Leleskani, Vwiyani Ndipu Jani Ndi Umoyu Buku Lanambala 7: Yesu Ndiyu Ambuya Ndi Mtaski

Outline: From Luke and John. 24 sections. It has a picture book to go along with the recording.

Script Number:424
Language:Tonga: Malawi
Theme:Multiple themes; Death of Christ; Resurrection of Jesus
Audience:General
Style:Monolog
Genre:Bible Story
Sophistication:General
Purpose:Teaching
Bible Quotation:Unknown
Status:Publishable

Script Text

Mazgu Ngakwamba

Mwanyangu kumbi tivwana kuti Yesu ndi mwana waku Chiuta? Kumbi tivwana kuti Iyu wakutumika ndi Chiuta? Kumbi tivwana kuti Iyu wangatipaska umoyu wamuyaya. Kuwa kwaku Yesu, vo vinguchitika pa umoyu waki, chiyuka chaki ndi mazgu ngaki ngatitirongo kuti Iyu ndi mwana waku Chiuta. Po muvwiskiya tepi iyi muwonengi vakujambuwa vo vemu buku liyera la nambala 7.

Wonani Chakujambuwa Chanambala 1: Kuwa Kwaku Yesu

Wonani Chakujambuwa Chanambala 1: Kuwa Kwaku Yesu

Yohani 1:1-14; Luka 2:1-11

Awonani nchakujambuwa ichi cho chirongo khola lo ndi malu ngakusungiyamu viwetu. Yapa pe so mwana wabonda, anyina ndi awiski kweniso wanthulumi wanyaki watatu wo wenga aliska wambereri. Wanthu yawa walereska mwana yo zina laki ndi Yesu. Munthu yumoza wajikamiya mwana yo. Ntchifukwa uli wajikama? Chifukwa chaki ntchakuti Yesu ndi mwana wakuzirwa yo wanguwaku pacharu chapasi. Wechendaweku, Yesu wenga kuchanya ndi Chiuta ndipu vinthu vosi vingulengeka kuziya mwaku Iyu. Chiuta ndi mzimu kweni wangujivumbuwa kuporote mwaku Yesu yo wanguwa kuziya mwa mwali Maria. Ivi vinguchitika chifukwa cha mzimu waku Chiuta. Mzimu mwenuyu wangujaso mwaku Yesu cho chirongo kuti Yesu ndi Chiuta. Yesu wanguza kwazititaska isi ku uheni ndikutirongo mo tingawiya wana waku Chiuta.

Wonani Chakujambuwa Chanambala 2: Yesu Wasanduska Maji Kuwa Vinyo

Wonani Chakujambuwa Chanambala 2: Yesu Wasanduska Maji Kuwa Vinyo

Yohani 2:1-11

Zuwa linyaki Yesu wati wakuwa wanguluta ku phwandu la zowala. Wasambili waki ndi Maria anyina nawu wanguluta nayu. Maria wanguziwa kuti Yesu wenga mwana waku Chiuta viyo wati wamala Iyu wangumuziwiska Yesu. Maria wanguti ku wanthu wo watewetanga pa zowalazo " chechosi cho wakamukambiyaninge muchiti." Penga viwiya vikuluvikulu vinkhondi ndi chimoza penipo. Ndipu Yesu wanguti ku wakutewetawo " zazani maji muviwiya ivi" viyo iwu wangudiramu maji mu viwiyamo. Yesu wanguti "newani vinyo ndipu mumupasi mwenechu wa zowalazo." Wasambili waku Yesu wangwamba kuwona kuti Yesu wenga ndi nthazi zakuziziswa zakutuliya kwaku Chiuta. Viyo iwu wanguvwaniya paku Iyu.

Wonani Chakujambuwa Chanambala 3: Yesu Wasambizga Nikodimu

Wonani Chakujambuwa Chanambala 3: Yesu Wasambizga Nikodimu

Yohani 3:1-36

Nikodemu wenga murongozi ndi msambizi wakuziwika ukongwa mu Yerusalemu. Iyu wanguvwa za ntchitu zakuziziswa zo Yesu wachitanga kweniso iyu wanguziwa kuti Yesu wangutuliya kwaku Chiuta. Usiku unyaki Nikodimu wanguluta kwaku yesu kwachikambiskana nayu za mazgu ngaku Chiuta ndi ntchitu zakuziziswa zo Yesu wachitanga. Ndipu Yesu wangukamba nayu wanguti "nadidi ndikamba nawi, asani munthu wangapapikaso cha kuti wangawona ufumu waku Chiuta cha." Nikodimu wangufumba wakuti "kumbi munthu wangapapikaso uli penipo wakota" Yesu wangumuka wakuti "chakuwa kuliwavu ntchakuliwavu ndi chakumzimu ntchamzimu." Ichi ching'anamuwa kuti weyosi yo wavwana ndi kuvwiya Ambuya Yesu ngwakupapikaso. Wakuvwanawo wakajanga ndi umoyu wamuyaya chifukwa wendi mzimu waku Chiuta. Kweni wosi wambula kuvwana mwaku Yesu wakatuzgikangapu pamasu paku Chiuta ndipu wazamusere so cha mu ufumu waku Chiuta.

