelinga eli Eye wa lekisa okuti wa yula unene wekandu, lowu wolofa kuendavo Satana. Kuenda wa tu yovolavo kunene wekandu vovimuenyo vietu. Kuenje etaili etu lopo tu tẽla oku yula ekandu kuenda unene wa Satana. Tu ci tẽla la Yesu. Yesu eca omuenyo ko pui ku wosi u kolela kuenda u pokola. Omo liaco tu imbi kuenda tu sanjuki loku fendela lika Suku yocili.

Ulandu

Vanja, yevelela kuenda lilongisa ovipama evi oku upisa Vembimbiliya. Ivaluka oku tuvula ociluvialuvia ci kuãyimo eci o yevelela ocisungo eci.,

Ociluvialuvia Ce 13: N Gindione Kuenda Ungelo Wa Suku

Ociluvialuvia Ce 13: N Gindione Kuenda Ungelo Wa Suku

Olonganji 6:1-24

Va Isaleli va amako loku sinila Suku kuenje va linga ovina vĩvi. Oco Suku wa tava okuti va Mindiane va va viala ci soka alima epanduvali. Va Midiane va nyola ovikũla via va Isaleli. Kuenje va Isaleli va lila loku liyuila Yehova ha va popela.
Eteke limue ulume umue wa tukuiwa Gindeone wa kala loku sasa otiliku vocikoselo cayuva. Eye wa kala loku vundisa otiliku oco va Midiane ka va ka yi mole. Ungelo wa Yehova weya ku Gindeone, kuenje wa popia hati: "Yehova o kasi love olume wa pama ukuotõyi." Ngindeone wa kumbulula hati: "Nda Yehova o kasi letu, oco hẽ, ovina evi viosi via tu wilila nye?" Puãi Yehova wa kolisa Ngindeone loku popia laye hati: "Kuende longusu o kuete ndeti. Popela Isaleli peka lia va Mindiane. Hameko hẽ nda ku tuma?"
Ngindeone wa kala lukũlihiso wokuti epata liaye lia honguele kuenda eye umue pokati kava va sule vepata liaye. Puãi ungelo wa Suku wa popiavo laye hati: "Ame ñala kumue love, kuenje va Midiane o va lundula ndomunu umosi." Ngindeone wa eca okulia kungelo. Ungelo wa lamba kokulia kuaco lombueti yaye. Vonjanja yaco haico kua vata ondalu, kuenje ungelo wa Suku wa senguluka kovaso aye. Oco Gindeone wa limbuka okuti Suku eye wa vangula laye.

Ociluvialuvia Ce 14: Ngideone O Nyola Oviteka

Ociluvialuvia Ce 14: Ngideone O Nyola Oviteka

Olonganji 6:25-32

Uteke waco Suku wa popia vali la Ngindeone hati: "Lundula utala wa Baale, una u kuete so, timbula oviti vi kola vi kasi konele yawo. Tungila Yehova Suku yove utala wovawe a longekiwa ciwa kilu liewe lilo." Epata lia Ngindeone lia fendaila oviteka (olosuku) viaco Baale kuenda Asherah via va Kanana. Gideone wa kala lohele yowiñi, puãi wa pokola ku Suku. Uteke waco eye wa kuata alume ekuĩ, kuenje va nyola olosuku (oviteka) viaco. Omanu va temele ca lua, kuenje va yonguile oku ipaya Ngideone, puãi isiaye wo tundila olunda loku popia hati: "Nda Baale osuku, a litundile eye muele olunda." Puãi lacimue ceyapo.

Suku wa velapo, olosuku via tungiwa loviti, pamue lovawe ale lovina vimue vikuavo, vi sule.

Ociluvialuvia Ce 15: Asualali a Ngindeone a Nyua Ovava

Ociluvialuvia Ce 15: Asualali a Ngindeone a Nyua Ovava

Olonganji 7:1-7

Noke Ngindeone wa kongela vakuavita va Isaleli, momo va Midiane va likuatele omunga oku yaka la va Isaleli. Puãi Suku wa popia la Ngindeone hati: "Omanu va kasi kumue love va lua enene. ...Wosi esumba haeye o luluma, a tiukile." Valua pokati kalume va Ngideone va tiukila. Suku wa popia vali la Ngindeone hati: "Omanu lopo valua enene. Lokila lavo kovava, oko hu va nolela." Kuenje Ngindeone wa lokila lalume vaye kovava ha va nyui. Valua vavo va kekama kolongolo loku nyua ovava. Kua kala lika ovita vitatu vialume via sua lovaka avo loku a capa ndeci ombua. Kuenje Suku wa popia hati: "Ovita vitatu vialume va capa, ovio ndu popeli lavio, haivio ngeca lavio va Midiane peka liove."

