Livro 1

Outline: Adam, Noah, Job, Abraham. 24 sections. It has a picture book to go along with the recording.

Script Number:418
Language:Takwane
Theme:Creation; Multiple themes
Audience:General
Style:Monolog
Genre:Bible Story
Sophistication:General
Purpose:Teaching
Bible Quotation:Direct
Status:Publishable

Script Text

Livro 1 Nikukuru A Mavolowelo

Muhuseliwa akwaaga? Moone vano musuuze odheela athu owambeela yakala vativa. Aliwa bifwanelele onisuziha dhijinji odheela Mulugu mmohi bahi ebaribari. Musugwe dhonihelo dha munivuruni nofiila. Vano musugwe yonihelo eli osogolowa, mweewa yoruma erumaga mukunuule. (*)

1 Yonihelo yowambeela. Opaddusiwa wa Adamu ni opaddusiwa wa anenyama

1 Yonihelo yowambeela. Opaddusiwa wa Adamu ni opaddusiwa wa anenyama

Gênesis 1:1-26, 2:14

Mulugu oli mmohi bahi. Oliye muneba. Oliye ohunona dhego dhatedhene teto oli mburo dhatedhene. Omambeelelo aliwo di Mulugu bahi. Mulugu di paddusile dhego dhatedhene odhulu ni vati. Vowambeela Mulugu ohupaddusa waara, nuwindo opaddusa odhulu, mirabo ni theya, vano mithamuko wambeela wunuwa. Nuwindo Mulugu opaddusa nduwa, mweeri ni thenddeeri. Oliye opaddusa dhatedhene dhafuniiye opaddusa dhili vati, ni mwinko. Muthu onamooniinyu va di Adamu. Oliye ahinvaha muthu muneba, wi ande omunona Mulugu. Mobuwelelo ni efunelo yateene ya muthu yaali yowiwanana ni efunelo ya Mulugu, vano muthu edda ni Mulugu. Yoruma. (*)

2 Yonihelo ya nabiili. Mwihiyana mmohi a Adamu

2 Yonihelo ya nabiili. Mwihiyana mmohi a Adamu

Gênesis 2:18-1

Mulugu ahimwihiya Adamu mburo woddiddilela weriwa mudda wa Iddeni wi oliye alimegemo, vano eng’anelegemo. Mwahikala mithanko dhohiyana hiyana, otaganyihedheya ni muthanko wononiha opama ni obure, ni muthanko wegumi. Mulugu ahenya wi Adamu athwege mandina anenyama ateene, ni balamedha dhelobwana ni dhehiyana dha mukalelo wateene dhopaddusiwa. Aliwa kayamoova muthu, mbwenye Adamu kanna mukwaaye. Mulugu ahimugoniha Adamu nikove nowi thapathaaa, othukula bararu ya mulobwana ole, osaddula okala mwihiyana. Vano omuthukula mwihiyana ole omwinka mulobwana Adamu wi akale namakamihedha aaye. Mulobwana ni mwihiyana yakala madave, mbwenye kayakalelana manyazo, teto yowoga ni Mulugu woona amweja apama. Kawaali wukuuwa, okwa naari obure oli wateene mburo wotikiniha. Yoruma (*)

3 Yonihelo ya nethaaru. Mbobo ni namudda

3 Yonihelo ya nethaaru. Mbobo ni namudda

Gênesis 3:1-8

Mulugu ahiwoga ni Adamu wiira: -Ojege ofunawawo dhovaha dhatedhene dha mithanko nda dhili mmiddani mu, mbwenye muthanko wononiha opama ni obure kudha oja, eneriha nlabo ninadhiwe oje, onookwa.-
Adamu ni mukamihedhi aaye yahikala mudhidhi mujinjeene eganna omwandani ni namapaddusa, ni dhopaddusa dhaye. Mbwenye obure wowangulamela aliwaya. Sathana aali mungero odhulu, mbwenye ahivirigana vamentoni va Mulugu, oliye afuna akale woona Mulugweene, amukwaranye Mulugu. Nuwindo oliye wigariwa odhulu, okala mwiiddani a Mulugu, ni athu ale yapaddusile Mulugu. Sathana ahisadduwa woona mbobo omwaddamela mwihiyana, omunyengetha wiira: - Kunakwa ojave dhovaha dhiwadelihiwinyu.-
Omala onfewiha ni omunyengetha oliye oja. Mwihiyana vajiligiye odhowa onvahawo Adamu oja. Vano vajiliiwa yovaha ele, wambeela woona wi: Nili madave. Aliwa kayamwiwelele mpaddusi, vano yahikwa mmunebani woona vawogele Mulugu. Aliwa withithagana ni mataakuru vano oxixaga wilogoha emoovaga Mulugu. (*)