Wonani Chakujambuwa Chanambala 4: Murongozgi Waweyere Yesu

Wonani Chakujambuwa Chanambala 4: Murongozgi Waweyere Yesu

Yohani 4:46-54

Kumbi imwi mungachita uli asani mwana winu watama ukongwa? Munthu yo muwona pa chakujambuwa ichi wangwenda mtunda utali ukongwa kupenja Yesu. Iyu wenga murongozi wakuziwika ukongwa kweni wamgupempha Yesu wanguti " Ambuya fikani kwidu mukachizgi mwana wangu wechendafwi." Yesu wangunena nayu wanguti "mwana waku ngwamoyu" morongoziyo wanguvwana mwaku Yesu ndipu wanguwere kwawu. Panthowa wantchitu waki wangumukambiya kuti mwana waki wachizgika. Murongoziyo wanguwamu kuti mwana waki wanguchizgika nyengu yeniyo Yesu wangumukambiya kuti mwana waki ngwamoyo. Viyo Iyu ndi nyumba yaki yosi wanguwika chivwanu chawu paku Yesu.

Wonani Chakujambuwa Chanambala 5: Munthu Wakutama Wakuja Pachiziwi

Wonani Chakujambuwa Chanambala 5: Munthu Wakutama Wakuja Pachiziwi

Yohani 5:1-47

Mumsumba wa Yerusalemu mwenga chiziwi mwenimo wanthu wakutama wabiranga alinga kuti wachizgiki penipo posi maji ngavunduka. Pachiziwi po penga munthu munyaki yo wangutama kwa vyaka 38. Yesu wangufika pafupi ndi muntu yo ndipu wanguti kwaku iyu " kumbi mukhumba kuchira?" munthuyo wangumuka wanguti " Ambuya ndilivi munthu wakuti wandibizgi muchiziwi pa maji ngavunduka." Penipo Yesu wanguti "tanduwa mphasa yaku ndipu yenda" munthuyo wanguchira nyengu yeniyo. Wanthu wanyaki wangukwiya chifukwa Yesu wanguchizga munthuyo pa zuwa lakupaturika lasabata. Zuwa lasabata lenga zuwa lo ayuda wachitanga ntchitu yeyosi cha alinga kuti wakasopi Chiuta. Munthu yuwa wanguluta ndikuwakambiya wayuda kuti Yesu ndiyu wangumuchizga. Kweni wayuda wangukhumba cha kuvwaniya paku yesu. Kuchizgika kwa munthu uyu kurongo kuti Yesu wenga ndi nthazi zakutuwa kwaku Chiuta, zakuchizgiya zuwa lelosi nanga mphasabata viyo.

Wonani Chakujambuwa Chanambala 6: Yesu Waliska Wanthu Wanandi

Wonani Chakujambuwa Chanambala 6: Yesu Waliska Wanthu Wanandi

Yohani 6:1-15

Wanthu wanandi wanguvwa kuti Yesu wachizganga wakutama viyo zuwa linyaki gulu linandi lingumurondo ku chigawa chakutali. Wati wafika msana, Yesu wangufumba wasambiri waki tchumi ndi wawi wanguti " kumbi tamugula pani chakurya chakuti wanthu yawa waryi." Yumoza wa wasambiri wangumuka wakuti " pe mnyamata yo wendi mikati yinkhondi yabarele ndi tisomba tiwi, kumbi ivi vingakwana kuliska wumba uwu?" Yesu wanguwakambiya wanthu wo kuti waje pasi, wanguto chakurya cho ndikuwonga Chiuta. Pavuli Iyu wangumenya vyakurya vo ndi kuwagawiya wanthu kwakulingana ndi vo munthu weyosi wangukhumba. Mawa laki gulu la wanthu lingumurondoso Yesu ndipu iyu wanguti "nadidi ndinena ndi imwi mutindirondo chifukwa cha vakuziziswa cha kweni chifukwa mungurya ndi kuguta. Yesu wangulutilizga wanguti "mungagwiranga ntchitu chifukwa cha chakurya cho chitayika cha, kweni chifukwa cha chakurya cho chijaririya cha umoyu wamuyaya cho mwana wamunthu wakakupasaningi imwi." Yesu wakambanga zaku Iyu mweneku ndipu wanguti Chiuta wakondwere mwaku Iyu ndipu wangutiso " Ini ndini mkati wamoyu, yo wangaza kwaku Ini wakavwanga nja cha."

