Rais Reko

Rais Reko

Outline: Short Bible stories from Genesis through the ascension. How to become a follower of Jesus. 40 sections. It has a picture book to go along with the recording.

Script Number: 395

Language: Amarasi

Theme: Sin and Satan (Temptation, Deliverance, Light/Darkness, Sin, disobedience, Satan (the devil)); Christ (Jesus, Our Substitute, Resurrection of Jesus, Son of God, Saviour of Sinful Men, Birth of Christ, Ascension, Sacrifice / Atonement, Death of Christ, Life of Christ); Eternal life (Salvation, Eternal / everlasting life, Broad & Narrow Ways); Character of God (Love of God, Holy Spirit, Grace and Mercy, Nature, character of God, Word of God (the Bible), Power of God / Jesus); Living as a Christian (Fruit of the Spirit, Prayer, petition, New Nature, Worship, Witnessing, Church, Christianity, Second Birth, Obedience, No other gods, idols, Peace with God, Leaving old way, begin new way, Forgiveness, Faith, trust, believe in Jesus, Peace (between men), Children of God, Family, relationships, Spiritual Life, Christian values); Life event (Death); Bible timeline (Creation, Law of God, End Time, Second Coming, Gospel, Good News, People of God); Problems (Materialism, Evil Spirits, demons, Fear, Problems, troubles, worries)

Audience: General

Style: Monolog

Genre: Bible Stories & Teac

Purpose: Evangelism

Bible Quotation: Extensive

Status: Publishable

Script Text

Taabe, tua! Uab ein re' ia, nfain uab reko ma'tani' neu ki. Sin nfain Rais Reko neu seka-kau goah. Mkius miit gambar et suurtan. Mpasan hi ruik minan he mneen rek-reko, oras au ureta' ki Rais Reko ia. Karu hi mneen a'reku' sapa sasando nahaan on re' ia te (music), hi mfei surat rari te, mkius gambar. Karu hi he mitenab gambar es in reta', ai' he mmaktanan es nok es, ai' he mi'ub-uab kim rais reko natuin gambar naan, bisa misnasab kaseet re' ia fe', mituin hi romim. Rai te, mputar mikonob. Onaim, oras ia, mtae gambar ahunut.

Gambar 1: Reta’ un-unu’

Gambar 1: Reta’ un-unu’

Surat Unu-Unu' 1:1-5; Sit Bo'is [Mazmur] 90:2

Un-unu' oras are' saa'-saa' ii ka njair fa fe', Uisneno mbi nain naan. Rai te, Uisneno anmoe' neno-tunan ma pah-pinan. Oras naan, are' saa'-saa' ka mahuma' ma ka atoran fa. Oras Uisneno nmo'e nrair pah-pinan ia, In naprenat me'u he ntana'. Rari te, in nmoe' manas, funan, ma are' kfuu. Uisneno naan reko kun. In ator nain are' saa'-saa'.

Gambar 2: Uisneno In Kabin ma Prenat sin

Gambar 2: Uisneno In Kabin ma Prenat sin

Yesaya 45:18-19; Ibrani 4:12; Sit Bo'is 19:7-10

Surat re' matu'i es re' gambar naan, es re' Suur Akninu'. Re' ia, es re' Uisneno In Kabin ma Prenat, re' natoon kit Uisneno In tuan, ma Uisneno In romin. Uisneno nneek nain are' mansian pah-pinan. Are' saa'-saa' re' au he utoon ki sin naan, au ait ain sin na'ko Uisneno In Kabin ma Prenat.

Gambar 3: Uisneno nmoe’ neno-tunan ma pah-pinan nok nain in afan ma in nesan

Gambar 3: Uisneno nmoe’ neno-tunan ma pah-pinan nok nain in afan ma in nesan

Surat Un-Unu' 1:1-25

Uisneno nmoe' nain are' saa'-saa'. Karu In nakua In Kabin ma Prenat nak, "Ro he nmui' me'u!" Oras naan me'gui njair nain, on re' In Uaban. In nmoe' neno-tunan. In nmoe' tasi. In na'uab ah, rari te auf meto naan anjair. Rari te, In nmoe' nain are' saa'-saa' re' nmoin ma nakbero'. Es re' ika' nbi o'je nanan, koro-koro nbi nenggoe tnanan, ma are' kanan mu'it ma kauna' sin. In neki ha uaba'. Uisneno nmoe' are' saa'-saa' njair nain. Uisneno nkius are' saa' re' In mo'e nrair je naan, In neekni, anmariin anmaet. Saa' re' In mo'je naan reko'!

Gambar 4: Nai’ Adam nok bi Hawa sin reta’

Gambar 4: Nai’ Adam nok bi Hawa sin reta’

Surat Un-Unu' 1:26-31, 2:7 - 3:24

Uisneno nmoe' atoin ahunut, ma bifee ahunut. In nakanab atoin ahunut naan, nai' Adam, ma bifee ahunut naan, bi Hawa. In amsa' anreun ma naprenat he sin n'urus are' saa'-saa' re' In moe' nain sin nok rek-reko. In nmoe' naan baar jes reko 'maten, ma sin natuan nbi naan. Anbi naan, Uisneno nok sin, In nroim he na'uab nok sin. Sin mapartein. Uisneno nfeen sin mainuan, he sin naah ma nbukae are' kanan hau-fuaf anbi bare naan, mes In ntaar sin he kais naah hau-fuaf na'ko hau u'goes. Neot es Uisneno In musu, es re' niut re'uf sin A'nakat, neem nasneku' ma nfuri' sin he nasenib sin. In nfuri' sin he nai' Adam nok bi Hawa kaisa' nneen Uisneno ntein. Rari te, sin nseu ma nekun hau fuaf re' Uisneno ntaar nani. Natuin rasi naan, sin nasaan bein, natuin sin nraak ma ntanhai Uisneno In Kabin ma Prenat. Etun sin maneek ti nok Uisneno natfeek. Rari te, Uisneno nriuk napoitan sin na'ko baer rek-reko naan. Anmurai na'ko oras naan rasi, are' mansian pah-pinan msa' nfain asanab neu Uisneno In Kabin ma Prenat. Etun sin rais manekat nok Uisneno natfeek en. Neik ranan naan, hit mansian tapein rais susat, menas, ma mates.

Gambar 5: Nai’ Kaen nok nai’ Haber sin reta’

Gambar 5: Nai’ Kaen nok nai’ Haber sin reta’

Surat Un-Unu' 4:1-16; Roma 3:23

Nai' Adam nok bi Hawa sin nahoni' ri aan mone nua. Aan moen unu, in kaan ee, nai' Kaen, nok in orif, nai' Haber. Nai' Haber in moe'n ii reko, onaim Uisneno nmariin. Mes nai' Kaen kahaf. Natuin nai' Kaen in moe' amre'ut naan, es nana te, Uisneno anhukun. Uisneno natoo' karu mansian ii anmoe' sanat. Batuur nii, Uisneno he nmapartein ma nmoin reko nok mansian. Mes hit amoe' sanat, es nana te, hit rais kua'noon reko nok Uisneno netfeek.