4 Yonihelo ya neenayi. Wiigariwa mmuddani

4 Yonihelo ya neenayi. Wiigariwa mmuddani

Genesis 3:14

Vayoniheloni va nnowoona yapadduwe. Adamu ni mwihiyanaye eganvanyile Mulugu. Mulugu ahasinyusa ni mwaha wahowiwelela othongi waye. Mbwenye vowambeela Mulugu ahimuwogela mbobo wiira:- Eyoya yiriliwe ddi? We onaakale owulumeleleya okwaranya dhopaddusiwa dhatedhene.- Wambeela mudhidhi olene Sathana okala mwiddani a Mulugu ni athu. Mulugu teto ororomeliha wi, nlabo nimohi anamabaliwelamo a Adamu ni mwihiyanaye, eneere omugonjiha Sathana. Yesu ohirana ndadha vakwiliye mwaha wa dhothega dha athu amwilaboni,vano avenya muukwani. Mulugu ahiwoga ni mwihiyanaya wiira: Gineere wenjedhedha dhovoreya dhawo dhomabalelo.- Vano owoga ni Adamu wi; nimwaha womwiwelela mwihiyanawo oja yovaha ya muthanko, theya enakala yowulumeleleya. Wehi oje enafuneyege wi olime vajinjivene wi we ni emudhi yaawo, mukalegena yooja. Nuwindo Mulugu wawigaramo mmiddani mwa Iddeni. Adamu mwihiyanaye amwithana Yeva, enatapulela, "egumi." Yeva wabala ahima ajinjene ayene edhiile orelana ofiyedha hiyo. Athu ateene enabaliwa ni yothega .Yothegaya teto sinanimwalaniha ni Mulugu . (*)

5 Yonihelo ya neetanu. Nowe ni mwanddeya mulubale

5 Yonihelo ya neetanu. Nowe ni mwanddeya mulubale

Genesis 6:1-22

Mulogo wakumile wa adamu ni ,
Yeva waali mujinji teto yahihara dila ya Sathana vano wiirana dhego dhotakala vamentoni va Mulugu. Mulugu ahiira gihisinyuwa ompaddusa muthu. Mulobwana mmohi bahi damudhivela Mulugu ndina naye eriwa Nowe.Nlabo nimohi Mulugu ahiwoga ni Nowe wiira :- Gihiroromeliha wi gabwanyule athu ateene, mwaha wi elabo yateene ehidhaala obure. Osasanye mwanddeya wi ovuluwemo woona mukalelo ginowaddelihimi, mwanddeya bumburo mulubale wokala, vowindo gineere orumiha mahinje amutokora mwilaboni, onatolose okalawo ateene enavuma. Gineere wirana nipangano ni we. Wamala osasanya, ovolowe mmwanddeyanimwa ni mwihiyanawo, ni anawo ni ahiyaniwene. Wathukule vano anenyama a musawo dhohiyana hiyana ni balame dha musawo dhohiyana hiyana othukule biili biili, wi elogoleleye ni egumi. (ekale bewu). Mulugu owoga ni Nowe makalelo osasanya mwanddeya, vano Nowe osasanya mwanddeya woona vamwaddele Mulugu. Nowe owawaddela athu wiira:– Mulugu onobwanyula elabo ela, mbwenye athuya kayampwatha teto kayathwaruwa ehiya dha mabasa mateene otakala yerisuna. (*)

6 Yonihelo ya neetanu nammohi. Mutokora mulubale

6 Yonihelo ya neetanu nammohi. Mutokora mulubale

Genesis 7:1-24

Mwanddeya wamaliliiwa osasanyiwa, Nowe ni amudhi aaye, ni anenyama ateene, yahivolowa mmwanddeyani, vano Mulugu ofuga musiwo. Vigavirile malabo matanu na menddi muzongwe wambeela orubwa. Vano ahirubwa malabo makumi manayi a mutana, makumi manayi a mahiyu ahiremusaga, elabo yateene. Mihinje dhatedhene ogumanela, okuneela elabo yowuuma yateene dhovuma dhatedhene dhahikwa ni mutokora mulubale, omwihiya Nowe ni ale yavolowiligiyena mmwanddeyani. (*)

7 Yonihelo ya neetanu nabiili. Muzirilimbo wa yorolomeliha

7 Yonihelo ya neetanu nabiili. Muzirilimbo wa yorolomeliha

Genesis 8:13

Nowe ni amudhi aaye ni anenyama ateene yakala mmwanddeyani ofiyedhamo yaaka emohi ni malabo kumi namatanu namenddi. Vamaliliiye orubwa, elabo yahuuma omamalelo wa yaaka. Nowe ni amudhi aaye ateene ni anenyama ateene yahikuma mmwanddeyani wi yambeele egumi exa. Woona mukalelo wotamalela, mwaha wovuluwa, Nowe ahimaga ebuwa woona vinonelihu va yoniheloni va, ovaha mukutho wa Mulugu. Mulugu ahirumeedha mukuthoya, vano ohela muzirilimbo odhulu wiira: –Kagidha gibwanyula elabo ni mahinje. Olenddo dhatedhene dhinoneyege mizirilimbo, ginerege wubuwelela yorolomeliha yaaga. (*)