Ociluvialuvia Ce 16: Alume Va Ngindeone Va Ñuala Ocilombo Ca Va Midiane

Ociluvialuvia Ce 16: Alume Va Ngindeone Va Ñuala Ocilombo Ca Va Midiane

Olonganji 7:16-25

Alume vakuavita via va Midiani va luile ca lua okuti oku va tenda ka ca tẽliwile, omo ca kala ndolohuma via vata posi. Kuenje va tunga ocilombo vocimbota. Ovo va kala lolongamelo via lua.Ngindeone wa kala lika lovita vitatu vialume, puãi Suku wo lekisa eci a sesamela oku linga. Ngindeone wa eca komunu lomunu enguena lesanga liupolokoso lovimihi vokati kasanga aco. Vokati kuteke va ñuala ocingonja ocilombo ca va Midiane. Kuenje vonjanja yimosi va fetika oku linga onjuela. Va sika anguena, va ipa asanga, kuenje va vilikiya vati: "Osipata ya Yehova la Ngindione." Va Midiane va kala lusumba lovimuenyo viavo, kuenje va fetika oku liponda voliavo muele. Ovo va tila alume va Ngindione. Ngindeone wa tuma olomunga oku kopilila ocisupe casualali va Isaleli. Va landula va Midiane, kuenje valua va pondiwa.

Ociluvialuvia Ce 17: Samisone O Ponda Ohosi

Ociluvialuvia Ce 17: Samisone O Ponda Ohosi

Olonganji 13:1-14:19

Kovaso yolofa via Ngindione, va Isaleli lopo va yanduluka Suku. Suku wa tava okuti va Filisiti, olongangala, va va viala ca soka akuĩ (40) kalima. Kuenje Suku wa tuma usongui loku wĩha unene woku popela va Isaleli. Onduko yaye Samisone. Eci Espilitu lia Yehova lio wila, eye wa kuata ongusu ya lua. Samisone lalimue eteke a putile esinga liaye. Esinga liaye lia lepa lia kala ondimbukiso yokuti eye wa tiamela ku Ñala. Eli olio lia kala elumbu liongusu yaye. Samisone wa sola ukãyi u Filisiti kuenje wa popia la Isiaye hati: "Ko Timina nda muilako ukãyi umue u Filisiti. Kaliye ko njupili ha lingi ukãyi wange."
Eci Samisone a kala vungende waye woku loña konjo yukãyi, ohosi ya liyaka laye. Samisone wa kuata ongusu yalua, kuenje wa ponda ohosi lovoko aye muele. Eye wa kuela ukãyi u Filisiti. Puãi eye wa sepuiwa kovaso a va filisiti vakuavo. Lonyeño yaco Samisone wa ponda akui atatu (30) a va Filisiti. Kuenje wa tiukila konjo ya isiaye.

Ociluvialuvia Ce 18: Samisone Kuenda Olombulu Vovapia Otiliku

Ociluvialuvia Ce 18: Samisone Kuenda Olombulu Vovapia Otiliku

Olonganji 15:1-7

Kovaso yaco Samisone wa tiukila ku va filisiti oku ka pasula ukãyi waye, puãi isia yukãyi wo wecele ale kulume ukuavo. Samisone wa popia hati: "Kaliye ndi pua eko la va Filisiti nda ndi va linga civi." Eye wa tunda, wa kuata ovita vitatu (300) kolombulu. Oco wa nyañula imihi yu wa ñualisapo olombulu, kuenje via limba icila. Pokati kicila viaco vivali, wa kapapo umihi. Eci a miha, wa eca olombulu, yu via enda kotiliku ya va Filsiti. Otiliku yavo yosi ya yokiwa. Va Filisiti va suvuka Samisone, kuenje va ile ko Yunda oku ko kuata, ha lingi omandekua.
Va Isaleli ko Yunda va kala lohele la va Filikisiti, kuenje va kuta Samisone yu vo weca kokuavo. Puãi Espilitu lia Yehova lia wila Samisone lunene. Ovikolo viaye via loluka kovaso aye. Wa nyañula olumbanjo luocimbulu, kuenje wa ponda laluo ohulukãyi yalume.