Gambar 6: Nai’ Noh in abnao ko’u

Gambar 6: Nai’ Noh in abnao ko’u

Surat Un-Unu' 6:1-22; 2 Petrus 3:9

Nai' Adam nok bi Hawa sin suuf keni mfau rutu. Mes sin arsin anmo'en sanat, ma antanhai Uisneno In Kabin ma Prenat. Sin moe' sanat ma buraru naan ma'tani, tar antea Uisneno nafeek he nareuk nain sin neik ranan huum es. Rasi naan es re' Uisneno nasanu' uran re' ka nasnasaf, tar antea are' noe nsae ma naheun. Naheun pah-pinan ia ok-oke'. Suma tuaf es ah, re' in maruki' ma anneen Uisneno, ma anneek Uisneno. Tuaf naan, es re' nai' Noh. Uisneno natonan nai' Noh he nmoe' naan bnao ko'goes he nati' in bisa napein rais ao-mina' ma nsoe naan ee na'ko noe ahenut naan. Onaim nai' Noh natuin Prenat Uisneno naan, mes in nmoe' bnao naan naah oras, to bani'. Oras in nmoe' bnao naan, in namnauba' tuaf-tuaf anbi bare naan nak Uisneno he nhukum mansian neik noe ahenut ko'u, he nareuk nain mansian pah-pinan. Mes ka tiit fa tuaf he ntoe natuin nai' Noh in uaban. Sin ka nromin fa he nasaitan sin moe' sanat.

Gambar 7: Noe ahenut ko’u

Gambar 7: Noe ahenut ko’u

Surat Un-Unu' 7:1-24

Uisneno napo' neik are' kanan mu'it ma kauna' neman neu nai' Noh. Rari te, nai' Noh nataam sin neu bnao naan in nanan. Namuni te, nai' Noh, nok in fee, ma in anmone teun nok nain sin fee keni, sin amsa' ntaman neu bnao naan in nanan. Sin arsin tuaf faun nbi bnao naan in nanan, nok nain are' kanan mu'it ma kauna'. Rari te, Uisneno na'eek bnao naan in eon ee mates. Neno hiut on nana te, Uisneno nasanu' uran. Uisneno npukai nain are' oe mata', es nana te are' oe mata' npuran napoitan oe ma'tani'. Oe uran nok oe mata' naan neem ma nsae piut-piut naheun pah-pinan. Tar antea neno bo'-haa, oe naan nsae piut naheun ma naheun ma ntoeb naan pah-pinan. Are' mansian oras naan re' ka ntaam nok fa neu bnao naan in nanan, sin ka nmui' fa rasi fnekat neu monit. Sin arsin anrema nmaten. Mes nai' Noh nok in um jii nanan napein rais ao-mina', natuin sin npirsain ma natuin Uisneno In A'prenat.

Gambar 8: Nai’ Abraham, bi Sara’, ma nai’ Isak sin reta’

Gambar 8: Nai’ Abraham, bi Sara’, ma nai’ Isak sin reta’

Surat Un-Unu' 9:18-19, 17:1-8, 21:1-7; Mateos 1:1-16

Nai' Noh in sufan na'ko oras neu oras nasufan ntein ein ma mfau rutu, tar antea nfain uuf-uuf. Nai' Noh in sufan es, es re' nai' Abraham. Nai' Abraham re' ia, in maruki', es nana te in nneen Uisneno. In amsa' anneek Uisneno. Neot es, Uisneno nmoe' rais manba'an nok nai' Abraham, nak, nai' Abraham nok in fee bi Sara' sin suuf keni of anfain too nbi pah-pah. Sin of ma'tani'. Te kah, nai' Abraham nok bi Sara' sin namnasin re'-reu'fen, ma sin amsa' ka nahoin ein fa. Mes sin nnaa' naheer-heeren Uisneno In rais manba'an. Nai' Abraham napein anmone mese' na'ko bifee sona'. In anah naan, kaan ee, nai' Ismaer. Nai' Ismaer re' ia, afain uuf neu abitan pah Arab. Onaim oras nai' Abraham nok bi Sara' namnasin re'-reu'fen, sin nahoni' natuin Uisneno In rais manba'an. Sin nakanab ri-ana' naan, nai' Isak. Uisneno anba'an he npaek nai' Isak nok nain in sufan sin, he neik tetus ao-mina' neu are' kanan mansian anbi pah-pinan.

Gambar 9: Nai’ Musa nok Uisneno In Atoran Aprenat

Gambar 9: Nai’ Musa nok Uisneno In Atoran Aprenat

Npoin na'ko Pah Masir 19:1-25, 34:27-32

Nai' Isak in sufan sin mfau rutu. Sin amsa' nfain pah ko'goes. Pah re' naan, in kaan ee Isra'er. In sufan es kaan ee, nai' Musa. Nai' Musa nroim he nneen ma npirsai Uisneno. Neot es, Uisneno no'en nai' Musa he nsae neu 'toe'f es. Uisneno na'uab nok nai' Musa anbi naan. In natoon In Atoran Aprenat neu nai' Musa, he in nanoni' mansian oras naan. Oras nai' Musa nsaun na'ko 'to'ef naan, in nnaa' fatu matu'i re' Uisneno nruun ma ntui In Atoran Aprenat sin. Uisneno nroim he are' kanan mansian ii natuin In Atoran Aprenat sin.

Gambar 10: Prenat Bo’es

Gambar 10: Prenat Bo’es

Npoi nak'o pah Masir 20:1-17

Atoran Aprenat re' Uisneno nfee je neu nai' Musa naan, reko oke'. Sekau re' natuin atoran naan, of antoup tetus ma athoen na'ko Uisneno. Uisneno In Atoran Aprenat sin es re': Hit arkit ro he tneek, ta'ruri' ma ta'bees, tneen Uisneno batur-batuur. Hit arkit kaisa' tmoe' baer fuat. Hit arkit kaisa' tpaek Uisneno In kaan ee rafu'-rafu'. Tpaek neng goes nbi kreij es in nanan he tasnaas ta'ko are' kanan mepu banit, ma ta'ruri' ta'bees neu Uisneno. Ri-aan ii ro he tneen ma thormat hit ama' ma hit aina'. Kaisa' atmaroor. Kaisa' atmakaek. Kais tapoi huma'-huma' ma atputa-kriu atoni'. Kaisa' tabaak. Kaisa' atsinmakan atoni' in bare'.