8 Yonihelo ya neetanu nathaaru. Nyuba yootama ya nthapa

8 Yonihelo ya neetanu nathaaru. Nyuba yootama ya nthapa

Genesis 11:1

Mulugu ahiwoga ni Nowe ni anaaye araaru wi, emwadheyele elabo yateene, mbwenye aliwa kayafuna omwalana, vano wubuwela mohiyana wi, envaanye Mulugu emage mudhi mulubale ni nyuba yolapa wi yafiye othaboni.Mulugu ahoona ohiwelela weewa ni withukulela wa nlogo naaye wiira:- Nlogo natenene nili woona nimohive, enawoga ewogelo emohive ateene. Kinakalena makathamiho yafunaga wiira enafuniiwa; nikite. Vano naviriganihe muwogelo weewa!- Vayoniheloni va athu ala kinewananavo pama. Vano nlogo natenene ohiya omaga mudhi mulubale wafuniiwa emage, vano odhowa okalaga maburo ohiyana hiyana. (*)

9 Yonihelo ya neetanu nenayi. Mulobwana mmohi othithimiheya eriwa Jobu

9 Yonihelo ya neetanu nenayi. Mulobwana mmohi othithimiheya eriwa Jobu

Jobu 1:1

Mulobwana oli va yoniheloni va, oneriwa Jobu. Oliye omwebedha Mulugu. Vano okutha mukutho amukuthelaga Mulugu ebaribari bahi. Oliye kahara dila yovaanya yohiwelela eli dila ya Sathana. Jobu ahikalana anaaye atanu na biili, ni anahiyana araaru. Vano okutha mukutho, akuthelaga anaye. Amulobaga Mulugu wi alevelele dhothega dhiwa, akala yahimuthegela Mulugu ni yego si yego. Mulugu omudhivela Jobu, teto omureeliha, omulogolelave amukalihagawo. Jobu ahikalana anenyama ajinjeene, ni midda dhijinji, ni anamalaba ajinjeene. Nlabo nimohi Mulugu ahiwoga ni Sathana vowi Jobu aali mulobwana owogoowa murima. Aali muthu apama malabweene, siyene akaleliiye oreelihiwa, athabwesesa oreela. Mbwenye Sathana ahaakula wi; Jobu onamurihela Mulugu mwaha wi, ohumureeliha. Vano wenjedhedhela wiira:- Ogihiye gimwaake dhoreela dhatedhene nimoone akala kowogelaga obure.- Mulugu ahinona wi Sathana oratha, vowi ahinona wi Jobu eere owelela okala mulobwana mmohive apama ni owoma murima, naari orabulene. Vano Mulugu ahimweenya Sathana wi amuherulele dhatedhene dhanniyena. (*)

10 Yonihelo ya neekumi. Dhinofiya mithenga dhotakala

10 Yonihelo ya neekumi. Dhinofiya mithenga dhotakala

Jobu 1:13

Va yoniheloni va, ninowoona malabo a goyi ya Jobu. Nlabo nimohi anamalaba a Jobu yahimwaddelaga miselu dhowopiha. Dhatedhene yamwaddelaga nlabo nimohive. Owambeela wiira:- Amwiddani enyu ehimala wiiya ng’ombe dhinyu ni abuuruya, teto ehapa anamalaba enyu. Ahinamale osorihamowa, ofiya namalaba mmohi wiira:- Pevo yobiiwa ya muzongwe, dari ehapa mabila enyu mateene ni anamajihaya. Ambava ehawiiya anenyama othukula sapo yagweliliiwa, (akameelo).Vano namalaba mmohi ofiya ni miselu dhimohi dhothabwesesa, wiira:- Aniinyu omukuthoni watugumanilisu, pevo elubale ibwanyula nyuba mwaliiwa ehikwa ateene!-
Agamalile wiiwa ndo, Jobu ahiigaga guruguma muru waaye, otapulela wuukuwa wulubale wa omamukwele wa mulobwana. Vano ahikonatigi vati okukumuweene ahinna kopolo.
Vano wiira:- Mulugu dagivahile, Mulugu dithukule. Nthithimihiwege ndina na Nabwiya Mulugu. Mwa dhatedhene nda Jobu kathegile, kamuwogile obure Mulugu, ni nda dhapadduwa.(*)