Ociluvialuvia Ce 19: Va Filisiti Va Puta Samisone

Ociluvialuvia Ce 19: Va Filisiti Va Puta Samisone

Olonganji 16:4-22

Samisone wa sola ukãyi umue ukuavo u Filisiti. Onduko yaye Delila. Eye olonjanja viosi wa seteka oku kũlihisa elumbu liongusu ya Samisone. Kuenje oku sulako eye Samisone wo sapuila cosi, hati: "Suku wa sapuila mayi la tate okuti ndinga upange wa Suku. Vutue wange ka mua la pita omoko yomuto. Nda mutiwa, oco olohõlo viange vi nunda."
Uteke umue, eci Samisone a kala loku pekelako, Delila wa kovonga va Filisiti. Vo puta esinga liosi. Kuenje Suku wa yanduluka Samisone, kuenda ongusu yo tunda. Va Filisiti va kuta Samisone. Vo tofola ovaso aye kuenje vo talavayisa vokayike. Puãi esinga liovutue waye lia fetika vali oku kula.

Ociluvialuvia Ca 20: Samisone O Nyola Va Filisiti

Ociluvialuvia Ca 20: Samisone O Nyola Va Filisiti

Olonganji 16:23-31

Eci Samisone a kala vokayike, va Filisiti va ci sanjukila ca lua kuenje asongui vavo va lumba ocilumba ku suku yavo. Kuenje vopa vokayike Samisone omeke loku papala laye ndocitalukilo. Va papala laye. Vonjo mua kala omanu valua kuenda kolusoka kua kala eci ci soka olohukukãyi vitatu viomanu. Samisone wa pinga umue pakuenje vo kuata peka hati: Ndambise vongunji yi kuete onjo oco ndi liyekemo. Kuenje Samisone wa likutilila ku Suku hati: "A Yehova Suku, hu pinga njivaluke. Hu pinga ñolise onjanja eyi lika,..." Samisone wa sinda longusu yaye yosi olongunji, kuenje onembele ya liwila posi kilu lia vosi. Samisone la vosi va kala vonembele va fila kumue. Suku wa talavaya la Samisone ha yuli va Filisiti. Eteke liaco liolofa via Samisone Suku wa eca eyulo loku lundula va Filisiti. Eteke liaco eye wa ponda valua va Filisiti okuti vomuenyo waye wosi ci sule.

Ociluvialuvia Ca 21: Yesu O Tundisa Ovilũlu Via Vĩha

Ociluvialuvia Ca 21: Yesu O Tundisa Ovilũlu Via Vĩha

Luka 8:26-39

Eci pa pita alima alua, kovaso yoku kala lomuenyo kua Ngindione la Samisone, Yesu wa kala vofeka ya Isaleli. Eteke limue eye wa sanga omunu o kuetiwe lovilũlu via lua. Ulume wa wila posi kovaso a Yesu, kuenje wa popia hati: "Tu likuetele nye love a Yesu a Mõla a Suku Tõlo? Hu pinga siti, Ku ka njambule!" Ovilũlu viaco via kala lukũlihiso wokuti Yesu omõla a Suku. Yesu wa handeleka ovilũlu oku sia omunu waco. Ovilũlu via iñila vocunda colongulu ca kala ocipepi. Olongulu via iñila vokalunga, kuenje via taka. Omanu va fetika oku mola okuti Yesu okuete unene la Satana, ca lomboloka okuti wa velapo Satana kuenda wa velapovo ovilũlu. Ocili, ndaño muele ovilũlu vio pokola. Ondaka ya Suku yi tu longisa okuti Yesu wa tambula unene wosi wokilu lowu wokilu lieve. Eye o kuete unene woku tundisa ovilũlu.

Ovilũlu vi kuete ovonene alua, puãi ovio ci tava okuti vi tundisiwila Vonduko ya Yesu Kilistu lunene w'Espilitu Liaye li Kola.

Ociluvialuvia Ca 22: Yesu O Tundisa Omanu Va Vĩha

Ociluvialuvia Ca 22: Yesu O Tundisa Omanu Va Vĩha

Luka 19:45-48; 20:1-2

Eteke limue Yesu wa iñila vonembele ya Suku ko Yelusalayi. Onembele omanu va yi pongolola ocitanda coku landisa ovinyama vioku lumba osimbu va kalavo loku linga olomilu viavo muele loku punda vakuavo. Yesu wa lupuisa vakuamilu kuenda ovinyama. Eye wa popia lavo hati: "Ca sonehiwa cokuti Onjo yange yi linga onjo yokulikutila ene puai wa yi lingisi ocilala covingumba." Oloneke viosi, Yesu wa longaisa vonembele. Puãi asongui vamue va Yundeya va kala loku sanda onjila yoku ipaya Yesu, omo ka vo kolelele. Eteke limue va pula Yesu hati: "Tu sapuileko. Unene we o kasi loku linga lawo ovina evi? Helie wa ku ĩha omoko yaco?"