Gambar 11: Fua’ turu’ re’ anfain tanar saok sanat

Gambar 11: Fua’ turu’ re’ anfain tanar saok sanat

A'nauk krei sin atoran [Imamat] 4:27-35; Yohanis 1:29; Roma 3:23

Uisneno In prinsiip ee, es re' karu atoni' anmoe' sanat, in ro he napein hukun. Hukun naan, es re' he tmaet. Mes oras nai' Musa nfain a'nakat neu too pah Isra'er sin, atoni' ro he nroor a'bib kaes ana' he nfain fua' turu' neu Uisneno, karu in ntaanhai Uisneno In Atoran Aprenat. A'bib kaes ana' naan, anmaet nfani' 'senuf neu atoni' re' antanhai Uisneno In Atoran Aprenat. Fua' turu' naan namnauba' atoni' nak, karu atanhai Uisneno In Atoran Aprenat naan, nahuum on re' hit tasaan Uisneno. A'bib-kaes ana' naan, nfain tanar re' naruru' ma nareka' kit nak, of anmui' fua' turu' es re' ma'tani' nnesi nteni'. Es re' Uisneno an ator nain rencana es, he nsonu' In anah Nai' Yesus neem neu pah-pinan, he nfain fua' turu' nsenu' hit sanat sin.

Gambar 12: Uisneno anba’an he nsonu’ tuaf es he neik kit rais ao-mina’

Gambar 12: Uisneno anba’an he nsonu’ tuaf es he neik kit rais ao-mina’

Rukas 1:26-38; Mateos 1:18-25

Toon natun fauk ankoon on nana te, Uisneno ansonu' ameput es na'ko sonaf neno-tunan. Ameput naan neik uab neu ri'feot munif es, in kaan ee, bi Maria. Bi Maria anmanaa' nok nai' Yusuf. Ameput na'ko sonaf neno-tunan naan, natonan bi Maria am, nak, "Ho moe'm ii anhariin Uisneno In nekan. Of ho muhoni' maan ri' anmoon jes. Ho ro he mu kaan be, nai' Yesus." Mes bi Maria nataah am, nak, "Au re' ia, ka tu-tuup iit fa ok atoni'! Onaim on mee, henati' au u'apu'?" Ameput naan nataah am, nak, "Onai! Of Uisneno In Smana Kniun Ee, neem neu ko. Neik ranan naan, Ri'ana' re' ho muhoins Ee naan, batur-batuur kninu', te Ri'ana' naan Uisneno In anah." Uisneno In ameput naan, nakrira' In tuan neu nai' Yusuf anbi mneit. In natoon nak, "Yusuf! Kais mumtau he msao bi Maria, te ri'ana' re' bi Maria na aups Ee re' naan, natuin Smana Kninu'. Of in nahoni' naan ri' anmoon jes. Mukaanb Ee, nai' Yesus." Haa, kanaf 'Yesus' naan, in a'moufn ii re' anfee ao-mina' neu atoni'. Rari te, nai' Yusuf ansao bi Maria, mes sin nua sin ka ntuup nabuan fa on re' fee-mone, tar antea Ri'ana' naan nahonis.

Gambar 13: Reta’ re’ oras nai’ Yesus nahonis

Gambar 13: Reta’ re’ oras nai’ Yesus nahonis

Rukas 2:1-20

Oras naan, uisf ee naprenat are' too gui, he nfanin on sin kuan mese'-mese' he ntui sin anbi sensus. Etun nai' Yusuf nok bi Maria msa' nnaon na'ko kuan Nasaret neu kuan Betlehem. Betlehem naan, nai' Yusuf in be'i-na'i sin kuan. Antean bare naan, are' uim losmen sin nahenun nok tuaf. Etun sin natua ntaah nein anbi o'of. Anbi bare naan, bi Maria nahonis ri'ana kru'uf es, es re' nai' Yesus. Mabe' re' nana msa', Uisneno In ameput na'ko sonaf neno-tunan nariir ok neu atukus fauk re' anbe'en ma ntiut sin a'bib-kasen anbi mnera' huun nbi koot in koten. Ameput Uisneno naan na'uab am, nak, "Au uum he utoon rais rek goes neu are' kanan mansian. Neno ia, nmui' naan bifeej es nahonis Kristus! Kristus naan, Atoni' re' Uisneno anba'an nani na'ko un-unu'. Uisneno ansoun Ee neem he neik rais ao-mina' ma rais saok sanat neu are' sanat sin!" In na'uab narair on nana te, nok askeken, Uisneno In ameput bian anteni' neman nbuub nok namfaun nokan. Onaim, sin bo'es na'naeba' Uisneno neik siit. Onain, atuuks ein naan na'uab ein es nok es am, nak, "Hae! Iim he tnao teu Betlehem. Tnao he tkius tiit saa' re' najair bon anbi nee!" Oras sin niit Ri'ana' nana te, sin natoon Ee neu seka-ka goah. Sin natoon saa' re' sin anneen, ma niit re' anmatoom nok Ri'ana' naan. Are' atoni' re' anneen rasi naan ansanmakan, natuin beno na'ko atukus sin.

Gambar 14: Usif Yesus nanoni’ mansian

Gambar 14: Usif Yesus nanoni’ mansian

Rukas 2:41-52; Markus 6:34

Nai' Yesus na'nae anbi nai' Yusuf nok bi Maria sin a'nimak. Oras In toon bo'es am nua, nai' Yusuf nok bi Maria neik nai' Yesus nbi kota Yerusalem. Anbi bare naan, In na'uab nok tungguru-tungguru sin ma nok a'nakat-a'nakat sin, natuin Uisneno In A'prenat. In npasan In rukin ma nma'taan nein nok sin. Sin arsin ansanmakan, natuin In nahiin batur-batuur Uisneno In A'prenat afa'-isi. Oras In toon bo'-teun, In nmurai nait mepu ma nanoni' tuaf natuin rasi Uisneno. Mes anmui' tuaf namfau ka npirsain fa, rari te sin nraaban nai' Yesus.

Gambar 15: Usif Yesus nmoe’ rais sanmakat huma’-huma’

Gambar 15: Usif Yesus nmoe’ rais sanmakat huma’-huma’

Markus 8:22-26, 5:35-43, 6:45-52

Uisneno nfee ma'tani' neu Nai' Yesus. In nmoe' rais sanmakat huma'-huma'. In nareko amenat. In nareko' atoni' na'ko maat foro. In nreun amates he nmoni nfain. In nreek ain ko'gui he nasnaas. In nnao nbi oj ii fafon. Oras atoni' niit are' rais sanmakat re' Nai' Yesus anmo'e, apirsait ii namfaun. Sin nak, Uisneno neik Noon es ansonu' nai' Yesus. Sin arsin ansanmakan natuin saa'-saa' re' In mo'e ma nanoni'. Usif Yesus anmui' kuasat he nturun ma nbaab kit amsa'.