11 Yonihelo ya neekumi nammohi. Goyi ya Jobu

11 Yonihelo ya neekumi nammohi. Goyi ya Jobu

Jobu 2:1-14

Sathana ahoona wi Jobu, omuthithimihave Mulugu. Vano ahiwela owoga ni Mulugu wiira:- Mwagihiyedha Jobu wi gikahinye egumi yaye, wi gimonihe goyi, oliye oneere wuwogani obure, eneriha; eli yokweya muthu oleva dhaaye alevelaga egumi yaaye. Vano Mulugu, ahenya wi Sathana amwehe Jobu dila biili. Sathana ahivenya vamentoni va Mulugu odhowa omporosa Jobu, ni mwaha wa tugwi dhamutotile makwadda mwiili wateene. Jobu ahivenya odhowa okwibi wa nyuba yaye oddodda nipalipali na nyuba, owagagana mmakwaddani mwaye. Mwihiyana a Jobu, onagave goyi ya mamune, ahiraga:- Kamuruwane Mulugu aawo okwe!- Mbwenye Jobu omwaakula wiira:- Mwihiyanaga, kanakelesa dhego dhijinji dhapama dha Mulugu? Ki-to nahinakelele ddi dhego dhotakala? Jobu awogaga nda, obuwelelaga wi goyi yateene enadheela wa Mulugu.
Akwaaye araaru egadhowile wi yamoone, kayanona yafuniiwa omwaddela, ni mwaha wa goyi yanniyena. Omamalelo wa mobuwelelo eewa, wubuwela mwabure, wi Jobu onela goyi ni mwaha wa obure wasasanyiliiye. Mbwenye Jobu karumedhele mobuwelelo eewa. Jobu okoha koha dila dha Mulugu, mbwenye katakaleliwe ni Mulugu. Nuwindo ahimooniha Jobu wuunuwa waaye ni ononelamo waye. (*)

12 Yonihelo ya nekumi nabiili. Jobu onowelihedhiwa

12 Yonihelo ya nekumi nabiili. Jobu onowelihedhiwa

Jobu. 42:1-17

Vayoniheloni va, Jobu oli owelelamweene ni egumi, ni dhoreela. Miyo gineere huwaddelani dhoodha mapadduweloya. Jobu voniliiye makalelo malubale a Mulugu, ahikalana manyazo mwaha wowanganyedha dila ya Mulugu, mugoyini mwaaye.
Vano Mulugu ahiwoga ni mulobwana mmohi aali mweja a Jobu eriwa Elifazi, wiira:- Miyo gihitakaleliwa ni we vamohi ni akwaawo, eneriha kamwirilena yofwaneela wa miyo woona dherile mwimeleli aaga Jobu.-
Mulugu ahawirela wi, kaweni mwavahe mukutho, mwaha wa dhothega dheenyu, vano mwimeleli aaga Jobu olobeleleni. Vowindo Mulugu eere walevelela. Vano Mulugu ahinvaha mureelelo ohiyana ni malabo a mundduli, onvaha dhoreela okwaranya dhende dhanniyena wale ahinakale mugoyini. Jobu anna ahima atanu nabiili ni anahiyana owomesesa araaru, ahikalawoove wi awoone anamabaliwelamo aye, vano akwile agawuluule, teto agaali oreelene.
Rugunusani yoruma eyo nikukuru nimohiya, mwiiwe dhororomeliha dhimohiya dha Mulugu***

Nikukuru =B=

Akwaaga, geenyeni wi guwaddeleni thalako ya mulobwana oneriwa Abaramu.
Mulugu ahimukaliha baba a malogo majinji, eneriha aali mulobwana amwiwelela Mulugu. Vano odheela mwa oliye, ninowakela yego yotikiniha. Mudhowe nikukuru noharela mweewa yoruma erumaga. (*)

13 Yonihelo ya neekumi nathaaru. Mulugu onomwithana Abaramu

13 Yonihelo ya neekumi nathaaru. Mulugu onomwithana Abaramu

Genesis 12:1

Va yoniheloni ela, nimoone Abaramu, ni mwihiyanaye Sarayi, mudhule Lothi ni anamalaba aaye. Aliwaala, eli vaari va olenddo wolapeleene. Eneriha,
Mulugu, nlabo nimohi ahimwithana Abaramu wiira: –Ovenye elabo yaawo, ovenye vade va makolo aawo odhowe elabo ginotonyihedhimi. Gineere wukalelihana mulogo mulubaleene. Mwa we athu elabo yateene ya vati, eneere okala orelihiwa..- Abaramu ahirumedhela yororomeliha ya Mulugu, omuthukula mwihiyanaye ni anaye ni dhatedhene dhanniyena. Vano yahedda olenddo wa malabo majinjeene, ofiya elabo yeriwa Kanahar.
Wewo Mulugu ahimwirela wiira: -Ela si elabo ginavahimi anamabaliwelamo aawo.-
Abaramu akalaga omadhowelo pevo wa elabo ya oKanahari, vano dala elubale yahifiya elabo ele. Kawaali yooja yowakwanana ni athu yaali wewule ateene. Vano Abaramu ahubuwela wi adhowe elabo emohi yeriwa Eguputhu, wi yonewo yotakuna, yooja. Vano osogolowa awelele oKanahani. Eneriha, orumedhela yororomeliha ya Mulugu Yaroromelihiye. (*)