Wonani Chakujambuwa Chanambala 7: Yesu Wayenda Panyanja

Wonani Chakujambuwa Chanambala 7: Yesu Wayenda Panyanja

Yohani 6:16-41; Mateyu 14:22-32

Wati waliska wanthu, yesu wanguwaleka iwu ndiwanguluta kuphiri kwaku yija kwachiromba. Wasambiri waku yesu wangukwera ngalawa alinga kuti wayambukiyi ku sirya linyaki lanyanja. Kwenga usiku ndipu penga chimphepu chikulu panyanjapo. Penipo yesu wanguza kwaku iwu wachiyenda panyanja. Wasambiri wanguwanawana kuti Yesu ndi mzukwa ndipu wangopa ukongwa. Kweni yesu wanguti " ndini mungopanga cha." Yesu wangukwera mu ngalawayo ndipu penipo chimphepu cho chinguleka kuputa. Mwanyangu ichi chingurongo wasambiri waku Yesu ndi isi viyo kunu ku le kuti nthazi zaku Chiuta zagwiranga ntchitu mwaku Yesu.

Wonani Chakujambuwa Chanambala 8: Yesu Wachizga Munthu Wachibulumutiya

Wonani Chakujambuwa Chanambala 8: Yesu Wachizga Munthu Wachibulumutiya

Yohani 9:1-41, 8:12

Penga munthu wachibulumutiya kwamba kuwa kaki. Wasambiri waku Yesu wanguwanawana kuti munthu uyu wanguwa viyo chifukwa cha mphulupulu zaki pamwenga za apapi waki. Kweni Yesu wanguti "munthu uyu wanguwa wachibulumutiya alinga kuti ntchitu zaku Chiuta ziwoneke paku Iyu." Penipo Yesu wangufunya mata pasi ndikukasa ulambwi. Yesu wanguwika ulambwiwo m'masu nga munthu wambura kuwonayo. Yesu wanguti ku munthuyo "luta ukasambi mu chiziwi cha Silomu cho ching'anamuwa wakutumika. Munthu yuwa wangumuvwiya Yesu ndipu wanguluta kwachisamba ku Silomu viyo wanguchizgika. Mwanyangu tanandi te wachibulumutiya, tiwamu cha za nthowa zaku Chiuta. Yesu wanguti "ini nde ukweru wa charu chapasi. Yosi yo warondo ini wakayendanga mumdima cha kweni wakawanga ndi ukweru waumoyu.

Wonani Chakujambuwa Chanambala 9

Wonani Chakujambuwa Chanambala 9

Yohani 11:1-6, English: Yohani 11:1-46

Kwenga munthu munyaki wakudanika Lazaru yo watamanga ndipu wenga ndi azichi waki wawi, Maria ndi Malita. Marita ndi Maria wangutuma mazgu kwaku Yesu za utenda waku Lazaru wanguti " wakwanjiwa winu watama." Yesu wanguti "kutama uku nkhwa kunyifwa cha kweni chifukwa cha unkhankhu waku Chiuta alinga kuti mwana wa munthu waronde unkhankhu." Yesu wangumwanja Lazaru pamoza ndi Maria ndi Marita kweni wati wavwa mazgu nga utenda kuti wangulutaku cha kwachimuona. Ghati ghakapu mazuwa ngawi, Yesu wanguti ku wasambiri waki "Lazaru wafwa ndipu ndikondwere chifukwa chaku imwi kuti ndingulutaku cha alinga kuti muvwani. Tiyeni sonu tiluti kweniko." Wati wafika wangusaniya kuti Lazaru wenga mu dindi kwa mazuwa nganayi. Azichi waku Lazaru wenga ndichitima chifukwa Yesu wanguza cha kwazichizga Lazaru. Kweni Yesu wanguti " mzichi waku wakayukanga." Yesu wangukambiya wanthu kuti watuzgepu chimwa pa dindi po. Penipo Yesu wangudanirizga wanguti "Lazaru Yuka!" viyo Lazaru wangutuwa mudindi wakumangika m'manja ndi malundi ndi salu zakumasanu. Yesu wechendamuyuski Lazaru kuwakufwa wanguti "Ini ndini chiyuka ndi umoyu, wakuvwana mwaku ini nanga wangafwa wakajanga ndi umoyu.