Gambar 16: Usif Yesus ansutai ma’ne’at

Gambar 16: Usif Yesus ansutai ma’ne’at

Mateos 27:11-31

Nai' Yesus anmoe' rais reko mfaun, ma too mfaun amsa'natuin Ee. In nturun ma anbaab too namfau, ma nanoni' Uisneno In romin. In nakrira' Uisneno In manekan, ma nakrira' ranan henati' atoni' bisa nabarbon nok Uisneno. Maski on nana msa', mes a'nakat-a'nakat krei sin neek ein namenan neu Nai' Yesus. Sin neek ein naheran on re' faut noe, ma sin ka nromin fa he npirsai nak, Uisneno es re' ansonu' nai' Yesus. Sin ka nromin fa he nmanaku' nak, sin amsa' anmo'en sanat ma antanhai Uisneno In Atoran Prenat. A'naka-a'nakat sin anmo'en rais poe ma reta' puta-kriu re' ka natai ma namnees fa nok Nai' Yesus. Rarit sin namin rais burarut ma anheek Nai' Yesus. Soraur sin anbeos Nai' Yesus. Sin nkaen 'soeb ma'aika' ma na'tuta' nraar je anbi Nai' Yesus In a'naakn Ee te, an nene ntein ee. Sin naseuk Ee. Hi mimnau in reta' fe'ena, oo? Nai' Yesus naan, Uisneno in Anah. Onaim, In nmui' kuasat he nareuk nain atoin ein naan ok-oke'. Maski on nana msa', Nai' Yesus ka nraban fa kre'-re'o. In nahiin, nak saa'-saa' re' njair on naan, Uisneno es re' an atoor nani.

Gambar 17: Sin nkuus na’maet Usif Yesus anbi hau nehe

Gambar 17: Sin nkuus na’maet Usif Yesus anbi hau nehe

Markus 15:22-39; 1 Petrus 2:21-24

Soraurs ein ankuus natneneb Nai' Yesus anbi hau nehe. Rarit In nakfiir anbi naan, tar antea In maet. Sin amsa' anhukun niis atoin aburarut nua nok Nai' Yesus. Oras naan, sin biasa nhukun atoni' npaek re' ranan naan. Te kah, ana'prenat sin anparikas narair Nai' Yesus, mes sin ka napein fa In sanat mese' msa'. In a'moufn ii, Nai' Yesus nasaah hukun re' ka nabei' fa he In ntopu. Rais hukun naan, batuur nii hit es re' he 'topu. Hit arkit atmo'e 'tsaan, onaim batuur, karu hit es re' he 'toup hukun naan. Mes Nai' Yesus nfain fua' turu' he nnoes nain hit sanat sin. Karu hit manaku' hit sanat sin, ma tasaitan sin oke', of Uisneno nnoes nain hit sanat sin. Etun au utoon ki onai. Hi mpirsai nai neu Usif Yesus Kristus, na' hi mipein rais ao-mina'.

Gambar 18: Usif Yesus anmoni nfain na’ko mates

Gambar 18: Usif Yesus anmoni nfain na’ko mates

Rukas 23:50 - 24:9

Atoni' re' anmamusun Nai' Yesus, sin nateenb ein nak ai' sin nareuk nain Nai' Yesus. Nanaa ka batuur af! Oras Nai' Yesus anmate nrair, In parteing goe nait In ta'un ma nataam ee nbi noup fat goes. Sin na eek narek-reko' noup fatu naan in enon nok faut been ko' goes. Nmeu te, Nai' Yesus anmoni nfain na'ko In a'maten naan. Anmui' naan bifee fauk nnaon neu noup fatu naan he nkaik ein fubona' natuin atoran harat. Antean bare nana te, nok askeken, sin niit faut bena' naan naritu' narari. Nai' Yesus In tau'n Ee msa' ka mamnita' fa! Uisneno In ameput nua nakriir ok neu sin, rari te, sin natonan am, nak, "Nai' Yesus ka et fa ia ntein, te In nmoni nfain!" Batuur! Nai' Yesus anmoni nfain! Neik ranan naan, In nakrira' nak, In batur-batuur Usi'. Nai' Yesus anmoin piut ntea oras ia. Maets ii ka nabei' Je fa. Niut reu'f ein sin a'nak te msa' ka nabei' Je fa.

Gambar 19: Reta’ anmatoom neu nai’ Tomas

Gambar 19: Reta’ anmatoom neu nai’ Tomas

Yohanis 20:19-31

Oras Nai' Yesus anmoni nfain, In nakriir On neu In atoup-noni' sin. In na'uab nok sin. In nbukae nabu-bua nok sin. Oras ahunut In nakriir On neu sin, In atoup-noni' es ka nokaf. In kaan ee, nai' Tomas. Oras in parteing guin natoon ee mnak Nai' Yesus anmoni nfain, in ka npirsaif. In na'uab am, nak, "Au ro he 'iit ma urepa' au kruruk neu In papa' re' ankuus ee oras naan, na' au 'pirsai." Kreij es ansopu te, Nai' Yesus nakriir On antein neu sin. Oras naan, nai' Tomas amsa' anbiin, on re' hi mtae gambar re' naan. Rari te, in nri'-tuu, ma nak, "Au 'pirsai batur-batuur au Usi'!" Niit nok matan on re' nana te, nai' Tomas neekn ee, ka na'oni' fa ntein. Nai' Yesus nataah am, nak, "Ho mpirsai natuin ho miit nok ho matam. Reko nneis neu re' atoni' re' ka niit Kau fa, mes sin anpirsain."

Gambar 20: Usif Yesus na’ait On neu sonaf neno-tunan

Gambar 20: Usif Yesus na’ait On neu sonaf neno-tunan

Mateos 28:18-20; Haef ein sin Reta' [Kisah] 1:1-11; Yohanis 14:1-4

Oras Nai' Yesus anmoni nfain, In nakrira' In Tuan neu too mfaun. Sin niit Ee, onaim sin nahiin nanin nak, In nmoni nfaan jen. Neno bo'-haa nteef ate, Nai' Yesus he nsae nfain neu Sonaf neno-tunan. In narair In mepu nbi pah-pinan ia. In haefa' apirsait neu In Tuan, nak, "Hi ro he mnao meu are' bare mee-mee he meik tuaf nfain Au inin. Minoni' sin rek-reko he natuin saa'-saa' re' Au utoon urair ki sin." Onaim Nai' Yesus na'ait On neu sonaf neno-tunan nbi sin matak. In ntaam neu noop je nanan, es nana te, sin ka niit antein Ee fa. Nok askeken te, ameput sonaf neno-tunan tuaf nua nakriir ok anbi bare naan. Sin natonan Usif Yesus In atoup-noin ein naan, In nsae on mee te, of In nsanu nfain neem on naan. Oras ia, Usif Yesus et sonaf neno-tunan. Anbi sonaf neno-tunan, Usif Yesus nabarab baer reko neu sekau-sekau re' anpirsai neu Usif Yesus. Onaim, au he utaan an ki onai: Ho on mee? Ho mpirsai Nai' Yesus, ai' kah? Mroim he mutuin Ee, kah? Of In nfain nema te, ho mubarab he nsonu ma ntoup Goe, ai' kafee'?

Taabe, tua! Hit tneen kaseet ii, in aon-bian. Mkius gambar bo'-nua mmese'. Mpasan hi ruikm ein he mneen rek-reko oras au ureta' Rais Reko ia. Karu mneen a'reku' sapa sasando nahaan on re' ia (music), na' mfei surat naan ma mtae gambar. Karu hi he miten-tenab gambar es in reta', ai' he mmaktanan es nok es, ai' he mi'ub-uab kim rais reko natuin gambar es in reta', bisa misnasab kaseet re' ia fe', mituin hi romim. Rari te, mputar mikonob. Onaim oras ia, mtae gambar bo'-nua mmese'.