14 Yonihelo ya neekumi nenayi. Abaramu ni Lothi

14 Yonihelo ya neekumi nenayi. Abaramu ni Lothi

Genesis 13:5-18

Abaramu ahikalana mudhule amweddiyena, eriwa Lothi. Aabiilene yahikalana anenyama ajinjeene yakalesa vamohi oKanahani. Anamajiha anenyama a Abaramu ni a Lothi, yakulesa okanganave, mwaha wa mpodda wanenyama. Vowi, kawaali mpodda wowakwanana anenyama ateene.
Vano Abaramu ahimwirela Lothi wiira: -Vahikale owanawana vaari vehu. Kabe nimwalane. Osakule kukuru enafuniiwe ya elabo ela, vano akala we onayelege nikukuru nong’ oto, miyo ginayelege moono wooja.-
Lothi ahisakula kukuru yanfwanelele ni anenyama aaye, vowi yaali elabo yoddiddilela nddiba na mwihinje. Wewene waali mudhi wakaliiye. Amagele nddiba nowaddamela mudhi wa oSoddoma. Mulogo wakalesa oSoddoma waali wovuruvuru kayamwiwelela Mulugu.
Abaramu akala elabo ya Kanahani, vano Mulugu ahiwelela owoga ni Abaramu wiira:- Gineere wavaha anamabaliwelamo aawo, elabo yateene ekalegemo malabweene vamentoni vawo. (*)

15 Yonihelo ya neekumi natanu. Abaramu onogumana ni mwene a murenddele

15 Yonihelo ya neekumi natanu. Abaramu onogumana ni mwene a murenddele

Genesis 14:18

Vano Lothi akalagave nddiba nendde, dhahipadduwa wi; amwiddani o Soddoma yahitatamula koddo odheela ni mudhi. Wahibwanyuliwa mudhiya. Lothi ni amudhi aaye yahithukuliwa woona adhaari. Mbwenye Abaramu ni alobwana aye yahidhowa wawobolawo, vano aliwa yahabwanyula amwiddaniya. Ewelagawo omawanelo wule, yahinfwanyaga mwene mulubale, woona munoneliihu vamodagarasiyani va, Eriwa Melikezedeki. Aali mwene wa mudhi wa Osalemi, enatapulela =murenddele.= Melikezedeki ahidhagana yoja omwinka Abaramu wiira:- Orelihiwa di we Abaramu ni Mulugu odhulu mwiinya a vati ni odhulu, olevele amwiddani ekala mmadani mwaawo.- Mwene oSoddoma afuna adhena nvahi amwiike Abaramu mwaha wowobola nlogo naye, mbwenye Abaramu karumedhile yego yodheela mwa mwene oSoddoma-obure. . (*)

16 Yonihelo ya neekumi natanu nammohi. Abaramu onelenga nyenyeddi

16 Yonihelo ya neekumi natanu nammohi. Abaramu onelenga nyenyeddi

Genesis 15:1-21

Vano Abaramu agamobolile Lothi ni mulogo wateene wa oSoddoma, Lothi ahiwelela mudhi wakaliiye.
Vano Mulugu ahiwoga ni Abaramu wiira: - Miyo gili muthiithihedho waawo, ni yowakela yaawo elubale. Mbwenye Abaramu aali ohudhiveliweene mwaha wi kanna mwaana. Mulugu ahimwithanelaga ode wa musasaaye, omwaddela wiira:- Osugwe nyenyeddi, welenge woone muthengoya akala oneere wanda! Anamabaliwelamo aawo winjivawa eneere ndo.Enakala ajinji woona nyenyeddi dha odhulu.- Abaramu ahirumedhela yororomeliha ya Mulugu, naari ahinnave mwaana. Eyo yahimudhivela Mulugu. Yoruma. (*)