Wonani Chakujambuwa Chanambala 10: Yesu Pamphinjika

Wonani Chakujambuwa Chanambala 10: Yesu Pamphinjika

Yohani 18:1 - 19:42

Yesu wangurongo kuti ndi mwana waku Chiuta kuporote mu vyakuziziswa vo Iyu wanguchita. Wara wasembi wachiyuda wanguchita nayu sanji Yesu ndipu wangukhumbiska kumubaya. Yesu wangukambiya wasambiri waki kuti Iyu watenere kufwiya mphulupulu za wanthu wosi pakuti Iyu ndiyu nthowa yimoza pe yo yikawezgiyanga wanthu kwaku Chiuta. Yumoza wawasambiri waku Yesu, Yudasi wanguguliska Yesu ndi ndalama zakukwana siliva matchumi ngatatu. Viyo wasilikali wanguza ndikumuko Yesu. Peturo ndi wasambiri wanyaki wanguthawa chifukwa wanguchita mantha. Ndipu Peturo wangumukana Yesu. Wara wachiyuda wangumpereka Yesu ku mphara ya mirandu kweni wangutondeka kupereka ukaboni wavo Yesu wangunanga. Kweni wayuda wangudanirizga wanguti " mpayikeni mpayikeniyo." Viyo wanthu wangubaya mwana murunji waku Chiuta. Vigawenga viwi vingubayika pamoza ndi Yesu. Vigawenga ivi vingulangika chifukwa cha vyakulakwa vawu. Kweni Yesu wangunanga chechosi cha. Wangufwa nge ndi mtengu wamphulupulu zinu ndi zangu. Yesu ndiyu sembi yimoza pe yo Chiuta wanguzomerezga chifukwa cha uheni widu.

Wonani Chakujambuwa Chanambala 11. Maria Ndi Yesu Kumasanu

Wonani Chakujambuwa Chanambala 11. Maria Ndi Yesu Kumasanu

Yohani 19, 20, Mateyu 27

Yumoza wa wasambiri waki wakudanika Yosefi wangupempha kuti wakawiki liwavu laku Yesu mudindi. Viyo liwavu lo linguperekeka kwaku iyu ndipu wanguchiliwika mudindi lo wangujinozge iyu mweneku. Yosefi wangukankhiyapu chimwa pakhomu la dindilo. Pa zuwa lachitatu Maria wamagadala wanguluta ku dindi ndipu wangusaniya kuti chimwa cho chingujarika pakhomu pengavi. Maria wangwamba kuliya, wangukotama ndikulereska mu dindimo ndipu liwavu la Ambuya Yesu mwengavi. Angelu wawi wenga pa malu ngo penga liwavu la Ambuya Yesu. Penipo Maria wangung'anamuka wanguwona munthu wakuma waka jo! Ndipu Iyu wanguziwa cha kuti munthu yo wenga Yesu. Yesu wangufumba Maria wanguti "mnthikazi uliyanji? Upenja yani?" Maria wangugomezga kuti munthuyo wenga mwenechu wa munda ndipu wangumufumba zako liwavu la Ambuya Lenga. Penipo Yesu wanguti kwaku Iyu "Maria" Maria wanguwamu kuti uyu wenga Yesu ndipu wenga wamoyu. Yesu wanguti kwaku Iyu "luta ku wabali wangu, ukawakambiyi kuti ndiluta kwa Ada wo mbawuskemwi ndi Chiuta winu ndi wangu. Po Yesu za wabali waki wang'anamuwanga wasambiri waki. Mwanyangu dindi lingutondeka kumusunga mwana waku Chiuta ndipu Iyu ngwamoyu!