Gambar 21: Hau neeh ruman

Gambar 21: Hau neeh ruman

1 Petrus 3:18; Garatia 2:20

Nansaa' am es Nai' Yesus ro he nmate nbi hau nehe? In sabab ii, onai: Nai' Yesus anmaet he nfee rais ao-mina' neu mansian asanat na'ko sanat sin hukun. Te kah, Nai' Yesus ka nmoe' niit fa sanat. Neik In rana 'mates naan, In nasaah ma nroe hit sanat sin hukun. Sin saant ein es re' nmoe' hit rais kua'nono tok Uisneno natfeek. Nai' Yesus naan, Uisneno In 'Bib-kaes Ana Kninu', re' ka nmui' fa sanat saa'-saa', re' anfain fua'turu' nsenu' nain kit. Karu hit tpirsai Nai' Yesus, ma atmanaku' hit saant ein, rari te, tasaitan tain saant ein naan, Uisneno annoes nain saant ein naan. Karu hit tmoe' on naan, Nai' Yesus nait kit nfain Uisneno In anah sin. Gambar akoon tan, natoon ki in a'moufn ii kninu'.

Gambar 22: Ranan nua

Gambar 22: Ranan nua

Mateos 7:13-14; Yohanis 3:16; 1 Yohanis 1:9

Nai' Yesus nanoni' rasi re' he atoni' anmoin piut nok Uisneno. Are' mansian pah-pinan, nmurai nmonin anbi raan ko'u ma mainuan. Te kah, raan ko'u ma mainuan naan, ranan re' naheun nok sanat. Are' mansian pah-pinan natuin ranan naan, natuin hit tmoe' sanat on re' nai' Adam. Te nai' Adam in suufna kit! Ranan eesan, an-ana'. Raan an-ana' naan neik atoni' neu Uisneno et sonaf neno-tunan, he atoni' bisa nmoin piut nok Uisneno. Usif Yesus nanoni' nak, reko nneis hit tnao tatuin raan ana'. Anbi gambar re' naan, hi miit hau nehe noon es, re' anhaek es raan ana' naan in uun. Hit bisa 'taam teu ranan naan, karu hit manaku' hit saant ein, tasaitan hit saant ein naan, ma atpirsai tak, Usif Yesus anmaet anbi hau nehe he nsenu' kit. Maski on naan, too mfaun ka nroim fa he nasaitan sin sanat. Sin nateenb ein nak, of ai' raan ana' he nnao neu sonaf neno-tunan naan suust ii ko'u neu sin he natuin ein. Raan mainuan naan, es re' maknura'. Te kah, raan mainuan naan, es re' nnao neu naraka. Naraka naan bare re' neik suust am nana'renat neu tuaf re' Uisneno nriu' napoitan. Onaim au he utaan: Na'ko raan nua ein naan, ho mpiir mee? Karu ho mroim he mpiir raan ao-mina', reko nneis ho mmanaku ho saant ein neu Uisneno. Kaisa' mpao mtein. Oras re' ia! Mutoon Ee, mmak, "Aam honi'! Au uhiin ain neu Ho ma'tani' ma kninu' msa'. Mes au he utoon au kaar eni nbi Ho, Aam, natuin au 'usanab huma'-huma'. Au 'pirsai ak Nai' Yesus anmaet anbi hau nehe he nasaah au rais hukun. Rari te, au 'baiseun Ko, Usi, mnoes main au sanat sin. Mukninu' kau na'ko are' au sanat sin. Mtoup kau nfain Ho anah. Au 'roim he utuin ranan re' neik kau neu ao-mina' re' Usif Yesus nakrira'. Of karu au 'maet, au 'roim he 'moin piut ok Ko, Aam, anbi sonaf neno-tunan. Makasi, Amoo! On re' naan."

Gambar 23: Ana-anah Uisneno

Gambar 23: Ana-anah Uisneno

Yohanis 6:37-40, 14:6; Nai' Yohanis niit Pah Fe'u [Wahyu] 7:9

Anbi gambar re' ia, hit tiit Nai' Yesus. In nseun bifee-atoni' na'ko uuf-uuf, pah-pah, ma uab-uab pah-pinan. Sin npirsain nrair Nai' Yesus. Nai' Yesus amsa' antopu nrair sin ntaam anah-anah Uisneno. Sin nnaon natuin raan ana' re' he nsae neu sonaf neno-tunan. Ana-anah Uisneno on re' tuaf-tuaf nfain asar ko'u anbi um jes in nanan. Bian namnasin, bian munif. Bian ana', bian ko'u. Nmui' bifee, ma nmui' atoni'. Anmui' atoin ao metan, bian sokrat, bian moro', bian muti'. Nmui' amu'it, ma nmui' ama'mu'it amsa'. Usif Yesus antoup nain sin oke'. Sin nfain anah-anah Uisneno.

Gambar 24: Nmoin fe’u

Gambar 24: Nmoin fe’u

Yohanis 3:1-18; Titus 3:4-7; 1 Petrus 1:22-23

Oras Nai' Yesus fe' anmoin anbi pah-pinan ia, nmui' naan tunggur agama es, in kaan ee, nai' Nikodemus. Faaj es, nai' Nikodemus re' ia nnao naim Usif Yesus he nataan naan uab mana'fauk. Usif Yesus natoon ee raas jes re' nmoe' nai' Nikodemus ansanmaak. In natoon nak, atoni' re' he nfain Uisneno In asar, in ro he nahonis nafain ee. Naa, hit 'taam asar nbi hit aina' ma ama' oras nahonis kit. Hit bisa tfain Uisneno In nonot asar karu nahonis nafani' kit. Nahonis nahunun kit naan, es re' nbi rais aof. Mes nahonis kit nonuan ii, es re' anbi smanaf. Nahonis kit anbi smanaf naan, Uisneno In Smana Kniun Ee es re' nfee kit a'moin fe'u. Hit toup 'moin fe'u naan, oras hit tatuin Uisneno. In nmoe' kit tfain mansian fe'u es re' tfain atoni' na'ko Uisneno.