17 Yonihelo ya neekumi natanu nabiili. Mwaana eriwa Zumayili

17 Yonihelo ya neekumi natanu nabiili. Mwaana eriwa Zumayili

Genesis 16:1

Musugwe Abaramu ukalana mwaana, ela siila yapadduwile: Abaramu akala oKanahani ofiyedha yaaka kumi, ajejihedhaga yororomeliha ya Mulugu. Vano mwihiyanaye Sarayi kanna mwaana. Sarayi ahikalana namalaba amwihiyana eriwa Agaari. Oliye ahifuna wi, namalaba ewa akalena mwaana aliwa emulelege, mwaanaya. Vowi, yaali yeddelo wa malabo alene. Vano Agaari ahirubalela ,teto Sarayi wambeela okalana aje. Vano wambeela omweddiha bure mwana mwihiyana ole alaba vade viwa, nuwi ndo Agaari othawavo. Mbwenye mungero a Mulugu onfwanya Agaari omwaddelaga wiira: We oneere okalana mwaana oneriwege Zumayili, Nabwiya ohiiwa wundda waawo. Zumayili enatapulela:-“ Mulugu ohiiwa”.- Oliye onaakale muthu oweddeedda mukokolani, vano ndada naaye nnakale nowiddana ni ateene. Vano mada amohiya eneere omwiidda oliye. Zumayili ahikala baabi a nlogo nakadda Aarabe.
Vigavirile yaaka kumi nathaaru vabaliwile Zumayili, Mulugu agamoonile Abaramu ahiira:- Miyo gili Mulugu a kopolo dhatedhene, weddege mowogowa mundila mwaaga, miyo gineere ohela nipangano vaari va we ni miyo, vano gineere huwenjedhedha valubalevene. Nnddi thinipangano naaga ni we: onaakale baabi a malogo majinjeene.-
Vano kudha withaniwaga Abaramu, mbwenye onethaniwege Abarahamu. Vowi, ginowukaliha baabi a malogo majinjeene. Ni mwaha wa ndina nixa, Abarahamu ahinona wi Mulugu oneere onvaha anamabaliwelamo ajinjeene.
Mulugu teto ahiwoga ni Abarahamu wiira:- Elabo yateene ya Kanahani gineere wuvaha we ni anamabaliwelamo awo, mundduli mwaawo. Vano ginakale Mulugu enyu..- Nuwindo Mulugu ahihiyaniha ndina na Sarayi okala Sara.Vano ahireelihiwa ni mwaana mmohi. (*)

18 Yonihelo ya neekumi natanu nathaaru. Mulugu onowaruma orumiwa araaru wa Abarahamu

18 Yonihelo ya neekumi natanu nathaaru. Mulugu onowaruma orumiwa araaru wa Abarahamu

Genesis 18:1-15

Nlabo nimohi,oorumiwa araaru yarumiwege ni Mulugu yahifiyaga vade va Abarahamu. Abarahamu ahimwithanaga Sara wi asasanye yooja, wi yavahe. Vano mulobwana mmohi ahimukohaga Abarahamu wiira:- Mwihiyana aawo oli waani? Abarahamu ahakulaga wiira: Oli mmusasani.= Mulobwana mmohi aaligi Mulugwene, omwiirela Abarahamu wi:- Miyo gineere owelela veva mudhidhi wankeene wowi huleena yaakeeyo. Vano Sara mwihiyanawo oneere okalana mwaana. Sara agewile nde ahiteyaga, ateyaga mwaha wowi, ahimala wuluula kafwanelela obala.Vano oliye ahiraga;- Miyo gineere okalana mwaana teto gigamalile wuluula? Oorumiwa mmohi ahiiraga:- Ehikalawo yego emohi enamurusa Mulugu? Miyo gineere owela yaakeeyo, Sara onokalana mwaana. (*)

19 Yonihelo ya neekumi natanu neenayi. Abarahamu onolobelela oSoddoma

19 Yonihelo ya neekumi natanu neenayi. Abarahamu onolobelela oSoddoma

Genesis 18:16

Orumiwa ale egamwihiyile Abarahamu, Abarahamu ahavelelaga wi awoone dila yayeligiwa. Aliwa yahisugwa mudhi wa Soddoma, vano Mulugu ahiwogaga ni Abarahamu wiira; ginaya goone mudhi wa Soddoma. Mulugu oofuna wi abwanyule mudhi wa Soddoma ni Gomora, mwaha wa obure weewa wahithabwa wuunuwa. Aliwa yahinyanyala mweddelo wa efunelo ya Mulugu, mwa alobwana ni ahiyana mewananelo.
Mbwenye Abarahamu omubuwelela Lothi wiira: -Nabwiya muneere wabwanyulawo apama ni abureya?-
Abarahamu ahimuloba Mulugu wi eddiwele thagaraga mudhi wa oSoddoma. Vano Mulugu ahaakula wiira:- Miyo gafwanyawo athu kumi ologomana apama, kaginabwanyulawo. Mulugu agamalile owoga Abarahamu ahiwelela vade vaye. Mbwenye kawaali athu ofiyedha kumi yamoova Mulugu Osoddoma. Oorumiwa abiili vadhowiliiwa oSoddoma, vowi, ofwanelelawoya aali Lothi, vano omwaddela Lothi wi avenyemo mudhi wa oSoddoma ole. Egamwaddele Lothi; -avenyemo mowaguvamwene, teto ahisugwe mundduli, vowi Mulugu omweddela thagaraga Lothi. Mwaha wi Mulugu eere orumiha munddo odhulu wowoopiha, wi ombwanyule Soddoma ni Gomora ni otolosa . Lothi ni amudhi aaye yahivenyamo ni waguvamwene. Vano egamaruwe edhowaga, mwadha Lothi osugwa mundduli. Vano mohumala mudhidhi, mwadha Lothi ahitaduwa eruwa ya mwiinyu. Abarahamu ahimuloba Mulugu wi avuluse ale yahanna mulili wa dhothega. Mbwenye Lothi ni anaaye abiili anahiyana bavuluwe. Vowi Mulugu ahimubuwelela Abarahamu, teto oliye omulobelela Lothi. (*)