Ociluvialuvia Ca 23: Kovaso Yokufa, Yesu O Kasi Lomuenyo

Ociluvialuvia Ca 23: Kovaso Yokufa, Yesu O Kasi Lomuenyo

Mateo 28:16-20

Asongui va Yundeya va kala anyali va Yesu va vanja omanu vakuavo ha vo pondi. Asualali va valela Yesu komindikiso yuti. Kuenje oko a fila. Puãi keteke liatatu wa pinduka. Suku wo pindula kolofa. Suku wa eca ku Yesu unene kolofa. Eye lalimue eteke a fa vali. Epinduko liaye lia lekisa okuti Eye, eye Mõla a Suku. Yesu wa popia loloñame viaye hati: "Uviali wosi wokilu lowu wokilu lieve wa nyihiwa. Oco kuendi, ka tavisi olofeka viosi oco va linge olondonge. Va papatisili vonduko ya Tate, la Mõla kuenda Espilitu li Kola. Va longisi oku linga ovina viosi ndo kundiki. Kuenje ame ñasi lene kumue oloneke viosi toke kesulilo lioluali."

Yesu wa yula ekandu kuenda wa yulavo olofa. Ava vosi va kuama Yesu, Suku o va ĩha Espilitu li Kola. Espilitu li Kola li kuatisa vakuetavo oku sola Suku kuenda oku kolela Ondaka Yaye.

Ociluvialuvia Ca 24: Esualali Lia Suku

Ociluvialuvia Ca 24: Esualali Lia Suku

Efeso 6:10-18

Yesu wa yula Satana, kuenje Eye eca unene woku liyaka la Satana kuenda luyaki waye. Puãi eci etu tu tẽla lika oku ci linga nda tua liangiliyila uyaki, ndeci ci kasi loku linga esualali li sangiwa vociluvialuvia. Eye wa liangiliyila uyaki.

Catete etu tua sesamela oku popia ocili olonjanja viosi loku kuama Ondaka ya Suku okuti oyo ocili. Tua sesamela oku yi wala ndeci uvia u kasi letu oku kuosi tuenda.
Tua sesamela oku sola vakuetu kuenda oku linga eci ca sunguluka kovaso a Suku. Ovina viwa tu sima levi tu popia kuenda evi tu linga, vi tu teyuila ndeci o (BREASTPLATE) yi tu teyuila kovilinga lokolondaka vĩvi.
Etu tua sesamela oku liangiliyila oku lomboluila vakuetu ondaka yiwa yombembua vu Yesu Kilistu. Ci kasi ndoku kapa olohaku viusualali. Ci tu kuatisa oku talama ngo latutu a Satana kuenda ci teyuila ovolu etu koku sielenela volonjila viaye vĩvi.
Tua sesamela oku kolela okuti Yesu Kilistu wa fila oku tu yovola kunene wa Satana lowu wekandu. Eci oco ociteyuilo cetu ku Satana. Satana o yongola oku tu yonjela kekandu. Eci eye a yongola oku tu nyola.
Ondaka ya Suku yi tu longisa okuti Yesu wa popeliwa kepiso liekandu. Ava va tava va tunda volofa, va ilukila komuenyo ko pui. Ukulihiso waco owu u teyuila ukuetavo wosi kovisimilo viatatahayi, ndeci o.........(HELMET) u teyuila utue wesualali. Ondaka ya Suku oyo osipata ya Suku espilitu Sandu. Ondaka ya Suku ocili. Ukuetavo wosi o sesamela oku talavaya Londaka ya Suku oku nyola ovohembi a Satana. Kovina viosi evi etu te tua likutilila ku Suku loku yevelela akumbululo aye kuenda oku kuama ovihandeleko Viaye. Noke etu tu kuata onepa keyulo lia Suku ku Satana, lo kekandu kuenda kolofa oloneke ka vi pui. Noke tu ka kala la Suku oloneke ka vi pui ndaño ceci tu fa. Eyi Ondaka Yiwa okuti omunu lomunu wa sesamela oku yi yeva.

Related information