Gambar 25: Uisneno In Smana Kninu’

Gambar 25: Uisneno In Smana Kninu’

Yohanis 14:15-18; Reta' na'ko Usif Yesus In haef ein 2:1-39

Oras Nai' Yesus ka nsae nfain fa fe' neu sonaf neno-tunan, In ba'an he nsonu' Uisneno In Smana Kninu'. Oras In nsaen nrair ntea sonaf neno-tunan, neno bo'es namuni te, In haef ein nabuan anbi baar jes. Nok askeken te, nmui' naan 'ruuf ko' goes on re' ain nautus. Rari te, sin niitan on re' ai pina' nbaits ok neu sin tunak mese'-mese'. Onain sin arsin napein Smana Kninu' Uisneno, natai nok saa' re' Nai' Yesus natoon naan je neu sin. Oras naan, nmui' naan atoni' namfau na'ko are' bare-bare nabuan anbi Yerusarem. Nai' Yesus In haef ein napenin kuasa he na'uab ein npaek es-es ate in uaban. Haef ein natonan abuat ein naan are' kanan rais reko re' Uisneno nmo'e nrari. Neno nana msa', anmui' naan tuaf nifu teun re' nait a'tfeeka' he natuin nain Usif Yesus. Oras ia, Smana Kninu' Uisneno natua et re' tuaf ein re' batur-batuur natuin Nai' Yesus. Smana Kninu' naan nfee kuasa neu kit he hit tatuin Nai' Yesus In nonin, ma tatonan atoni' bian anteni anmatoom Nai' Yesus.

Gambar 26: Tmoni tbi me’u

Gambar 26: Tmoni tbi me’u

Yohanis 3:19-21, 8:12; 1 Yohanis 1:5-7

Atoni' re' ka npirsai fa neu Usif Yesus on re' atoin ein re' gambar re' ia. Sin nnaon mes nabreong goah nbin meis'okan. Sin iat nastunan ma ntekobin, natuin ka tiit fa me'u re' nfain atana' ranan nbi meis'okan naan. Karu hit tpirsai teu Nai' Yesus, ma tapohot ai' tana'at hit a'moin ki neu In a'niman, hit on re' atoin ein re' nnaon et me'u. Nkius raan ii te, hit mariin! Maski raan ee re'-re'uf, mes in ka nteikobef, te in neik me'u, es re' in niit fatu ai' kona ma pe'es nbi ranan naan, onaim in nbeok he kaisa' nastuun ai' ntikoib. Usif Yesus, natoon am nak, "Au re'ia, meu' sine' neu pah-pinan. Karu atoni' natuin Kau, in ka nmoin fa nbi meis'okan." Usif Yesus nfee in Smana Kninu' he nfain maat ranan neu atoin ein re' npirsai neu Usif Yesus.

Gambar 27: Hit bisa tfain atoin fe’u

Gambar 27: Hit bisa tfain atoin fe’u

Garatia 5:16-26; Efesus 4:22-32; 2 Korintus 5:17

Are' atoin ein re' natuin Usif Yesus Kristus, in nfain atoin fe'u. In nroim he natuin Uisneno In Uab ein. In nnaben nahiin rais sukuur, natuin Uisneno nsao' nain in saant ein oke', ma nfeen ee moin fe'u. In ka nmoe' fa rais re'uf, re' he nmoe' he Uisneno natoo'. Onaim tuaf ein re' anpirsain neu Nai' Yesus ka nmaburin fa, ka nabakan fa, ka nmakaek, ma kaisa' mfua uis teta'. Smana Kniun Ee nfee kit 'be'if he hit tasaitan are' rais re'uf ein naan, he hit tmoe' rais reko kuun, tatuin Uisneno In romin."

Gambar 28: Nonot asar Kristen sin a’moni’

Gambar 28: Nonot asar Kristen sin a’moni’

Efesus 5:21 - 6:1; 1 Petrus 3:1-9

Karu uum jes in naan ee batur-batuur natuin Nai' Yesus In rana 'honis, sin nmoin nok neek mese' ma ansao' mese'. Moe't ein es re' atoin moonj ate nneek in fee. Fee mnais ee, nneek ma anhormaat in mone. Ri'an ein anneen am natniin sin amaf-ainaf. Re' naan Uisneno In Kabin ma Prenat sin es re' nanoni' on naan. Hit fee-mone atmaturun, he taheran hit nekak es nok es. Tanoni' hit aanh ein, he nneek Uisneno ma natuin In Kabin ma Prent eni. Uum jes in nanan re' na'ruir am na'bees neu Uisneno, sin biasa n'oen ein bu'-bua', nmeup ma'tani' nabu-buan, ma nmonin nok neek mese' ma ansao' mese'.

Gambar 29: Mneek ho musu sin

Gambar 29: Mneek ho musu sin

Mateos 5:43-48; Lukas 10:25-37

Usif Yesus nanoni' atoin ein he natuin Ee ma nneek in aon-bian ma mansian ii ok-oke' msa'. Hit amsa' ro he tneek hit musun. Neot es, Nai' Yesus nareta' nak, anmui' naan atoin es nnao neu kota es. Ntea raan tnana' onai te, apaikaurt ein anpaikaru. Atoin es neem. Atoin amnemat ia na'ko uuf es kuun. Atoni' re' ia niit atoin mapaikaru naan nbi raan ee ninen. In neem anhaumaak atoin mapaikaru' naan, ma nakniun ee in paap ein, ma n'aum paap ein naan. Rari te, in nasaeb ee neu in bikaes keredai. Rarit, in neik je neu kota es. Onaim in namaik tuaf naan nbi uim rosmen es. In nbaen uim rosmen naan, npaek in roit kuun, he nati' rosmen ee in tuan naan, n'urus atoin mapaikaru' naan rek-reko. Usi' Yesus nanoni' nak hit ro he tturun sekau-sekau re' anbi suust ii in nanan, kaisa' tkius in na'ko uuf mee, ai' pirsait mee.

Gambar 30: Usif Yesus anmui’ kuasat ma’tani’

Gambar 30: Usif Yesus anmui’ kuasat ma’tani’

Haef ein sin reta' [Kisah] 19:18-20; Sit Pures Bo'is [Mazmur] 115:1-8; 1 Yohanis

Atoin ein re' nbi gambar re' ia, sin neik sin baer fuat ein he nout niis sin. Nahunu te, sin nfua niut re'uf ein. Mes oras ia, sin natuin Nai' Yesus. Atoni' re' natuin Nai' Yesus kaisa' mseor nok niut reu'f ein naan, are' meo re'uf, tpaek niut reu'f ii in nonin. Hit kaisa' tamtausan baer nitun naan, ma kais tatuin sin. Uisneno ma'tani' nneis na'ko nitun naan, ma ma'tani' nneis na'ko niut reu'f ein naan sin A'nakat, es re' nai' Rusifer. Tuaf re' npirsai neu Nai' Yesus ro he nasaitan nain are' saa' re' nfutu' sin. Usi' Yesus bisa npafa' ma npanat kit na'ko baer nitun naan, karu hit taskaa Goe.