20 Yonihelo ya makumi menddi. Mukutho wa Abarahamu

20 Yonihelo ya makumi menddi. Mukutho wa Abarahamu

Genesis 22:1

Sara aganna yaaka makumi matanu namanayi, ahikalana mwaana, woona vamuroromelihile Mulugu Abarahamu. Abarahamu anna yaaka zana dhowuunuwa. Mwaanaya yamuthwile ndina na Ezaaki, ninatapulela: - “Ole onateya.”- Ezaaki afiyedhaga vezombweni, Mulugu aheeha nroromelo na Abarahamu, ahimwiirela wi: Omuthukule mwanawo owudhivela ogikuthele miyo woona mukutho.- Abarahamu ahimwiwelela Mulugu,othukula kuni omwinka Ezaaki, vano ahithukulaga mbene ni munddo.Vano Ezaaki ahikohaga wiira: Ki nibilana nili waani ninadhowIinyu mwakuthe? Abarahamu ahakulaga wiira: Mulugu oneere ogisayelela yokutha mukutho mwanaga. Abarahamu osasanya ebuwa, ohelavo kuni, vano ommaga mwanaye vano omuhela vadhulu va kuni vebuwani. Nuwindo Abarahamu ahithukulaga mbene wi ampena Ezaaki, vano mungero a Mulugu ahimwirelaga Abarahamu wiira: Kumutapulele ndada mwanawo. Kumwiirena yego, vano gihinona wi onomoova Mulugu. Kugikoddihedhe mwanawo. Vano Mulugu wiira: Vowi ohugiwelela miyo gineere wureeliha. Abarahamu omuroromela Mulugu vajinjivene, ahimwiwelela vohiribeliwa, vowi ahinona wi Mulugu eere onvaha egumi emohi Ezaaki. Vano Mulugu voniliye wi Abarahamu eere ompa mwanaye ahiwoga wiira:- Abarahamu, Abarahamu! Kumwirena yego yotakala mwanawo. Vano gihinona wi onomoova Mulugu okwaranya dhatedhene, vowi naari mwanawo kugiwadelihedhe ookala mmohive, mwanawo oweeka. Nuwindo Abarahamu ahoonaga odduliwaye, nibila nigakokihiwe munipaddani na nikuphu, vano ahimuthukula omukuthela mukutho wa Mulugu omwihiya mwanaye. Vano Mulugu wiira:- Vowi ohugiwelela ndhu naaga, muwari mwa bewu yaawo enakale oreelihiwa malogo mateene a mwilaboni.. (*)

21 Yonihelo ya makumi menddi nimohi. Abarahamu ni namemelela aaye

21 Yonihelo ya makumi menddi nimohi. Abarahamu ni namemelela aaye

Genesis 24:1

Abarahamu agamalile wuluula, ahimwithana namemelela aaye wiira:- Owelele owanuhu, wi odhowe wamusayele mwihiyana muwari mwa amudhi aaga wi mwanaga Ezaaki amutele. Abarahamu kaafuna wi mwanaye Ezaaki avenyewo elabo ya oKanahani, naari ahimutele mwana mwihiyana a nlogo nakadda Kananewu. Mwimeleli a Abarahamu ahiiwelela odhowa mudhi wa Nakore. Vano ahiloba wi Mulugu anvelele wi anfwanye mwihiyana ofwanelela wi akale Ezaaki. Nudhowa ahinfwanyawo mwana mwihiyana owomesesa eriwa Rabeeka akumaga mavade a mudhi adhowaga wiiko arugwe mahinje. Oliye warugwa mahinje omwinka oorumiwa ole a Abarahamu , ni abuuru yannigiyena wangwiha. Namemelela ole ahinona wi Mulugu ohugirumihedha mwihiyana ola. Oliye ahinfwanya mwihiyana ole amusayeliye. Teto aali mudhula a ddibila Abarahamu. Namemelela ole ahimutamalela Mulugu vowi ahiiwa yoloba yaaye. Vano Rabeeka okala mwihiyana Ezaaki. Abarahamu akwile ni yaaka , zana ni makumi matanu-na-menddi ni yaaka tanu dhobaliwa. Odheela egumi yaaye yateene aroromela madhu mateene yamuroromeliha Mulugu, vano Mulugu omureeliha malabweene.
Mulugu onowareeliha ateene alene enamuroromela Muluguya woona Abarahamu. (*)