Wonani Chakujambuwa Chanambala 12: Yesu Wawoneke Ku Wasambiri

Wonani Chakujambuwa Chanambala 12: Yesu Wawoneke Ku Wasambiri

Yohani 21:1-19

Wandakwere kuchanya, Yesu wanguchitaso chakuziziswa chinyaki. Usiku unyaki wasambiri waki wanguluta kwachiko somba kweni kuti wanguko kanthu cha. Kuchicha, kunguwoneka munthu mphepeti mwa Nyanja. Munthu yo wanguwakambiya kuti waponyi mkwawu wawu kuchiri kumaryi ndipu wakakonga somba. Iwu wanguvwana ndipu wanguko somba zinandi. Penipo wasambiri wanguwamu kuti yo wakambanga nawu wenga Yesu. Wasambiri wangupereka somba zosi kumtunda ndipu kweniko wangusaniya kuti Yesu wangunozga kali chakurya. Peturo pamoza ndi wasambiri anyaki wo wanguthawa Yesu pa nyengu yo wangukoreka, wangusika mungalawa ndipu wanguthawiriya kumtundako kwachikumana nayu. Yesu wanguti kwaku Peturo "ndirondo" wangumukambiyaso Peturo kuti wasambizgi wanthu waku Chiuta ndikuwaphwere. Mwanyangu Chiuta wakhumba kuti wanthu wosi wavwi zaku Yesu ndi vyakuziziswa vo wanguchita alinga kuti wavwani kuti Yesu ndi mwana waku Chiuta. Murondoni Yesu alinga kuti muronde umoyu wamuyaya.

Wonani Chakujambuwa Chanambala 13: Yesu Wsambizga Wasambiri Wawi

Wonani Chakujambuwa Chanambala 13: Yesu Wsambizga Wasambiri Wawi

Luka 24:13-35

Wayuda wanandi wawanawananga kuti Yesu wakawataskanga ku ulamuliru wa waroma kweni ichi ndichu Yesu wanguziya cha. Mwaviyo wayuda wamgupempha warongozi wachiroma kuti wamubayi Yesu. Warongozgi yawa wangumubaya Yesu pakumupayika pa mphinjika. Zuwa linyaki Yesu wati wayuka kuwakufwa, wanguwoneke wasambiri waki wawi kwamabuchibuchi wo wayendanga panthowa yawu yakuluta kunyumba. Iwu wangumuziwa cha Yesu wangugomezga kuti wenga mlendu. Wasambiri yawa wangwamba kumukonkhoske za vo vingumuchitikiya Yesu. Penipo Yesu wanguwasambizga za vo Mosesi ndi waneneri wanyaki waku Chiuta wangukambiya limu zaku Yesu m'malemba vyaka vinandi vajumpha. Waneneriwo wanguti Yesu wazamutambuzgika ndi kufwa kweni wazamuyuka kuwakufwa ndikuja ku janja lamaryi laku Chiuta ndikuwusa mu ufumu waku Chiuta kwamuyaya. Usiku weniwo Yesu wanguja ndi wasambiriwo ndipo wangurya nawu. Po Iyu wangumenya mkati ndikuwapasa iwu, masu ngawu ngangujulika ndipu wanguwamu kuti Iyu wenga Yesu. Nyengu yeniyo Yesu wanguwatuliyapu. Wasambiriwo wanguluta ku Yerusalemu kwachikambiya wasambiri wanyawu kuti wangumuwona Yesu ndipu ngwamoyo. Mwanyangu tiyeni tivwiyi cho Yesu mwenechu watitisambizga mumalemba.

Wonani Chakujambuwa Chanambala 14: Mwana Wakusowa Pakati Pa Nkhumba

Wonani Chakujambuwa Chanambala 14: Mwana Wakusowa Pakati Pa Nkhumba

Luka 15:11-19

Yesu wangukamba ntharika ya munthu yo wenga ndi wana wawi wanthulumi. Mumana wanguti ku a wiski "ndigawiyeni gawa la chuma changu" viyo awiski wangumugawiya mwanayo chuma. Mumanayo wanguto chuma chaki ndikuluta ku charu chakutali ko wangusakaza chuma cho ndi nthowa zambura kwenere. Chaka chenicho munguwa nja yikulu mucharu cho. Mwanayo wangusakaza chuma chaki chosi viyo wanguja ndi kanthu kekosi cha. Iyu wanguluta kwachigwira ntchitu yakuliska nkhumba. Mwanayo wangwamba kurya chakurya cha nkhumba. Zuwa linyaki iyu wanguwanawana wanguti "wantchitu wa ada wendi chakurya chinandi kweni ini ndisuzgika kunu. Ndikalutanga kwa ada ndikuwakambiya kuti ndanangiya kuchanya kweniso ndi imwi. Nditenereso cha kudanika mwana winu mwaviyo mundito nge yumoza wawantchitu winu. Viyo mwana yo wangusoka ndikuluta ku awiski