Gambar 31: Usif Yesus nriu’ niut aburarut ein oke’

Gambar 31: Usif Yesus nriu’ niut aburarut ein oke’

Markus 5:1-20; Yakobis 4:7

Neot es, anmui' naan tuaf es niut reu'f ein antaam ee ma ankuas atoni' naan in tuan. Atoni' ka bisa nfuut goe fa, maski nekin korenet, natuin nitun re' naan ma'tain besen. Mes Nai' Yesus anriu' napoitan niut reu'f ein naan na'ko tuaf re' naan. Rarit sin natuin In aprenat. Rari te, Nai' Yesus nafetin tuaf naan, onaim niut reu'f ein naan ka nmu'i ntein ein fa kuasa neu tuaf naan. Onaim, atoni' naan annao natoon neu in nonot asar sin, ma in parteing guin oke', saa' re' Nai' Yesus anmoo' je neu in tuan. Nai' Yesus anriu' nain are' kanan niut re'uf ein na'ko tuaf namfau. Naa, Nai' Yesus anriu' niut re'uf ain naan. Onaim, hit tahiin tak, niut reu'f ein nok sin a'naakt ee, ro he natuin Nai' Yesus In aprenat. Of oni' ho mfain atoin Kristen, mes anmui' niut re'uf re' noek ko. Mumnau, karu ho mpirsai mrair Usif Yesus, ho mfain Usif Yesus In inin. Niut reu'f ein ka nmui' fa haak neu ko ntein. Mraban nitun re' naan, mtoit Usif Yesus he mpaek In kuasat he nriu' niis niut reu'f ein naan. Mtoit apirsait-apirsait sin he n'onen bu'-bua' nok ko. Karu hit arkit atmoe' tatuin Usif Yesus In aprenat, In kuasat naan anpanat kit. On nana te, niut reu'f ein sin kuasat ka nabei' kit fa.

Gambar 32: Rasin re’ he nsoba’ kit

Gambar 32: Rasin re’ he nsoba’ kit

Mateos 6:24; 1 Timotius 6:6-10; 1 Korintus 10:13-14

Niut reu'f ein sin A'nakat nsob-soba' Uisneno In aanh ein. Sin nromin he hit kaisa' tneen ma tatuin Usif Yesus antein. Sin nfuir kit neik baer ii huma'-huma', nahuum on re' baer pake, mniun tua-mafu, narkoba, roit re' tapein je nok raan re'uf, tsinmakan a'toko prenat, uab ma moe kake, makaket. Sin nfuir kit he nputa'-kri'u nain kit, he hit tatenab tak baer ein re' naan re' bisa neik kit neu marine. Mes sin naan, apoit ee uun! Sin he napoi kit he hit tasaitan tain Uisneno. Onaim, hit ro he 'toit ma'tani' he Uisneno nturun kit, he hit bisa traban niut reu'f ein sin fuir ma kopo' naan. Mpirsai neu Usif Yesus ma mutuin ah Ee.

Gambar 33: Karu hit tmoe’ sanat

Gambar 33: Karu hit tmoe’ sanat

Rukas 15:11-32; 1 Yohanis 1:7-9

Karu atoin apirsait ii anmoe' sanat, in rana' poo ji on mee? Neot es, Nai' Yesus nareta' on nai: Anmui' naan atoin muinf es, nnao nasaitan in nonot asar, in umi ma ropo, in kuan ma bare. In nnao na'roo neu pah es anteni', ma nmoe' rais re'uf namfau. In nmoe' rais amreu't ii mfau re'uf. In makaek, tar antea in narair nain roit ein re' in aamf ee anfeen ee sin. Ka 'roo fa te, pah re' naan napein rais amnahas ma'tani'. Atoin munif naan in roit ein oek ein. In amsa' namnaha nmaet. Rari te, in namnau nak in nmo'e nrair sanat neu Uisneno ma in amaf. In nmee'j on batur-batuur. Rari te, in nfain neu in amaf. Maski atoin munif naan anmoe' saant ii mfaun, mes in aamf ee nneek ee. Rari te, in aamf ee antoup goe nok neek marine. In nnikan nain in aanh ee in saant ein oke'. Onaim, karu hit tmoe' sanat, hit ro he tmee'j ok, ma atmanaku' hit saant ein naan. Rari te, hit tasaitan tain are' saant ein naan. In of antoup kit on re' 'naef nbi reta' fe'ena. Nai' Yesus natoon niit nak, "Karu anmui' tuaf es ah anmee'j on ma nmanaku', ma nasaitan in saant ein naan oke', ma nabanit in tuan ii he natuin Uisneno, Abitan Sonaf neng goe tunan anmarinan ok-oke'."

Gambar 34: Karu tapein menas

Gambar 34: Karu tapein menas

Filipi 4:6-7; Yakobis 5:13-16

Karu Usineno in aanh ein namenan, hit he tmoe' on mee? Nahunu te, hit ro he t'onen ma atpirsai tak Uisneno nroim he nmoe' saa' es re' nareok neu kit. Uisneno bisa nareko' amenat, karu tatuin In romin. Uisneno anneek kit, ma In es re' an'atoor saa' re' hit ta'euk ma tateef tokan. Nai' Yesus In Smana Kniun ee nok kit, anbi susat, menas, he nturun ma nbaab kit he hit nekak ia nteinina'.

Gambar 35: Karu anmui’ amates

Gambar 35: Karu anmui’ amates

1 Tesalonika 4:13-18; Ibrani 2:14-15; Nai' Yohanis niit Pah Fe'u amnenat [Wahyu]

Anbi gambar re' ia, hit tiit atoin ein ansuub amates natuin sin atoran harat. Neng goes ate, hit arkit esa-esa te, ro he tmaet. Onaim hit mate te, hit tfain saa'? Uisneno In Uab ein es re' Suur Akninu', nak karu anmui' apirsait neu Usif Yesus anmaet, in a'smanan naan ansae nabu-buan nok Nai' Yesus neu sonaf neno-tunan. Anbi gambar ia, apirsait re' anmaet naan in asar ma parteing guin ansusan, sin neek ein namenan, mes sin ka nma'nuran fa. Hit kaisa' tamtausan mates. Uisneno anneek kit, In imsa' nfee kit saok sanat na'ko hit saant ein oke'. Hit imsa' ka tapeni 'tein fa in hukun. Mes atoni' re' ka npirsai fa Usif Yesus, ka bisa nafnekan fa sin tua kein he nmonin nok Uisneno nbi sonaf neno-tunan. Kaisa' mufnekan main! Suur Akniun ii nak ka apirsait neu Usif Yesus of anriu' sin ma nataam sin neu baer suust am nana'renat, neu ai maputu' ma marara' re' ka nmaet nitaf. Naa, onaim au he utaan ki, onai: Karu ntea oras ho mmaet, ho mupein bare nbi mee? Mnao mmoin piut mok Uisneno? Ai', nriu' ko ma neik ko neu ai maputu' ma marara' re' ka nmaet nitaf?

Gambar 36: Kristus In aon

Gambar 36: Kristus In aon

1 Korintus 12:12-31; Efesus 4:11-16; 1 Petrus 4:10

Hit aok re' ia, et haef, nimaf, 'nakaf, nok nain in knuut keni, es-es ate nok nain in sarit. Maat ki he bisa niit. Ruik ii he bisa nneen. Feef ki he bisa na'uab ma naah. Are' hit aok ii es-es ate anmeup neik ini, mes nfain aof mese'. Karu knuut es nameen ai' napapa', aof es oke' nain nsusan. Uisneno natoon nak, apirsait neu Nai' Yesus nahuum on re' atoin es in aon. Hit 'teek ee tak, 'Krei'. Usif Yesus nfain 'Nakaf neu aof naan, Uisneno anbait mepu neu are' apirsait ein. Mepu re' Uisneno nbait sin re' naan es re': bian natoon Uisneno In Rais Reko, bian ansiin, bian nfanin atuta', bian antoupun tamu, bian nanoin ein, bian anfeen fua'turu'. Karu nmui' naan tua-apirsait es, ka nmoe' natuin fa in mepu nana te, Krei je in aon ee nsuus. Are' apirsait ii ro he nmepun ok-oke' nok reko, ma anmatut-haen ein es nok es, ma nfee rais hormaat neu Uisneno.