22 Yonihelo ya neekumi nabiili. Yesu ohubaliwa

22 Yonihelo ya neekumi nabiili. Yesu ohubaliwa

Galata 4:4

Madhu a Mulugu beebaribari. Mulugu kanaratha, Mulugu ahiwoga ni Adamu, wi gineere omuruma muthu onamugonjihe sathana. Oliye ahimwaddela Nowe wi oneere wabwanyula anamathega ni mwaha wovaadda mirima dheewa ni mwaha wohufuna onyanyala merelo eewa otakala. Oliye ohumoniha Jobu, wi ononifunelana opama wa malabweene. Oliye ahimoniha Abarahamu, wi oliye onowakwaneliha dhatedhene dhinapaganyiiye. Vayoniheloni va ninomoonavo mwaana oneeriwa Yesu. Mofwanafwanela mudhidhi wasakulile Mulugu, Yesu abaliwe elabo ya wiZarayeli. Amaye aali mwana namwali eriwa Mariya. Aali mmudhi wa Abarahamu ni Ezaaki, mbwenye ababe aali Mulugu. Yesu duliyene onadhana mareeliho mwilaboni mula, mwaha wi, adheele ombwanyula sathana wi, anoobole, aniwelihedhe wa Mulugu. Akwanelihaga mwa oliye dhatedhene dhapaganyiliiye Mulugu. (*)

23 Yonihelo ya makumi ménddi nathaaru. Okwa wa Yesu

23 Yonihelo ya makumi ménddi nathaaru. Okwa wa Yesu

Galata 3:13-14

Yesu obaliwa, vano agoonuwile, hosuziha nlogo dila ya Mulugu. Oliye owirana matikiniho majinjeene, wi oonihe mwilaboni wi odhiile wa Mulugu. Mbwenye athu amohi owivunganyedha kayamurumeedhela oliyeya. Vano yahimpa omukomela. Munyakoddo mmohi ahiimelaga wi amoone akala ebaribarene ohukwa. Omulata mbararuni ni mwalago wiira:- Ebaribareene oli okweene.-
Akwaaga: - Mulugu ahiwoga ni Adamu, wi oneere okwa wajave dhovaha dha muthamuko ola. Hiyo ateene ninonvaanya Mulugu awoga, nihifwanelela okwa. Yesu ohukwa wi anakihedhe goyi yehu. Abarahamu afuna ompa mwanaye, mbwenye Mulugu ahinvaha nibila mumburoni na mwanaye. Mbwenye Mulugu ohumuleva mwanaye okwa, onikwela hiyo. Vamohive Mulugu ohunvulusa muthu muukwani wa malabwene, onvaha mwanaye ookala mmohi, Yesu wi okale mukutho wa dhothega dhehu dhatedhene. E e e e, dhothega dhehu, dhinonimwalaniha ni Mulugu.Yesu si dila yowelelana wa Mulugu.*

24 Yonihelo ya makumi menddi nenayi. Yesu peeno mugumi

24 Yonihelo ya makumi menddi nenayi. Yesu peeno mugumi

João 20:24

Maningo a Yesu yaheliwe munsiyeni. Mbwenye nlabo nanethaaru oliye okala mugumi. Okwa kawandile omwihidda Yesu, mwana Mulugu. Yesu ahikumelela vaaligi akwaaye, vano mmohi mwa aliwa eriwa Tome, kaaligivo mudhidhi oyene. Yamoniligiiwa yahimwaddela wiira: -Nihimoona Yesu.- Mbwenye oliye karumedhilege. Osogolowa Yesu ahikumelelaga egaali vevo ateene. Olenddo oyo Tome aligi vevo. Yesu omwaddamela oliye, omooniha mabamba mwakomeliwiiye ni nibamba na mwalago nomurimani, omwiirela wi ohiddemo ni embuno yaawo.
Vano Yesu ahenjedhedhaga wira: -Kukale muliba ohuroromela, vano rumedhela. Oorelihiwa baalene enaroromela ehoonile.-
Akwaaga: -Nahikale woona Tome, amwanganyedhile Mulugu. Mubuwelele wi Mulugu ahiwoga ni Adamu wiira: -Gineere omuruma onambwanyule sathana. Yesu vakwiliiye vamuraddini ahivenya muukwani. Oliye omugonjiha Sathana. Sathana kanna ewodhelo ni athu enamurumeedhela, emuroromelaga Yesu. Eyo siiyo yebaribariya, yamuroromelihe Mulugu Abarahamu. Mulugu ahiroromeliha wi malogo mateene eneere oreelihiwa odheela mwa oliye. Mareliho ayo bayeene enanivulusa mwa dhothega dhehu. Vano nikalena egumi yohumala ni Mulugu. Mareeliho ala edheele mwa Yesu. Dhili dhofuneya wi hiyo naakele mareeliho ayo, hiyoya namurumedhela Yesu, vano niiwelelaga madhu aaye.gorogoddogo.. (*)

Related information