Wonani Chakujambuwa Chanambala 15: Mwana Wakusowa Wawere Kwawu

Wonani Chakujambuwa Chanambala 15: Mwana Wakusowa Wawere Kwawu

Luka 15:20-32

Awiski a mwana yuwa wangumuwona weche kuza patali ndipu wangumuchimbiriya ndikumuvumbatiya Iyu. Wangukambiyaso wantchitu waki kuti wamupasi vakuvwala vamampha ukongwa ndikumunozge chakurya. Awiski wanguti tiyeni tiryi ndikukondwa chifukwa mwana wangu uyu wenga wakufwa ndipu sonu ngwamoyu, wenga wakusowa kweni wasanilika. Penga chiphwandu chikulu ukongwa. Mwanyangu Chiuta yo wakutilenga wenge awiski a mwana wakusowayo. Wanthu wosi wenge mwana wakusowa, kweni Chiuta watitanja mbwenu. Iyu wakhumba ukongwa kuti isi tiwere kwaku Iyu. Wakhumba kuti watigowoke mwaviyo wangutuma mwana waki Yesu kwazipenja ndikutaska wanthu wo wakugawukaku kwaku Chiuta. Wanthu wo wagawukaku kwaku Chiuta mbanthu wakusowa ndipu Yesu ndiyu nthowa yimoza pe yakuwelere kwaku Chiuta Auskefwi.

Wonani Chakujambuwa Chanambala 16: Munthu Wachuma

Wonani Chakujambuwa Chanambala 16: Munthu Wachuma

Luka 21:13-21

Yesu wangukambiya wanthu ntharika ya munthu wakukhupuka yo wenga ndi vakurya vinandi. Munthu yo wanguwanawana za kuzenga nkhokwi zikulu zinandi ndikusunga chakurya chakicho. Viyo Iyu wanguti kwaku Iyu yija " umoyu wangu wenachu chakurya chinandi cho chikajaririyanga kufikiya vyaka vinandi. Pumuwa sonu ndipu ulyi ndi kukondwa." Kweni Chiuta wanguti " wakupusa iwi, usiku weniwunu ukafwanga ndipu kumbi vinthu vo ungunozga vikawanga vaku yani?" Mwanyangu, Yesu wanguti " umu ndimu wachitiya wanthu wo watijiwunjikiya chuma iwu wija kwambura kuwikizga chuma kwaku Chiuta." Ichi ching'namuwa kuti ubwezi wa munthu ndi Chiuta nkhuwa ndi chivwanu mwaku Iyu.

Wonani Chakujambuwa Chanambala 17: Munthu Mukavu Ndi Wakukhupuka

Wonani Chakujambuwa Chanambala 17: Munthu Mukavu Ndi Wakukhupuka

Luka 16:19-31

Yesu wangukambaso ntharika ya munthu wakukhupuka yo wenga ndi chechosi cho wangukhumba ndipu kuti wawovyanga wakavu cha. Munthu munyaki mukavu wangufwa ndipu wanguluta kuchanya ndikuchija ndi Abrahamu mpapi mura wa wayuda. Munthu wakukhupuka nayu wangufwa ndipu wanguluta kumotu wakudanika gehena. Iyu wangudana Abrahamu kuti watumi munthu mukavuyo kuti wakamupaskeku maji. Kweni Abrahamu wanguti " pakati paku imwi ndi isi pe chinkhwawu chikulu ukongwa mwaviyo kuti tingayambuka cha chinkhwawu ichi." Mwanyangu ku gehena kulivi mpumulu ndipu kulivi kuthawa. Wo walutaku kweniko wazamusuzgika kwamuyaya. Wakukhupuka pamwenga wakavu titenere kurondo nthowa yaku Chiuta teche ndi umoyu asani tikhumba kuronde umoyu wamuyaya. Viyo vwanani ndi Ambuya Yesu ndipu mukataskikanga.

Wonani Chakujambuwa Chanambala 18: Bwezi Pakhomu

Wonani Chakujambuwa Chanambala 18: Bwezi Pakhomu

Luka 11:5-13

Munthu munyaki wanguza ndi usiku ku nyumba kwa m'bwezi waki ndipu wanguti kwaku iyu "bwezi undibwerekeku mikati yitatu pakuti ndaronde mlendu ndipu ndilivi chakurya chakuti ndingamupaska kuti waryi." Mwenechu wa nyumbayo wenga mtulu pamoza ndi wamunyumba yaki wosi ndipu kuti wangukhumba cha kuyuka. Kweni bweziyo wangulutilizga kukhong'oska pakhomu kufikiya po mwenechu wa nyumbayo wanguyuka ndikumupaska vo wakhumbanga. Yesu wanguti "pemphani ndipu wakakupaskaningi, penjani ndipu musaniyengi, khong'oskani ndipu wakakujuliyaningi." Yesu wangukambaso kuti "nanga techendapemphi kwaku Chiuta, Iyu wakatipaskanga pakuti Iyu ngwamampha. Watitipaska mzimu mtuwa ndi vosi vo tipenja. Cho tikhumbika kuchita nkhumupempha Iyu pakuromba kuti watovyi kurondo mazgu ngaki ndi kuvwana mwaku Iyu.