Gambar 37: Tabua he ta’ruri’ ma ta’bees neu Uisneno

Gambar 37: Tabua he ta’ruri’ ma ta’bees neu Uisneno

Ibrani 10:24-25; 1 Korintus 11:23-34; Kolose 3:15-17

Atoin apirsait neu Usi' Yesus ro he nabuan he na'ruir ein ma na'besan neu Uisneno. Reko nneis karu sin nabuan on re' biasa sin nabu-buan. Karu sin nabuan te, sin nanoin ein na'ko Uisneno In Kabin ma Prenat, sin n'oen ein bu'-bua', ma sin amsa' nasaeb pures bo'is neu Uisneno. Reko nteni' karu sin nekin Uisneno sin fua'turu' he sin nasaah Uisneno In mepu. Usi' Yesus nanoni' msa', he atoin ein re' natuin Ee namnau In a'maten. Anbi gambar re' ia, hi miit apirsait ein anbukae nabu-buan. Utunu' re' sin nbukaa je re' naan, namnaub sin oras Nai' Yesus In aon naan nakfiir Ee ma anmaet anbi hau nehe. Re' sin ning goe re' naan, namnaub sin re' In naa' re' nat'oop he nfee kit rana 'honis na'ko hit sanat-sanat sin. Hit imsa' ro he tabua ma ta'mees ok, he tamnau Nai' Yesus In a'maten teik cara re' naan, tar antea In nkoenon afain neem.

Gambar 38: Usi’ Yesus he nkoenon anfain neem

Gambar 38: Usi’ Yesus he nkoenon anfain neem

Yohanis 14:1-3; 1 Tesalonika 4:13 - 5:4

Of neot es, Usi' Yesus nroim he nkoenon anfain neem na'ko sonaf neno-tunan ntaam neu pah-pinan, on re' In nba'an nani. Of In neem nok askeken, oras atoni' ka natenab naneef. Rari te, atoin apirsait ein of anpoin na'ko nopu-nopu ma nateef Nai' Yesus. Apirsait re' anmonin fe', sin amsa' nabua nok sin, ma nateef Nai' Yesus anbi neng goe tnanan. Rari te, apirsait ein nmoin piut-piut nok Nai' Yesus nbi sonaf neno-tunan. Mes ka apirsait ein neu Nai' Yesus ka nmoin nok fa Nai' Yesus on naan. Uisneno nok apirsait ein nasaitan sin on na haa re' naan. Of Uisneno nfeen sin hukun he sin nha'muuk jok piut. Hit ka tahiin fa in oras Usi' Yesus ankoenon anfain neem. Etun hit ro he tabarab piut, ma tpao. Onaim, au he utaan: Karu Usi' Yesus ankoenon neem neno ia, ho murabab, a'fee'?

Gambar 39: Mmoe’ sufa’ ma fua reko

Gambar 39: Mmoe’ sufa’ ma fua reko

Mateos 7:15-20; Garatia 5:22-23; Yohanis 15:1-8

Hau re' abit gambar ia, in fuan ein mfau rutu! Karu hit tatuin Nai' Yesus, Uisneno In Smana Kniun Ee anmeup nbi hit tuak ii, rari te hit tasuuf ma tafua. Suur Akniun ii natoon nak, sufaf ma fuaf re' Smana Kniun Ee nmoo' je naan, es re': tmoni te atmaneek, tmui' neek marine, tnabeen tahiin rais ao-miin am rame', tmui' sabaar, tmoe' rais reko, neek ma'nura', tatuin piut, taran, kaisa' tpaek neek fatu, ma 'tahan tahiin hit tuak. Neot es ate, Nai' Yesus nak, "Au on re' haa goan in tean. Hi mfain on re' in taen. Karu hi mi'kii' mbi Kau, ma mkonan Kau he Au 'mafuut ok ki, of hi misuuf ma mifua mfau re'uf." Mes hit tahiin tak taef ein re' anmeton, ka nasufan ma ka nafuan fa. Reen tuaf ee of n'oten porin sin, rari te nout sin. Nai' Yesus anroim he hi tatuin Ee, he tasuuf ma tafua mfaun. Karu tmoe' on nana te, hit tfee rais hormaat neu Uisneno ma atmaturun ma atmabaab es nok es.

Gambar 40: Tatoon Nai’ Yesus neu tuaf bian

Gambar 40: Tatoon Nai’ Yesus neu tuaf bian

Mateos 28:18-20; Haef ein sin Reta' 1:8

Usi' Yesus nanoni' nak, atoni' re' natuin Ee ro he natoon Nai' Yesus neu tuaf bian. Natoon nak, sekau re' anpirsai neu Nai' Yesus of sin napenin rasi 'honis na'ko sin saant ein naan, na'ko Uisneno In hukun, ma na'ko rasi 'maten. Karu ho mfain apirsait neu Usi' Yesus, ho ro he mturun tuaf bian, he sin amsa' nahiin narek-reko' Uisneno In Rana 'Honis Arekot. Uisneno In Smana Kninu' of naheran ho nekam, he ho bisa mutoon Nai' Yesus neu tuaf bian. Karu mromi te, mpaek re' suur gambar re' ia, he mutonan tuaf bian. Meik rasi nana te, of tuaf bian nahinin are' kanan rais reko Uisneno nok In Anah, Yesus Kristus, es re' anfee kit rasi 'honis ma ao-mina'.

On re' naan! Saloom!

Related information

Free downloads - Here you can find all the main GRN message scripts in several languages, plus pictures and other related materials, available for download.

"Good News" audio-visual - This audio visual set has 40 pictures to present an overview of the Bible from Creation to Christ. It covers the salvation message and basic teaching on the Christian life. It is available in more than 1300 languages.

How to use GRN Audio visual resources - 1: Sharing the Gospel made easy - This article gives an introduction to some of the many different ways the GRN audio visual resources can be used in ministry.

How to use GRN Audio visual resources - 2: Going Deeper - This article gives further explanation of how people learn from the stories, and why the stories do not have a lot of commentary.

The GRN Audio Library - Evangelistic and basic Bible teaching material appropriate to the people's need and culture in a variety of styles and formats.

Copyright and Licensing - GRN shares it's audio, video and written scripts under Creative Commons

Creating DVDs using the GRN Slide show Videos - How to burn DVDs for specific people groups you are trying to reach

Choosing the right audio or video format - What audio and video file formats are available from GRN, and which one is best to use?