Wonani Chakujambuwa Chanambala 19: Wanthu Wawi Mnyumba Yaku Chiuta

Wonani Chakujambuwa Chanambala 19: Wanthu Wawi Mnyumba Yaku Chiuta

Luka 18:9-14

Kumbi Chiuta watuvwa madandaulu nga munthu weyosi yo watuza kwaku Iyu mukuromba? Pachakujambuwa ichi tiwona wanthu wawi wo warombanga mukasopi. Yumoza wenga wakusopa ndipuso wakujikuzga. Iyu wangujipemphere yija wanguti "Chiuta nditimuwongani kuti nde semu wanthu wanyaki cha wambura kuchita urunji, warewi pamwenga nge wakukhomeska msonkhuyo" Chiuta wangukondwa nalu cha rombu laki. Munthu munyaki yo wenga wamsonkhu, ndiwakupusika yo wabiyanga wanthu. Iyu wanguziwa kuti wamukondweskanga cha Chiuta. Iyu wangujikhung'uska pa chifuwa ndipu wanguromba wanguti "Chiuta mundichitiyi lisungu ini munthu wakwananga." Yesu wanguti Chiuta wanguvwa rombu lawa msonkhuyo ndipu Chiuta wangumugowoke mphulupulu zaki. Mwanyangu Chiuta wakhumba cha wanthu wakujikuzga kweni waronde wanthu wo watijisiska.

Wonani Chakujambuwa Chanambala 20: Mlimi Wapanda Mbewu

Wonani Chakujambuwa Chanambala 20: Mlimi Wapanda Mbewu

Luka 8:4-9

Zuwa linyaki Yesu wasambizganga wanthu ndipu Iyu wangunena nawu wanguti "munthu munyaki wanguluta kwachipanda mbewu zaki. Mbewu zinyaki zinguwa mumphepeti mwa msewu mwaviyo zinyaki zingukandika ndi zinyaki zingulyika ndi viyuni." Zinyaki zinguwa pa mya ndipu zati zame liwi liwi zingufota pakuti zengavi pakukhole. Mbewu zinyaki zinguwa pa minga ndipu zati zame zingutondeka kukuwa chifukwa cha mingayo. Zo zinguwa pa nyata yamampha zingume ndipu zingupasa vipasi machumi chumi. Yesu wanguti yo wendi makutu ngakuvwiya wavwi. Pavuli paki wasambiri wangumufumba Yesu cho ntharikayo yang'anamuwanga.

Wonani Chakujambuwa Chanambala 21: Mbewu Zikuwa

Wonani Chakujambuwa Chanambala 21: Mbewu Zikuwa

Luka 8:9-15

Yesu wangung'anamuliya ntharika yiya wakuti mbewuzo ndi mazgu ngaku Chiuta. Mbewu zo zinguwa mphepeti mwa msewu zimiya wanthu wo watuvwa mazgu ngaku Chiuta, penipo satana watuza ndikutuzgamu mazgu mumitima yawu vini wanthu wo wangavwana ndikutaskika. Zo zinguwiya pa mya ndi wanthu wo wati wavwa mazgu watingarondere mwakukondwa ndikuvwana kwakanyengu kamanavi kweni pa nyengu ya kweseka iwu wataya mazgu ngo. Zapaminga zimiya wo iwu watuvwa mazgu kweni yati yakapu nyengu iwu wasokonezeka ndi chuma ndi madandaulu. Zapanyata zimiya wo iwu wavwa mazgu ndikusunga mazgu yanga mu mitima yawu mwauneneska ndipu iwu wabala vipasi ndi pakukunthiyapu. Mwanyangu kumbi muronde uli mazgu ngaku Chiuta? Kumbi mutuvwa mazgu ndikusowa? Kumbi mutuvwa mazgu ngaku Chiuta, kungasunga ndikukondwesa Chiuta. Asani mungachita viyo ndikuti mwenge mbewu zo zinguwiya pa nyata yamampha.

Wonani Chakujambuwa Chanambala 22: Kovyeka Kwa Munthu Wakupwetekeka

Wonani Chakujambuwa Chanambala 22: Kovyeka Kwa Munthu Wakupwetekeka

Luka 10:25-37

Kumbi tingaziwa uli kuti tikondwesa Chiuta pa umoyu widu wa zuwa ndi zuwa? Mazgu ngaku Chiuta ngatitisambizga kuti titenere kwanja Chiuta kweniso ndi wanthu wanyaki. Nanga ndi wanthu nawa wo titenere kuwanja? Yesu wangukamba ntharika ya munthu munyaki yo wangwenda mu nthowa ya mu bozwa ndipu vigawenga vingumuronda vinthu vaki vosi ndikumupweteka Iyu ndipu wangumureka we pafupi kufwa. Wara wakukasopi wawi wangujumpha pa nthowa yeniyo kweni kuti wangumovya cha munthuyo. Mlendu munyaki nayu wangusikiyaso ku nthowa yeniyo ndipu wati wamuwona munthu yo wangumuchitiya chitima. Iyu wangumumanga mabala ngaki ndipu wangumukwezga pa mbunda yaki ndikuluta nayu ku nyumba ya walendo alinga kuti wakamovyi. Yesu wanguti asani titanja wanyidu titenereso kurongo chanju ichi pakovya weyosi yo wakhumbika chovyu.

Wonani Chakujambuwa Chanambala 23: Kuza Kwa Mwenechu Wa Nyumba

Wonani Chakujambuwa Chanambala 23: Kuza Kwa Mwenechu Wa Nyumba

Luka 12:35-48

Kumbi mukumbuka kuti Yesu wati wafwa wanguyukaso kuwakufwa? Wasambiri waki wangumuwona Iyu wechendakwere kuchanya. Yesu wangukambiya wasambiri waki kuti wakazangaso. Iyu wanguti wanthu wo wavwana mwaku Iyu watenere kuwa nge wantchitu wo walindizga mbuyawu kuza kutuliya ku phwandu la nthengwa. Yesu wanguti ngwakutumbikika kapolu yo iyu mbuyaki pakuza wazakumusaniya wakunozgeka. Mwanyangu tiziwa cha zuwa lo Yesu wakaziyangaso mwaviyo titenere kumutewete ndikuja wakunozgeka kumuronde Iyu pakuza. Zuwa lo lizamukuwa zuwa la likondwa likulu kuwakuvwana kweni yizamukuwa nyengu yachitima ku waheni. Yesu wangukambaso kuti wanthu wo iwu warongozga wanthu waki watenere kunozgeke kuza kwaki ndipu asani iwu warongozgengi nyumba yaki umampha ndi kuphwere mbereri zaki, wazamuronde mphotu yikulu. Kweni asani wapuma wakapolu waki ndi kulowe wazamuronde chilangu chikulu ndi chakutambuza.

Wonani Chakujambuwa Chanambala 24: Munthu Wakwera Muchimiti

Wonani Chakujambuwa Chanambala 24: Munthu Wakwera Muchimiti

Luka 19:1-10

Yesu wangataska munthu weyosi ku mphurupuru. Vwiyani ichi; Zakeyu wenga wamsonkhu wachuma ndipu wenga wachinyengu yo wabiyanga wanthu ndalama. Zakeyu wangukhumbiska uwona Yesu kweni wenga mufupi ukongwa. Yesu wenga ndi wumba unandi ukongwa wa wanthu wo wangumuzingiliya viyo Zakeyu wangukwera muchimiti. Po Yesu wajumphanga pamalu penipo, Iyu wangulereska mu chimiti ndipu wanguti kwaku Zakeyu " Zakeyu sika luwi pakuti msanawale nditenere kuwa munyumba yaku." Wanthu wanguzizwa pakuti Zakeyu wenga munthu muheni. Iyu wangusika muchimiti ndikumurondere Yesu mnyumba yaki ndi chimwemwi. Zakeyu wangukambiya Yesu kuti walekengi nthowa zaki ziheni ndikusintha ndipu iyu wanguwezga vosi vo wanguba. Yesu wanguti " msanawale utaski wafika mu nyumba yinu." Mwanyangu, Yesu wakuza kwazipenjapenja ndi kuitaska weyosi wakusowa yo wakutuwaku kwaku Chiuta. Kumbukani kuti asani namwi mukhumba kureka uheni ndikusintha nthowa zinu nge ndimo Zakeyu wnguchitiya; munyoroski nthowa yinu pamasu paku Chiuta pakuvwana ndikuvwiya Yesu Khristu.

Related information